១. វិភង្គវារោ

ហេតុបច្ចយោ

៤០១. កុសលោ ធម្មោ កុសលស្ស ធម្មស្ស ហេតុបច្ចយេន បច្ចយោ – កុសលា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. កុសលោ ធម្មោ អព្យាកតស្ស ធម្មស្ស ហេតុបច្ចយេន បច្ចយោ – កុសលា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. កុសលោ ធម្មោ កុសលស្ស ច អព្យាកតស្ស ច ធម្មស្ស ហេតុបច្ចយេន បច្ចយោ – កុសលា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

៤០២. អកុសលោ ធម្មោ អកុសលស្ស ធម្មស្ស ហេតុបច្ចយេន បច្ចយោ – អកុសលា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. អកុសលោ ធម្មោ អព្យាកតស្ស ធម្មស្ស ហេតុបច្ចយេន បច្ចយោ – អកុសលា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. អកុសលោ ធម្មោ អកុសលស្ស ច អព្យាកតស្ស ច ធម្មស្ស ហេតុបច្ចយេន បច្ចយោ – អកុសលា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

៤០៣. អព្យាកតោ ធម្មោ អព្យាកតស្ស ធម្មស្ស ហេតុបច្ចយេន បច្ចយោ – វិបាកាព្យាកតា កិរិយាព្យាកតា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ វិបាកាព្យាកតា ហេតូ សម្បយុត្តកានំ ខន្ធានំ កដត្តា ច រូបានំ ហេតុបច្ចយេន បច្ចយោ. (១)

អារម្មណបច្ចយោ

៤០៤. កុសលោ ធម្មោ កុសលស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ, សេក្ខា គោត្រភុំ បច្ចវេក្ខន្តិ, វោទានំ បច្ចវេក្ខន្តិ, សេក្ខា មគ្គា វុដ្ឋហិត្វា មគ្គំ បច្ចវេក្ខន្តិ, សេក្ខា វា បុថុជ្ជនា វា កុសលំ អនិច្ចតោ ទុក្ខតោ អនត្តតោ វិបស្សន្តិ, ចេតោបរិយញាណេន កុសលចិត្តសមង្គិស្ស ចិត្តំ ជានន្តិ. អាកាសានញ្ចាយតនកុសលំ វិញ្ញាណញ្ចាយតនកុសលស្ស អារម្មណបច្ចយេន បច្ចយោ. អាកិញ្ចញ្ញាយតនកុសលំ នេវសញ្ញានាសញ្ញាយតនកុសលស្ស អារម្មណបច្ចយេន បច្ចយោ. កុសលា ខន្ធា ឥទ្ធិវិធញាណស្ស ចេតោបរិយញាណស្ស បុព្ពេនិវាសានុស្សតិញាណស្ស យថាកម្មូបគញាណស្ស អនាគតំសញាណស្ស អារម្មណបច្ចយេន បច្ចយោ. (១)

៤០៥. កុសលោ ធម្មោ អកុសលស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. បុព្ពេ សុចិណ្ណានិ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. ឈានា វុដ្ឋហិត្វា ឈានំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ. ឈានេ បរិហីនេ វិប្បដិសារិស្ស ទោមនស្សំ ឧប្បជ្ជតិ. (២)

៤០៦. កុសលោ ធម្មោ អព្យាកតស្ស ធម្មស្ស អារម្មណបច្ចយេន បច្ចយោ – អរហា មគ្គា វុដ្ឋហិត្វា មគ្គំ បច្ចវេក្ខតិ; បុព្ពេ សុចិណ្ណានិ បច្ចវេក្ខតិ; កុសលំ អនិច្ចតោ ទុក្ខតោ អនត្តតោ វិប្បស្សតិ; ចេតោបរិយញាណេន កុសលចិត្តសមង្គិស្ស ចិត្តំ ជានាតិ. សេក្ខា វា បុថុជ្ជនា វា កុសលំ អនិច្ចតោ ទុក្ខតោ អនត្តតោ វិបស្សន្តិ, កុសលេ និរុទ្ធេ វិបាកោ តទារម្មណតា ឧប្បជ្ជតិ. កុសលំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ, អកុសលេ និរុទ្ធេ វិបាកោ តទារម្មណតា ឧប្បជ្ជតិ. អាកាសានញ្ចាយតនកុសលំ វិញ្ញាណញ្ចាយតនវិបាកស្ស ច, កិរិយស្ស ច អារម្មណបច្ចយេន បច្ចយោ. អាកិញ្ចញ្ញាយតនកុសលំ នេវសញ្ញានាសញ្ញាយតនវិបាកស្ស ច, កិរិយស្ស ច អារម្មណបច្ចយេន បច្ចយោ. កុសលា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (៣)

៤០៧. អកុសលោ ធម្មោ អកុសលស្ស ធម្មស្ស អារម្មណបច្ចយេន បច្ចយោ – រាគំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. ទិដ្ឋិំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. វិចិកិច្ឆំ អារព្ភ វិចិកិច្ឆា ឧប្បជ្ជតិ, ទិដ្ឋិ ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. ឧទ្ធច្ចំ អារព្ភ ឧទ្ធច្ចំ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទោមនស្សំ ឧប្បជ្ជតិ. ទោមនស្សំ អារព្ភ ទោមនស្សំ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ. (១)

៤០៨. អកុសលោ ធម្មោ កុសលស្ស ធម្មស្ស អារម្មណបច្ចយេន បច្ចយោ – សេក្ខា បហីនេ កិលេសេ [បហីនកិលេសេ (ស្យា.)] បច្ចវេក្ខន្តិ, វិក្ខម្ភិតេ កិលេសេ [វិក្ខម្ភិតកិលេសេ (ស្យា.)] បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ, សេក្ខា វា បុថុជ្ជនា វា អកុសលំ អនិច្ចតោ ទុក្ខតោ អនត្តតោ វិបស្សន្តិ, ចេតោបរិយញាណេន អកុសលចិត្តសមង្គិស្ស ចិត្តំ ជានន្តិ. អកុសលា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស អនាគតំសញាណស្ស អារម្មណបច្ចយេន បច្ចយោ. (២)

៤០៩. អកុសលោ ធម្មោ អព្យាកតស្ស ធម្មស្ស អារម្មណបច្ចយេន បច្ចយោ – អរហា បហីនេ កិលេសេ បច្ចវេក្ខតិ, បុព្ពេ សមុទាចិណ្ណេ កិលេសេ ជានាតិ, អកុសលំ អនិច្ចតោ ទុក្ខតោ អនត្តតោ វិបស្សតិ, ចេតោបរិយញាណេន អកុសលចិត្តសមង្គិស្ស ចិត្តំ ជានាតិ, សេក្ខា វា បុថុជ្ជនា វា អកុសលំ អនិច្ចតោ ទុក្ខតោ អនត្តតោ វិបស្សន្តិ, កុសលេ និរុទ្ធេ វិបាកោ តទារម្មណតា ឧប្បជ្ជតិ. អកុសលំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. អកុសលេ និរុទ្ធេ វិបាកោ តទារម្មណតា ឧប្បជ្ជតិ. អកុសលា ខន្ធា ចេតោបរិយញាណស្ស បុព្ពេនិវាសានុស្សតិញាណស្ស យថាកម្មូបគញាណស្ស អនាគតំសញាណស្ស អាវជ្ជនាយ អារម្មណបច្ចយេន បច្ចយោ. (៣)

៤១០. អព្យាកតោ ធម្មោ អព្យាកតស្ស ធម្មស្ស អារម្មណបច្ចយេន បច្ចយោ – អរហា ផលំ បច្ចវេក្ខតិ, និព្ពានំ បច្ចវេក្ខតិ. និព្ពានំ ផលស្ស អាវជ្ជនាយ អារម្មណបច្ចយេន បច្ចយោ. អរហា ចក្ខុំ អនិច្ចតោ ទុក្ខតោ អនត្តតោ វិបស្សតិ. សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… វិបាកាព្យាកតេ កិរិយាព្យាកតេ ខន្ធេ អនិច្ចតោ ទុក្ខតោ អនត្តតោ វិបស្សតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន វិបាកាព្យាកតកិរិយាព្យាកតចិត្តសមង្គិស្ស ចិត្តំ ជានាតិ. អាកាសានញ្ចាយតនកិរិយំ វិញ្ញាណញ្ចាយតនកិរិយស្ស អារម្មណបច្ចយេន បច្ចយោ. អាកិញ្ចញ្ញាយតនកិរិយំ នេវសញ្ញានាសញ្ញាយតនកិរិយស្ស អារម្មណបច្ចយេន បច្ចយោ. រូបាយតនំ ចក្ខុវិញ្ញាណស្ស អារម្មណបច្ចយេន បច្ចយោ. សទ្ទាយតនំ សោតវិញ្ញាណស្ស… គន្ធាយតនំ ឃានវិញ្ញាណស្ស… រសាយតនំ ជិវ្ហាវិញ្ញាណស្ស … ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ. អព្យាកតា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

៤១១. អព្យាកតោ ធម្មោ កុសលស្ស ធម្មស្ស អារម្មណបច្ចយេន បច្ចយោ – សេក្ខា ផលំ បច្ចវេក្ខន្តិ, និព្ពានំ បច្ចវេក្ខន្តិ. និព្ពានំ គោត្រភុស្ស វោទានស្ស មគ្គស្ស អារម្មណបច្ចយេន បច្ចយោ. សេក្ខា វា បុថុជ្ជនា វា ចក្ខុំ អនិច្ចតោ ទុក្ខតោ អនត្តតោ វិប្បស្សន្តិ. សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… វិបាកាព្យាកតេ កិរិយាព្យាកតេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, ទិព្ពេន ចក្ខុនា រូបំ បស្សន្តិ, ទិព្ពាយ សោតធាតុយា សទ្ទំ សុណន្តិ, ចេតោបរិយញាណេន វិបាកាព្យាកតកិរិយាព្យាកតចិត្តសមង្គិស្ស ចិត្តំ ជានន្តិ. អព្យាកតា ខន្ធា ឥទ្ធិវិធញាណស្ស ចេតោបរិយញាណស្ស បុព្ពេនិវាសានុស្សតិញាណស្ស អនាគតំសញាណស្ស អារម្មណបច្ចយេន បច្ចយោ.

៤១២. អព្យាកតោ ធម្មោ អកុសលស្ស ធម្មស្ស អារម្មណបច្ចយេន បច្ចយោ – ចក្ខុំ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… វិបាកាព្យាកតេ កិរិយាព្យាកតេ ខន្ធេ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. (៣)

អធិបតិបច្ចយោ

៤១៣. កុសលោ ធម្មោ កុសលស្ស ធម្មស្ស អធិបតិបច្ចយេន បច្ចយោ. អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា, តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ. សេក្ខា គោត្រភុំ គរុំ កត្វា បច្ចវេក្ខន្តិ, វោទានំ គរុំ កត្វា បច្ចវេក្ខន្តិ. សេក្ខា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – កុសលាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

៤១៤. កុសលោ ធម្មោ អកុសលស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា, តំ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ, បុព្ពេ សុចិណ្ណានិ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. ឈានា វុដ្ឋហិត្វា ឈានំ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ.

កុសលោ ធម្មោ អព្យាកតស្ស ធម្មស្ស អធិបតិបច្ចយេន បច្ចយោ. អារម្មណាធិបតិ, សហជាតាធិបតិ. អារម្មណាធិបតិ – អរហា មគ្គា វុដ្ឋហិត្វា មគ្គំ គរុំ កត្វា បច្ចវេក្ខតិ. សហជាតាធិបតិ – កុសលាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (៣)

កុសលោ ធម្មោ កុសលស្ស ច អព្យាកតស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – កុសលាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៤)

៤១៥. អកុសលោ ធម្មោ អកុសលស្ស ធម្មស្ស អធិបតិបច្ចយេន បច្ចយោ. អារម្មណាធិបតិ, សហជាតាធិបតិ. អារម្មណាធិបតិ – រាគំ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. ទិដ្ឋិំ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – អកុសលាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស អធិបតិបច្ចយេន បច្ចយោ. សហជាតាធិបតិ – អកុសលាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

អកុសលោ ធម្មោ អកុសលស្ស ច អព្យាកតស្ស ច ធម្មស្ស អធិបតិ បច្ចយេន បច្ចយោ. សហជាតាធិបតិ – អកុសលាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៤១៦. អព្យាកតោ ធម្មោ អព្យាកតស្ស ធម្មស្ស អធិបតិបច្ចយេន បច្ចយោ. អារម្មណាធិបតិ, សហជាតាធិបតិ. អារម្មណាធិបតិ – អរហា ផលំ គរុំ កត្វា បច្ចវេក្ខតិ, និព្ពានំ គរុំ កត្វា បច្ចវេក្ខតិ. និព្ពានំ ផលស្ស អធិបតិបច្ចយេន បច្ចយោ. សហជាតាធិបតិ – វិបាកាព្យាកតកិរិយាព្យាកតាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អព្យាកតោ ធម្មោ កុសលស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – សេក្ខា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ. និព្ពានំ គោត្រភុស្ស, វោទានស្ស, មគ្គស្ស អធិបតិបច្ចយេន បច្ចយោ. (២)

អព្យាកតោ ធម្មោ អកុសលស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ចក្ខុំ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… វិបាកាព្យាកតេ កិរិយាព្យាកតេ ខន្ធេ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (៣)

អនន្តរបច្ចយោ

៤១៧. កុសលោ ធម្មោ កុសលស្ស ធម្មស្ស អនន្តរបច្ចយេន បច្ចយោ – បុរិមា បុរិមា កុសលា ខន្ធា បច្ឆិមានំ បច្ឆិមានំ កុសលានំ ខន្ធានំ អនន្តរបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អនន្តរបច្ចយេន បច្ចយោ. (១)

កុសលោ ធម្មោ អព្យាកតស្ស ធម្មស្ស អនន្តរបច្ចយេន បច្ចយោ. កុសលំ វុដ្ឋានស្ស… មគ្គោ ផលស្ស… អនុលោមំ សេក្ខាយ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកុសលំ ផលសមាបត្តិយា អនន្តរបច្ចយេន បច្ចយោ. (២)

អកុសលោ ធម្មោ អកុសលស្ស ធម្មស្ស អនន្តរបច្ចយេន បច្ចយោ – បុរិមា បុរិមា អកុសលា ខន្ធា បច្ឆិមានំ បច្ឆិមានំ អកុសលានំ ខន្ធានំ អនន្តរបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស អនន្តរបច្ចយេន បច្ចយោ. អកុសលំ វុដ្ឋានស្ស អនន្តរបច្ចយេន បច្ចយោ. (២)

អព្យាកតោ ធម្មោ អព្យាកតស្ស ធម្មស្ស អនន្តរបច្ចយេន បច្ចយោ – បុរិមា បុរិមា វិបាកាព្យាកតា កិរិយាព្យាកតា ខន្ធា បច្ឆិមានំ បច្ឆិមានំ វិបាកាព្យាកតានំ កិរិយាព្យាកតានំ ខន្ធានំ អនន្តរបច្ចយេន បច្ចយោ. ភវង្គំ អាវជ្ជនាយ… កិរិយំ វុដ្ឋានស្ស… អរហតោ អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកិរិយំ ផលសមាបត្តិយា អនន្តរបច្ចយេន បច្ចយោ. (១)

អព្យាកតោ ធម្មោ កុសលស្ស ធម្មស្ស អនន្តរបច្ចយេន បច្ចយោ – អាវជ្ជនា កុសលានំ ខន្ធានំ អនន្តរបច្ចយេន បច្ចយោ. (២)

អព្យាកតោ ធម្មោ អកុសលស្ស ធម្មស្ស អនន្តរបច្ចយេន បច្ចយោ – អាវជ្ជនា អកុសលានំ ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយោ

៤១៨. កុសលោ ធម្មោ កុសលស្ស ធម្មស្ស សមនន្តរបច្ចយេន បច្ចយោ – បុរិមា បុរិមា កុសលា ខន្ធា បច្ឆិមានំ បច្ឆិមានំ កុសលានំ ខន្ធានំ សមនន្តរបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស សមនន្តរបច្ចយេន បច្ចយោ.

កុសលោ ធម្មោ អព្យាកតស្ស ធម្មស្ស សមនន្តរបច្ចយេន បច្ចយោ. កុសលំ វុដ្ឋានស្ស… មគ្គោ ផលស្ស… អនុលោមំ សេក្ខាយ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកុសលំ ផលសមាបត្តិយា សមនន្តរបច្ចយេន បច្ចយោ. (២)

អកុសលោ ធម្មោ អកុសលស្ស ធម្មស្ស សមនន្តរបច្ចយេន បច្ចយោ – បុរិមា បុរិមា អកុសលា ខន្ធា បច្ឆិមានំ បច្ឆិមានំ អកុសលានំ ខន្ធានំ សមនន្តរបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស សមនន្តរបច្ចយេន បច្ចយោ – អកុសលំ វុដ្ឋានស្ស សមនន្តរបច្ចយេន បច្ចយោ. (២)

អព្យាកតោ ធម្មោ អព្យាកតស្ស ធម្មស្ស សមនន្តរបច្ចយេន បច្ចយោ – បុរិមា បុរិមា វិបាកាព្យាកតា កិរិយាព្យាកតា ខន្ធា បច្ឆិមានំ បច្ឆិមានំ វិបាកាព្យាកតានំ កិរិយាព្យាកតានំ ខន្ធានំ សមនន្តរបច្ចយេន បច្ចយោ. ភវង្គំ អាវជ្ជនាយ… កិរិយំ វុដ្ឋានស្ស… អរហតោ អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកិរិយំ ផលសមាបត្តិយា សមនន្តរបច្ចយេន បច្ចយោ. (១)

អព្យាកតោ ធម្មោ កុសលស្ស ធម្មស្ស សមនន្តរបច្ចយេន បច្ចយោ – អាវជ្ជនា កុសលានំ ខន្ធានំ សមនន្តរបច្ចយេន បច្ចយោ. (២)

អព្យាកតោ ធម្មោ អកុសលស្ស ធម្មស្ស សមនន្តរបច្ចយេន បច្ចយោ – អាវជ្ជនា អកុសលានំ ខន្ធានំ សមនន្តរបច្ចយេន បច្ចយោ. (៣)

សហជាតបច្ចយោ

៤១៩. កុសលោ ធម្មោ កុសលស្ស ធម្មស្ស សហជាតបច្ចយេន បច្ចយោ – កុសលោ ឯកោ ខន្ធោ តិណ្ណន្នំ ខន្ធានំ សហជាតបច្ចយេន បច្ចយោ. តយោ ខន្ធា ឯកស្ស ខន្ធស្ស សហជាតបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ សហជាតបច្ចយេន បច្ចយោ. (១)

កុសលោ ធម្មោ អព្យាកតស្ស ធម្មស្ស សហជាតបច្ចយេន បច្ចយោ – កុសលា ខន្ធា ចិត្តសមុដ្ឋានានំ រូបានំ សហជាតបច្ចយេន បច្ចយោ. (២)

កុសលោ ធម្មោ កុសលស្ស ច អព្យាកតស្ស ច ធម្មស្ស សហជាតបច្ចយេន បច្ចយោ – កុសលោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. (៣)

អកុសលោ ធម្មោ អកុសលស្ស ធម្មស្ស សហជាតបច្ចយេន បច្ចយោ – អកុសលោ ឯកោ ខន្ធោ តិណ្ណន្នំ ខន្ធានំ សហជាតបច្ចយេន បច្ចយោ. តយោ ខន្ធា ឯកស្ស ខន្ធស្ស សហជាតបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ សហជាតបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស សហជាតបច្ចយេន បច្ចយោ – អកុសលា ខន្ធា ចិត្តសមុដ្ឋានានំ រូបានំ សហជាតបច្ចយេន បច្ចយោ. (២)

អកុសលោ ធម្មោ អកុសលស្ស ច អព្យាកតស្ស ច ធម្មស្ស សហជាតបច្ចយេន បច្ចយោ – អកុសលោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. (៣)

អព្យាកតោ ធម្មោ អព្យាកតស្ស ធម្មស្ស សហជាតបច្ចយេន បច្ចយោ – វិបាកាព្យាកតោ កិរិយាព្យាកតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. បដិសន្ធិក្ខណេ វិបាកាព្យាកតោ ឯកោ ខន្ធោ តិណ្ណន្នំ ខន្ធានំ កដត្តា ច រូបានំ សហជាតបច្ចយេន បច្ចយោ. តយោ ខន្ធា ឯកស្ស ខន្ធស្ស កដត្តា ច រូបានំ សហជាតបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ កដត្តា ច រូបានំ សហជាតបច្ចយេន បច្ចយោ. ខន្ធា វត្ថុស្ស សហជាតបច្ចយេន បច្ចយោ. វត្ថុ ខន្ធានំ សហជាតបច្ចយេន បច្ចយោ. ឯកំ មហាភូតំ តិណ្ណន្នំ មហាភូតានំ សហជាតបច្ចយេន បច្ចយោ. តយោ មហាភូតា ឯកស្ស មហាភូតស្ស សហជាតបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ សហជាតបច្ចយេន បច្ចយោ. មហាភូតា ចិត្តសមុដ្ឋានានំ រូបានំ កដត្តារូបានំ ឧបាទារូបានំ សហជាតបច្ចយេន បច្ចយោ. ពាហិរំ ឯកំ មហាភូតំ តិណ្ណន្នំ មហាភូតានំ សហជាតបច្ចយេន បច្ចយោ. តយោ មហាភូតា ឯកស្ស មហាភូតស្ស សហជាតបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ សហជាតបច្ចយេន បច្ចយោ. មហាភូតា ឧបាទារូបានំ សហជាតបច្ចយេន បច្ចយោ. អាហារសមុដ្ឋានំ ឯកំ មហាភូតំ តិណ្ណន្នំ មហាភូតានំ សហជាតបច្ចយេន បច្ចយោ. តយោ មហាភូតា ឯកស្ស មហាភូតស្ស សហជាតបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ សហជាតបច្ចយេន បច្ចយោ. មហាភូតា ឧបាទារូបានំ សហជាតបច្ចយេន បច្ចយោ. ឧតុសមុដ្ឋានំ ឯកំ មហាភូតំ តិណ្ណន្នំ មហាភូតានំ សហជាតបច្ចយេន បច្ចយោ. តយោ មហាភូតា ឯកស្ស មហាភូតស្ស សហជាតបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ សហជាតបច្ចយេន បច្ចយោ. មហាភូតា ឧបាទារូបានំ សហជាតបច្ចយេន បច្ចយោ. អសញ្ញសត្តានំ ឯកំ មហាភូតំ តិណ្ណន្នំ មហាភូតានំ សហជាតបច្ចយេន បច្ចយោ. តយោ មហាភូតា ឯកស្ស មហាភូតស្ស សហជាតបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ សហជាតបច្ចយេន បច្ចយោ. មហាភូតា កដត្តារូបានំ ឧបាទារូបានំ សហជាតបច្ចយេន បច្ចយោ. (១)

កុសលោ ច អព្យាកតោ ច ធម្មា អព្យាកតស្ស ធម្មស្ស សហជាតបច្ចយេន បច្ចយោ – កុសលា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. (១)

អកុសលោ ច អព្យាកតោ ច ធម្មា អព្យាកតស្ស ធម្មស្ស សហជាតបច្ចយេន បច្ចយោ – អកុសលា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. (១)

អញ្ញមញ្ញបច្ចយោ

៤២០. កុសលោ ធម្មោ កុសលស្ស ធម្មស្ស អញ្ញមញ្ញបច្ចយេន បច្ចយោ – កុសលោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ. តយោ ខន្ធា ឯកស្ស ខន្ធស្ស អញ្ញមញ្ញបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ អញ្ញមញ្ញបច្ចយេន បច្ចយោ. (១)

អកុសលោ ធម្មោ អកុសលស្ស ធម្មស្ស អញ្ញមញ្ញបច្ចយេន បច្ចយោ – អកុសលោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ. តយោ ខន្ធា ឯកស្ស ខន្ធស្ស អញ្ញមញ្ញបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ អញ្ញមញ្ញបច្ចយេន បច្ចយោ. (១)

អព្យាកតោ ធម្មោ អព្យាកតស្ស ធម្មស្ស អញ្ញមញ្ញបច្ចយេន បច្ចយោ – វិបាកាព្យាកតោ កិរិយាព្យាកតោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ. តយោ ខន្ធា ឯកស្ស ខន្ធស្ស អញ្ញមញ្ញបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ អញ្ញមញ្ញបច្ចយេន បច្ចយោ. បដិសន្ធិក្ខណេ វិបាកាព្យាកតោ ឯកោ ខន្ធោ តិណ្ណន្នំ ខន្ធានំ វត្ថុស្ស ច អញ្ញមញ្ញបច្ចយេន បច្ចយោ. តយោ ខន្ធា ឯកស្ស ខន្ធស្ស វត្ថុស្ស ច អញ្ញមញ្ញបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ វត្ថុស្ស ច អញ្ញមញ្ញបច្ចយេន បច្ចយោ. ខន្ធា វត្ថុស្ស អញ្ញមញ្ញបច្ចយេន បច្ចយោ. វត្ថុ ខន្ធានំ អញ្ញមញ្ញបច្ចយេន បច្ចយោ. ឯកំ មហាភូតំ តិណ្ណន្នំ មហាភូតានំ អញ្ញមញ្ញបច្ចយេន បច្ចយោ. តយោ មហាភូតា ឯកស្ស មហាភូតស្ស អញ្ញមញ្ញបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ អញ្ញមញ្ញបច្ចយេន បច្ចយោ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ តិណ្ណន្នំ មហាភូតានំ អញ្ញមញ្ញបច្ចយេន បច្ចយោ…បេ… ទ្វេ មហាភូតា ទ្វិន្នំ មហាភូតានំ អញ្ញមញ្ញបច្ចយេន បច្ចយោ. (១)

និស្សយបច្ចយោ

៤២១. កុសលោ ធម្មោ កុសលស្ស ធម្មស្ស និស្សយបច្ចយេន បច្ចយោ – កុសលោ ឯកោ ខន្ធោ តិណ្ណន្នំ ខន្ធានំ និស្សយបច្ចយេន បច្ចយោ. តយោ ខន្ធា ឯកស្ស ខន្ធស្ស និស្សយបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ និស្សយបច្ចយេន បច្ចយោ. (១)

កុសលោ ធម្មោ អព្យាកតស្ស ធម្មស្ស និស្សយបច្ចយេន បច្ចយោ – កុសលា ខន្ធា ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

កុសលោ ធម្មោ កុសលស្ស ច អព្យាកតស្ស ច ធម្មស្ស និស្សយបច្ចយេន បច្ចយោ – កុសលោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. (៣)

អកុសលោ ធម្មោ អកុសលស្ស ធម្មស្ស និស្សយបច្ចយេន បច្ចយោ – អកុសលោ ឯកោ ខន្ធោ តិណ្ណន្នំ ខន្ធានំ និស្សយបច្ចយេន បច្ចយោ. តយោ ខន្ធា ឯកស្ស ខន្ធស្ស និស្សយបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ និស្សយបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស និស្សយបច្ចយេន បច្ចយោ – អកុសលា ខន្ធា ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

អកុសលោ ធម្មោ អកុសលស្ស ច អព្យាកតស្ស ច ធម្មស្ស និស្សយបច្ចយេន បច្ចយោ – អកុសលោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. (៣)

អព្យាកតោ ធម្មោ អព្យាកតស្ស ធម្មស្ស និស្សយបច្ចយេន បច្ចយោ – វិបាកាព្យាកតោ កិរិយាព្យាកតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ. បដិសន្ធិក្ខណេ វិបាកាព្យាកតោ ឯកោ ខន្ធោ តិណ្ណន្នំ ខន្ធានំ កដត្តា ច រូបានំ និស្សយបច្ចយេន បច្ចយោ. តយោ ខន្ធា ឯកស្ស ខន្ធស្ស កដត្តា ច រូបានំ និស្សយបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ កដត្តា ច រូបានំ និស្សយបច្ចយេន បច្ចយោ. ខន្ធា វត្ថុស្ស និស្សយបច្ចយេន បច្ចយោ. វត្ថុ ខន្ធានំ និស្សយបច្ចយេន បច្ចយោ. ឯកំ មហាភូតំ តិណ្ណន្នំ មហាភូតានំ និស្សយបច្ចយេន បច្ចយោ. តយោ មហាភូតា ឯកស្ស មហាភូតស្ស និស្សយបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ និស្សយបច្ចយេន បច្ចយោ. មហាភូតា ចិត្តសមុដ្ឋានានំ រូបានំ, កដត្តារូបានំ, ឧបាទារូបានំ និស្សយបច្ចយេន បច្ចយោ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ តិណ្ណន្នំ មហាភូតានំ និស្សយបច្ចយេន បច្ចយោ. តយោ មហាភូតា ឯកស្ស មហាភូតស្ស និស្សយបច្ចយេន បច្ចយោ. ទ្វេ មហាភូតា ទ្វិន្នំ មហាភូតានំ និស្សយបច្ចយេន បច្ចយោ. មហាភូតា កដត្តារូបានំ, ឧបាទារូបានំ និស្សយបច្ចយេន បច្ចយោ. ចក្ខាយតនំ ចក្ខុវិញ្ញាណស្ស និស្សយបច្ចយេន បច្ចយោ. សោតាយតនំ…បេ… ឃានាយតនំ…បេ… ជិវ្ហាយតនំ …បេ… កាយាយតនំ កាយវិញ្ញាណស្ស និស្សយបច្ចយេន បច្ចយោ. វត្ថុ វិបាកាព្យាកតានំ កិរិយាព្យាកតានំ ខន្ធានំ និស្សយបច្ចយេន បច្ចយោ.

អព្យាកតោ ធម្មោ កុសលស្ស ធម្មស្ស និស្សយបច្ចយេន បច្ចយោ – វត្ថុ កុសលានំ ខន្ធានំ និស្សយបច្ចយេន បច្ចយោ. (២)

អព្យាកតោ ធម្មោ អកុសលស្ស ធម្មស្ស និស្សយបច្ចយេន បច្ចយោ – វត្ថុ អកុសលានំ ខន្ធានំ និស្សយបច្ចយេន បច្ចយោ. (៣)

៤២២. កុសលោ ច អព្យាកតោ ច ធម្មា កុសលស្ស ធម្មស្ស និស្សយបច្ចយេន បច្ចយោ – កុសលោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ. តយោ ខន្ធា ច វត្ថុ ច ឯកស្ស ខន្ធស្ស និស្សយបច្ចយេន បច្ចយោ. ទ្វេ ខន្ធា ច វត្ថុ ច ទ្វិន្នំ ខន្ធានំ និស្សយបច្ចយេន បច្ចយោ. (១)

កុសលោ ច អព្យាកតោ ច ធម្មា អព្យាកតស្ស ធម្មស្ស និស្សយបច្ចយេន បច្ចយោ – កុសលា ខន្ធា ច មហាភូតា ច ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

អកុសលោ ច អព្យាកតោ ច ធម្មា អកុសលស្ស ធម្មស្ស និស្សយបច្ចយេន បច្ចយោ – អកុសលោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ. តយោ ខន្ធា ច វត្ថុ ច ឯកស្ស ខន្ធស្ស និស្សយបច្ចយេន បច្ចយោ. ទ្វេ ខន្ធា ច វត្ថុ ច ទ្វិន្នំ ខន្ធានំ និស្សយបច្ចយេន បច្ចយោ. (១)

អកុសលោ ច អព្យាកតោ ច ធម្មា អព្យាកតស្ស ធម្មស្ស និស្សយបច្ចយេន បច្ចយោ – អកុសលា ខន្ធា ច មហាភូតា ច ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

ឧបនិស្សយបច្ចយោ

៤២៣. កុសលោ ធម្មោ កុសលស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ.

អារម្មណូបនិស្សយោ – ទានំ ទត្វា សីលំ សមាទិយិត្វា ឧបោសថកម្មំ កត្វា, តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, សេក្ខា គោត្រភុំ គរុំ កត្វា បច្ចវេក្ខន្តិ, វោទានំ គរុំ កត្វា បច្ចវេក្ខន្តិ, សេក្ខា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ.

អនន្តរូបនិស្សយោ – បុរិមា បុរិមា កុសលា ខន្ធា បច្ឆិមានំ បច្ឆិមានំ កុសលានំ ខន្ធានំ ឧបនិស្សយបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស ឧបនិស្សយបច្ចយេន បច្ចយោ.

បកតូបនិស្សយោ – សទ្ធំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. សីលំ…បេ… សុតំ…បេ… ចាគំ…បេ… បញ្ញំ ឧបនិស្សយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. សទ្ធា… សីលំ… សុតំ… ចាគោ… បញ្ញា … សទ្ធាយ… សីលស្ស… សុតស្ស… ចាគស្ស… បញ្ញាយ ឧបនិស្សយបច្ចយេន បច្ចយោ.

បឋមស្ស ឈានស្ស បរិកម្មំ បឋមស្ស ឈានស្ស ឧបនិស្សយបច្ចយេន បច្ចយោ. ទុតិយស្ស ឈានស្ស បរិកម្មំ ទុតិយស្ស ឈានស្ស ឧបនិស្សយបច្ចយេន បច្ចយោ. តតិយស្ស ឈានស្ស បរិកម្មំ តតិយស្ស ឈានស្ស ឧបនិស្សយបច្ចយេន បច្ចយោ. ចតុត្ថស្ស ឈានស្ស បរិកម្មំ ចតុត្ថស្ស ឈានស្ស ឧបនិស្សយបច្ចយេន បច្ចយោ. អាកាសានញ្ចាយតនស្ស បរិកម្មំ អាកាសានញ្ចាយតនស្ស ឧបនិស្សយបច្ចយេន បច្ចយោ. វិញ្ញាណញ្ចាយតនស្ស បរិកម្មំ វិញ្ញាណញ្ចាយតនស្ស ឧបនិស្សយបច្ចយេន បច្ចយោ. អាកិញ្ចញ្ញាយតនស្ស បរិកម្មំ អាកិញ្ចញ្ញាយតនស្ស ឧបនិស្សយបច្ចយេន បច្ចយោ. នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. បឋមំ ឈានំ ទុតិយស្ស ឈានស្ស ឧបនិស្សយបច្ចយេន បច្ចយោ. ទុតិយំ ឈានំ តតិយស្ស ឈានស្ស ឧបនិស្សយបច្ចយេន បច្ចយោ. តតិយំ ឈានំ ចតុត្ថស្ស ឈានស្ស ឧបនិស្សយបច្ចយេន បច្ចយោ. ចតុត្ថំ ឈានំ អាកាសានញ្ចាយតនស្ស ឧបនិស្សយបច្ចយេន បច្ចយោ. អាកាសានញ្ចាយតនំ វិញ្ញាណញ្ចាយតនស្ស ឧបនិស្សយបច្ចយេន បច្ចយោ. វិញ្ញាណញ្ចាយតនំ អាកិញ្ចញ្ញាយតនស្ស ឧបនិស្សយបច្ចយេន បច្ចយោ. អាកិញ្ចញ្ញាយតនំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. ទិព្ពស្ស ចក្ខុស្ស បរិកម្មំ ទិព្ពស្ស ចក្ខុស្ស ឧបនិស្សយបច្ចយេន បច្ចយោ. ទិព្ពាយ សោតធាតុយា បរិកម្មំ ទិព្ពាយ សោតធាតុយា ឧបនិស្សយបច្ចយេន បច្ចយោ. ឥទ្ធិវិធញាណស្ស បរិកម្មំ ឥទ្ធិវិធញាណស្ស ឧបនិស្សយបច្ចយេន បច្ចយោ. ចេតោបរិយញាណស្ស បរិកម្មំ ចេតោបរិយញាណស្ស ឧបនិស្សយបច្ចយេន បច្ចយោ. បុព្ពេនិវាសានុស្សតិញាណស្ស បរិកម្មំ បុព្ពេនិវាសានុស្សតិញាណស្ស ឧបនិស្សយបច្ចយេន បច្ចយោ. យថាកម្មូបគញាណស្ស បរិកម្មំ យថាកម្មូបគញាណស្ស ឧបនិស្សយបច្ចយេន បច្ចយោ. អនាគតំសញាណស្ស បរិកម្មំ អនាគតំសញាណស្ស ឧបនិស្សយបច្ចយេន បច្ចយោ. ទិព្ពចក្ខុ ទិព្ពាយ សោតធាតុយា ឧបនិស្សយបច្ចយេន បច្ចយោ. ទិព្ពសោតធាតុ ឥទ្ធិវិធញាណស្ស ឧបនិស្សយបច្ចយេន បច្ចយោ. ឥទ្ធិវិធញាណំ ចេតោបរិយញាណស្ស ឧបនិស្សយបច្ចយេន បច្ចយោ. ចេតោបរិយញាណំ បុព្ពេនិវាសានុស្សតិញាណស្ស ឧបនិស្សយបច្ចយេន បច្ចយោ. បុព្ពេនិវាសានុស្សតិញាណំ យថាកម្មូបគញាណស្ស ឧបនិស្សយបច្ចយេន បច្ចយោ. យថាកម្មូបគញាណំ អនាគតំសញាណស្ស ឧបនិស្សយបច្ចយេន បច្ចយោ. បឋមស្ស មគ្គស្ស បរិកម្មំ បឋមស្ស មគ្គស្ស ឧបនិស្សយបច្ចយេន បច្ចយោ. ទុតិយស្ស មគ្គស្ស បរិកម្មំ ទុតិយស្ស មគ្គស្ស ឧបនិស្សយបច្ចយេន បច្ចយោ. តតិយស្ស មគ្គស្ស បរិកម្មំ តតិយស្ស មគ្គស្ស ឧបនិស្សយបច្ចយេន បច្ចយោ. ចតុត្ថស្ស មគ្គស្ស បរិកម្មំ ចតុត្ថស្ស មគ្គស្ស ឧបនិស្សយបច្ចយេន បច្ចយោ. បឋមោ មគ្គោ ទុតិយស្ស មគ្គស្ស ឧបនិស្សយបច្ចយេន បច្ចយោ. ទុតិយោ មគ្គោ តតិយស្ស មគ្គស្ស ឧបនិស្សយបច្ចយេន បច្ចយោ. តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. សេក្ខា មគ្គំ ឧបនិស្សាយ អនុប្បន្នំ សមាបត្តិំ ឧប្បាទេន្តិ, ឧប្បន្នំ សមាបជ្ជន្តិ, សង្ខារេ អនិច្ចតោ ទុក្ខតោ អនត្តតោ វិបស្សន្តិ. មគ្គោ សេក្ខានំ អត្ថប្បដិសម្ភិទាយ, ធម្មប្បដិសម្ភិទាយ, និរុត្តិប្បដិសម្ភិទាយ, បដិភានប្បដិសម្ភិទាយ, ឋានាឋានកោសល្លស្ស ឧបនិស្សយបច្ចយេន បច្ចយោ. (១)

កុសលោ ធម្មោ អកុសលស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ.

អារម្មណូបនិស្សយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. បុព្ពេ សុចិណ្ណានិ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. ឈានា វុដ្ឋហិត្វា ឈានំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ.

បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ. សីលំ…បេ… សុតំ…បេ… ចាគំ…បេ… បញ្ញំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ. សទ្ធា… សីលំ… សុតំ… ចាគោ… បញ្ញា រាគស្ស… ទោសស្ស… មោហស្ស… មានស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (២)

កុសលោ ធម្មោ អព្យាកតស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ.

អារម្មណូបនិស្សយោ – អរហា មគ្គា វុដ្ឋហិត្វា មគ្គំ គរុំ កត្វា បច្ចវេក្ខតិ.

អនន្តរូបនិស្សយោ – កុសលំ វុដ្ឋានស្ស… មគ្គោ ផលស្ស… អនុលោមំ សេក្ខាយ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកុសលំ ផលសមាបត្តិយា ឧបនិស្សយបច្ចយេន បច្ចយោ.

បកតូបនិស្សយោ – សទ្ធំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. សីលំ…បេ… សុតំ…បេ… ចាគំ…បេ… បញ្ញំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. សទ្ធា… សីលំ… សុតំ… ចាគោ… បញ្ញា កាយិកស្ស សុខស្ស… កាយិកស្ស ទុក្ខស្ស… ផលសមាបត្តិយា ឧបនិស្សយបច្ចយេន បច្ចយោ. កុសលំ កម្មំ វិបាកស្ស ឧបនិស្សយបច្ចយេន បច្ចយោ. អរហា មគ្គំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ, ឧប្បន្នំ សមាបជ្ជតិ, សង្ខារេ អនិច្ចតោ ទុក្ខតោ អនត្តតោ វិបស្សតិ. មគ្គោ អរហតោ អត្ថប្បដិសម្ភិទាយ, ធម្មប្បដិសម្ភិទាយ, និរុត្តិប្បដិសម្ភិទាយ, បដិភានប្បដិសម្ភិទាយ, ឋានាឋានកោសល្លស្ស ឧបនិស្សយបច្ចយេន បច្ចយោ. មគ្គោ ផលសមាបត្តិយា ឧបនិស្សយបច្ចយេន បច្ចយោ. (៣)

អកុសលោ ធម្មោ អកុសលស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ.

អារម្មណូបនិស្សយោ – រាគំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. ទិដ្ឋិំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ.

អនន្តរូបនិស្សយោ – បុរិមា បុរិមា អកុសលា ខន្ធា បច្ឆិមានំ បច្ឆិមានំ អកុសលានំ ខន្ធានំ ឧបនិស្សយបច្ចយេន បច្ចយោ.

បកតូបនិស្សយោ – រាគំ ឧបនិស្សាយ បាណំ ហនតិ, អទិន្នំ អាទិយតិ, មុសា ភណតិ, បិសុណំ ភណតិ, ផរុសំ ភណតិ, សម្ផំ បលបតិ, សន្ធិំ ឆិន្ទតិ, និល្លោបំ ហរតិ, ឯកាគារិកំ ករោតិ, បរិបន្ថេ តិដ្ឋតិ, បរទារំ គច្ឆតិ, គាមឃាតំ ករោតិ, និគមឃាតំ ករោតិ, មាតរំ ជីវិតា វោរោបេតិ, បិតរំ ជីវិតា វោរោបេតិ, អរហន្តំ ជីវិតា វោរោបេតិ, ទុដ្ឋេន ចិត្តេន តថាគតស្ស លោហិតំ ឧប្បាទេតិ, សង្ឃំ ភិន្ទតិ. ទោសំ ឧបនិស្សាយ…បេ… មោហំ ឧបនិស្សាយ…បេ… មានំ ឧបនិស្សាយ…បេ… ទិដ្ឋិំ ឧបនិស្សាយ…បេ… បត្ថនំ ឧបនិស្សាយ បាណំ ហនតិ…បេ… សង្ឃំ ភិន្ទតិ. រាគោ… ទោសោ… មោហោ… មានោ… ទិដ្ឋិ… បត្ថនា រាគស្ស… ទោសស្ស… មោហស្ស… មានស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. បាណាតិបាតោ បាណាតិបាតស្ស ឧបនិស្សយបច្ចយេន បច្ចយោ. បាណាតិបាតោ អទិន្នាទានស្ស…បេ… កាមេសុមិច្ឆាចារស្ស…បេ… មុសាវាទស្ស…បេ… បិសុណាយ វាចាយ…បេ… ផរុសាយ វាចាយ…បេ… សម្ផប្បលាបស្ស…បេ… អភិជ្ឈាយ…បេ… ព្យាបាទស្ស…បេ… មិច្ឆាទិដ្ឋិយា ឧបនិស្សយបច្ចយេន បច្ចយោ. អទិន្នាទានំ អទិន្នាទានស្ស… កាមេសុមិច្ឆាចារស្ស… មុសាវាទស្ស… (សំខិត្តំ) មិច្ឆាទិដ្ឋិយា… បាណាតិបាតស្ស ឧបនិស្សយបច្ចយេន បច្ចយោ. (ចក្កំ ពន្ធិតព្ពំ.) កាមេសុមិច្ឆាចារោ…បេ… មុសាវាទោ…បេ… បិសុណវាចា…បេ… ផរុសវាចា…បេ… សម្ផប្បលាបោ…បេ… អភិជ្ឈា…បេ… ព្យាបាទោ…បេ… មិច្ឆាទិដ្ឋិ មិច្ឆាទិដ្ឋិយា ឧបនិស្សយបច្ចយេន បច្ចយោ. មិច្ឆាទិដ្ឋិ បាណាតិបាតស្ស… អទិន្នាទានស្ស… កាមេសុមិច្ឆាចារស្ស… មុសាវាទស្ស… បិសុណាយ វាចាយ… ផរុសាយ វាចាយ… សម្ផប្បលាបស្ស… អភិជ្ឈាយ… ព្យាបាទស្ស ឧបនិស្សយបច្ចយេន បច្ចយោ. មាតុឃាតិកម្មំ មាតុឃាតិកម្មស្ស ឧបនិស្សយបច្ចយេន បច្ចយោ. មាតុឃាតិកម្មំ បិតុឃាតិកម្មស្ស ឧបនិស្សយ…បេ… អរហន្តឃាតិកម្មស្ស… រុហិរុប្បាទកម្មស្ស… សង្ឃភេទកម្មស្ស… និយតមិច្ឆាទិដ្ឋិយា ឧបនិស្សយបច្ចយេន បច្ចយោ. បិតុឃាតិកម្មំ បិតុឃាតិកម្មស្ស… អរហន្តឃាតិកម្មស្ស… រុហិរុប្បាទកម្មស្ស… សង្ឃភេទកម្មស្ស… និយតមិច្ឆាទិដ្ឋិយា… មាតុឃាតិកម្មស្ស ឧបនិស្សយបច្ចយេន បច្ចយោ. អរហន្តឃាតិកម្មំ អរហន្តឃាតិកម្មស្ស… រុហិរុប្បាទកម្មស្ស…បេ… រុហិរុប្បាទកម្មំ រុហិរុប្បាទកម្មស្ស…បេ… សង្ឃភេទកម្មំ សង្ឃភេទកម្មស្ស…បេ… និយតមិច្ឆាទិដ្ឋិ និយតមិច្ឆាទិដ្ឋិយា ឧបនិស្សយបច្ចយេន បច្ចយោ. និយតមិច្ឆាទិដ្ឋិ មាតុឃាតិកម្មស្ស ឧបនិស្សយ…បេ… អរហន្តឃាតិកម្មស្ស… រុហិរុប្បាទកម្មស្ស… សង្ឃភេទកម្មស្ស ឧបនិស្សយបច្ចយេន បច្ចយោ. (ចក្កំ កាតព្ពំ.) (១)

អកុសលោ ធម្មោ កុសលស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – រាគំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. ទោសំ…បេ… មោហំ…បេ… មានំ…បេ… ទិដ្ឋិំ…បេ… បត្ថនំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. រាគោ… ទោសោ… មោហោ… មានោ… ទិដ្ឋិ… បត្ថនា សទ្ធាយ… សីលស្ស… សុតស្ស… ចាគស្ស … បញ្ញាយ ឧបនិស្សយបច្ចយេន បច្ចយោ. បាណំ ហន្ត្វា តស្ស បដិឃាតត្ថាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. អទិន្នំ អាទិយិត្វា…បេ… មុសា ភណិត្វា…បេ… បិសុណំ ភណិត្វា…បេ… ផរុសំ ភណិត្វា…បេ… សម្ផំ បលបិត្វា…បេ… សន្ធិំ ឆិន្ទិត្វា…បេ… និល្លោបំ ហរិត្វា…បេ… ឯកាគារិកំ ករិត្វា…បេ… បរិបន្ថេ ឋត្វា…បេ… បរទារំ គន្ត្វា…បេ… គាមឃាតំ ករិត្វា…បេ… និគមឃាតំ ករិត្វា តស្ស បដិឃាតត្ថាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. មាតរំ ជីវិតា វោរោបេត្វា តស្ស បដិឃាតត្ថាយ ទានំ ទេតិ, សីលំ សមាទិយតិ, ឧបោសថកម្មំ ករោតិ. បិតរំ ជីវិតា វោរោបេត្វា…បេ… អរហន្តំ ជីវិតា វោរោបេត្វា…បេ… ទុដ្ឋេន ចិត្តេន តថាគតស្ស លោហិតំ ឧប្បាទេត្វា…បេ… សង្ឃំ ភិន្ទិត្វា តស្ស បដិឃាតត្ថាយ ទានំ ទេតិ, សីលំ សមាទិយតិ, ឧបោសថកម្មំ ករោតិ. (២)

អកុសលោ ធម្មោ អព្យាកតស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ.

អនន្តរូបនិស្សយោ – អកុសលំ វុដ្ឋានស្ស ឧបនិស្សយបច្ចយេន បច្ចយោ.

បកតូបនិស្សយោ – រាគំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. ទោសំ…បេ… មោហំ…បេ… មានំ …បេ… ទិដ្ឋិំ…បេ… បត្ថនំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. រាគោ… ទោសោ … មោហោ… មានោ… ទិដ្ឋិ… បត្ថនា កាយិកស្ស សុខស្ស… កាយិកស្ស ទុក្ខស្ស… ផលសមាបត្តិយា ឧបនិស្សយបច្ចយេន បច្ចយោ. អកុសលំ កម្មំ វិបាកស្ស ឧបនិស្សយបច្ចយេន បច្ចយោ. (៣)

អព្យាកតោ ធម្មោ អព្យាកតស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ.

អារម្មណូបនិស្សយោ – អរហា ផលំ គរុំ កត្វា បច្ចវេក្ខតិ, និព្ពានំ គរុំ កត្វា បច្ចវេក្ខតិ, និព្ពានំ ផលស្ស ឧបនិស្សយបច្ចយេន បច្ចយោ.

អនន្តរូបនិស្សយោ – បុរិមា បុរិមា វិបាកាព្យាកតា, កិរិយាព្យាកតា ខន្ធា បច្ឆិមានំ បច្ឆិមានំ វិបាកាព្យាកតានំ កិរិយាព្យាកតានំ ខន្ធានំ ឧបនិស្សយបច្ចយេន បច្ចយោ. ភវង្គំ អាវជ្ជនាយ… កិរិយំ វុដ្ឋានស្ស… អរហតោ អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកិរិយំ ផលសមាបត្តិយា ឧបនិស្សយបច្ចយេន បច្ចយោ.

បកតូបនិស្សយោ – កាយិកំ សុខំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. កាយិកំ ទុក្ខំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. ឧតុ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. ភោជនំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. សេនាសនំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. កាយិកំ សុខំ… កាយិកំ ទុក្ខំ… ឧតុ… ភោជនំ… សេនាសនំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. ផលសមាបត្តិ កាយិកស្ស សុខស្ស ឧបនិស្សយបច្ចយេន បច្ចយោ.

អរហា កាយិកំ សុខំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ, ឧប្បន្នំ សមាបជ្ជតិ, សង្ខារេ អនិច្ចតោ ទុក្ខតោ អនត្តតោ វិបស្សតិ. កាយិកំ ទុក្ខំ… ឧតុំ… ភោជនំ … សេនាសនំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ, ឧប្បន្នំ សមាបជ្ជតិ, សង្ខារេ អនិច្ចតោ ទុក្ខតោ អនត្តតោ វិបស្សតិ. (១)

អព្យាកតោ ធម្មោ កុសលស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ.

អារម្មណូបនិស្សយោ – សេក្ខា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ. និព្ពានំ គោត្រភុស្ស… វោទានស្ស… មគ្គស្ស ឧបនិស្សយបច្ចយេន បច្ចយោ.

អនន្តរូបនិស្សយោ – អាវជ្ជនា កុសលានំ ខន្ធានំ ឧបនិស្សយបច្ចយេន បច្ចយោ.

បកតូបនិស្សយោ – កាយិកំ សុខំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. កាយិកំ ទុក្ខំ… ឧតុំ… ភោជនំ… សេនាសនំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. កាយិកំ សុខំ… កាយិកំ ទុក្ខំ… ឧតុ… ភោជនំ… សេនាសនំ សទ្ធាយ… សីលស្ស… សុតស្ស… ចាគស្ស… បញ្ញាយ ឧបនិស្សយបច្ចយេន បច្ចយោ. (២)

អព្យាកតោ ធម្មោ អកុសលស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ.

អារម្មណូបនិស្សយោ – ចក្ខុំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សោតំ…បេ… ឃានំ…បេ… ជិវ្ហំ…បេ… កាយំ…បេ… រូបេ…បេ… សទ្ទេ…បេ… គន្ធេ…បេ… រសេ…បេ… ផោដ្ឋព្ពេ…បេ… វត្ថុំ…បេ… វិបាកាព្យាកតេ កិរិយាព្យាកតេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ.

អនន្តរូបនិស្សយោ – អាវជ្ជនា អកុសលានំ ខន្ធានំ ឧបនិស្សយបច្ចយេន បច្ចយោ.

បកតូបនិស្សយោ – កាយិកំ សុខំ ឧបនិស្សាយ បាណំ ហនតិ, អទិន្នំ អាទិយតិ, មុសា ភណតិ, បិសុណំ ភណតិ, ផរុសំ ភណតិ, សម្ផំ បលបតិ, សន្ធិំ ឆិន្ទតិ, និល្លោបំ ហរតិ, ឯកាគារិកំ ករោតិ, បរិបន្ថេ តិដ្ឋតិ, បរទារំ គច្ឆតិ, គាមឃាតំ ករោតិ, និគមឃាតំ ករោតិ, មាតរំ ជីវិតា វោរោបេតិ, បិតរំ ជីវិតា វោរោបេតិ, អរហន្តំ ជីវិតា វោរោបេតិ, ទុដ្ឋេន ចិត្តេន តថាគតស្ស លោហិតំ ឧប្បាទេតិ, សង្ឃំ ភិន្ទតិ.

កាយិកំ ទុក្ខំ…បេ… ឧតុំ…បេ… ភោជនំ…បេ… សេនាសនំ ឧបនិស្សាយ បាណំ ហនតិ… (សំខិត្តំ.) សង្ឃំ ភិន្ទតិ.

កាយិកំ សុខំ… កាយិកំ ទុក្ខំ… ឧតុ… ភោជនំ… សេនាសនំ រាគស្ស… ទោសស្ស… មោហស្ស… មានស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (៣)

បុរេជាតបច្ចយោ

៤២៤. អព្យាកតោ ធម្មោ អព្យាកតស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ.

អារម្មណបុរេជាតំ – អរហា ចក្ខុំ អនិច្ចតោ ទុក្ខតោ អនត្តតោ វិបស្សតិ. សោតំ…បេ… ឃានំ…បេ… ជិវ្ហំ…បេ… កាយំ…បេ… រូបេ…បេ… សទ្ទេ…បេ… គន្ធេ…បេ… រសេ…បេ… ផោដ្ឋព្ពេ…បេ… វត្ថុំ អនិច្ចតោ ទុក្ខតោ អនត្តតោ វិបស្សតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស បុរេជាតបច្ចយេន បច្ចយោ. សទ្ទាយតនំ សោតវិញ្ញាណស្ស…បេ… គន្ធាយតនំ ឃានវិញ្ញាណស្ស…បេ… រសាយតនំ ជិវ្ហាវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ.

វត្ថុបុរេជាតំ – ចក្ខាយតនំ ចក្ខុវិញ្ញាណស្ស បុរេជាតបច្ចយេន បច្ចយោ. សោតាយតនំ សោតវិញ្ញាណស្ស …បេ… ឃានាយតនំ ឃានវិញ្ញាណស្ស…បេ… ជិវ្ហាយតនំ ជិវ្ហាវិញ្ញាណស្ស…បេ… កាយាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុ វិបាកាព្យាកតានំ កិរិយាព្យាកតានំ ខន្ធានំ បុរេជាតបច្ចយេន បច្ចយោ. (១)

អព្យាកតោ ធម្មោ កុសលស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ.

អារម្មណបុរេជាតំ – សេក្ខា វា បុថុជ្ជនា វា ចក្ខុំ អនិច្ចតោ ទុក្ខតោ អនត្តតោ វិបស្សន្តិ. សោតំ…បេ… ឃានំ…បេ… ជិវ្ហំ…បេ… កាយំ…បេ… រូបេ…បេ… សទ្ទេ…បេ… គន្ធេ…បេ… រសេ…បេ… ផោដ្ឋព្ពេ…បេ… វត្ថុំ អនិច្ចតោ ទុក្ខតោ អនត្តតោ វិបស្សន្តិ. ទិព្ពេន ចក្ខុនា រូបំ បស្សន្តិ. ទិព្ពាយ សោតធាតុយា សទ្ទំ សុណន្តិ.

វត្ថុបុរេជាតំ – វត្ថុ កុសលានំ ខន្ធានំ បុរេជាតបច្ចយេន បច្ចយោ. (២)

អព្យាកតោ ធម្មោ អកុសលស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ. សោតំ…បេ… ឃានំ…បេ… ជិវ្ហំ…បេ… កាយំ…បេ… រូបេ…បេ… សទ្ទេ…បេ… គន្ធេ…បេ… រសេ…បេ… ផោដ្ឋព្ពេ…បេ… វត្ថុំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ.

វត្ថុបុរេជាតំ – វត្ថុ អកុសលានំ ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

៤២៥. កុសលោ ធម្មោ អព្យាកតស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា កុសលា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អកុសលា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អព្យាកតោ ធម្មោ អព្យាកតស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា វិបាកាព្យាកតា កិរិយាព្យាកតា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៤២៦. កុសលោ ធម្មោ កុសលស្ស ធម្មស្ស អាសេវនបច្ចយេន បច្ចយោ – បុរិមា បុរិមា កុសលា ខន្ធា បច្ឆិមានំ បច្ឆិមានំ កុសលានំ ខន្ធានំ អាសេវនបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

អកុសលោ ធម្មោ អកុសលស្ស ធម្មស្ស អាសេវនបច្ចយេន បច្ចយោ – បុរិមា បុរិមា អកុសលា ខន្ធា បច្ឆិមានំ បច្ឆិមានំ អកុសលានំ ខន្ធានំ អាសេវនបច្ចយេន បច្ចយោ. (១)

អព្យាកតោ ធម្មោ អព្យាកតស្ស ធម្មស្ស អាសេវនបច្ចយេន បច្ចយោ – បុរិមា បុរិមា កិរិយាព្យាកតា ខន្ធា បច្ឆិមានំ បច្ឆិមានំ កិរិយាព្យាកតានំ ខន្ធានំ អាសេវនបច្ចយេន បច្ចយោ. (១)

កម្មបច្ចយោ

៤២៧. កុសលោ ធម្មោ កុសលស្ស ធម្មស្ស កម្មបច្ចយេន បច្ចយោ – កុសលា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

កុសលោ ធម្មោ អព្យាកតស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា [នានាខណិកា (ក.)]. សហជាតា – កុសលា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ.

នានាក្ខណិកា – កុសលា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (២)

កុសលោ ធម្មោ កុសលស្ស ច អព្យាកតស្ស ច ធម្មស្ស កម្មបច្ចយេន បច្ចយោ – កុសលា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

អកុសលោ ធម្មោ អកុសលស្ស ធម្មស្ស កម្មបច្ចយេន បច្ចយោ – អកុសលា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អកុសលា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – អកុសលា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (២)

អកុសលោ ធម្មោ អកុសលស្ស ច អព្យាកតស្ស ច ធម្មស្ស កម្មបច្ចយេន បច្ចយោ – អកុសលា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

អព្យាកតោ ធម្មោ អព្យាកតស្ស ធម្មស្ស កម្មបច្ចយេន បច្ចយោ – វិបាកាព្យាកតា កិរិយាព្យាកតា ចេតនា សម្បយុត្តកានំ ខន្ធានំ, ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ វិបាកាព្យាកតា ចេតនា សម្បយុត្តកានំ ខន្ធានំ កដត្តា ច រូបានំ កម្មបច្ចយេន បច្ចយោ. ចេតនា វត្ថុស្ស កម្មបច្ចយេន បច្ចយោ. (១)

វិបាកបច្ចយោ

៤២៨. អព្យាកតោ ធម្មោ អព្យាកតស្ស ធម្មស្ស វិបាកបច្ចយេន បច្ចយោ – វិបាកាព្យាកតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ. តយោ ខន្ធា ឯកស្ស ខន្ធស្ស ចិត្តសមុដ្ឋានានញ្ច រូបានំ វិបាកបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ. បដិសន្ធិក្ខណេ វិបាកាព្យាកតោ ឯកោ ខន្ធោ តិណ្ណន្នំ ខន្ធានំ កដត្តា ច រូបានំ វិបាកបច្ចយេន បច្ចយោ. តយោ ខន្ធា ឯកស្ស ខន្ធស្ស កដត្តា ច រូបានំ វិបាកបច្ចយេន បច្ចយោ. ទ្វេ ខន្ធា ទ្វិន្នំ ខន្ធានំ កដត្តា ច រូបានំ វិបាកបច្ចយេន បច្ចយោ. ខន្ធា វត្ថុស្ស វិបាកបច្ចយេន បច្ចយោ. (១)

អាហារបច្ចយោ

៤២៩. កុសលោ ធម្មោ កុសលស្ស ធម្មស្ស អាហារបច្ចយេន បច្ចយោ – កុសលា អាហារា សម្បយុត្តកានំ ខន្ធានំ អាហារបច្ចយេន បច្ចយោ. (១)

កុសលោ ធម្មោ អព្យាកតស្ស ធម្មស្ស អាហារបច្ចយេន បច្ចយោ – កុសលា អាហារា ចិត្តសមុដ្ឋានានំ រូបានំ អាហារបច្ចយេន បច្ចយោ. (២)

កុសលោ ធម្មោ កុសលស្ស ច អព្យាកតស្ស ច ធម្មស្ស អាហារបច្ចយេន បច្ចយោ – កុសលា អាហារា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អាហារបច្ចយេន បច្ចយោ. (៣)

អកុសលោ ធម្មោ អកុសលស្ស ធម្មស្ស អាហារបច្ចយេន បច្ចយោ – អកុសលា អាហារា សម្បយុត្តកានំ ខន្ធានំ អាហារបច្ចយេន បច្ចយោ.

អកុសលោ ធម្មោ អព្យាកតស្ស ធម្មស្ស អាហារបច្ចយេន បច្ចយោ – អកុសលា អាហារា ចិត្តសមុដ្ឋានានំ រូបានំ អាហារបច្ចយេន បច្ចយោ. (២)

អកុសលោ ធម្មោ អកុសលស្ស ច អព្យាកតស្ស ច ធម្មស្ស អាហារបច្ចយេន បច្ចយោ – អកុសលា អាហារា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អាហារបច្ចយេន បច្ចយោ. (៣)

អព្យាកតោ ធម្មោ អព្យាកតស្ស ធម្មស្ស អាហារបច្ចយេន បច្ចយោ – វិបាកាព្យាកតា កិរិយាព្យាកតា អាហារា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អាហារបច្ចយេន បច្ចយោ. បដិសន្ធិក្ខណេ វិបាកាព្យាកតា អាហារា សម្បយុត្តកានំ ខន្ធានំ កដត្តា ច រូបានំ អាហារបច្ចយេន បច្ចយោ. កពឡីការោ អាហារោ ឥមស្ស កាយស្ស អាហារបច្ចយេន បច្ចយោ. (១)

ឥន្ទ្រិយបច្ចយោ

៤៣០. កុសលោ ធម្មោ កុសលស្ស ធម្មស្ស ឥន្ទ្រិយបច្ចយេន បច្ចយោ – កុសលា ឥន្ទ្រិយា សម្បយុត្តកានំ ខន្ធានំ ឥន្ទ្រិយបច្ចយេន បច្ចយោ. (១)

កុសលោ ធម្មោ អព្យាកតស្ស ធម្មស្ស ឥន្ទ្រិយបច្ចយេន បច្ចយោ – កុសលា ឥន្ទ្រិយា ចិត្តសមុដ្ឋានានំ រូបានំ ឥន្ទ្រិយបច្ចយេន បច្ចយោ. (២)

កុសលោ ធម្មោ កុសលស្ស ច អព្យាកតស្ស ច ធម្មស្ស ឥន្ទ្រិយបច្ចយេន បច្ចយោ – កុសលា ឥន្ទ្រិយា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ. (៣)

អកុសលោ ធម្មោ អកុសលស្ស ធម្មស្ស ឥន្ទ្រិយបច្ចយេន បច្ចយោ – អកុសលា ឥន្ទ្រិយា សម្បយុត្តកានំ ខន្ធានំ ឥន្ទ្រិយបច្ចយេន បច្ចយោ. (១)

អកុសលោ ធម្មោ អព្យាកតស្ស ធម្មស្ស ឥន្ទ្រិយបច្ចយេន បច្ចយោ – អកុសលា ឥន្ទ្រិយា ចិត្តសមុដ្ឋានានំ រូបានំ ឥន្ទ្រិយបច្ចយេន បច្ចយោ. (២)

អកុសលោ ធម្មោ អកុសលស្ស ច អព្យាកតស្ស ច ធម្មស្ស ឥន្ទ្រិយបច្ចយេន បច្ចយោ – អកុសលា ឥន្ទ្រិយា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ. (៣)

អព្យាកតោ ធម្មោ អព្យាកតស្ស ធម្មស្ស ឥន្ទ្រិយបច្ចយេន បច្ចយោ – វិបាកាព្យាកតា កិរិយាព្យាកតា ឥន្ទ្រិយា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ. បដិសន្ធិក្ខណេ វិបាកាព្យាកតា ឥន្ទ្រិយា សម្បយុត្តកានំ ខន្ធានំ កដត្តា ច រូបានំ ឥន្ទ្រិយបច្ចយេន បច្ចយោ. ចក្ខុន្ទ្រិយំ ចក្ខុវិញ្ញាណស្ស ឥន្ទ្រិយបច្ចយេន បច្ចយោ. សោតិន្ទ្រិយំ សោតវិញ្ញាណស្ស …បេ… ឃានិន្ទ្រិយំ ឃានវិញ្ញាណស្ស…បេ… ជិវ្ហិន្ទ្រិយំ ជិវ្ហាវិញ្ញាណស្ស…បេ… កាយិន្ទ្រិយំ កាយវិញ្ញាណស្ស ឥន្ទ្រិយបច្ចយេន បច្ចយោ. រូបជីវិតិន្ទ្រិយំ កដត្តារូបានំ ឥន្ទ្រិយបច្ចយេន បច្ចយោ. (១)