១. វិភង្គវារោ

នហេតុបច្ចយោ

៤. បរិត្តារម្មណំ ធម្មំ បដិច្ច បរិត្តារម្មណោ ធម្មោ ឧប្បជ្ជតិ នហេតុបច្ចយា – អហេតុកំ បរិត្តារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. អហេតុកបដិសន្ធិក្ខណេ បរិត្តារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា, វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

មហគ្គតារម្មណំ ធម្មំ បដិច្ច មហគ្គតារម្មណោ ធម្មោ ឧប្បជ្ជតិ នហេតុបច្ចយា – អហេតុកំ មហគ្គតារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា, វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

អប្បមាណារម្មណំ ធម្មំ បដិច្ច អប្បមាណារម្មណោ ធម្មោ ឧប្បជ្ជតិ នហេតុបច្ចយា – អហេតុកំ អប្បមាណារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)

នអធិបតិបច្ចយោ

៥. បរិត្តារម្មណំ ធម្មំ បដិច្ច បរិត្តារម្មណោ ធម្មោ ឧប្បជ្ជតិ នអធិបតិបច្ចយា – បរិត្តារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. បដិសន្ធិក្ខណេ…បេ…. (១)

មហគ្គតារម្មណំ ធម្មំ បដិច្ច មហគ្គតារម្មណោ ធម្មោ ឧប្បជ្ជតិ នអធិបតិបច្ចយា – មហគ្គតារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. បដិសន្ធិក្ខណេ…បេ…. (១)

អប្បមាណារម្មណំ ធម្មំ បដិច្ច អប្បមាណារម្មណោ ធម្មោ ឧប្បជ្ជតិ នអធិបតិបច្ចយា – អប្បមាណារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)

នបុរេជាតបច្ចយាទិ

៦. បរិត្តារម្មណំ ធម្មំ បដិច្ច បរិត្តារម្មណោ ធម្មោ ឧប្បជ្ជតិ នបុរេជាតបច្ចយា – អរូបេ បរិត្តារម្មណំ ឯកំ ខន្ធំ បដិច្ច តយោ ខន្ធា…បេ… បដិសន្ធិក្ខណេ…បេ…. (១)

មហគ្គតារម្មណំ ធម្មំ បដិច្ច មហគ្គតារម្មណោ ធម្មោ ឧប្បជ្ជតិ នបុរេជាតបច្ចយា – អរូបេ មហគ្គតារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា (មហគ្គតារម្មណេ បដិសន្ធិ នត្ថិ). (១)

អប្បមាណារម្មណំ ធម្មំ បដិច្ច អប្បមាណារម្មណោ ធម្មោ ឧប្បជ្ជតិ នបុរេជាតបច្ចយា – អរូបេ អប្បមាណារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា (នបច្ឆាជាតបច្ចយញ្ច នអាសេវនបច្ចយញ្ច នអធិបតិសទិសំ).

នកម្មបច្ចយោ

៧. បរិត្តារម្មណំ ធម្មំ បដិច្ច បរិត្តារម្មណោ ធម្មោ ឧប្បជ្ជតិ នកម្មបច្ចយា – បរិត្តារម្មណេ ខន្ធេ បដិច្ច បរិត្តារម្មណា ចេតនា. (១)

មហគ្គតារម្មណំ ធម្មំ បដិច្ច មហគ្គតារម្មណោ ធម្មោ ឧប្បជ្ជតិ នកម្មបច្ចយា – មហគ្គតារម្មណេ ខន្ធេ បដិច្ច មហគ្គតារម្មណា ចេតនា. (១)

អប្បមាណារម្មណំ ធម្មំ បដិច្ច អប្បមាណារម្មណោ ធម្មោ ឧប្បជ្ជតិ នកម្មបច្ចយា – អប្បមាណារម្មណេ ខន្ធេ បដិច្ច អប្បមាណារម្មណា ចេតនា. (១)

នវិបាកបច្ចយាទិ

៨. បរិត្តារម្មណំ ធម្មំ បដិច្ច បរិត្តារម្មណោ ធម្មោ ឧប្បជ្ជតិ នវិបាកបច្ចយា (បដិសន្ធិ នត្ថិ)… នឈានបច្ចយា – បញ្ចវិញ្ញាណសហគតំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា…នមគ្គបច្ចយា – អហេតុកំ បរិត្តារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា; អហេតុកបដិសន្ធិក្ខណេ…បេ… ទ្វេ ខន្ធា…បេ….

មហគ្គតារម្មណំ ធម្មំ បដិច្ច មហគ្គតារម្មណោ ធម្មោ ឧប្បជ្ជតិ នមគ្គបច្ចយា – អហេតុកំ មហគ្គតារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)

អប្បមាណារម្មណំ ធម្មំ បដិច្ច អប្បមាណារម្មណោ ធម្មោ ឧប្បជ្ជតិ នមគ្គបច្ចយា – អហេតុកំ អប្បមាណារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)

នវិប្បយុត្តបច្ចយោ

៩. បរិត្តារម្មណំ ធម្មំ បដិច្ច បរិត្តារម្មណោ ធម្មោ ឧប្បជ្ជតិ នវិប្បយុត្តបច្ចយា – អរូបេ បរិត្តារម្មណំ ឯកំ ខន្ធំ បដិច្ច តយោ ខន្ធា…បេ…. (១)

មហគ្គតារម្មណំ ធម្មំ បដិច្ច មហគ្គតារម្មណោ ធម្មោ ឧប្បជ្ជតិ នវិប្បយុត្តបច្ចយា – អរូបេ មហគ្គតារម្មណំ ឯកំ ខន្ធំ បដិច្ច តយោ ខន្ធា…បេ…. (១)

អប្បមាណារម្មណំ ធម្មំ បដិច្ច អប្បមាណារម្មណោ ធម្មោ ឧប្បជ្ជតិ នវិប្បយុត្តបច្ចយា – អរូបេ អប្បមាណារម្មណំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)