១៤. ចុទ្ទសមវគ្គោ

(១៤៤) ៩. អបរិយាបន្នកថា

៧០៩. ទិដ្ឋិគតំ អបរិយាបន្នន្តិ? អាមន្តា. មគ្គោ ផលំ និព្ពានំ, សោតាបត្តិមគ្គោ សោតាបត្តិផលំ, សកទាគាមិមគ្គោ សកទាគាមិផលំ, អនាគាមិមគ្គោ អនាគាមិផលំ, អរហត្តមគ្គោ អរហត្តផលំ, សតិបដ្ឋានំ សម្មប្បធានំ ឥទ្ធិបាទោ ឥន្ទ្រិយំ ពលំ ពោជ្ឈង្គោតិ? ន ហេវំ វត្តព្ពេ…បេ….

៧១០. ន វត្តព្ពំ – ‘‘ទិដ្ឋិគតំ អបរិយាបន្ន’’ន្តិ? អាមន្តា. បុថុជ្ជនោ ‘‘កាមេសុ វីតរាគោ’’តិ វត្តព្ពោតិ? អាមន្តា. ‘‘វិគតទិដ្ឋិយោ’’តិ វត្តព្ពោតិ? ន ហេវំ វត្តព្ពេ. តេន ហិ ទិដ្ឋិគតំ អបរិយាបន្នន្តិ.

អបរិយាបន្នកថា និដ្ឋិតា.

ចុទ្ទសមវគ្គោ.

តស្សុទ្ទានំ –

អកុសលមូលំ បដិសន្ទហតិ កុសលមូលំ, កុសលមូលំ បដិសន្ទហតិ អកុសលមូលំ, សឡាយតនំ ឆវិញ្ញាណកាយា, អរិយរូបំ មហាភូតានំ ឧបាទាយ, ស្វេវ អនុសយោ តំ បរិយុដ្ឋានំ, បរិយុដ្ឋានំ ចិត្តវិប្បយុត្តំ, យថាធាតុ តញ្ញេវ អនុសេតិ, ទិដ្ឋិគតំ អព្យាកតំ, ទិដ្ឋិគតំ អបរិយាបន្នន្តិ.