១. វិភង្គវារោ

នហេតុបច្ចយោ

២៣៩. អកុសលំ ធម្មំ សហជាតោ អកុសលោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ សហជាតោ វិចិកិច្ឆាសហគតោ ឧទ្ធច្ចសហគតោ មោហោ. (១)

អព្យាកតំ ធម្មំ សហជាតោ អព្យាកតោ ធម្មោ ឧប្បជ្ជតិ នហេតុបច្ចយា – អហេតុកំ វិបាកាព្យាកតំ កិរិយាព្យាកតំ ឯកំ ខន្ធំ សហជាតា តយោ ខន្ធា ចិត្តសមុដ្ឋានញ្ច រូបំ, តយោ ខន្ធេ សហជាតោ ឯកោ ខន្ធោ ចិត្តសមុដ្ឋានញ្ច រូបំ, ទ្វេ ខន្ធេ សហជាតា ទ្វេ ខន្ធា ចិត្តសមុដ្ឋានញ្ច រូបំ; អហេតុកបដិសន្ធិក្ខណេ វិបាកាព្យាកតំ ឯកំ ខន្ធំ សហជាតា តយោ ខន្ធា កដត្តា ច រូបំ, តយោ ខន្ធេ សហជាតោ ឯកោ ខន្ធោ កដត្តា ច រូបំ, ទ្វេ ខន្ធេ សហជាតា ទ្វេ ខន្ធា កដត្តា ច រូបំ, ខន្ធេ សហជាតំ វត្ថុ, វត្ថុំ សហជាតា ខន្ធា; ឯកំ មហាភូតំ សហជាតា តយោ មហាភូតា, តយោ មហាភូតេ សហជាតំ ឯកំ មហាភូតំ, ទ្វេ មហាភូតេ សហជាតា ទ្វេ មហាភូតា, មហាភូតេ សហជាតំ ចិត្តសមុដ្ឋានំ រូបំ កដត្តារូបំ ឧបាទារូបំ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ សហជាតា តយោ មហាភូតា…បេ… មហាភូតេ សហជាតំ កដត្តារូបំ ឧបាទារូបំ. (១)

(យថា បដិច្ចវារេ, ឯវំ វិត្ថារេតព្ពំ.)