៨. អដ្ឋមវគ្គោ

(៧៧) ៥. រូបធាតុកថា

៥១៥. រូបិនោ ធម្មា រូបធាតូតិ? អាមន្តា. រូបំ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… អត្ថិ រូបូបគំ កម្មន្តិ? ន ហេវំ វត្តព្ពេ…បេ… អត្ថិ រូបូបគា សត្តាតិ? ន ហេវំ វត្តព្ពេ…បេ… រូបេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… រូបេ អត្ថិ រូបំ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… រូបំ បញ្ចវោការភវោតិ? ន ហេវំ វត្តព្ពេ…បេ….

រូបធាតុ ភវោ គតិ…បេ… អត្តភាវបដិលាភោតិ? អាមន្តា. រូបំ ភវោ គតិ…បេ… អត្តភាវបដិលាភោតិ? ន ហេវំ វត្តព្ពេ…បេ… អត្ថិ រូបធាតូបគំ កម្មន្តិ? អាមន្តា. អត្ថិ រូបូបគំ កម្មន្តិ? ន ហេវំ វត្តព្ពេ…បេ… អត្ថិ រូបធាតូបគា សត្តាតិ? អាមន្តា. អត្ថិ រូបូបគា សត្តាតិ? ន ហេវំ វត្តព្ពេ…បេ….

រូបធាតុយា សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? អាមន្តា. រូបេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… រូបធាតុយា អត្ថិ រូបំ វេទនា សញ្ញា សង្ខារា វិញ្ញាណន្តិ? អាមន្តា. រូបេ អត្ថិ រូបំ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… រូបធាតុ បញ្ចវោការភវោតិ? អាមន្តា. រូបំ បញ្ចវោការភវោតិ? ន ហេវំ វត្តព្ពេ…បេ….

៥១៦. រូបិនោ ធម្មា រូបធាតុ, កាមធាតុយា អត្ថិ រូបន្តិ? អាមន្តា. សាវ កាមធាតុ, សា រូបធាតូតិ? ន ហេវំ វត្តព្ពេ…បេ… សាវ កាមធាតុ, សា រូបធាតូតិ? អាមន្តា. កាមភវេន សមន្នាគតោ បុគ្គលោ ទ្វីហិ ភវេហិ សមន្នាគតោ ហោតិ – កាមភវេន ច រូបភវេន ចាតិ? ន ហេវំ វត្តព្ពេ.

រូបធាតុកថា និដ្ឋិតា.