៨. អដ្ឋមវគ្គោ

(៧៨) ៦. អរូបធាតុកថា

៥១៧. អរូបិនោ ធម្មា អរូបធាតូតិ? អាមន្តា. វេទនា ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… អត្ថិ វេទនូបគំ កម្មន្តិ? ន ហេវំ វត្តព្ពេ…បេ… អត្ថិ វេទនូបគា សត្តាតិ? ន ហេវំ វត្តព្ពេ…បេ… វេទនាយ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… វេទនាយ អត្ថិ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… វេទនា ចតុវោការភវោតិ? ន ហេវំ វត្តព្ពេ…បេ….

អរូបធាតុ ភវោ គតិ…បេ… អត្តភាវបដិលាភោតិ? អាមន្តា. វេទនា ភវោ គតិ…បេ… អត្តភាវបដិលាភោតិ? ន ហេវំ វត្តព្ពេ…បេ… អត្ថិ អរូបធាតូបគំ កម្មន្តិ? អាមន្តា. អត្ថិ វេទនូបគំ កម្មន្តិ? ន ហេវំ វត្តព្ពេ…បេ… អត្ថិ អរូបធាតូបគា សត្តាតិ? អាមន្តា. អត្ថិ វេទនូបគា សត្តាតិ? ន ហេវំ វត្តព្ពេ…បេ….

អរូបធាតុយា សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? អាមន្តា. វេទនាយ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… អរូបធាតុយា អត្ថិ វេទនា សញ្ញា សង្ខារា វិញ្ញាណន្តិ? អាមន្តា. វេទនាយ អត្ថិ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… អរូបធាតុ ចតុវោការភវោតិ? អាមន្តា. វេទនា ចតុវោការភវោតិ? ន ហេវំ វត្តព្ពេ…បេ….

៥១៨. អរូបិនោ ធម្មា អរូបធាតុ, កាមធាតុយា អត្ថិ វេទនា សញ្ញា សង្ខារា វិញ្ញាណន្តិ? អាមន្តា. សាវ កាមធាតុ, សា អរូបធាតូតិ? ន ហេវំ វត្តព្ពេ…បេ… សាវ កាមធាតុ, សា អរូបធាតូតិ? អាមន្តា. កាមភវេន សមន្នាគតោ បុគ្គលោ ទ្វីហិ ភវេហិ សមន្នាគតោ ហោតិ – កាមភវេន ច អរូបភវេន ចាតិ? ន ហេវំ វត្តព្ពេ…បេ….

រូបិនោ ធម្មា រូបធាតុ, អរូបិនោ ធម្មា អរូបធាតុ, កាមធាតុយា អត្ថិ រូបំ វេទនា សញ្ញា សង្ខារា វិញ្ញាណន្តិ? អាមន្តា. សាវ កាមធាតុ, សា រូបធាតុ, សា អរូបធាតូតិ? ន ហេវំ វត្តព្ពេ…បេ… សាវ កាមធាតុ, សា រូបធាតុ, សា អរូបធាតូតិ? អាមន្តា. កាមភវេន សមន្នាគតោ បុគ្គលោ តីហិ ភវេហិ សមន្នាគតោ ហោតិ – កាមភវេន ច រូបភវេន ច អរូបភវេន ចាតិ? ន ហេវំ វត្តព្ពេ…បេ….

អរូបធាតុកថា និដ្ឋិតា.