(១៤២) ៧. បរិយាបន្នកថា

៧០៣. រូបរាគោ រូបធាតុំ អនុសេតិ, រូបធាតុបរិយាបន្នោតិ? អាមន្តា. សមាបត្តេសិយោ ឧបបត្តេសិយោ ទិដ្ឋធម្មសុខវិហារោ, សមាបត្តេសិយេន ចិត្តេន ឧបបត្តេសិយេន ចិត្តេន ទិដ្ឋធម្មសុខវិហារេន ចិត្តេន សហគតោ សហជាតោ សំសដ្ឋោ សម្បយុត្តោ ឯកុប្បាទោ ឯកនិរោធោ ឯកវត្ថុកោ ឯការម្មណោតិ? ន ហេវំ វត្តព្ពេ…បេ… ននុ ន សមាបត្តេសិយោ ន ឧបបត្តេសិយោ ន ទិដ្ឋធម្មសុខវិហារោ, ន សមាបត្តេសិយេន ចិត្តេន ន ឧបបត្តេសិយេន ចិត្តេន ន ទិដ្ឋធម្មសុខវិហារេន ចិត្តេន សហគតោ សហជាតោ សំសដ្ឋោ សម្បយុត្តោ ឯកុប្បាទោ ឯកនិរោធោ ឯកវត្ថុកោ ឯការម្មណោតិ? អាមន្តា. ហញ្ចិ ន សមាបត្តេសិយោ ន ឧបបត្តេសិយោ ន ទិដ្ឋធម្មសុខវិហារោ…បេ… ឯការម្មណោ, នោ ច វត រេ វត្តព្ពេ – ‘‘រូបរាគោ រូបធាតុំ អនុសេតិ, រូបធាតុបរិយាបន្នោ’’តិ…បេ….

រូបរាគោ រូបធាតុំ អនុសេតិ, រូបធាតុបរិយាបន្នោតិ? អាមន្តា. សទ្ទរាគោ សទ្ទធាតុំ អនុសេតិ, សទ្ទធាតុបរិយាបន្នោតិ? ន ហេវំ វត្តព្ពេ…បេ… រូបរាគោ រូបធាតុំ អនុសេតិ, រូបធាតុបរិយាបន្នោតិ? អាមន្តា. គន្ធរាគោ…បេ… រសរាគោ…បេ… ផោដ្ឋព្ពរាគោ ផោដ្ឋព្ពធាតុំ អនុសេតិ, ផោដ្ឋព្ពធាតុបរិយាបន្នោតិ? ន ហេវំ វត្តព្ពេ…បេ….

សទ្ទរាគោ សទ្ទធាតុំ អនុសេតិ, ន វត្តព្ពំ – ‘‘សទ្ទធាតុបរិយាបន្នោ’’តិ? អាមន្តា. រូបរាគោ រូបធាតុំ អនុសេតិ, ន វត្តព្ពំ – ‘‘រូបធាតុបរិយាបន្នោ’’តិ? ន ហេវំ វត្តព្ពេ…បេ… គន្ធរាគោ…បេ… រសរាគោ…បេ… ផោដ្ឋព្ពរាគោ ផោដ្ឋព្ពធាតុំ អនុសេតិ, ន វត្តព្ពំ – ‘‘ផោដ្ឋព្ពធាតុបរិយាបន្នោ’’តិ? អាមន្តា. រូបរាគោ រូបធាតុំ អនុសេតិ, ន វត្តព្ពំ – ‘‘រូបធាតុបរិយាបន្នោ’’តិ? ន ហេវំ វត្តព្ពេ…បេ….

៧០៤. អរូបរាគោ អរូបធាតុំ អនុសេតិ, អរូបធាតុបរិយាបន្នោតិ? អាមន្តា. សមាបត្តេសិយោ ឧបបត្តេសិយោ ទិដ្ឋធម្មសុខវិហារោ, សមាបត្តេសិយេន ចិត្តេន ឧបបត្តេសិយេន ចិត្តេន ទិដ្ឋធម្មសុខវិហារេន ចិត្តេន សហគតោ សហជាតោ សំសដ្ឋោ សម្បយុត្តោ ឯកុប្បាទោ ឯកនិរោធោ ឯកវត្ថុកោ ឯការម្មណោតិ? ន ហេវំ វត្តព្ពេ…បេ…. ននុ ន សមាបត្តេសិយោ ន ឧបបត្តេសិយោ ន ទិដ្ឋធម្មសុខវិហារោ, ន សមាបត្តេសិយេន ចិត្តេន…បេ… ឯការម្មណោតិ? អាមន្តា. ហញ្ចិ ន សមាបត្តេសិយោ ន ឧបបត្តេសិយោ…បេ… ឯការម្មណោ, នោ ច វត រេ វត្តព្ពេ – ‘‘អរូបរាគោ អរូបធាតុំ អនុសេតិ, អរូបធាតុបរិយាបន្នោ’’តិ.

អរូបរាគោ អរូបធាតុំ អនុសេតិ, អរូបធាតុបរិយាបន្នោតិ? អាមន្តា. សទ្ទរាគោ សទ្ទធាតុំ អនុសេតិ, សទ្ទធាតុបរិយាបន្នោតិ? ន ហេវំ វត្តព្ពេ…បេ… អរូបរាគោ អរូបធាតុំ អនុសេតិ, អរូបធាតុបរិយាបន្នោតិ? អាមន្តា. គន្ធរាគោ…បេ… រសរាគោ…បេ… ផោដ្ឋព្ពរាគោ ផោដ្ឋព្ពធាតុំ អនុសេតិ, ផោដ្ឋព្ពធាតុបរិយាបន្នោតិ? ន ហេវំ វត្តព្ពេ…បេ….

សទ្ទរាគោ សទ្ទធាតុំ អនុសេតិ, ន វត្តព្ពំ – ‘‘សទ្ទធាតុបរិយាបន្នោ’’តិ? អាមន្តា. អរូបរាគោ អរូបធាតុំ អនុសេតិ, ន វត្តព្ពំ – ‘‘អរូបធាតុបរិយាបន្នោ’’តិ, ន ហេវំ វត្តព្ពេ…បេ… គន្ធរាគោ…បេ… រសរាគោ…បេ… ផោដ្ឋព្ពរាគោ ផោដ្ឋព្ពធាតុំ អនុសេតិ, ន វត្តព្ពំ – ‘‘ផោដ្ឋព្ពធាតុបរិយាបន្នោ’’តិ? អាមន្តា. អរូបរាគោ អរូបធាតុំ អនុសេតិ, ន វត្តព្ពំ – ‘‘អរូបធាតុបរិយាបន្នោ’’តិ? ន ហេវំ វត្តព្ពេ…បេ….

៧០៥. ន វត្តព្ពំ – ‘‘រូបរាគោ រូបធាតុំ អនុសេតិ រូបធាតុបរិយាបន្នោ, អរូបរាគោ អរូបធាតុំ អនុសេតិ អរូបធាតុបរិយាបន្នោ’’តិ? អាមន្តា. ននុ កាមរាគោ កាមធាតុំ អនុសេតិ, កាមធាតុបរិយាបន្នោតិ? អាមន្តា. ហញ្ចិ កាមរាគោ កាមធាតុំ អនុសេតិ កាមធាតុបរិយាបន្នោ, តេន វត រេ វត្តព្ពេ – ‘‘រូបរាគោ រូបធាតុំ អនុសេតិ រូបធាតុបរិយាបន្នោ, អរូបរាគោ អរូបធាតុំ អនុសេតិ អរូបធាតុបរិយាបន្នោ’’តិ.

បរិយាបន្នកថា និដ្ឋិតា.