១៩. ឯកូនវីសតិមវគ្គោ

(១៨៨) ៣ សាមញ្ញផលកថា

៨៣៥. សាមញ្ញផលំ អសង្ខតន្តិ? អាមន្តា. និព្ពានំ តាណំ លេណំ សរណំ បរាយណំ អច្ចុតំ អមតន្តិ? ន ហេវំ វត្តព្ពេ…បេ… សាមញ្ញផលំ អសង្ខតំ, និព្ពានំ អសង្ខតន្តិ? អាមន្តា. ទ្វេ អសង្ខតានីតិ? ន ហេវំ វត្តព្ពេ…បេ… ទ្វេ អសង្ខតានីតិ? អាមន្តា. ទ្វេ តាណានិ…បេ… អន្តរិកា វាតិ? ន ហេវំ វត្តព្ពេ…បេ….

៨៣៦. សាមញ្ញផលំ អសង្ខតន្តិ? អាមន្តា. សាមញ្ញំ អសង្ខតន្តិ? ន ហេវំ វត្តព្ពេ …បេ… សាមញ្ញំ សង្ខតន្តិ? អាមន្តា. សាមញ្ញផលំ សង្ខតន្តិ? ន ហេវំ វត្តព្ពេ…បេ….

សោតាបត្តិផលំ អសង្ខតន្តិ? អាមន្តា. សោតាបត្តិមគ្គោ អសង្ខតោតិ? ន ហេវំ វត្តព្ពេ…បេ… សោតាបត្តិមគ្គោ សង្ខតោតិ? អាមន្តា. សោតាបត្តិផលំ សង្ខតន្តិ? ន ហេវំ វត្តព្ពេ…បេ….

សកទាគាមិផលំ…បេ… អនាគាមិផលំ…បេ… អរហត្តផលំ អសង្ខតន្តិ? អាមន្តា. អរហត្តមគ្គោ អសង្ខតោតិ? ន ហេវំ វត្តព្ពេ…បេ… អរហត្តមគ្គោ សង្ខតោតិ? អាមន្តា. អរហត្តផលំ សង្ខតន្តិ? ន ហេវំ វត្តព្ពេ…បេ….

សោតាបត្តិផលំ អសង្ខតំ, សកទាគាមិផលំ…បេ… អនាគាមិផលំ …បេ… អរហត្តផលំ អសង្ខតំ, និព្ពានំ អសង្ខតន្តិ? អាមន្តា. បញ្ច អសង្ខតានីតិ? ន ហេវំ វត្តព្ពេ…បេ… បញ្ច អសង្ខតានីតិ? អាមន្តា. បញ្ច តាណានិ…បេ… អន្តរិកា វាតិ? ន ហេវំ វត្តព្ពេ…បេ….

សាមញ្ញផលកថា និដ្ឋិតា.