១៤. ហីនត្តិកំ

១. បដិច្ចវារោ

១. បច្ចយានុលោមំ

១. វិភង្គវារោ

ហេតុបច្ចយោ

១. ហីនំ ធម្មំ បដិច្ច ហីនោ ធម្មោ ឧប្បជ្ជតិ ហេតុបច្ចយា – ហីនំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

ហីនំ ធម្មំ បដិច្ច មជ្ឈិមោ ធម្មោ ឧប្បជ្ជតិ ហេតុបច្ចយា – ហីនេ ខន្ធេ បដិច្ច ចិត្តសមុដ្ឋានំ រូបំ. (២)

ហីនំ ធម្មំ បដិច្ច ហីនោ ច មជ្ឈិមោ ច ធម្មា ឧប្បជ្ជន្តិ ហេតុបច្ចយា – ហីនំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

២. មជ្ឈិមំ ធម្មំ បដិច្ច មជ្ឈិមោ ធម្មោ ឧប្បជ្ជតិ ហេតុបច្ចយា – មជ្ឈិមំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

៣. បណីតំ ធម្មំ បដិច្ច បណីតោ ធម្មោ ឧប្បជ្ជតិ ហេតុបច្ចយា… តីណិ.

៤. មជ្ឈិមញ្ច បណីតញ្ច ធម្មំ បដិច្ច មជ្ឈិមោ ធម្មោ ឧប្បជ្ជតិ ហេតុបច្ចយា – បណីតេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

៥. ហីនញ្ច មជ្ឈិមញ្ច ធម្មំ បដិច្ច មជ្ឈិមោ ធម្មោ ឧប្បជ្ជតិ ហេតុបច្ចយា – ហីនេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

(ហីនត្តិកំ សំកិលិដ្ឋត្តិកសទិសំ វិត្ថារេតព្ពំ បរិបុណ្ណំ.)

ហីនត្តិកំ និដ្ឋិតំ.