១. វិភង្គវារោ

នហេតុបច្ចយោ

៣៩៦. អកុសលំ ធម្មំ សម្បយុត្តោ អកុសលោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ សម្បយុត្តោ វិចិកិច្ឆាសហគតោ ឧទ្ធច្ចសហគតោ មោហោ. (១)

៣៩៧. អព្យាកតំ ធម្មំ សម្បយុត្តោ អព្យាកតោ ធម្មោ ឧប្បជ្ជតិ នហេតុបច្ចយា – អហេតុកំ វិបាកាព្យាកតំ កិរិយាព្យាកតំ ឯកំ ខន្ធំ សម្បយុត្តា តយោ ខន្ធា, តយោ ខន្ធេ សម្បយុត្តោ ឯកោ ខន្ធោ, ទ្វេ ខន្ធេ សម្បយុត្តា ទ្វេ ខន្ធា; អហេតុកបដិសន្ធិក្ខណេ វិបាកាព្យាកតំ ឯកំ ខន្ធំ សម្បយុត្តា តយោ ខន្ធា, តយោ ខន្ធេ សម្បយុត្តោ ឯកោ ខន្ធោ, ទ្វេ ខន្ធេ សម្បយុត្តា ទ្វេ ខន្ធា. (សំខិត្តំ.) (១)