១. វិភង្គវារោ

នហេតុបច្ចយោ

៣៣៤. អកុសលំ ធម្មំ និស្សាយ អកុសលោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ និស្សាយ វិចិកិច្ឆាសហគតោ ឧទ្ធច្ចសហគតោ មោហោ. (១)

អព្យាកតំ ធម្មំ និស្សាយ អព្យាកតោ ធម្មោ ឧប្បជ្ជតិ នហេតុបច្ចយា – អហេតុកំ វិបាកាព្យាកតំ កិរិយាព្យាកតំ ឯកំ ខន្ធំ និស្សាយ តយោ ខន្ធា ចិត្តសមុដ្ឋានញ្ច រូបំ, តយោ ខន្ធេ និស្សាយ ឯកោ ខន្ធោ ចិត្តសមុដ្ឋានញ្ច រូបំ, ទ្វេ ខន្ធ និស្សាយ ទ្វេ ខន្ធា ចិត្តសមុដ្ឋានញ្ច រូបំ; អហេតុកបដិសន្ធិក្ខណេ វិបាកាព្យាកតំ ឯកំ ខន្ធំ និស្សាយ តយោ ខន្ធា កដត្តា ច រូបំ…បេ… ទ្វេ ខន្ធេ និស្សាយ ទ្វេ ខន្ធា កដត្តា ច រូបំ; ខន្ធេ និស្សាយ វត្ថុ, វត្ថុំ និស្សាយ ខន្ធា; ឯកំ មហាភូតំ និស្សាយ តយោ មហាភូតា…បេ… មហាភូតេ និស្សាយ ចិត្តសមុដ្ឋានំ រូបំ កដត្តារូបំ ឧបាទារូបំ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ និស្សាយ តយោ មហាភូតា…បេ… មហាភូតេ និស្សាយ កដត្តារូបំ ឧបាទារូបំ; ចក្ខាយតនំ និស្សាយ ចក្ខុវិញ្ញាណំ…បេ… កាយាយតនំ និស្សាយ កាយវិញ្ញាណំ; វត្ថុំ និស្សាយ អហេតុកា វិបាកាព្យាកតា កិរិយាព្យាកតា ខន្ធា. (១)

អព្យាកតំ ធម្មំ និស្សាយ អកុសលោ ធម្មោ ឧប្បជ្ជតិ នហេតុបច្ចយា – វត្ថុំ និស្សាយ វិចិកិច្ឆាសហគតោ ឧទ្ធច្ចសហគតោ មោហោ. (២)

អកុសលញ្ច អព្យាកតញ្ច ធម្មំ និស្សាយ អកុសលោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច និស្សាយ វិចិកិច្ឆាសហគតោ ឧទ្ធច្ចសហគតោ មោហោ. (១)

(យថា បច្ចយវារេ, ឯវំ វិត្ថារេតព្ពំ.)