២. បរិហានិកថា

១. វាទយុត្តិបរិហានិ

២៣៩. បរិហាយតិ អរហា អរហត្តាតិ? អាមន្តា. សព្ពត្ថ អរហា អរហត្តា បរិហាយតីតិ? ន ហេវំ វត្តព្ពេ…បេ… សព្ពត្ថ អរហា អរហត្តា បរិហាយតីតិ? អាមន្តា. សព្ពត្ថ អរហតោ បរិហានីតិ? ន ហេវំ វត្តព្ពេ…បេ….

បរិហាយតិ អរហា អរហត្តាតិ? អាមន្តា. សព្ពទា អរហា អរហត្តា បរិហាយតីតិ? ន ហេវំ វត្តព្ពេ…បេ… សព្ពទា អរហា អរហត្តា បរិហាយតីតិ? អាមន្តា. សព្ពទា អរហតោ បរិហានីតិ? ន ហេវំ វត្តព្ពេ…បេ….

បរិហាយតិ អរហា អរហត្តាតិ? អាមន្តា. សព្ពេវ អរហន្តោ អរហត្តា បរិហាយន្តីតិ? ន ហេវំ វត្តព្ពេ…បេ… សព្ពេវ អរហន្តោ អរហត្តា បរិហាយន្តីតិ? អាមន្តា. សព្ពេសំយេវ អរហន្តានំ បរិហានីតិ? ន ហេវំ វត្តព្ពេ…បេ….

បរិហាយតិ អរហា អរហត្តាតិ? អាមន្តា. អរហា អរហត្តា បរិហាយមានោ ចតូហិ ផលេហិ បរិហាយតីតិ? ន ហេវំ វត្តព្ពេ…បេ….

ចតូហិ សតសហស្សេហិ សេដ្ឋី សេដ្ឋិត្តំ ការេន្តោ សតសហស្សេ បរិហីនេ សេដ្ឋិត្តា បរិហីនោ ហោតីតិ? អាមន្តា. សព្ពសាបតេយ្យា បរិហីនោ ហោតីតិ? ន ហេវំ វត្តព្ពេ…បេ….

ចតូហិ សតសហស្សេហិ សេដ្ឋី សេដ្ឋិត្តំ ការេន្តោ សតសហស្សេ បរិហីនេ ភព្ពោ សព្ពសាបតេយ្យា បរិហាយិតុន្តិ? អាមន្តា. អរហា អរហត្តា បរិហាយមានោ ភព្ពោ ចតូហិ ផលេហិ បរិហាយិតុន្តិ? ន ហេវំ វត្តព្ពេ…បេ….

២. អរិយបុគ្គលសំសន្ទនបរិហានិ

២៤០. បរិហាយតិ អរហា អរហត្តាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

បរិហាយតិ អរហា អរហត្តាតិ? អាមន្តា. បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

បរិហាយតិ អរហា អរហត្តាតិ? អាមន្តា. បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

បរិហាយតិ អនាគាមី អនាគាមិផលាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

បរិហាយតិ អនាគាមី អនាគាមិផលាតិ? អាមន្តា. បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

បរិហាយតិ សកទាគាមី សកទាគាមិផលាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

ន បរិហាយតិ សោតាបន្នោ សោតាបត្តិផលាតិ? អាមន្តា. ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

ន បរិហាយតិ សកទាគាមី សកទាគាមិផលាតិ? អាមន្តា. ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

ន បរិហាយតិ អនាគាមី អនាគាមិផលាតិ? អាមន្តា. ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

ន បរិហាយតិ សោតាបន្នោ សោតាបត្តិផលាតិ? អាមន្តា. ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

ន បរិហាយតិ សកទាគាមី សកទាគាមិផលាតិ? អាមន្តា. ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

ន បរិហាយតិ សោតាបន្នោ សោតាបត្តិផលាតិ? អាមន្តា. ន បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

២៤១. បរិហាយតិ អរហា អរហត្តាតិ? អាមន្តា. អរហា អរហត្តា បរិហាយមានោ កត្ថ សណ្ឋាតីតិ? អនាគាមិផលេតិ. អនាគាមី អនាគាមិផលា បរិហាយមានោ កត្ថ សណ្ឋាតីតិ? សកទាគាមិផលេតិ. សកទាគាមី សកទាគាមិផលា បរិហាយមានោ កត្ថ សណ្ឋាតីតិ? សោតាបត្តិផលេតិ. សោតាបន្នោ សោតាបត្តិផលា បរិហាយមានោ បុថុជ្ជនភូមិយំ សណ្ឋាតីតិ? ន ហេវំ វត្តព្ពេ.

អាជានាហិ និគ្គហំ. ហញ្ចិ អរហា អរហត្តា បរិហាយមានោ អនាគាមិផលេ សណ្ឋាតិ, អនាគាមី អនាគាមិផលា បរិហាយមានោ សកទាគាមិផលេ សណ្ឋាតិ, សកទាគាមី សកទាគាមិផលា បរិហាយមានោ សោតាបត្តិផលេ សណ្ឋាតិ; តេន វត រេ វត្តព្ពេ – ‘‘សោតាបន្នោ សោតាបត្តិផលា បរិហាយមានោ បុថុជ្ជនភូមិយំ សណ្ឋាតី’’តិ.

អរហា អរហត្តា បរិហាយមានោ សោតាបត្តិផលេ សណ្ឋាតីតិ? អាមន្តា. សោតាបត្តិផលស្ស អនន្តរា អរហត្តំយេវ សច្ឆិករោតីតិ? ន ហេវំ វត្តព្ពេ…បេ….

២៤២. បរិហាយតិ អរហា អរហត្តាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស ពហុតរា កិលេសា បហីនា អរហតោ វា សោតាបន្នស្ស វាតិ? អរហតោ. ហញ្ចិ អរហតោ ពហុតរា កិលេសា បហីនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ.

បរិហាយតិ អរហា អរហត្តាតិ? អាមន្តា. បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ… កស្ស ពហុតរា កិលេសា បហីនា អរហតោ វា សកទាគាមិស្ស វាតិ? អរហតោ. ហញ្ចិ អរហតោ ពហុតរា កិលេសា បហីនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ សកទាគាមី សកទាគាមិផលា’’តិ.

បរិហាយតិ អរហា អរហត្តាតិ? អាមន្តា. បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ… កស្ស ពហុតរា កិលេសា បហីនា អរហតោ វា អនាគាមិស្ស វាតិ? អរហតោ. ហញ្ចិ អរហតោ ពហុតរា កិលេសា បហីនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ អនាគាមី អនាគាមិផលា’’តិ.

បរិហាយតិ អនាគាមី អនាគាមិផលាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស ពហុតរា កិលេសា បហីនា អនាគាមិស្ស វា សោតាបន្នស្ស វាតិ? អនាគាមិស្ស. ហញ្ចិ អនាគាមិស្ស ពហុតរា កិលេសា បហីនា, បរិហាយតិ អនាគាមី អនាគាមិផលា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ.

២៤៣. បរិហាយតិ អនាគាមី អនាគាមិផលាតិ? អាមន្តា. បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ… កស្ស ពហុតរា កិលេសា បហីនា អនាគាមិស្ស វា សកទាគាមិស្ស វាតិ? អនាគាមិស្ស. ហញ្ចិ អនាគាមិស្ស ពហុតរា កិលេសា បហីនា, បរិហាយតិ អនាគាមី អនាគាមិផលា; តេន វត រេ វត្តព្ពេ – ‘‘បរិហាយតិ សកទាគាមី សកទាគាមិផលា’’តិ.

បរិហាយតិ សកទាគាមី សកទាគាមិផលាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស ពហុតរា កិលេសា បហីនា សកទាគាមិស្ស វា សោតាបន្នស្ស វាតិ? សកទាគាមិស្ស. ហញ្ចិ សកទាគាមិស្ស ពហុតរា កិលេសា បហីនា, បរិហាយតិ សកទាគាមី សកទាគាមិផលា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ.

២៤៤. បរិហាយតិ អរហា អរហត្តាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស អធិមត្តា មគ្គភាវនា អរហតោ វា សោតាបន្នស្ស វាតិ? អរហតោ. ហញ្ចិ អរហតោ អធិមត្តា មគ្គភាវនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ.

បរិហាយតិ អរហា អរហត្តាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស អធិមត្តា សតិបដ្ឋានភាវនា…បេ… សម្មប្បធានភាវនា… ឥទ្ធិបាទភាវនា… ឥន្ទ្រិយភាវនា … ពលភាវនា… ពោជ្ឈង្គភាវនា អរហតោ វា សោតាបន្នស្ស វាតិ? អរហតោ. ហញ្ចិ អរហតោ អធិមត្តា ពោជ្ឈង្គភាវនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ.

បរិហាយតិ អរហា អរហត្តាតិ? អាមន្តា. បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ… កស្ស អធិមត្តា មគ្គភាវនា…បេ… ពោជ្ឈង្គភាវនា អរហតោ វា សកទាគាមិស្ស វាតិ? អរហតោ. ហញ្ចិ អរហតោ អធិមត្តា ពោជ្ឈង្គភាវនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ សកទាគាមី សកទាគាមិផលា’’តិ.

បរិហាយតិ អរហា អរហត្តាតិ? អាមន្តា. បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ… កស្ស អធិមត្តា មគ្គភាវនា…បេ… ពោជ្ឈង្គភាវនា អរហតោ វា អនាគាមិស្ស វាតិ? អរហតោ. ហញ្ចិ អរហតោ អធិមត្តា ពោជ្ឈង្គភាវនា, បរិហាយតិ អរហា អរហត្តា; តេន វត រេ វត្តព្ពេ – ‘‘បរិហាយតិ អនាគាមី អនាគាមិផលា’’តិ.

២៤៥. បរិហាយតិ អនាគាមី អនាគាមិផលាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស អធិមត្តា មគ្គភាវនា…បេ… ពោជ្ឈង្គភាវនា អនាគាមិស្ស វា សោតាបន្នស្ស វាតិ? អនាគាមិស្ស. ហញ្ចិ អនាគាមិស្ស អធិមត្តា ពោជ្ឈង្គភាវនា, បរិហាយតិ អនាគាមី អនាគាមិផលា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ.

បរិហាយតិ អនាគាមី អនាគាមិផលាតិ? អាមន្តា. បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ… កស្ស អធិមត្តា មគ្គភាវនា…បេ… ពោជ្ឈង្គភាវនា អនាគាមិស្ស វា សកទាគាមិស្ស វាតិ? អនាគាមិស្ស. ហញ្ចិ អនាគាមិស្ស អធិមត្តា ពោជ្ឈង្គភាវនា, បរិហាយតិ អនាគាមី អនាគាមិផលា; តេន វត រេ វត្តព្ពេ – ‘‘បរិហាយតិ សកទាគាមី សកទាគាមិផលា’’តិ.

២៤៦. បរិហាយតិ សកទាគាមី សកទាគាមិផលាតិ? អាមន្តា. បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ… កស្ស អធិមត្តា មគ្គភាវនា…បេ… ពោជ្ឈង្គភាវនា សកទាគាមិស្ស វា សោតាបន្នស្ស វាតិ? សកទាគាមិស្ស. ហញ្ចិ សកទាគាមិស្ស អធិមត្តា ពោជ្ឈង្គភាវនា, បរិហាយតិ សកទាគាមី សកទាគាមិផលា; តេន វត រេ វត្តព្ពេ – ‘‘បរិហាយតិ សោតាបន្នោ សោតាបត្តិផលា’’តិ…បេ….

២៤៧. អរហតា ទុក្ខំ ទិដ្ឋំ, បរិហាយតិ អរហា អរហត្តាតិ? អាមន្តា. សោតាបន្នេន ទុក្ខំ ទិដ្ឋំ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតា សមុទយោ ទិដ្ឋោ, បរិហាយតិ អរហា អរហត្តាតិ? អាមន្តា. សោតាបន្នេន សមុទយោ ទិដ្ឋោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតា និរោធោ ទិដ្ឋោ, បរិហាយតិ អរហា អរហត្តាតិ? អាមន្តា. សោតាបន្នេន និរោធោ ទិដ្ឋោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតា មគ្គោ ទិដ្ឋោ, បរិហាយតិ អរហា អរហត្តាតិ? អាមន្តា. សោតាបន្នេន មគ្គោ ទិដ្ឋោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតា ចត្តារិ សច្ចានិ ទិដ្ឋានិ, បរិហាយតិ អរហា អរហត្តាតិ? អាមន្តា. សោតាបន្នេន ចត្តារិ សច្ចានិ ទិដ្ឋានិ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតា ទុក្ខំ ទិដ្ឋំ, បរិហាយតិ អរហា អរហត្តាតិ? អាមន្តា. សកទាគាមិនា ទុក្ខំ ទិដ្ឋំ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

អរហតា សមុទយោ ទិដ្ឋោ…បេ… និរោធោ ទិដ្ឋោ…បេ… មគ្គោ ទិដ្ឋោ…បេ… ចត្តារិ សច្ចានិ ទិដ្ឋានិ, បរិហាយតិ អរហា អរហត្តាតិ? អាមន្តា. សកទាគាមិនា ចត្តារិ សច្ចានិ ទិដ្ឋានិ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

អរហតា ទុក្ខំ ទិដ្ឋំ, បរិហាយតិ អរហា អរហត្តាតិ? អាមន្តា. អនាគាមិនា ទុក្ខំ ទិដ្ឋំ, បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

អរហតា សមុទយោ ទិដ្ឋោ…បេ… និរោធោ ទិដ្ឋោ…បេ… មគ្គោ ទិដ្ឋោ…បេ… ចត្តារិ សច្ចានិ ទិដ្ឋានិ, បរិហាយតិ អរហា អរហត្តាតិ? អាមន្តា. អនាគាមិនា ចត្តារិ សច្ចានិ ទិដ្ឋានិ, បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

២៤៨. អនាគាមិនា ទុក្ខំ ទិដ្ឋំ, បរិហាយតិ អនាគាមី អនាគាមិផលាតិ? អាមន្តា. សោតាបន្នេន ទុក្ខំ ទិដ្ឋំ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អនាគាមិនា សមុទយោ ទិដ្ឋោ…បេ… និរោធោ ទិដ្ឋោ…បេ… មគ្គោ ទិដ្ឋោ…បេ… ចត្តារិ សច្ចានិ ទិដ្ឋានិ, បរិហាយតិ អនាគាមី អនាគាមិផលាតិ? អាមន្តា. សោតាបន្នេន ចត្តារិ សច្ចានិ ទិដ្ឋានិ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អនាគាមិនា ទុក្ខំ ទិដ្ឋំ, បរិហាយតិ អនាគាមី អនាគាមិផលាតិ? អាមន្តា. សកទាគាមិនា ទុក្ខំ ទិដ្ឋំ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

អនាគាមិនា សមុទយោ ទិដ្ឋោ…បេ… និរោធោ ទិដ្ឋោ…បេ… មគ្គោ ទិដ្ឋោ…បេ… ចត្តារិ សច្ចានិ ទិដ្ឋានិ, បរិហាយតិ អនាគាមី អនាគាមិផលាតិ? អាមន្តា. សកទាគាមិនា ចត្តារិ សច្ចានិ ទិដ្ឋានិ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

២៤៩. សកទាគាមិនា ទុក្ខំ ទិដ្ឋំ, បរិហាយតិ សកទាគាមី សកទាគាមិផលាតិ? អាមន្តា. សោតាបន្នេន ទុក្ខំ ទិដ្ឋំ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

សកទាគាមិនា សមុទយោ ទិដ្ឋោ…បេ… និរោធោ ទិដ្ឋោ…បេ… មគ្គោ ទិដ្ឋោ…បេ… ចត្តារិ សច្ចានិ ទិដ្ឋានិ, បរិហាយតិ សកទាគាមី សកទាគាមិផលាតិ? អាមន្តា. សោតាបន្នេន ចត្តារិ សច្ចានិ ទិដ្ឋានិ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

២៥០. សោតាបន្នេន ទុក្ខំ ទិដ្ឋំ, ន បរិហាយតិ សោតាបន្នោ សោតាបត្តិផលាតិ? អាមន្តា. អរហតា ទុក្ខំ ទិដ្ឋំ, ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

សោតាបន្នេន សមុទយោ ទិដ្ឋោ…បេ… និរោធោ ទិដ្ឋោ…បេ… មគ្គោ ទិដ្ឋោ…បេ… ចត្តារិ សច្ចានិ ទិដ្ឋានិ, ន បរិហាយតិ សោតាបន្នោ សោតាបត្តិផលាតិ? អាមន្តា. អរហតា ចត្តារិ សច្ចានិ ទិដ្ឋានិ, ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

សកទាគាមិនា ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ សកទាគាមី សកទាគាមិផលាតិ? អាមន្តា. អរហតា ចត្តារិ សច្ចានិ ទិដ្ឋានិ, ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

អនាគាមិនា ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ អនាគាមី អនាគាមិផលាតិ? អាមន្តា. អរហតា ចត្តារិ សច្ចានិ ទិដ្ឋានិ, ន បរិហាយតិ អរហា អរហត្តាតិ? ន ហេវំ វត្តព្ពេ…បេ….

សោតាបន្នេន ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ សោតាបន្នោ សោតាបត្តិផលាតិ? អាមន្តា.

អនាគាមិនា ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

សកទាគាមិនា ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ សកទាគាមី សកទាគាមិផលាតិ? អាមន្តា. អនាគាមិនា ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

សោតាបន្នេន ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ សោតាបន្នោ សោតាបត្តិផលាតិ? អាមន្តា. សកទាគាមិនា ទុក្ខំ ទិដ្ឋំ…បេ… ចត្តារិ សច្ចានិ ទិដ្ឋានិ, ន បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

២៥១. អរហតោ រាគោ បហីនោ, បរិហាយតិ អរហា អរហត្តាតិ? អាមន្តា. សោតាបន្នស្ស សក្កាយទិដ្ឋិ បហីនា, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតោ រាគោ បហីនោ, បរិហាយតិ អរហា អរហត្តាតិ? អាមន្តា. សោតាបន្នស្ស វិចិកិច្ឆា បហីនា…បេ… សីលព្ពតបរាមាសោ បហីនោ…បេ… អបាយគមនីយោ រាគោ បហីនោ …បេ… អបាយគមនីយោ ទោសោ បហីនោ…បេ… អបាយគមនីយោ មោហោ បហីនោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតោ ទោសោ បហីនោ…បេ… មោហោ បហីនោ… មានោ បហីនោ… ទិដ្ឋិ បហីនា… វិចិកិច្ឆា បហីនា… ថិនំ [ថីនំ (សី. ស្យា. កំ. បី.)] បហីនំ… ឧទ្ធច្ចំ បហីនំ… អហិរិកំ បហីនំ…បេ… អនោត្តប្បំ បហីនំ, បរិហាយតិ អរហា អរហត្តាតិ? អាមន្តា. សោតាបន្នស្ស សក្កាយទិដ្ឋិ បហីនា, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតោ អនោត្តប្បំ បហីនំ, បរិហាយតិ អរហា អរហត្តាតិ? អាមន្តា. សោតាបន្នស្ស វិចិកិច្ឆា បហីនា…បេ… សីលព្ពតបរាមាសោ បហីនោ…បេ… អបាយគមនីយោ រាគោ បហីនោ…បេ… អបាយគមនីយោ ទោសោ បហីនោ…បេ… អបាយគមនីយោ មោហោ បហីនោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ…បេ….

អរហតោ រាគោ បហីនោ, បរិហាយតិ អរហា អរហត្តាតិ? អាមន្តា. សកទាគាមិស្ស សក្កាយទិដ្ឋិ បហីនា, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

អរហតោ រាគោ បហីនោ, បរិហាយតិ អរហា អរហត្តាតិ? អាមន្តា. សកទាគាមិស្ស វិចិកិច្ឆា បហីនា…បេ… សីលព្ពតបរាមាសោ បហីនោ…បេ… ឱឡារិកោ កាមរាគោ បហីនោ… ឱឡារិកោ ព្យាបាទោ បហីនោ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ…បេ….

អរហតោ ទោសោ បហីនោ…បេ… អនោត្តប្បំ បហីនំ, បរិហាយតិ អរហា អរហត្តាតិ? អាមន្តា. សកទាគាមិស្ស សក្កាយទិដ្ឋិ បហីនា…បេ… ឱឡារិកោ ព្យាបាទោ បហីនោ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

អរហតោ រាគោ បហីនោ, បរិហាយតិ អរហា អរហត្តាតិ? អាមន្តា. អនាគាមិស្ស សក្កាយទិដ្ឋិ បហីនា, បរិហាយតិ អនាគាមី អនាគាមិផលាតិ? ន ហេវំ វត្តព្ពេ…បេ….

អរហតោ រាគោ បហីនោ, បរិហាយតិ អរហា អរហត្តាតិ? អាមន្តា. អនាគាមិស្ស វិចិកិច្ឆា បហីនា…បេ… សីលព្ពតបរាមាសោ បហីនោ… អណុសហគតោ កាមរាគោ បហីនោ… អណុសហគតោ ព្យាបាទោ បហីនោ, បរិហាយតិ អនាគាមី អនាគាមិផលាតិ? ន ហេវំ វត្តព្ពេ.

អរហតោ ទោសោ បហីនោ…បេ… អនោត្តប្បំ បហីនំ, បរិហាយតិ អរហា អរហត្តាតិ? អាមន្តា. អនាគាមិស្ស សក្កាយទិដ្ឋិ បហីនា…បេ… អណុសហគតោ ព្យាបាទោ បហីនោ, បរិហាយតិ អនាគាមី អនាគាមិផលាតិ? ន ហេវំ វត្តព្ពេ.

២៥២. អនាគាមិស្ស សក្កាយទិដ្ឋិ បហីនា, បរិហាយតិ អនាគាមី អនាគាមិផលាតិ? អាមន្តា. សោតាបន្នស្ស សក្កាយទិដ្ឋិ បហីនា, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ.

អនាគាមិស្ស សក្កាយទិដ្ឋិ បហីនា, បរិហាយតិ អនាគាមី អនាគាមិផលាតិ? អាមន្តា. សោតាបន្នស្ស វិចិកិច្ឆា បហីនា…បេ… អបាយគមនីយោ មោហោ បហីនោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ.

អនាគាមិស្ស វិចិកិច្ឆា បហីនា…បេ… អណុសហគតោ ព្យាបាទោ បហីនោ, បរិហាយតិ អនាគាមី អនាគាមិផលាតិ? អាមន្តា. សោតាបន្នស្ស សក្កាយទិដ្ឋិ បហីនា…បេ… អបាយគមនីយោ មោហោ បហីនោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ.

អនាគាមិស្ស សក្កាយទិដ្ឋិ បហីនា, បរិហាយតិ អនាគាមី អនាគាមិផលាតិ? អាមន្តា. សកទាគាមិស្ស សក្កាយទិដ្ឋិ បហីនា, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

អនាគាមិស្ស សក្កាយទិដ្ឋិ បហីនា, បរិហាយតិ អនាគាមី អនាគាមិផលាតិ? អាមន្តា. សកទាគាមិស្ស វិចិកិច្ឆា បហីនា…បេ… សីលព្ពតបរាមាសោ បហីនោ… ឱឡារិកោ កាមរាគោ បហីនោ… ឱឡារិកោ ព្យាបាទោ បហីនោ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

អនាគាមិស្ស វិចិកិច្ឆា បហីនា…បេ… អណុសហគតោ ព្យាបាទោ បហីនោ, បរិហាយតិ អនាគាមី អនាគាមិផលាតិ? អាមន្តា. សកទាគាមិស្ស សក្កាយទិដ្ឋិ បហីនា…បេ… ឱឡារិកោ ព្យាបាទោ បហីនោ, បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

២៥៣. សកទាគាមិស្ស សក្កាយទិដ្ឋិ បហីនា, បរិហាយតិ សកទាគាមី សកទាគាមិផលាតិ? អាមន្តា. សោតាបន្នស្ស សក្កាយទិដ្ឋិ បហីនា, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ.

សកទាគាមិស្ស សក្កាយទិដ្ឋិ បហីនា, បរិហាយតិ សកទាគាមី សកទាគាមិផលាតិ? អាមន្តា. សោតាបន្នស្ស វិចិកិច្ឆា បហីនា…បេ… អបាយគមនីយោ មោហោ បហីនោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ.

សកទាគាមិស្ស វិចិកិច្ឆា បហីនា…បេ… ឱឡារិកោ កាមរាគោ បហីនោ… ឱឡារិកោ ព្យាបាទោ បហីនោ, បរិហាយតិ សកទាគាមី សកទាគាមិផលាតិ? អាមន្តា. សោតាបន្នស្ស សក្កាយទិដ្ឋិ បហីនា…បេ… អបាយគមនីយោ មោហោ បហីនោ, បរិហាយតិ សោតាបន្នោ សោតាបត្តិផលាតិ? ន ហេវំ វត្តព្ពេ.

២៥៤. សោតាបន្នស្ស សក្កាយទិដ្ឋិ បហីនា, ន បរិហាយតិ សោតាបន្នោ សោតាបត្តិផលាតិ? អាមន្តា. អរហតោ រាគោ បហីនោ, ន បរិហាយតិ អរហា អរហត្តាតិ? ន ហេវំ វត្តព្ពេ.

សោតាបន្នស្ស សក្កាយទិដ្ឋិ បហីនា, ន បរិហាយតិ សោតាបន្នោ សោតាបត្តិផលាតិ? អាមន្តា. អរហតោ ទោសោ បហីនោ…បេ… អនោត្តប្បំ បហីនំ, ន បរិហាយតិ អរហា អរហត្តាតិ? ន ហេវំ វត្តព្ពេ.

សោតាបន្នស្ស វិចិកិច្ឆា បហីនា…បេ… អបាយគមនីយោ មោហោ បហីនោ, ន បរិហាយតិ សោតាបន្នោ សោតាបត្តិផលាតិ? អាមន្តា. អរហតោ រាគោ បហីនោ…បេ… អនោត្តប្បំ បហីនំ, ន បរិហាយតិ អរហា អរហត្តាតិ? ន ហេវំ វត្តព្ពេ.

២៥៥. សកទាគាមិស្ស សក្កាយទិដ្ឋិ បហីនា, ន បរិហាយតិ សកទាគាមី សកទាគាមិផលាតិ? អាមន្តា. អរហតោ រាគោ បហីនោ…បេ… អនោត្តប្បំ បហីនំ, ន បរិហាយតិ អរហា អរហត្តាតិ? ន ហេវំ វត្តព្ពេ.

សកទាគាមិស្ស វិចិកិច្ឆា បហីនា…បេ… ឱឡារិកោ ព្យាបាទោ បហីនោ, ន បរិហាយតិ សកទាគាមី សកទាគាមិផលាតិ? អាមន្តា. អរហតោ រាគោ បហីនោ…បេ… អនោត្តប្បំ បហីនំ, ន បរិហាយតិ អរហា អរហត្តាតិ? ន ហេវំ វត្តព្ពេ.

២៥៦. អនាគាមិស្ស សក្កាយទិដ្ឋិ បហីនា, ន បរិហាយតិ អនាគាមី អនាគាមិផលាតិ? អាមន្តា. អរហតោ រាគោ បហីនោ…បេ… អនោត្តប្បំ បហីនំ, ន បរិហាយតិ អរហា អរហត្តាតិ? ន ហេវំ វត្តព្ពេ.

អនាគាមិស្ស វិចិកិច្ឆា បហីនា…បេ… អណុសហគតោ ព្យាបាទោ បហីនោ, ន បរិហាយតិ អនាគាមី អនាគាមិផលាតិ? អាមន្តា. អរហតោ រាគោ បហីនោ…បេ… អនោត្តប្បំ បហីនំ, ន បរិហាយតិ អរហា អរហត្តាតិ? ន ហេវំ វត្តព្ពេ.

២៥៧. សោតាបន្នស្ស សក្កាយទិដ្ឋិ បហីនា, ន បរិហាយតិ សោតាបន្នោ សោតាបត្តិផលាតិ? អាមន្តា. អនាគាមិស្ស សក្កាយទិដ្ឋិ បហីនា… អណុសហគតោ ព្យាបាទោ បហីនោ, ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ.

សោតាបន្នស្ស វិចិកិច្ឆា បហីនា…បេ… អបាយគមនីយោ មោហោ បហីនោ, ន បរិហាយតិ សោតាបន្នោ សោតាបត្តិផលាតិ? អាមន្តា. អនាគាមិស្ស សក្កាយទិដ្ឋិ បហីនា…បេ… អណុសហគតោ ព្យាបាទោ បហីនោ, ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ.

២៥៨. សកទាគាមិស្ស សក្កាយទិដ្ឋិ បហីនា, ន បរិហាយតិ សកទាគាមី សកទាគាមិផលាតិ? អាមន្តា. អនាគាមិស្ស សក្កាយទិដ្ឋិ បហីនា…បេ… អណុសហគតោ ព្យាបាទោ បហីនោ, ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ.

សកទាគាមិស្ស វិចិកិច្ឆា បហីនា…បេ… ឱឡារិកោ ព្យាបាទោ បហីនោ, ន បរិហាយតិ សកទាគាមី សកទាគាមិផលាតិ? អាមន្តា. អនាគាមិស្ស សក្កាយទិដ្ឋិ បហីនា…បេ… អណុសហគតោ ព្យាបាទោ បហីនោ, ន បរិហាយតិ អនាគាមី អនាគាមិផលាតិ? ន ហេវំ វត្តព្ពេ.

២៥៩. សោតាបន្នស្ស សក្កាយទិដ្ឋិ បហីនា, ន បរិហាយតិ សោតាបន្នោ សោតាបត្តិផលាតិ? អាមន្តា. សកទាគាមិស្ស សក្កាយទិដ្ឋិ បហីនា…បេ… ឱឡារិកោ ព្យាបាទោ បហីនោ, ន បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

សោតាបន្នស្ស វិចិកិច្ឆា បហីនា…បេ… អបាយគមនីយោ មោហោ បហីនោ, ន បរិហាយតិ សោតាបន្នោ សោតាបត្តិផលាតិ? អាមន្តា. សកទាគាមិស្ស សក្កាយទិដ្ឋិ បហីនា…បេ… ឱឡារិកោ ព្យាបាទោ បហីនោ, ន បរិហាយតិ សកទាគាមី សកទាគាមិផលាតិ? ន ហេវំ វត្តព្ពេ.

២៦០. បរិហាយតិ អរហា អរហត្តាតិ? អាមន្តា. ននុ អរហតោ រាគោ បហីនោ ឧច្ឆិន្នមូលោ តាលាវត្ថុកតោ អនភាវង្កតោ [អនភាវកតោ (សី.)] អាយតិំ អនុប្បាទធម្មោតិ? អាមន្តា. ហញ្ចិ អរហតោ រាគោ បហីនោ ឧច្ឆិន្នមូលោ តាលាវត្ថុកតោ អនភាវង្កតោ អាយតិំ អនុប្បាទធម្មោ, នោ ច វត រេ [នោ វត រេ (ស្យា. បី.) ឯវមុបរិបិ] វត្តព្ពេ – ‘‘បរិហាយតិ អរហា អរហត្តា’’តិ.

បរិហាយតិ អរហា អរហត្តាតិ? អាមន្តា. ននុ អរហតោ ទោសោ បហីនោ…បេ… មោហោ បហីនោ… មានោ បហីនោ… ទិដ្ឋិ បហីនា… វិចិកិច្ឆា បហីនា… ថិនំ បហីនំ… ឧទ្ធច្ចំ បហីនំ… អហិរិកំ បហីនំ… អនោត្តប្បំ បហីនំ ឧច្ឆិន្នមូលំ តាលាវត្ថុកតំ អនភាវង្កតំ អាយតិំ អនុប្បាទធម្មន្តិ? អាមន្តា. ហញ្ចិ អរហតោ អនោត្តប្បំ បហីនំ ឧច្ឆិន្នមូលំ តាលាវត្ថុកតំ អនភាវង្កតំ អាយតិំ អនុប្បាទធម្មំ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

បរិហាយតិ អរហា អរហត្តាតិ? អាមន្តា. ននុ អរហតោ រាគប្បហានាយ មគ្គោ ភាវិតោតិ? អាមន្តា. ហញ្ចិ អរហតោ រាគប្បហានាយ មគ្គោ ភាវិតោ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

បរិហាយតិ អរហា អរហត្តាតិ? អាមន្តា. ននុ អរហតោ រាគប្បហានាយ សតិបដ្ឋានា ភាវិតា…បេ… សម្មប្បធានា ភាវិតា… ឥទ្ធិបាទា ភាវិតា… ឥន្ទ្រិយា ភាវិតា… ពលា ភាវិតា… ពោជ្ឈង្គា ភាវិតាតិ? អាមន្តា. ហញ្ចិ អរហតោ រាគប្បហានាយ ពោជ្ឈង្គា ភាវិតា, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

បរិហាយតិ អរហា អរហត្តាតិ? អាមន្តា. ននុ អរហតោ ទោសប្បហានាយ…បេ… អនោត្តប្បបហានាយ មគ្គោ ភាវិតោ…បេ… ពោជ្ឈង្គា ភាវិតាតិ? អាមន្តា. ហញ្ចិ អរហតោ អនោត្តប្បបហានាយ ពោជ្ឈង្គា ភាវិតា, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

២៦១. បរិហាយតិ អរហា អរហត្តាតិ? អាមន្តា. ននុ អរហា វីតរាគោ វីតទោសោ វីតមោហោ កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ ឧក្ខិត្តបលិឃោ សង្កិណ្ណបរិខោ អព្ពូឡ្ហេសិកោ និរគ្គឡោ អរិយោ បន្នទ្ធជោ បន្នភារោ វិសញ្ញុត្តោ សុវិជិតវិជយោ; ទុក្ខំ តស្ស បរិញ្ញាតំ, សមុទយោ បហីនោ, និរោធោ សច្ឆិកតោ, មគ្គោ ភាវិតោ, អភិញ្ញេយ្យំ អភិញ្ញាតំ, បរិញ្ញេយ្យំ បរិញ្ញាតំ, បហាតព្ពំ បហីនំ, ភាវេតព្ពំ ភាវិតំ, សច្ឆិកាតព្ពំ សច្ឆិកតន្តិ? អាមន្តា. ហញ្ចិ អរហា វីតរាគោ វីតទោសោ វីតមោហោ…បេ… សច្ឆិកាតព្ពំ សច្ឆិកតំ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

២៦២. បរិហាយតិ អរហា អរហត្តាតិ? ( ) [(អាមន្តា) (ក.)] សមយវិមុត្តោ អរហា អរហត្តា បរិហាយតិ, អសមយវិមុត្តោ អរហា អរហត្តា ន បរិហាយតីតិ. សមយវិមុត្តោ អរហា អរហត្តា បរិហាយតីតិ? អាមន្តា. អសមយវិមុត្តោ អរហា អរហត្តា បរិហាយតីតិ [ន បរិហាយតីតិ (ក.)]? ន ហេវំ វត្តព្ពេ.

អសមយវិមុត្តោ អរហា អរហត្តា ន បរិហាយតីតិ? អាមន្តា. សមយវិមុត្តោ អរហា អរហត្តា ន បរិហាយតីតិ? ន ហេវំ វត្តព្ពេ.

សមយវិមុត្តស្ស អរហតោ រាគោ បហីនោ, បរិហាយតិ សមយវិមុត្តោ អរហា អរហត្តាតិ? អាមន្តា. អសមយវិមុត្តស្ស អរហតោ រាគោ បហីនោ, បរិហាយតិ អសមយវិមុត្តោ អរហា អរហត្តាតិ? ន ហេវំ វត្តព្ពេ.

សមយវិមុត្តស្ស អរហតោ ទោសោ បហីនោ…បេ… អនោត្តប្បំ បហីនំ, បរិហាយតិ សមយវិមុត្តោ អរហា អរហត្តាតិ? អាមន្តា. អសមយវិមុត្តស្ស អរហតោ អនោត្តប្បំ បហីនំ, បរិហាយតិ អសមយវិមុត្តោ អរហា អរហត្តាតិ? ន ហេវំ វត្តព្ពេ.

សមយវិមុត្តស្ស អរហតោ រាគប្បហានាយ មគ្គោ ភាវិតោ, បរិហាយតិ សមយវិមុត្តោ អរហា អរហត្តាតិ? អាមន្តា. អសមយវិមុត្តស្ស អរហតោ រាគប្បហានាយ មគ្គោ ភាវិតោ, បរិហាយតិ អសមយវិមុត្តោ អរហា អរហត្តាតិ? ន ហេវំ វត្តព្ពេ.

សមយវិមុត្តស្ស អរហតោ រាគប្បហានាយ សតិបដ្ឋានា ភាវិតា…បេ… សម្មប្បធានា ភាវិតា… ឥទ្ធិបាទា ភាវិតា… ឥន្ទ្រិយា ភាវិតា… ពលា ភាវិតា… ពោជ្ឈង្គា ភាវិតា, បរិហាយតិ សមយវិមុត្តោ អរហា អរហត្តាតិ? អាមន្តា. អសមយវិមុត្តស្ស អរហតោ រាគប្បហានាយ សតិបដ្ឋានា ភាវិតា…បេ… ពោជ្ឈង្គា ភាវិតា, បរិហាយតិ អសមយវិមុត្តោ អរហា អរហត្តាតិ? ន ហេវំ វត្តព្ពេ.

សមយវិមុត្តស្ស អរហតោ ទោសប្បហានាយ…បេ… អនោត្តប្បបហានាយ មគ្គោ ភាវិតោ…បេ… ពោជ្ឈង្គា ភាវិតា, បរិហាយតិ សមយវិមុត្តោ អរហា អរហត្តាតិ? អាមន្តា. អសមយវិមុត្តស្ស អរហតោ អនោត្តប្បបហានាយ មគ្គោ ភាវិតោ…បេ… ពោជ្ឈង្គា ភាវិតា, បរិហាយតិ អសមយវិមុត្តោ អរហា អរហត្តាតិ? ន ហេវំ វត្តព្ពេ…បេ….

សមយវិមុត្តោ អរហា វីតរាគោ វីតទោសោ វីតមោហោ កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ ឧក្ខិត្តបលិឃោ សង្កិណ្ណបរិខោ អព្ពូឡ្ហេសិកោ និរគ្គឡោ អរិយោ បន្នទ្ធជោ បន្នភារោ វិសញ្ញុត្តោ សុវិជិតវិជយោ, ទុក្ខំ តស្ស បរិញ្ញាតំ, សមុទយោ បហីនោ, និរោធោ សច្ឆិកតោ, មគ្គោ ភាវិតោ, អភិញ្ញេយ្យំ អភិញ្ញាតំ, បរិញ្ញេយ្យំ បរិញ្ញាតំ, បហាតព្ពំ បហីនំ, ភាវេតព្ពំ ភាវិតំ, សច្ឆិកាតព្ពំ សច្ឆិកតំ, បរិហាយតិ សមយវិមុត្តោ អរហា អរហត្តាតិ? អាមន្តា. អសមយវិមុត្តោ អរហា វីតរាគោ វីតទោសោ វីតមោហោ…បេ… សច្ឆិកាតព្ពំ សច្ឆិកតំ, បរិហាយតិ អសមយវិមុត្តោ អរហា អរហត្តាតិ? ន ហេវំ វត្តព្ពេ.

២៦៣. អសមយវិមុត្តស្ស អរហតោ រាគោ បហីនោ, ន បរិហាយតិ អសមយវិមុត្តោ អរហា អរហត្តាតិ? អាមន្តា. សមយវិមុត្តស្ស អរហតោ រាគោ បហីនោ, ន បរិហាយតិ សមយវិមុត្តោ អរហា អរហត្តាតិ? ន ហេវំ វត្តព្ពេ.

អសមយវិមុត្តស្ស អរហតោ ទោសោ បហីនោ…បេ… អនោត្តប្បំ បហីនំ, ន បរិហាយតិ អសមយវិមុត្តោ អរហា អរហត្តាតិ? អាមន្តា. សមយវិមុត្តស្ស អរហតោ អនោត្តប្បំ បហីនំ, ន បរិហាយតិ សមយវិមុត្តោ អរហា អរហត្តាតិ? ន ហេវំ វត្តព្ពេ.

អសមយវិមុត្តស្ស អរហតោ រាគប្បហានាយ មគ្គោ ភាវិតោ…បេ… ពោជ្ឈង្គា ភាវិតា, ន បរិហាយតិ អសមយវិមុត្តោ អរហា អរហត្តាតិ? អាមន្តា. សមយវិមុត្តស្ស អរហតោ រាគប្បហានាយ មគ្គោ ភាវិតោ…បេ… ពោជ្ឈង្គា ភាវិតា, ន បរិហាយតិ សមយវិមុត្តោ អរហា អរហត្តាតិ? ន ហេវំ វត្តព្ពេ.

អសមយវិមុត្តស្ស អរហតោ ទោសប្បហានាយ…បេ… អនោត្តប្បបហានាយ មគ្គោ ភាវិតោ…បេ… ពោជ្ឈង្គា ភាវិតា, ន បរិហាយតិ អសមយវិមុត្តោ អរហា អរហត្តាតិ? អាមន្តា. សមយវិមុត្តស្ស អរហតោ អនោត្តប្បបហានាយ មគ្គោ ភាវិតោ…បេ… ពោជ្ឈង្គា ភាវិតា, ន បរិហាយតិ សមយវិមុត្តោ អរហា អរហត្តាតិ? ន ហេវំ វត្តព្ពេ.

អសមយវិមុត្តោ អរហា វីតរាគោ វីតទោសោ វីតមោហោ…បេ… សច្ឆិកាតព្ពំ សច្ឆិកតំ, ន បរិហាយតិ អសមយវិមុត្តោ អរហា អរហត្តាតិ? អាមន្តា. សមយវិមុត្តោ អរហា វីតរាគោ វីតទោសោ វីតមោហោ…បេ… សច្ឆិកាតព្ពំ សច្ឆិកតំ, ន បរិហាយតិ សមយវិមុត្តោ អរហា អរហត្តាតិ? ន ហេវំ វត្តព្ពេ…បេ….

២៦៤. បរិហាយតិ អរហា អរហត្តាតិ? អាមន្តា. សារិបុត្តោ ថេរោ បរិហាយិត្ថ អរហត្តាតិ? ន ហេវំ វត្តព្ពេ. មហាមោគ្គល្លានោ [មហាមោគ្គលានោ (ក.)] ថេរោ… មហាកស្សបោ ថេរោ… មហាកច្ចាយនោ [មហាកច្ចានោ (ម. និ. ១.២០២ អាទយោ)] ថេរោ… មហាកោដ្ឋិកោ [មហាកោដ្ឋិតោ (សី. ស្យា. កំ. បី.)] ថេរោ… មហាបន្ថកោ ថេរោ បរិហាយិត្ថ អរហត្តាតិ? ន ហេវំ វត្តព្ពេ.

សារិបុត្តោ ថេរោ ន បរិហាយិត្ថ អរហត្តាតិ? អាមន្តា. ហញ្ចិ សារិបុត្តោ ថេរោ ន បរិហាយិត្ថ អរហត្តា, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

មហាមោគ្គល្លានោ ថេរោ… មហាកស្សបោ ថេរោ… មហាកច្ចាយនោ ថេរោ… មហាកោដ្ឋិកោ ថេរោ… មហាបន្ថកោ ថេរោ ន បរិហាយិត្ថ អរហត្តាតិ? អាមន្តា. ហញ្ចិ មហាបន្ថកោ ថេរោ ន បរិហាយិត្ថ អរហត្តា, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

អរិយបុគ្គលសំសន្ទនំ.

៣. សុត្តសាធនបរិហានិ

២៦៥. បរិហាយតិ អរហា អរហត្តាតិ? អាមន្តា. ននុ វុត្តំ ភគវតា –

‘‘ឧច្ចាវចា ហិ បដិបទា [បដិបាទា (អដ្ឋ.)], សមណេន បកាសិតា;

ន បារំ ទិគុណំ យន្តិ, នយិទំ ឯកគុណំ មុត’’ន្តិ [សុ. និ. ៧១៩ សុត្តនិបាតេ].

អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘បរិហាយតិ អរហា អរហត្តា’’តិ.

បរិហាយតិ អរហា អរហត្តាតិ? អាមន្តា. អត្ថិ ឆិន្នស្ស ឆេទិយន្តិ? ន ហេវំ វត្តព្ពេ.

អត្ថិ ឆិន្នស្ស ឆេទិយន្តិ? អាមន្តា. ននុ វុត្តំ ភគវតា –

‘‘វីតតណ្ហោ អនាទានោ, កិច្ចំ យស្ស ន វិជ្ជតិ;

ឆិន្នស្ស ឆេទិយំ នត្ថិ, ឱឃបាសោ សមូហតោ’’តិ.

អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អត្ថិ ឆិន្នស្ស ឆេទិយ’’ន្តិ.

២៦៦. បរិហាយតិ អរហា អរហត្តាតិ? អាមន្តា. អត្ថិ កតស្ស បតិចយោតិ? ន ហេវំ វត្តព្ពេ.

អត្ថិ កតស្ស បតិចយោតិ? អាមន្តា. ននុ វុត្តំ ភគវតា –

‘‘តស្ស សម្មា វិមុត្តស្ស, សន្តចិត្តស្ស ភិក្ខុនោ;

កតស្ស បតិចយោ នត្ថិ, ករណីយំ ន វិជ្ជតិ.

‘‘សេលោ យថា ឯកគ្ឃនោ, វាតេន ន សមីរតិ;

ឯវំ រូបា រសា សទ្ទា, គន្ធា ផស្សា ច កេវលា.

‘‘ឥដ្ឋា ធម្មា អនិដ្ឋា ច, នប្បវេធេន្តិ តាទិនោ;

ឋិតំ ចិត្តំ វិប្បមុត្តំ, វយំ ចស្សានុបស្សតី’’តិ [មហាវ. ២៤៤; អ. និ. ៦.៥៥].

អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘អត្ថិ កតស្ស បតិចយោ’’តិ.

២៦៧. ន វត្តព្ពំ – ‘‘បរិហាយតិ អរហា អរហត្តា’’តិ? អាមន្តា. ននុ វុត្តំ ភគវតា – ‘‘បញ្ចិមេ, ភិក្ខវេ, ធម្មា សមយវិមុត្តស្ស ភិក្ខុនោ បរិហានាយ សំវត្តន្តិ. កតមេ បញ្ច? កម្មារាមតា, ភស្សារាមតា, និទ្ទារាមតា, សង្គណិការាមតា, យថាវិមុត្តំ ចិត្តំ ន បច្ចវេក្ខតិ. ឥមេ ខោ, ភិក្ខវេ, បញ្ច ធម្មា សមយវិមុត្តស្ស ភិក្ខុនោ បរិហានាយ សំវត្តន្តី’’តិ [អ. និ. ៥.១៤៩]. អត្ថេវ សុត្តន្តោតិ? អាមន្តា. តេន ហិ បរិហាយតិ អរហា អរហត្តាតិ.

អត្ថិ អរហតោ កម្មារាមតាតិ? ន ហេវំ វត្តព្ពេ.

អត្ថិ អរហតោ កម្មារាមតាតិ? អាមន្តា. អត្ថិ អរហតោ រាគោ កាមរាគោ កាមរាគបរិយុដ្ឋានំ កាមរាគសំយោជនំ កាមោឃោ កាមយោគោ កាមច្ឆន្ទនីវរណន្តិ? ន ហេវំ វត្តព្ពេ.

អត្ថិ អរហតោ ភស្សារាមតា, អត្ថិ អរហតោ និទ្ទារាមតា, អត្ថិ អរហតោ សង្គណិការាមតាតិ? ន ហេវំ វត្តព្ពេ.

អត្ថិ អរហតោ សង្គណិការាមតាតិ? អាមន្តា. អត្ថិ អរហតោ រាគោ កាមរាគោ កាមរាគបរិយុដ្ឋានំ កាមរាគសំយោជនំ កាមោឃោ កាមយោគោ កាមច្ឆន្ទនីវរណន្តិ? ន ហេវំ វត្តព្ពេ.

២៦៨. បរិហាយតិ អរហា អរហត្តាតិ? អាមន្តា. អរហា អរហត្តា បរិហាយមានោ កិំ បរិយុដ្ឋិតោ បរិហាយតីតិ? រាគបរិយុដ្ឋិតោ បរិហាយតីតិ. បរិយុដ្ឋានំ កិំ បដិច្ច ឧប្បជ្ជតីតិ? អនុសយំ បដិច្ច ឧប្បជ្ជតីតិ. អត្ថិ អរហតោ អនុសយាតិ? ន ហេវំ វត្តព្ពេ.

អត្ថិ អរហតោ អនុសយាតិ? អាមន្តា. អត្ថិ អរហតោ កាមរាគានុសយោ បដិឃានុសយោ មានានុសយោ ទិដ្ឋានុសយោ វិចិកិច្ឆានុសយោ ភវរាគានុសយោ អវិជ្ជានុសយោតិ? ន ហេវំ វត្តព្ពេ.

ទោសបរិយុដ្ឋិតោ បរិហាយតីតិ…បេ… មោហបរិយុដ្ឋិតោ បរិហាយតីតិ…. បរិយុដ្ឋានំ កិំ បដិច្ច ឧប្បជ្ជតីតិ? អនុសយំ បដិច្ច ឧប្បជ្ជតីតិ. អត្ថិ អរហតោ អនុសយាតិ? ន ហេវំ វត្តព្ពេ…បេ….

អត្ថិ អរហតោ អនុសយាតិ? អាមន្តា. អត្ថិ អរហតោ កាមរាគានុសយោ…បេ… អវិជ្ជានុសយោតិ? ន ហេវំ វត្តព្ពេ.

បរិហាយតិ អរហា អរហត្តាតិ? អាមន្តា. អរហតោ អរហត្តា បរិហាយមានស្ស កិំ ឧបចយំ គច្ឆតីតិ? រាគោ ឧបចយំ គច្ឆតីតិ. សក្កាយទិដ្ឋិ ឧបចយំ គច្ឆតីតិ, វិចិកិច្ឆា ឧបចយំ គច្ឆតីតិ, សីលព្ពតបរាមាសោ ឧបចយំ គច្ឆតីតិ? ន ហេវំ វត្តព្ពេ. ទោសោ ឧបចយំ គច្ឆតីតិ…បេ… មោហោ ឧបចយំ គច្ឆតីតិ, សក្កាយទិដ្ឋិ ឧបចយំ គច្ឆតីតិ, វិចិកិច្ឆា ឧបចយំ គច្ឆតីតិ, សីលព្ពតបរាមាសោ ឧបចយំ គច្ឆតីតិ? ន ហេវំ វត្តព្ពេ.

បរិហាយតិ អរហា អរហត្តាតិ? អាមន្តា. អរហា អាចិនតីតិ? ន ហេវំ វត្តព្ពេ. អរហា អបចិនតីតិ? ន ហេវំ វត្តព្ពេ. អរហា បជហតីតិ? ន ហេវំ វត្តព្ពេ. អរហា ឧបាទិយតីតិ? ន ហេវំ វត្តព្ពេ. អរហា វិសិនេតីតិ? ន ហេវំ វត្តព្ពេ. អរហា ឧស្សិនេតីតិ? ន ហេវំ វត្តព្ពេ. អរហា វិធូបេតីតិ? ន ហេវំ វត្តព្ពេ. អរហា សន្ធូបេតីតិ? ន ហេវំ វត្តព្ពេ.

ននុ អរហា នេវាចិនតិ ន អបចិនតិ អបចិនិត្វា ឋិតោតិ? អាមន្តា. ហញ្ចិ អរហា នេវាចិនតិ ន អបចិនតិ អបចិនិត្វា ឋិតោ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

ននុ អរហា នេវ បជហតិ ន ឧបាទិយតិ បជហិត្វា ឋិតោតិ? អាមន្តា. ហញ្ចិ អរហា នេវ បជហតិ ន ឧបាទិយតិ បជហិត្វា ឋិតោ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

ននុ អរហា នេវ វិសិនេតិ ន ឧស្សិនេតិ វិសិនិត្វា ឋិតោតិ? អាមន្តា. ហញ្ចិ អរហា នេវ វិសិនេតិ ន ឧស្សិនេតិ វិសិនិត្វា ឋិតោ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

ននុ អរហា នេវ វិធូបេតិ ន សន្ធូបេតិ វិធូបេត្វា ឋិតោតិ? អាមន្តា. ហញ្ចិ អរហា នេវ វិធូបេតិ ន សន្ធូបេតិ វិធូបេត្វា ឋិតោ, នោ ច វត រេ វត្តព្ពេ – ‘‘បរិហាយតិ អរហា អរហត្តា’’តិ.

បរិហានិកថា និដ្ឋិតា.