(៨០) ៨. អរូបេ រូបកថា

៥២៤. អត្ថិ រូបំ អរូបេសូតិ? អាមន្តា. រូបភវោ រូបគតិ រូបសត្តាវាសោ រូបសំសារោ រូបយោនិ រូបត្តភាវបដិលាភោតិ? ន ហេវំ វត្តព្ពេ…បេ… ននុ អរូបភវោ អរូបគតិ អរូបសត្តាវាសោ អរូបសំសារោ អរូបយោនិ អរូបត្តភាវបដិលាភោតិ? អាមន្តា. ហញ្ចិ អរូបភវោ…បេ… អរូបត្តភាវបដិលាភោ, នោ ច វត រេ វត្តព្ពេ – ‘‘អត្ថិ រូបំ អរូបេសូ’’តិ.

អត្ថិ រូបំ អរូបេសូតិ? អាមន្តា. បញ្ចវោការភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… ននុ ចតុវោការភវោ…បេ… អត្តភាវបដិលាភោតិ? អាមន្តា. ហញ្ចិ ចតុវោការភវោ គតិ…បេ… អត្តភាវបដិលាភោ, នោ ច វត រេ វត្តព្ពេ – ‘‘អត្ថិ រូបំ អរូបេសូ’’តិ.

៥២៥. អត្ថិ រូបំ រូបធាតុយា, សោ ច រូបភវោ រូបគតិ រូបសត្តាវាសោ រូបសំសារោ រូបយោនិ រូបត្តភាវបដិលាភោតិ? អាមន្តា. អត្ថិ រូបំ អរូបេសុ, សោ ច រូបភវោ រូបគតិ…បេ… រូបត្តភាវបដិលាភោតិ? ន ហេវំ វត្តព្ពេ…បេ… អត្ថិ រូបំ រូបធាតុយា, សោ ច បញ្ចវោការភវោ គតិ…បេ… អត្តភាវបដិលាភោតិ? អាមន្តា. អត្ថិ រូបំ អរូបេសុ, សោ ច បញ្ចវោការភវោ គតិ…បេ… អត្តភាវបដិលាភោតិ? ន ហេវំ វត្តព្ពេ…បេ…. អត្ថិ រូបំ អរូបេសុ, សោ ច អរូបភវោ អរូបគតិ អរូបសត្តាវាសោ អរូបសំសារោ អរូបយោនិ អរូបត្តភាវបដិលាភោតិ? អាមន្តា. អត្ថិ រូបំ រូបធាតុយា [អរូបធាតុយា (សព្ពត្ថ)], សោ ច អរូបភវោ អរូបគតិ…បេ… អរូបត្តភាវបដិលាភោតិ? ន ហេវំ វត្តព្ពេ…បេ… អត្ថិ រូបំ អរូបេសុ, សោ ច ចតុវោការភវោ គតិ…បេ… អត្តភាវបដិលាភោតិ? អាមន្តា. អត្ថិ រូបំ រូបធាតុយា [អរូបធាតុយា (សព្ពត្ថ)], សោ ច ចតុវោការភវោ គតិ…បេ… អត្តភាវបដិលាភោតិ? ន ហេវំ វត្តព្ពេ…បេ….

៥២៦. អត្ថិ រូបំ អរូបេសូតិ? អាមន្តា. ននុ រូបានំ និស្សរណំ អរូបំ [ឥតិវុ. ៧២; អ. និ. ៥.២០០; ទី. និ. ៣.៣២១] វុត្តំ ភគវតាតិ? អាមន្តា. ហញ្ចិ រូបានំ និស្សរណំ អរូបំ [ឥតិវុ. ៧២; អ. និ. ៥.២០០; ទី. និ. ៣.៣២១] វុត្តំ ភគវតា, នោ ច វត រេ វត្តព្ពេ – ‘‘អត្ថិ រូបំ អរូបេសូ’’តិ.

រូបានំ និស្សរណំ អរូបំ វុត្តំ ភគវតា, អត្ថិ រូបំ អរូបេសូតិ? អាមន្តា. កាមានំ និស្សរណំ នេក្ខម្មំ វុត្តំ ភគវតា, អត្ថិ នេក្ខម្មេសុ កាមា, អត្ថិ អនាសវេសុ អាសវា, អត្ថិ អបរិយាបន្នេសុ បរិយាបន្នាតិ? ន ហេវំ វត្តព្ពេ…បេ….

អរូបេ រូបកថា និដ្ឋិតា.