២. បច្ចយបច្ចនីយំ

១. វិភង្គវារោ

នហេតុបច្ចយោ

២៧៧. អកុសលំ ធម្មំ បច្ចយា អកុសលោ ធម្មោ ឧប្បជ្ជតិ ន ហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

អព្យាកតំ ធម្មំ បច្ចយា អព្យាកតោ ធម្មោ ឧប្បជ្ជតិ នហេតុបច្ចយា – អហេតុកំ វិបាកាព្យាកតំ កិរិយាព្យាកតំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បច្ចយា ទ្វេ ខន្ធា ចិត្តសមុដ្ឋានញ្ច រូបំ; អហេតុកបដិសន្ធិក្ខណេ វិបាកាព្យាកតំ ឯកំ ខន្ធំ បច្ចយា តយោ ខន្ធា កដត្តា ច រូបំ…បេ… ទ្វេ ខន្ធេ បច្ចយា ទ្វេ ខន្ធា កដត្តា ច រូបំ; ខន្ធេ បច្ចយា វត្ថុ, វត្ថុំ បច្ចយា ខន្ធា; ឯកំ មហាភូតំ បច្ចយា តយោ មហាភូតា…បេ… មហាភូតេ បច្ចយា ចិត្តសមុដ្ឋានំ រូបំ កដត្តារូបំ ឧបាទារូបំ; ពាហិរំ … អាហារសមុដ្ឋានំ… ឧតុសមុដ្ឋានំ … អសញ្ញសត្តានំ ឯកំ មហាភូតំ បច្ចយា តយោ មហាភូតា…បេ… មហាភូតេ បច្ចយា កដត្តារូបំ ឧបាទារូបំ. ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ; វត្ថុំ បច្ចយា អហេតុកា វិបាកាព្យាកតា កិរិយាព្យាកតា ខន្ធា. (១)

អព្យាកតំ ធម្មំ បច្ចយា អកុសលោ ធម្មោ ឧប្បជ្ជតិ នហេតុបច្ចយា – វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

អកុសលញ្ច អព្យាកតញ្ច ធម្មំ បច្ចយា អកុសលោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយោ

២៧៨. កុសលំ ធម្មំ បច្ចយា អព្យាកតោ ធម្មោ ឧប្បជ្ជតិ នអារម្មណបច្ចយា – កុសលេ ខន្ធេ បច្ចយា ចិត្តសមុដ្ឋានំ រូបំ.

(យថា បដិច្ចវារេ នអារម្មណបច្ចយា, ឯវំ វិត្ថារេតព្ពំ.)

នអធិបតិបច្ចយោ

២៧៩. កុសលំ ធម្មំ បច្ចយា កុសលោ ធម្មោ ឧប្បជ្ជតិ នអធិបតិបច្ចយា – កុសលំ ឯកំ ខន្ធំ បច្ចយា… តីណិ.

អកុសលំ ធម្មំ បច្ចយា… តីណិ.

អព្យាកតំ ធម្មំ បច្ចយា…បេ… បដិសន្ធិក្ខណេ…បេ… (អព្យាកតំ បរិបុណ្ណំ កាតព្ពំ). ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ បច្ចយា…បេ… ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា វិបាកាព្យាកតា កិរិយាព្យាកតា ខន្ធា.

អព្យាកតំ ធម្មំ បច្ចយា កុសលោ ធម្មោ ឧប្បជ្ជតិ នអធិបតិបច្ចយា, វត្ថុំ បច្ចយា កុសលា ខន្ធា…បេ….

(យថា អនុលោមេ សហជាតបច្ចយំ, ឯវំ គណេតព្ពំ.)

នអនន្តរាទិបច្ចយា

២៨០. កុសលំ ធម្មំ បច្ចយា អព្យាកតោ ធម្មោ ឧប្បជ្ជតិ នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា… នបុរេជាតបច្ចយា.

(យថា បដិច្ចវារេ, ឯវំ វិត្ថារេតព្ពំ.)

នបច្ឆាជាតាទិបច្ចយា

២៨១. កុសលំ ធម្មំ បច្ចយា កុសលោ ធម្មោ ឧប្បជ្ជតិ នបច្ឆាជាតបច្ចយា… នអាសេវនបច្ចយា…បេ… ចក្ខាយតនំ បច្ចយា…បេ… (នបច្ឆាជាតបច្ចយម្បិ នអាសេវនបច្ចយម្បិ បរិបុណ្ណំ, សត្តរស.)

(យថា អនុលោមេ សហជាតបច្ចយំ, ឯវំ វិត្ថារេតព្ពំ.)

នកម្មបច្ចយោ

២៨២. កុសលំ ធម្មំ បច្ចយា កុសលោ ធម្មោ ឧប្បជ្ជតិ នកម្មបច្ចយា – កុសលេ ខន្ធេ បច្ចយា កុសលា ចេតនា. (១)

អកុសលំ ធម្មំ បច្ចយា អកុសលោ ធម្មោ ឧប្បជ្ជតិ នកម្មបច្ចយា – អកុសលេ ខន្ធេ បច្ចយា អកុសលា ចេតនា. (១)

អព្យាកតំ ធម្មំ បច្ចយា អព្យាកតោ ធម្មោ ឧប្បជ្ជតិ នកម្មបច្ចយា, កិរិយាព្យាកតេ ខន្ធេ បច្ចយា កិរិយាព្យាកតា ចេតនា; ពាហិរំ… អាហារសមុដ្ឋានំ… ឧតុសមុដ្ឋានំ ឯកំ មហាភូតំ បច្ចយា…បេ… ឧបាទារូបំ, វត្ថុំ បច្ចយា កិរិយាព្យាកតា ចេតនា. (១)

អព្យាកតំ ធម្មំ បច្ចយា កុសលោ ធម្មោ ឧប្បជ្ជតិ នកម្មបច្ចយា – វត្ថុំ បច្ចយា កុសលា ចេតនា. (២)

អព្យាកតំ ធម្មំ បច្ចយា អកុសលោ ធម្មោ ឧប្បជ្ជតិ នកម្មបច្ចយា – វត្ថុំ បច្ចយា អកុសលា ចេតនា. (៣)

កុសលញ្ច អព្យាកតញ្ច ធម្មំ បច្ចយា កុសលោ ធម្មោ ឧប្បជ្ជតិ នកម្មបច្ចយា – កុសលេ ខន្ធេ ច វត្ថុញ្ច បច្ចយា កុសលា ចេតនា. (១)

អកុសលញ្ច អព្យាកតញ្ច ធម្មំ បច្ចយា អកុសលោ ធម្មោ ឧប្បជ្ជតិ នកម្មបច្ចយា – អកុសលេ ខន្ធេ ច វត្ថុញ្ច បច្ចយា អកុសលា ចេតនា. (១)

នវិបាកបច្ចយោ

២៨៣. កុសលំ ធម្មំ បច្ចយា កុសលោ ធម្មោ ឧប្បជ្ជតិ នវិបាកបច្ចយា – កុសលំ ឯកំ ខន្ធំ បច្ចយា… តីណិ.

អកុសលំ ធម្មំ បច្ចយា… តីណិ.

អព្យាកតំ ធម្មំ បច្ចយា អព្យាកតោ ធម្មោ ឧប្បជ្ជតិ នវិបាកបច្ចយា – កិរិយាព្យាកតំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បច្ចយា ទ្វេ ខន្ធា ចិត្តសមុដ្ឋានញ្ច រូបំ, ឯកំ មហាភូតំ បច្ចយា តយោ មហាភូតា…បេ… មហាភូតេ បច្ចយា ចិត្តសមុដ្ឋានំ រូបំ ឧបាទារូបំ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ បច្ចយា តយោ មហាភូតា…បេ… មហាភូតេ បច្ចយា កដត្តារូបំ ឧបាទារូបំ, វត្ថុំ បច្ចយា កិរិយាព្យាកតា ខន្ធា.

អព្យាកតំ ធម្មំ បច្ចយា កុសលោ ធម្មោ ឧប្បជ្ជតិ នវិបាកបច្ចយា – វត្ថុំ បច្ចយា កុសលា ខន្ធា.

(វិបាកំ ឋបេត្វា សព្ពត្ថ វិត្ថារេតព្ពំ.)

នអាហារាទិបច្ចយា

២៨៤. អព្យាកតំ ធម្មំ បច្ចយា អព្យាកតោ ធម្មោ ឧប្បជ្ជតិ នអាហារបច្ចយា… នឥន្ទ្រិយបច្ចយា… នឈានបច្ចយា…បេ… ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ. (ន ឈានេ ឥទំ នានាករណំ.) នមគ្គបច្ចយា… ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ. វត្ថុំ បច្ចយា អហេតុកវិបាកាព្យាកតា កិរិយាព្យាកតា ខន្ធា. (នមគ្គេ ឥទំ នានាករណំ.)

(អវសេសំ យថា បដិច្ចវារេ បច្ចនីយំ, ឯវំ វិត្ថារេតព្ពំ.)

នសម្បយុត្តាទិបច្ចយា

២៨៥. នសម្បយុត្តបច្ចយា … នវិប្បយុត្តបច្ចយា… នោនត្ថិបច្ចយា… កុសលំ ធម្មំ បច្ចយា អព្យាកតោ ធម្មោ ឧប្បជ្ជតិ នោវិគតបច្ចយា – កុសលេ ខន្ធេ បច្ចយា ចិត្តសមុដ្ឋានំ រូបំ.

(យថា បដិច្ចវារេ, ឯវំ វិត្ថារេតព្ពំ.)