១. វិភង្គវារោ

ហេតុបច្ចយោ

៣៦. មិច្ឆត្តនិយតោ ធម្មោ មិច្ឆត្តនិយតស្ស ធម្មស្ស ហេតុបច្ចយេន បច្ចយោ – មិច្ឆត្តនិយតា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

មិច្ឆត្តនិយតោ ធម្មោ អនិយតស្ស ធម្មស្ស ហេតុបច្ចយេន បច្ចយោ – មិច្ឆត្តនិយតា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (២)

មិច្ឆត្តនិយតោ ធម្មោ មិច្ឆត្តនិយតស្ស ច អនិយតស្ស ច ធម្មស្ស ហេតុបច្ចយេន បច្ចយោ – មិច្ឆត្តនិយតា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

សម្មត្តនិយតោ ធម្មោ សម្មត្តនិយតស្ស ធម្មស្ស ហេតុបច្ចយេន បច្ចយោ… តីណិ.

អនិយតោ ធម្មោ អនិយតស្ស ធម្មស្ស ហេតុបច្ចយេន បច្ចយោ – អនិយតា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. បដិសន្ធិក្ខណេ…បេ…. (១)

អារម្មណបច្ចយោ

៣៧. មិច្ឆត្តនិយតោ ធម្មោ អនិយតស្ស ធម្មស្ស អារម្មណបច្ចយេន បច្ចយោ – អរិយា មិច្ឆត្តនិយតេ បហីនេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. មិច្ឆត្តនិយតេ ខន្ធេ អនិច្ចតោ…បេ… វិបស្សន្តិ. ចេតោបរិយញាណេន មិច្ឆត្តនិយតចិត្តសមង្គិស្ស ចិត្តំ ជានន្តិ. មិច្ឆត្តនិយតា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស អាវជ្ជនាយ អារម្មណបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ បច្ចវេក្ខន្តិ. ចេតោបរិយញាណេន សម្មត្តនិយតចិត្តសមង្គិស្ស ចិត្តំ ជានន្តិ. សម្មត្តនិយតា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

៣៨. អនិយតោ ធម្មោ អនិយតស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ, អរិយា ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, ផលស្ស, អាវជ្ជនាយ អារម្មណបច្ចយេន បច្ចយោ. អរិយា អនិយតេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ. បុព្ពេ សមុទាចិណ្ណេ កិលេសេ ជានន្តិ. ចក្ខុំ…បេ… វត្ថុំ… អនិយតេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ, តំ អារព្ភ អនិយតោ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន អនិយតចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស អារម្មណបច្ចយេន បច្ចយោ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ. អនិយតា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អនិយតោ ធម្មោ មិច្ឆត្តនិយតស្ស ធម្មស្ស អារម្មណបច្ចយេន បច្ចយោ – រូបជីវិតិន្ទ្រិយំ មាតុឃាតិកម្មស្ស… បិតុឃាតិកម្មស្ស… អរហន្តឃាតិកម្មស្ស… រុហិរុប្បាទកម្មស្ស អារម្មណបច្ចយេន បច្ចយោ. យំ វត្ថុំ បរាមសន្តស្ស មិច្ឆត្តនិយតា ខន្ធា ឧប្បជ្ជន្តិ, តំ វត្ថុ មិច្ឆត្តនិយតានំ ខន្ធានំ អារម្មណបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស អារម្មណបច្ចយេន បច្ចយោ – និព្ពានំ មគ្គស្ស អារម្មណបច្ចយេន បច្ចយោ. (៣)

អធិបតិបច្ចយោ

៣៩. មិច្ឆត្តនិយតោ ធម្មោ មិច្ឆត្តនិយតស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មិច្ឆត្តនិយតាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

មិច្ឆត្តនិយតោ ធម្មោ អនិយតស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មិច្ឆត្តនិយតាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

មិច្ឆត្តនិយតោ ធម្មោ មិច្ឆត្តនិយតស្ស ច អនិយតស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មិច្ឆត្តនិយតាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៤០. សម្មត្តនិយតោ ធម្មោ សម្មត្តនិយតស្ស ធម្មស្ស អធិបតិបច្ចយេន បច្ចយោ. សហជាតាធិបតិ – សម្មត្តនិយតាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – សម្មត្តនិយតាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

សម្មត្តនិយតោ ធម្មោ សម្មត្តនិយតស្ស ច អនិយតស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – សម្មត្តនិយតាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៤១. អនិយតោ ធម្មោ អនិយតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ សហជាតាធិបតិ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា…បេ… អរិយា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, ផលស្ស អធិបតិបច្ចយេន បច្ចយោ. ចក្ខុំ…បេ… វត្ថុំ…បេ… អនិយតេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា អនិយតោ រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – អនិយតាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អនិយតោ ធម្មោ សម្មត្តនិយតស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – និព្ពានំ មគ្គស្ស អធិបតិបច្ចយេន បច្ចយោ. (២)

អនន្តរបច្ចយោ

៤២. មិច្ឆត្តនិយតោ ធម្មោ អនិយតស្ស ធម្មស្ស អនន្តរបច្ចយេន បច្ចយោ – មិច្ឆត្តនិយតា ខន្ធា វុដ្ឋានស្ស អនន្តរបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស អនន្តរបច្ចយេន បច្ចយោ – មគ្គោ ផលស្ស អនន្តរបច្ចយេន បច្ចយោ. (១)

អនិយតោ ធម្មោ អនិយតស្ស ធម្មស្ស អនន្តរបច្ចយេន បច្ចយោ – បុរិមា បុរិមា អនិយតា ខន្ធា បច្ឆិមានំ បច្ឆិមានំ អនិយតានំ ខន្ធានំ អនន្តរបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… ផលំ ផលស្ស… អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនំ ផលសមាបត្តិយា អនន្តរបច្ចយេន បច្ចយោ. (១)

៤៣. អនិយតោ ធម្មោ មិច្ឆត្តនិយតស្ស ធម្មស្ស អនន្តរបច្ចយេន បច្ចយោ – អនិយតំ ទោមនស្សំ មិច្ឆត្តនិយតស្ស ទោមនស្សស្ស អនន្តរបច្ចយេន បច្ចយោ. អនិយតមិច្ឆាទិដ្ឋិ និយតមិច្ឆាទិដ្ឋិយា អនន្តរបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស អនន្តរបច្ចយេន បច្ចយោ – គោត្រភុ មគ្គស្ស… វោទានំ មគ្គស្ស អនន្តរបច្ចយេន បច្ចយោ. (៣)

សមនន្តរបច្ចយាទិ

៤៤. មិច្ឆត្តនិយតោ ធម្មោ អនិយតស្ស ធម្មស្ស សមនន្តរបច្ចយេន បច្ចយោ (អនន្តរសទិសំ)… សហជាតបច្ចយេន បច្ចយោ (បដិច្ចវារសទិសំ, នវ បញ្ហា)… អញ្ញមញ្ញបច្ចយេន បច្ចយោ (បដិច្ចវារសទិសំ, តិស្សោ បញ្ហា)… និស្សយបច្ចយេន បច្ចយោ (កុសលត្តិកសទិសា, តេរស បញ្ហា).

ឧបនិស្សយបច្ចយោ

៤៥. មិច្ឆត្តនិយតោ ធម្មោ មិច្ឆត្តនិយតស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – មាតុឃាតិកម្មំ មាតុឃាតិកម្មស្ស ឧបនិស្សយបច្ចយេន បច្ចយោ. មាតុឃាតិកម្មំ…បេ… បិតុឃាតិកម្មំ…បេ… អរហន្តឃាតិកម្មំ…បេ… រុហិរុប្បាទកម្មំ…បេ… សង្ឃភេទកម្មំ…បេ… និយតមិច្ឆាទិដ្ឋិយា ឧបនិស្សយបច្ចយេន បច្ចយោ (ចក្កំ កាតព្ពំ). និយតមិច្ឆាទិដ្ឋិ និយតមិច្ឆាទិដ្ឋិយា ឧបនិស្សយបច្ចយេន បច្ចយោ. និយតមិច្ឆាទិដ្ឋិ មាតុឃាតិកម្មស្ស…បេ… សង្ឃភេទកម្មស្ស ឧបនិស្សយបច្ចយេន បច្ចយោ. (១)

មិច្ឆត្តនិយតោ ធម្មោ អនិយតស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – មាតរំ ជីវិតា វោរោបេត្វា តស្ស បដិឃាតត្ថាយ ទានំ ទេតិ, សីលំ សមាទិយតិ, ឧបោសថកម្មំ ករោតិ. បិតរំ ជីវិតា វោរោបេត្វា…បេ… អរហន្តំ ជីវិតា វោរោបេត្វា…បេ… ទុដ្ឋេន ចិត្តេន តថាគតស្ស លោហិតំ ឧប្បាទេត្វា…បេ… សង្ឃំ ភិន្ទិត្វា តស្ស បដិឃាតត្ថាយ ទានំ ទេតិ, សីលំ សមាទិយតិ, ឧបោសថកម្មំ ករោតិ. (២)

៤៦. សម្មត្តនិយតោ ធម្មោ សម្មត្តនិយតស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស ឧបនិស្សយបច្ចយេន បច្ចយោ…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អរិយា មគ្គំ ឧបនិស្សាយ អនុប្បន្នំ សមាបត្តិំ ឧប្បាទេន្តិ, ឧប្បន្នំ សមាបជ្ជន្តិ, សង្ខារេ អនិច្ចតោ ទុក្ខតោ អនត្តតោ វិបស្សន្តិ. មគ្គោ អរិយានំ អត្ថប្បដិសម្ភិទាយ…បេ… ឋានាឋានកោសល្លស្ស ឧបនិស្សយបច្ចយេន បច្ចយោ. មគ្គោ ផលសមាបត្តិយា ឧបនិស្សយបច្ចយេន បច្ចយោ. (២)

៤៧. អនិយតោ ធម្មោ អនិយតស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អនិយតំ សទ្ធំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ…បេ… ឈានំ ឧប្បាទេតិ, វិបស្សនំ… អភិញ្ញំ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. អនិយតំ សីលំ… សុតំ… ចាគំ… បញ្ញំ… រាគំ…បេ… បត្ថនំ… កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ ឧបនិស្សាយ ទានំ ទេតិ…បេ… និគមឃាតំ ករោតិ. អនិយតា សទ្ធា…បេ… បញ្ញា, រាគោ…បេ… សេនាសនំ អនិយតាយ សទ្ធាយ…បេ… កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. បឋមស្ស ឈានស្ស បរិកម្មំ តស្សេវ…បេ… នេវសញ្ញានាសញ្ញាយតនស្ស បរិកម្មំ តស្សេវ…បេ… បឋមំ ឈានំ ទុតិយស្ស ឈានស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… បាណាតិបាតោ បាណាតិបាតស្ស ឧបនិស្សយបច្ចយេន បច្ចយោ (ចក្កំ កាតព្ពំ). (១)

អនិយតោ ធម្មោ មិច្ឆត្តនិយតស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អនិយតំ រាគំ ឧបនិស្សាយ មាតរំ ជីវិតា វោរោបេតិ…បេ… សង្ឃំ ភិន្ទតិ. អនិយតំ ទោសំ…បេ… បត្ថនំ… កាយិកំ សុខំ…បេ… សេនាសនំ ឧបនិស្សាយ មាតរំ ជីវិតា វោរោបេតិ…បេ… សង្ឃំ ភិន្ទតិ. អនិយតោ រាគោ…បេ… សេនាសនំ មាតុឃាតិកម្មស្ស… បិតុឃាតិកម្មស្ស… អរហន្តឃាតិកម្មស្ស… រុហិរុប្បាទកម្មស្ស… សង្ឃភេទកម្មស្ស… និយតមិច្ឆាទិដ្ឋិយា ឧបនិស្សយបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បឋមស្ស មគ្គស្ស បរិកម្មំ បឋមស្ស មគ្គស្ស…បេ… ចតុត្ថស្ស មគ្គស្ស បរិកម្មំ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៣)

បុរេជាតបច្ចយោ

៤៨. អនិយតោ ធម្មោ អនិយតស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ, អស្សាទេតិ អភិនន្ទតិ, តំ អារព្ភ អនិយតោ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ អនិយតានំ ខន្ធានំ បុរេជាតបច្ចយេន បច្ចយោ. (១)

អនិយតោ ធម្មោ មិច្ឆត្តនិយតស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – រូបជីវិតិន្ទ្រិយំ មាតុឃាតិកម្មស្ស… បិតុឃាតិកម្មស្ស… អរហន្តឃាតិកម្មស្ស… រុហិរុប្បាទកម្មស្ស បុរេជាតបច្ចយេន បច្ចយោ. វត្ថុបុរេជាតំ – វត្ថុ មិច្ឆត្តនិយតានំ ខន្ធានំ បុរេជាតបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស បុរេជាតបច្ចយេន បច្ចយោ. វត្ថុបុរេជាតំ – វត្ថុ សម្មត្តនិយតានំ ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

៤៩. មិច្ឆត្តនិយតោ ធម្មោ អនិយតស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា មិច្ឆត្តនិយតា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស បច្ឆាជាតបច្ចយេន បច្ចយោ. បច្ឆាជាតា សម្មត្តនិយតា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អនិយតោ ធម្មោ អនិយតស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អនិយតា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៥០. អនិយតោ ធម្មោ អនិយតស្ស ធម្មស្ស អាសេវនបច្ចយេន បច្ចយោ – បុរិមា បុរិមា អនិយតា ខន្ធា បច្ឆិមានំ បច្ឆិមានំ អនិយតានំ ខន្ធានំ អាសេវនបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស អាសេវនបច្ចយេន បច្ចយោ. (១)

អនិយតោ ធម្មោ មិច្ឆត្តនិយតស្ស ធម្មស្ស អាសេវនបច្ចយេន បច្ចយោ – អនិយតំ ទោមនស្សំ មិច្ឆត្តនិយតស្ស ទោមនស្សស្ស អាសេវនបច្ចយេន បច្ចយោ. អនិយតមិច្ឆាទិដ្ឋិ និយតមិច្ឆាទិដ្ឋិយា អាសេវនបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស អាសេវនបច្ចយេន បច្ចយោ – គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (៣)

កម្មបច្ចយោ

៥១. មិច្ឆត្តនិយតោ ធម្មោ មិច្ឆត្តនិយតស្ស ធម្មស្ស កម្មបច្ចយេន បច្ចយោ – មិច្ឆត្តនិយតា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

មិច្ឆត្តនិយតោ ធម្មោ អនិយតស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – មិច្ឆត្តនិយតា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – មិច្ឆត្តនិយតា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (២)

មិច្ឆត្តនិយតោ ធម្មោ មិច្ឆត្តនិយតស្ស ច អនិយតស្ស ច ធម្មស្ស កម្មបច្ចយេន បច្ចយោ – មិច្ឆត្តនិយតា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

៥២. សម្មត្តនិយតោ ធម្មោ សម្មត្តនិយតស្ស ធម្មស្ស កម្មបច្ចយេន បច្ចយោ – សម្មត្តនិយតា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – សម្មត្តនិយតា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – សម្មត្តនិយតា ចេតនា វិបាកានំ ខន្ធានំ កម្មបច្ចយេន បច្ចយោ. (២)

សម្មត្តនិយតោ ធម្មោ សម្មត្តនិយតស្ស ច អនិយតស្ស ច ធម្មស្ស កម្មបច្ចយេន បច្ចយោ – សម្មត្តនិយតា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

អនិយតោ ធម្មោ អនិយតស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អនិយតា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ…បេ…. នានាក្ខណិកា – អនិយតា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

វិបាកបច្ចយោ

៥៣. អនិយតោ ធម្មោ អនិយតស្ស ធម្មស្ស វិបាកបច្ចយេន បច្ចយោ – វិបាកោ អនិយតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ…បេ… បដិសន្ធិក្ខណេ…បេ… ខន្ធា វត្ថុស្ស…បេ….

អាហារបច្ចយាទិ

៥៤. មិច្ឆត្តនិយតោ ធម្មោ មិច្ឆត្តនិយតស្ស ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ.

វិប្បយុត្តបច្ចយោ

៥៥. មិច្ឆត្តនិយតោ ធម្មោ អនិយតស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – មិច្ឆត្តនិយតា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – មិច្ឆត្តនិយតា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

សម្មត្តនិយតោ ធម្មោ អនិយតស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – សម្មត្តនិយតា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – សម្មត្តនិយតា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អនិយតោ ធម្មោ អនិយតស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – អនិយតា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ…បេ… ខន្ធា វត្ថុស្ស វិប្បយុត្តបច្ចយេន បច្ចយោ. វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ អនិយតានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – អនិយតា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អនិយតោ ធម្មោ មិច្ឆត្តនិយតស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ មិច្ឆត្តនិយតានំ ខន្ធានំ វិប្បយុត្តបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ សម្មត្តនិយតានំ ខន្ធានំ វិប្បយុត្តបច្ចយេន បច្ចយោ. (៣)

អត្ថិបច្ចយោ

៥៦. មិច្ឆត្តនិយតោ ធម្មោ មិច្ឆត្តនិយតស្ស ធម្មស្ស អត្ថិបច្ចយេន បច្ចយោ – មិច្ឆត្តនិយតោ ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា ទ្វិន្នំ ខន្ធានំ អត្ថិបច្ចយេន បច្ចយោ. (១)

មិច្ឆត្តនិយតោ ធម្មោ អនិយតស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – មិច្ឆត្តនិយតា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – មិច្ឆត្តនិយតា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

មិច្ឆត្តនិយតោ ធម្មោ មិច្ឆត្តនិយតស្ស ច អនិយតស្ស ច អត្ថិបច្ចយេន បច្ចយោ – មិច្ឆត្តនិយតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ…. (៣)

សម្មត្តនិយតោ ធម្មោ សម្មត្តនិយតស្ស ធម្មស្ស អត្ថិបច្ចយេន បច្ចយោ…បេ… (តិស្សោ បញ្ហា).

អនិយតោ ធម្មោ អនិយតស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – អនិយតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស អត្ថិបច្ចយេន បច្ចយោ. វត្ថុ ខន្ធានំ អត្ថិបច្ចយេន បច្ចយោ. ឯកំ មហាភូតំ…បេ… អសញ្ញសត្តានំ ឯកំ មហាភូតំ…បេ…. បុរេជាតំ – ចក្ខុំ…បេ… វត្ថុំ អនិច្ចតោ ទុក្ខតោ អនត្តតោ វិបស្សតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ អនិយតានំ ខន្ធានំ អត្ថិបច្ចយេន បច្ចយោ. បច្ឆាជាតា – អនិយតា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. កពឡីការោ អាហារោ ឥមស្ស កាយស្ស អត្ថិបច្ចយេន បច្ចយោ. រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

អនិយតោ ធម្មោ មិច្ឆត្តនិយតស្ស ធម្មស្ស អត្ថិបច្ចយេន បច្ចយោ. បុរេជាតំ – រូបជីវិតិន្ទ្រិយំ មាតុឃាតិកម្មស្ស…បេ… រុហិរុប្បាទកម្មស្ស អត្ថិបច្ចយេន បច្ចយោ. វត្ថុ មិច្ឆត្តនិយតានំ ខន្ធានំ អត្ថិបច្ចយេន បច្ចយោ. (២)

អនិយតោ ធម្មោ សម្មត្តនិយតស្ស ធម្មស្ស អត្ថិបច្ចយេន បច្ចយោ. បុរេជាតំ – វត្ថុ សម្មត្តនិយតានំ ខន្ធានំ អត្ថិបច្ចយេន បច្ចយោ. (៣)

៥៧. មិច្ឆត្តនិយតោ ច អនិយតោ ច ធម្មា មិច្ឆត្តនិយតស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – មិច្ឆត្តនិយតោ ឯកោ ខន្ធោ ច វត្ថុ ច តិណ្ណន្នំ ខន្ធានំ…បេ… ទ្វេ ខន្ធា ច…បេ…. (១)

មិច្ឆត្តនិយតោ ច អនិយតោ ច ធម្មា អនិយតស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – មិច្ឆត្តនិយតា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – មិច្ឆត្តនិយតា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – មិច្ឆត្តនិយតា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

សម្មត្តនិយតោ ច អនិយតោ ច ធម្មា សម្មត្តនិយតស្ស ធម្មស្ស អត្ថិបច្ចយេន បច្ចយោ…បេ… (ទ្វេ បញ្ហា មិច្ឆត្តនិយតសទិសា).