១. វិភង្គវារោ

ហេតុបច្ចយោ

៤៩. សហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ ហេតុបច្ចយា – សហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

សហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ ហេតុបច្ចយា – សហេតុកេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

សហេតុកំ ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ ហេតុបច្ចយា – សហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

៥០. អហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច ចិត្តសមុដ្ឋានំ រូបំ; ឯកំ មហាភូតំ បដិច្ច តយោ មហាភូតា…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

អហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច សម្បយុត្តកា ខន្ធា; បដិសន្ធិក្ខណេ វត្ថុំ បដិច្ច សហេតុកា ខន្ធា. (២)

អហេតុកំ ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ វត្ថុំ បដិច្ច សហេតុកា ខន្ធា, មហាភូតេ បដិច្ច កដត្តារូបំ. (៣)

៥១. សហេតុកញ្ច អហេតុកញ្ច ធម្មំ បដិច្ច សហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ សហេតុកំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ…. (១)

សហេតុកញ្ច អហេតុកញ្ច ធម្មំ បដិច្ច អហេតុកោ ធម្មោ ឧប្បជ្ជតិ ហេតុបច្ចយា – សហេតុកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ, វិចិកិច្ឆាសហគតេ ឧទ្ធច្ចសហគតេ ខន្ធេ ច មោហញ្ច បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

សហេតុកញ្ច អហេតុកញ្ច ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ ហេតុបច្ចយា – វិចិកិច្ឆាសហគតំ ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ សហេតុកំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ… សហេតុកេ ខន្ធេ ច មហាភូតេ ច បដិច្ច កដត្តារូបំ. (៣)

អារម្មណបច្ចយោ

៥២. សហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ អារម្មណបច្ចយា – សហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

សហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (២)

សហេតុកំ ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ អារម្មណបច្ចយា – វិចិកិច្ឆាសហគតំ ឧទ្ធច្ចសហគតំ ឯកំ ខន្ធំ បដិច្ច តយោ ខន្ធា មោហោ ច…បេ… ទ្វេ ខន្ធេ…បេ…. (៣)

៥៣. អហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ អារម្មណបច្ចយា – អហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ វត្ថុំ បដិច្ច អហេតុកា ខន្ធា. (១)

អហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច សម្បយុត្តកា ខន្ធា; បដិសន្ធិក្ខណេ វត្ថុំ បដិច្ច សហេតុកា ខន្ធា. (២)

សហេតុកញ្ច អហេតុកញ្ច ធម្មំ បដិច្ច សហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតំ ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ សហេតុកំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ…. (១)

អធិបតិបច្ចយោ

៥៤. សហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ អធិបតិបច្ចយា – សហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

សហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ អធិបតិបច្ចយា – សហេតុកេ ខន្ធេ បដិច្ច ចិត្តសមុដ្ឋានំ រូបំ. (២)

សហេតុកំ ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ អធិបតិបច្ចយា – សហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៥៥. អហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ អធិបតិបច្ចយា – ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ ឧបាទារូបំ. (១)

សហេតុកញ្ច អហេតុកញ្ច ធម្មំ បដិច្ច អហេតុកោ ធម្មោ ឧប្បជ្ជតិ អធិបតិបច្ចយា – សហេតុកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

អនន្តរបច្ចយាទិ

៥៦. សហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ អនន្តរបច្ចយា… សមនន្តរបច្ចយា… សហជាតបច្ចយា – សហេតុកំ ឯកំ ខន្ធំ បដិច្ច តយោ ខន្ធា…បេ… បដិសន្ធិក្ខណេ…បេ…. (១)

សហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ សហជាតបច្ចយា – សហេតុកេ ខន្ធេ បដិច្ច ចិត្តសមុដ្ឋានំ រូបំ, វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ ចិត្តសមុដ្ឋានញ្ច រូបំ; បដិសន្ធិក្ខណេ…បេ…. (២)

សហេតុកំ ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ សហជាតបច្ចយា – សហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ…បេ… វិចិកិច្ឆាសហគតំ ឧទ្ធច្ចសហគតំ ឯកំ ខន្ធំ បដិច្ច តយោ ខន្ធា មោហោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

៥៧. អហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ សហជាតបច្ចយា – អហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វិចិកិច្ឆាសហគតំ ឧទ្ធច្ចសហគតំ មោហំ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ…បេ…. (១)

អហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ សហជាតបច្ចយា (ឥមេ បញ្ច បញ្ហា ហេតុសទិសា, និន្នានំ). (២)

អញ្ញមញ្ញបច្ចយោ

៥៨. សហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ អញ្ញមញ្ញបច្ចយា – សហេតុកំ ឯកំ ខន្ធំ បដិច្ច តយោ ខន្ធា…បេ… បដិសន្ធិក្ខណេ…បេ…. (១)

សហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ អញ្ញមញ្ញបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ; បដិសន្ធិក្ខណេ សហេតុកេ ខន្ធេ បដិច្ច វត្ថុ. (២)

សហេតុកំ ធម្មំ បដិច្ច សហេតុកោ ច អហេតុកោ ច ធម្មា ឧប្បជ្ជន្តិ អញ្ញមញ្ញបច្ចយា – វិចិកិច្ឆាសហគតំ ឧទ្ធច្ចសហគតំ ឯកំ ខន្ធំ បដិច្ច តយោ ខន្ធា មោហោ ច…បេ… ទ្វេ ខន្ធេ…បេ… បដិសន្ធិក្ខណេ សហេតុកំ ឯកំ ខន្ធំ បដិច្ច តយោ ខន្ធា វត្ថុ ច…បេ… ទ្វេ ខន្ធេ…បេ…. (៣)

៥៩. អហេតុកំ ធម្មំ បដិច្ច អហេតុកោ ធម្មោ ឧប្បជ្ជតិ អញ្ញមញ្ញបច្ចយា – អហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ អហេតុកំ ឯកំ ខន្ធំ បដិច្ច តយោ ខន្ធា វត្ថុ ច…បេ… ទ្វេ ខន្ធេ…បេ… (សំខិត្តំ, យាវ អសញ្ញសត្តា). (១)

អហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ អញ្ញមញ្ញបច្ចយា – វិចិកិច្ឆាសហគតំ ឧទ្ធច្ចសហគតំ មោហំ បដិច្ច សម្បយុត្តកា ខន្ធា; បដិសន្ធិក្ខណេ វត្ថុំ បដិច្ច សហេតុកា ខន្ធា. (២)

សហេតុកញ្ច អហេតុកញ្ច ធម្មំ បដិច្ច សហេតុកោ ធម្មោ ឧប្បជ្ជតិ អញ្ញមញ្ញបច្ចយា – វិចិកិច្ឆាសហគតំ ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ សហេតុកំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ…. (១)

និស្សយបច្ចយាទិ

៦០. សហេតុកំ ធម្មំ បដិច្ច សហេតុកោ ធម្មោ ឧប្បជ្ជតិ និស្សយបច្ចយា… ឧបនិស្សយបច្ចយា… បុរេជាតបច្ចយា… អាសេវនបច្ចយា… កម្មបច្ចយា… វិបាកបច្ចយា… អាហារបច្ចយា… ឥន្ទ្រិយបច្ចយា… ឈានបច្ចយា… មគ្គបច្ចយា… (ឈានម្បិ មគ្គម្បិ សហជាតបច្ចយសទិសា, ពាហិរា មហាភូតា នត្ថិ ) សម្បយុត្តបច្ចយា… វិប្បយុត្តបច្ចយា… អត្ថិបច្ចយា… នត្ថិបច្ចយា… វិគតបច្ចយា… អវិគតបច្ចយា.