១២. ទ្វាទសមវគ្គោ

(១២០) ៥. សត្តក្ខត្តុបរមកថា

៦៤១. សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. មាតា ជីវិតា វោរោបិតា… បិតា ជីវិតា វោរោបិតោ… អរហា ជីវិតា វោរោបិតោ… ទុដ្ឋេន ចិត្តេន តថាគតស្ស លោហិតំ ឧប្បាទិតំ… សង្ឃោ ភិន្នោតិ? ន ហេវំ វត្តព្ពេ…បេ….

សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. អភព្ពោ អន្តរា ធម្មំ អភិសមេតុន្តិ? ន ហេវំ វត្តព្ពេ…បេ…. អភព្ពោ អន្តរា ធម្មំ អភិសមេតុន្តិ? អាមន្តា. មាតា ជីវិតា វោរោបិតា… បិតា ជីវិតា វោរោបិតោ… អរហា ជីវិតា វោរោបិតោ… ទុដ្ឋេន ចិត្តេន តថាគតស្ស លោហិតំ ឧប្បាទិតំ… សង្ឃោ ភិន្នោតិ? ន ហេវំ វត្តព្ពេ…បេ….

៦៤២. សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. អត្ថិ សោ និយមោ យេន និយមេន សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? ន ហេវំ វត្តព្ពេ…បេ… អត្ថិ តេ សតិបដ្ឋានា…បេ… សម្មប្បធានា… ឥទ្ធិបាទា… ឥន្ទ្រិយា… ពលា… ពោជ្ឈង្គា យេហិ ពោជ្ឈង្គេហិ សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? ន ហេវំ វត្តព្ពេ…បេ….

៦៤៣. នត្ថិ សោ និយមោ យេន និយមេន សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. ហញ្ចិ នត្ថិ សោ និយមោ យេន និយមេន សត្តក្ខត្តុបរមោ បុគ្គលោ សត្តក្ខត្តុបរមតានិយតោ, នោ ច វត រេ វត្តព្ពេ – ‘‘សត្តក្ខត្តុបរមោ បុគ្គលោ សត្តក្ខត្តុបរមតានិយតោ’’តិ.

នត្ថិ តេ សតិបដ្ឋានា… ពោជ្ឈង្គា យេហិ ពោជ្ឈង្គេហិ សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. ហញ្ចិ នត្ថិ តេ ពោជ្ឈង្គា យេហិ ពោជ្ឈង្គេហិ សត្តក្ខត្តុបរមោ បុគ្គលោ សត្តក្ខត្តុបរមតានិយតោ, នោ ច វត រេ វត្តព្ពេ – ‘‘សត្តក្ខត្តុបរមោ បុគ្គលោ សត្តក្ខត្តុបរមតានិយតោ’’តិ.

៦៤៤. សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. សកទាគាមិនិយមេនាតិ? ន ហេវំ វត្តព្ពេ…បេ… អនាគាមិនិយមេនាតិ? ន ហេវំ វត្តព្ពេ…បេ… អរហត្តនិយមេនាតិ? ន ហេវំ វត្តព្ពេ…បេ….

កតមេន និយមេនាតិ? សោតាបត្តិនិយមេនាតិ. សត្តក្ខត្តុបរមោ បុគ្គលោ សត្តក្ខត្តុបរមតានិយតោតិ? អាមន្តា. យេ កេចិ សោតាបត្តិនិយាមំ ឱក្កមន្តិ, សព្ពេ តេ សត្តក្ខត្តុបរមតានិយតាតិ? ន ហេវំ វត្តព្ពេ…បេ….

៦៤៥. ន វត្តព្ពំ – ‘‘សត្តក្ខត្តុបរមោ បុគ្គលោ សត្តក្ខត្តុបរមតានិយតោ’’តិ? អាមន្តា. ននុ សោ សត្តក្ខត្តុបរមោតិ? អាមន្តា. ហញ្ចិ សោ សត្តក្ខត្តុបរមោ, តេន វត រេ វត្តព្ពេ – ‘‘សត្តក្ខត្តុបរមោ បុគ្គលោ សត្តក្ខត្តុបរមតានិយតោ’’តិ.

សត្តក្ខត្តុបរមកថា និដ្ឋិតា.