១២. ទ្វាទសមវគ្គោ

(១២៣) ៨. ជីវិតា វោរោបនកថា

៦៤៨. ទិដ្ឋិសម្បន្នោ បុគ្គលោ សញ្ចិច្ច បាណំ ជីវិតា វោរោបេយ្យាតិ? អាមន្តា. ទិដ្ឋិសម្បន្នោ បុគ្គលោ សញ្ចិច្ច មាតរំ ជីវិតា វោរោបេយ្យ…បេ… បិតរំ ជីវិតា វោរោបេយ្យ …បេ… អរហន្តំ ជីវិតា វោរោបេយ្យ…បេ… ទុដ្ឋេន ចិត្តេន តថាគតស្ស លោហិតំ ឧប្បាទេយ្យ…បេ… សង្ឃំ ភិន្ទេយ្យាតិ? ន ហេវំ វត្តព្ពេ…បេ….

ទិដ្ឋិសម្បន្នោ បុគ្គលោ សញ្ចិច្ច បាណំ ជីវិតា វោរោបេយ្យាតិ? អាមន្តា. ទិដ្ឋិសម្បន្នោ បុគ្គលោ សត្ថរិ អគារវោតិ? ន ហេវំ វត្តព្ពេ…បេ… ធម្មេ…បេ… សង្ឃេ…បេ… សិក្ខាយ អគារវោតិ? ន ហេវំ វត្តព្ពេ…បេ….

ននុ ទិដ្ឋិសម្បន្នោ បុគ្គលោ សត្ថរិ សគារវោតិ? អាមន្តា. ហញ្ចិ ទិដ្ឋិសម្បន្នោ បុគ្គលោ សត្ថរិ សគារវោ, នោ ច វត រេ វត្តព្ពេ – ‘‘ទិដ្ឋិសម្បន្នោ បុគ្គលោ សញ្ចិច្ច បាណំ ជីវិតា វោរោបេយ្យា’’តិ. ននុ ទិដ្ឋិសម្បន្នោ បុគ្គលោ ធម្មេ…បេ… សង្ឃេ…បេ… សិក្ខាយ សគារវោតិ? អាមន្តា. ហញ្ចិ ទិដ្ឋិសម្បន្នោ បុគ្គលោ សិក្ខាយ សគារវោ, នោ ច វត រេ វត្តព្ពេ – ‘‘ទិដ្ឋិសម្បន្នោ បុគ្គលោ សញ្ចិច្ច បាណំ ជីវិតា វោរោបេយ្យា’’តិ.

៦៤៩. ទិដ្ឋិសម្បន្នោ បុគ្គលោ សត្ថរិ អគារវោតិ? អាមន្តា. ទិដ្ឋិសម្បន្នោ បុគ្គលោ ពុទ្ធថូបេ ឱហទេយ្យ ឱមុត្តេយ្យ និដ្ឋុភេយ្យ ពុទ្ធថូបេ អបព្យាមតោ [អសព្យាកតោ (សី. ក.)] ករេយ្យាតិ? ន ហេវំ វត្តព្ពេ…បេ….

ទិដ្ឋិសម្បន្នោ បុគ្គលោ សញ្ចិច្ច បាណំ ជីវិតា វោរោបេយ្យាតិ? អាមន្តា. ននុ វុត្តំ ភគវតា – ‘‘សេយ្យថាបិ, ភិក្ខវេ, មហាសមុទ្ទោ ឋិតធម្មោ វេលំ នាតិវត្តតិ; ឯវមេវ ខោ, ភិក្ខវេ, យំ មយា សាវកានំ សិក្ខាបទំ បញ្ញត្តំ តំ មម សាវកា ជីវិតហេតុបិ នាតិក្កមន្តី’’តិ [ចូឡវ. ៣៨៥; អ. និ. ៨.២០; ឧទា. ៤៥]! អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘ទិដ្ឋិសម្បន្នោ បុគ្គលោ សញ្ចិច្ច បាណំ ជីវិតា វោរោបេយ្យា’’តិ.

ជីវិតា វោរោបនកថា និដ្ឋិតា.