៨. អដ្ឋមវគ្គោ

(៧៦) ៤. កាមកថា

៥១៣. បញ្ចេវាយតនា កាមាតិ? អាមន្តា. ននុ អត្ថិ តប្បដិសំយុត្តោ ឆន្ទោតិ? អាមន្តា. ហញ្ចិ អត្ថិ តប្បដិសំយុត្តោ ឆន្ទោ, នោ ច វត រេ វត្តព្ពេ – ‘‘បញ្ចេវាយតនា កាមា’’តិ. ននុ អត្ថិ តប្បដិសំយុត្តោ រាគោ តប្បដិសំយុត្តោ ឆន្ទោ តប្បដិសំយុត្តោ ឆន្ទរាគោ តប្បដិសំយុត្តោ សង្កប្បោ តប្បដិសំយុត្តោ រាគោ តប្បដិសំយុត្តោ សង្កប្បរាគោ តប្បដិសំយុត្តា បីតិ តប្បដិសំយុត្តំ សោមនស្សំ តប្បដិសំយុត្តំ បីតិសោមនស្សន្តិ? អាមន្តា. ហញ្ចិ អត្ថិ តប្បដិសំយុត្តំ បីតិសោមនស្សំ, នោ ច វត រេ វត្តព្ពេ – ‘‘បញ្ចេវាយតនា កាមា’’តិ.

៥១៤. ន វត្តព្ពំ – ‘‘បញ្ចេវាយតនា កាមា’’តិ? អាមន្តា. ននុ វុត្តំ ភគវតា – ‘‘បញ្ចិមេ, ភិក្ខវេ, កាមគុណា! កតមេ បញ្ច? ចក្ខុវិញ្ញេយ្យា រូបា…បេ… កាយវិញ្ញេយ្យា ផោដ្ឋព្ពា ឥដ្ឋា កន្តា មនាបា បិយរូបា កាមូបសំហិតា រជនីយា – ឥមេ ខោ, ភិក្ខវេ, បញ្ច កាមគុណា’’តិ. អត្ថេវ សុត្តន្តោតិ? អាមន្តា. តេន ហិ បញ្ចេវាយតនា កាមាតិ.

បញ្ចេវាយតនា កាមាតិ? អាមន្តា. ននុ វុត្តំ ភគវតា – ‘‘បញ្ចិមេ, ភិក្ខវេ, កាមគុណា! កតមេ បញ្ច? ចក្ខុវិញ្ញេយ្យា រូបា…បេ… កាយវិញ្ញេយ្យា ផោដ្ឋព្ពា ឥដ្ឋា កន្តា មនាបា បិយរូបា កាមូបសំហិតា រជនីយា – ឥមេ ខោ, ភិក្ខវេ, បញ្ច កាមគុណា. អបិ ច, ភិក្ខវេ, នេតេ កាមា កាមគុណា នាមេតេ អរិយស្ស វិនយេ វុច្ច’’ន្តិ –

‘‘សង្កប្បរាគោ បុរិសស្ស កាមោ,

ន តេ កាមា យានិ ចិត្រានិ លោកេ;

សង្កប្បរាគោ បុរិសស្ស កាមោ,

តិដ្ឋន្តិ ចិត្រានិ តថេវ លោកេ;

អថេត្ថ ធីរា វិនយន្តិ ឆន្ទ’’ន្តិ [អ. និ. ៦.៦៣ និព្ពេធិកសុត្តេ].

អត្ថេវ សុត្តន្តោតិ? អាមន្តា. តេន ហិ ន វត្តព្ពំ – ‘‘បញ្ចេវាយតនា កាមា’’តិ.

កាមកថា និដ្ឋិតា.