១. វិភង្គវារោ

ហេតុបច្ចយោ

២៣៤. កុសលំ ធម្មំ សហជាតោ កុសលោ ធម្មោ ឧប្បជ្ជតិ ហេតុបច្ចយា – កុសលំ ឯកំ ខន្ធំ សហជាតា តយោ ខន្ធា, តយោ ខន្ធេ សហជាតោ ឯកោ ខន្ធោ, ទ្វេ ខន្ធេ សហជាតា ទ្វេ ខន្ធា. កុសលំ ធម្មំ សហជាតោ អព្យាកតោ ធម្មោ ឧប្បជ្ជតិ ហេតុបច្ចយា – កុសលេ ខន្ធេ សហជាតំ ចិត្តសមុដ្ឋានំ រូបំ. កុសលំ ធម្មំ សហជាតោ កុសលោ ច អព្យាកតោ ច ធម្មា ឧប្បជ្ជន្តិ ហេតុបច្ចយា – កុសលំ ឯកំ ខន្ធំ សហជាតា តយោ ខន្ធា ចិត្តសមុដ្ឋានញ្ច រូបំ, តយោ ខន្ធេ សហជាតោ ឯកោ ខន្ធោ ចិត្តសមុដ្ឋានញ្ច រូបំ, ទ្វេ ខន្ធេ សហជាតា ទ្វេ ខន្ធា ចិត្តសមុដ្ឋានញ្ច រូបំ. (៣)

២៣៥. អកុសលំ ធម្មំ សហជាតោ អកុសលោ ធម្មោ ឧប្បជ្ជតិ ហេតុបច្ចយា – អកុសលំ ឯកំ ខន្ធំ សហជាតា តយោ ខន្ធា, តយោ ខន្ធេ សហជាតោ ឯកោ ខន្ធោ, ទ្វេ ខន្ធេ សហជាតា ទ្វេ ខន្ធា. អកុសលំ ធម្មំ សហជាតោ អព្យាកតោ ធម្មោ ឧប្បជ្ជតិ ហេតុបច្ចយា – អកុសលេ ខន្ធេ សហជាតំ ចិត្តសមុដ្ឋានំ រូបំ. អកុសលំ ធម្មំ សហជាតោ អកុសលោ ច អព្យាកតោ ច ធម្មា ឧប្បជ្ជន្តិ ហេតុបច្ចយា – អកុសលំ ឯកំ ខន្ធំ សហជាតា តយោ ខន្ធា ចិត្តសមុដ្ឋានញ្ច រូបំ, តយោ ខន្ធេ សហជាតោ ឯកោ ខន្ធោ ចិត្តសមុដ្ឋានញ្ច រូបំ, ទ្វេ ខន្ធេ សហជាតា ទ្វេ ខន្ធា ចិត្តសមុដ្ឋានញ្ច រូបំ. (៣)

២៣៦. អព្យាកតំ ធម្មំ សហជាតោ អព្យាកតោ ធម្មោ ឧប្បជ្ជតិ ហេតុបច្ចយា – វិបាកាព្យាកតំ កិរិយាព្យាកតំ ឯកំ ខន្ធំ សហជាតា តយោ ខន្ធា ចិត្តសមុដ្ឋានញ្ច រូបំ, តយោ ខន្ធេ សហជាតោ ឯកោ ខន្ធោ ចិត្តសមុដ្ឋានញ្ច រូបំ, ទ្វេ ខន្ធេ សហជាតា ទ្វេ ខន្ធា ចិត្តសមុដ្ឋានញ្ច រូបំ; បដិសន្ធិក្ខណេ វិបាកាព្យាកតំ ឯកំ ខន្ធំ សហជាតា តយោ ខន្ធា កដត្តា ច រូបំ, តយោ ខន្ធេ សហជាតោ ឯកោ ខន្ធោ កដត្តា ច រូបំ, ទ្វេ ខន្ធេ សហជាតា ទ្វេ ខន្ធា កដត្តា ច រូបំ; ខន្ធេ សហជាតំ វត្ថុ, វត្ថុំ សហជាតា ខន្ធា; ឯកំ មហាភូតំ សហជាតា តយោ មហាភូតា, តយោ មហាភូតេ សហជាតំ ឯកំ មហាភូតំ, ទ្វេ មហាភូតេ សហជាតា ទ្វេ មហាភូតា, មហាភូតេ សហជាតំ ចិត្តសមុដ្ឋានំ រូបំ កដត្តារូបំ ឧបាទារូបំ. (១)

២៣៧. កុសលញ្ច អព្យាកតញ្ច ធម្មំ សហជាតោ អព្យាកតោ ធម្មោ ឧប្បជ្ជតិ ហេតុបច្ចយា – កុសលេ ខន្ធេ ច មហាភូតេ ច សហជាតំ ចិត្តសមុដ្ឋានំ រូបំ. (១)

អកុសលញ្ច អព្យាកតញ្ច ធម្មំ សហជាតោ អព្យាកតោ ធម្មោ ឧប្បជ្ជតិ ហេតុបច្ចយា – អកុសលេ ខន្ធេ ច មហាភូតេ ច សហជាតំ ចិត្តសមុដ្ឋានំ រូបំ. (១)

(យថា បដិច្ចវារេ ឯវំ វិត្ថារេតព្ពំ.)