(១៥៦) ១. និគ្គហកថា

៧៤៣. បរោ បរស្ស ចិត្តំ និគ្គណ្ហាតីតិ? អាមន្តា. បរោ បរស្ស ចិត្តំ ‘‘មា រជ្ជិ’’, ‘‘មា ទុស្សិ’’, ‘‘មា មុយ្ហិ’’, ‘‘មា កិលិស្សី’’តិ និគ្គណ្ហាតីតិ? ន ហេវំ វត្តព្ពេ…បេ… បរោ បរស្ស ចិត្តំ និគ្គណ្ហាតីតិ? អាមន្តា. បរោ បរស្ស ឧប្បន្នោ ផស្សោ ‘‘មា និរុជ្ឈី’’តិ និគ្គណ្ហាតីតិ? ន ហេវំ វត្តព្ពេ…បេ… បរោ បរស្ស ឧប្បន្នា វេទនា…បេ… ឧប្បន្នា សញ្ញា… ឧប្បន្នា ចេតនា… ឧប្បន្នំ ចិត្តំ… ឧប្បន្នា សទ្ធា… ឧប្បន្នំ វីរិយំ … ឧប្បន្នា សតិ… ឧប្បន្នោ សមាធិ…បេ… ឧប្បន្នា បញ្ញា ‘‘មា និរុជ្ឈី’’តិ និគ្គណ្ហាតីតិ? ន ហេវំ វត្តព្ពេ…បេ….

បរោ បរស្ស ចិត្តំ និគ្គណ្ហាតីតិ? អាមន្តា. បរោ បរស្ស អត្ថាយ រាគំ បជហតិ… ទោសំ បជហតិ…បេ… អនោត្តប្បំ បជហតីតិ? ន ហេវំ វត្តព្ពេ…បេ….

បរោ បរស្ស ចិត្តំ និគ្គណ្ហាតីតិ? អាមន្តា. បរោ បរស្ស អត្ថាយ មគ្គំ ភាវេតិ… សតិបដ្ឋានំ ភាវេតិ…បេ… ពោជ្ឈង្គំ ភាវេតីតិ? ន ហេវំ វត្តព្ពេ…បេ….

បរោ បរស្ស ចិត្តំ និគ្គណ្ហាតីតិ? អាមន្តា. បរោ បរស្ស អត្ថាយ ទុក្ខំ បរិជានាតិ, សមុទយំ បជហតិ, និរោធំ សច្ឆិករោតិ, មគ្គំ ភាវេតីតិ? ន ហេវំ វត្តព្ពេ…បេ….

បរោ បរស្ស ចិត្តំ និគ្គណ្ហាតីតិ? អាមន្តា. អញ្ញោ អញ្ញស្ស ការកោ, បរង្កតំ សុខំ ទុក្ខំ អញ្ញោ ករោតិ អញ្ញោ បដិសំវេទេតីតិ? ន ហេវំ វត្តព្ពេ…បេ….

បរោ បរស្ស ចិត្តំ និគ្គណ្ហាតីតិ? អាមន្តា. ននុ វុត្តំ ភគវតា –

‘‘អត្តនាវ កតំ បាបំ, អត្តនា សំកិលិស្សតិ;

អត្តនា អកតំ បាបំ, អត្តនាវ វិសុជ្ឈតិ;

សុទ្ធិ អសុទ្ធិ បច្ចត្តំ, នាញ្ញោ អញ្ញំ វិសោធយេ’’តិ [ធ. ប. ១៦៥].

អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘បរោ បរស្ស ចិត្តំ និគ្គណ្ហាតី’’តិ.

៧៤៤. ន វត្តព្ពំ – ‘‘បរោ បរស្ស ចិត្តំ និគ្គណ្ហាតី’’តិ? អាមន្តា. ននុ អត្ថិ ពលប្បត្តា, អត្ថិ វសីភូតាតិ? អាមន្តា. ហញ្ចិ អត្ថិ ពលប្បត្តា, អត្ថិ វសីភូតា, តេន វត រេ វត្តព្ពេ – ‘‘បរោ បរស្ស ចិត្តំ និគ្គណ្ហាតី’’តិ.

និគ្គហកថា និដ្ឋិតា.