៨. អដ្ឋមវគ្គោ

(៧៤) ២. អន្តរាភវកថា

៥០៥. អត្ថិ អន្តរាភវោតិ? អាមន្តា. កាមភវោតិ? ន ហេវំ វត្តព្ពេ…បេ… អត្ថិ អន្តរាភវោតិ? អាមន្តា. រូបភវោតិ? ន ហេវំ វត្តព្ពេ…បេ… អត្ថិ អន្តរាភវោតិ? អាមន្តា. អរូបភវោតិ? ន ហេវំ វត្តព្ពេ…បេ… អត្ថិ អន្តរាភវោតិ? អាមន្តា. កាមភវស្ស ច រូបភវស្ស ច អន្តរេ អត្ថិ អន្តរាភវោតិ? ន ហេវំ វត្តព្ពេ…បេ… អត្ថិ អន្តរាភវោតិ? អាមន្តា. រូបភវស្ស ច អរូបភវស្ស ច អន្តរេ អត្ថិ អន្តរាភវោតិ? ន ហេវំ វត្តព្ពេ…បេ….

កាមភវស្ស ច រូបភវស្ស ច អន្តរេ នត្ថិ អន្តរាភវោតិ? អាមន្តា. ហញ្ចិ កាមភវស្ស ច រូបភវស្ស ច អន្តរេ នត្ថិ អន្តរាភវោ, នោ ច វត រេ វត្តព្ពេ – ‘‘អត្ថិ អន្តរាភវោ’’តិ. រូបភវស្ស ច អរូបភវស្ស ច អន្តរេ នត្ថិ អន្តរាភវោតិ? អាមន្តា. ហញ្ចិ រូបភវស្ស ច អរូបភវស្ស ច អន្តរេ នត្ថិ អន្តរាភវោ, នោ ច វត រេ វត្តព្ពេ – ‘‘អត្ថិ អន្តរាភវោ’’តិ.

៥០៦. អត្ថិ អន្តរាភវោតិ? អាមន្តា. បញ្ចមី សា យោនិ, ឆដ្ឋមី សា គតិ, អដ្ឋមី សា វិញ្ញាណដ្ឋិតិ, ទសមោ សោ សត្តាវាសោតិ? ន ហេវំ វត្តព្ពេ…បេ… អត្ថិ អន្តរាភវោតិ? អាមន្តា. អន្តរាភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… អត្ថិ អន្តរាភវូបគំ កម្មន្តិ? ន ហេវំ វត្តព្ពេ…បេ… អត្ថិ អន្តរាភវូបគា សត្តាតិ? ន ហេវំ វត្តព្ពេ…បេ… អន្តរាភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… អន្តរាភវេ អត្ថិ រូបំ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… អន្តរាភវោ បញ្ចវោការភវោតិ? ន ហេវំ វត្តព្ពេ…បេ….

៥០៧. អត្ថិ កាមភវោ, កាមភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? អាមន្តា. អត្ថិ អន្តរាភវោ, អន្តរាភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… អត្ថិ កាមភវូបគំ កម្មន្តិ? អាមន្តា. អត្ថិ អន្តរាភវូបគំ កម្មន្តិ? ន ហេវំ វត្តព្ពេ…បេ… អត្ថិ កាមភវូបគា សត្តាតិ? អាមន្តា. អត្ថិ អន្តរាភវូបគា សត្តាតិ? ន ហេវំ វត្តព្ពេ…បេ… កាមភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? អាមន្តា. អន្តរាភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… កាមភវេ អត្ថិ រូបំ វេទនា សញ្ញា សង្ខារា វិញ្ញាណន្តិ? អាមន្តា. អន្តរាភវេ អត្ថិ រូបំ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… កាមភវោ បញ្ចវោការភវោតិ? អាមន្តា. អន្តរាភវោ បញ្ចវោការភវោតិ? ន ហេវំ វត្តព្ពេ…បេ….

អត្ថិ រូបភវោ, រូបភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? អាមន្តា. អត្ថិ អន្តរាភវោ, អន្តរាភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… អត្ថិ រូបភវូបគំ កម្មន្តិ? អាមន្តា. អត្ថិ អន្តរាភវូបគំ កម្មន្តិ? ន ហេវំ វត្តព្ពេ…បេ… អត្ថិ រូបភវូបគា សត្តាតិ? អាមន្តា. អត្ថិ អន្តរាភវូបគា សត្តាតិ? ន ហេវំ វត្តព្ពេ…បេ… រូបភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? អាមន្តា. អន្តរាភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… រូបភវេ អត្ថិ រូបំ វេទនា សញ្ញា សង្ខារា វិញ្ញាណន្តិ? អាមន្តា. អន្តរាភវេ អត្ថិ រូបំ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… រូបភវោ បញ្ចវោការភវោតិ? អាមន្តា. អន្តរាភវោ បញ្ចវោការភវោតិ? ន ហេវំ វត្តព្ពេ…បេ….

អត្ថិ អរូបភវោ, អរូបភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? អាមន្តា. អត្ថិ អន្តរាភវោ, អន្តរាភវោ ភវោ គតិ សត្តាវាសោ សំសារោ យោនិ វិញ្ញាណដ្ឋិតិ អត្តភាវបដិលាភោតិ? ន ហេវំ វត្តព្ពេ…បេ… អត្ថិ អរូបភវូបគំ កម្មន្តិ? អាមន្តា. អត្ថិ អន្តរាភវូបគំ កម្មន្តិ? ន ហេវំ វត្តព្ពេ…បេ… អត្ថិ អរូបភវូបគា សត្តាតិ? អាមន្តា. អត្ថិ អន្តរាភវូបគា សត្តាតិ? ន ហេវំ វត្តព្ពេ…បេ… អរូបភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? អាមន្តា. អន្តរាភវេ សត្តា ជាយន្តិ ជីយន្តិ មីយន្តិ ចវន្តិ ឧបបជ្ជន្តីតិ? ន ហេវំ វត្តព្ពេ…បេ… អរូបភវេ អត្ថិ វេទនា សញ្ញា សង្ខារា វិញ្ញាណន្តិ? អាមន្តា. អន្តរាភវេ អត្ថិ វេទនា សញ្ញា សង្ខារា វិញ្ញាណន្តិ? ន ហេវំ វត្តព្ពេ…បេ… អរូបភវោ ចតុវោការភវោតិ? អាមន្តា. អន្តរាភវោ ចតុវោការភវោតិ? ន ហេវំ វត្តព្ពេ…បេ….

៥០៨. អត្ថិ អន្តរាភវោតិ? អាមន្តា. សព្ពេសញ្ញេវ សត្តានំ អត្ថិ អន្តរាភវោតិ? ន ហេវំ វត្តព្ពេ …បេ… សព្ពេសញ្ញេវ សត្តានំ នត្ថិ អន្តរាភវោតិ? អាមន្តា. ហញ្ចិ សព្ពេសញ្ញេវ សត្តានំ នត្ថិ អន្តរាភវោ, នោ ច វត រេ វត្តព្ពេ – ‘‘អត្ថិ អន្តរាភវោ’’តិ.

អត្ថិ អន្តរាភវោតិ? អាមន្តា. អានន្តរិយស្ស បុគ្គលស្ស អត្ថិ អន្តរាភវោតិ? ន ហេវំ វត្តព្ពេ…បេ… អានន្តរិយស្ស បុគ្គលស្ស នត្ថិ អន្តរាភវោតិ? អាមន្តា. ហញ្ចិ អានន្តរិយស្ស បុគ្គលស្ស នត្ថិ អន្តរាភវោ, នោ ច វត រេ វត្តព្ពេ – ‘‘អត្ថិ អន្តរាភវោ’’តិ.

ន អានន្តរិយស្ស បុគ្គលស្ស អត្ថិ អន្តរាភវោតិ? អាមន្តា. អានន្តរិយស្ស បុគ្គលស្ស អត្ថិ អន្តរាភវោតិ? ន ហេវំ វត្តព្ពេ…បេ… អានន្តរិយស្ស បុគ្គលស្ស នត្ថិ អន្តរាភវោតិ? អាមន្តា. ន អានន្តរិយស្ស បុគ្គលស្ស នត្ថិ អន្តរាភវោតិ? ន ហេវំ វត្តព្ពេ…បេ… និរយូបគស្ស បុគ្គលស្ស…បេ… អសញ្ញសត្តូបគស្ស បុគ្គលស្ស …បេ… អរូបូបគស្ស បុគ្គលស្ស អត្ថិ អន្តរាភវោតិ? ន ហេវំ វត្តព្ពេ…បេ… អរូបូបគស្ស បុគ្គលស្ស នត្ថិ អន្តរាភវោតិ? អាមន្តា. ហញ្ចិ អរូបូបគស្ស បុគ្គលស្ស នត្ថិ អន្តរាភវោ, នោ ច វត រេ វត្តព្ពេ – ‘‘អត្ថិ អន្តរាភវោ’’តិ.

ន អរូបូបគស្ស បុគ្គលស្ស អត្ថិ អន្តរាភវោតិ? អាមន្តា. អរូបូបគស្ស បុគ្គលស្ស អត្ថិ អន្តរាភវោតិ? ន ហេវំ វត្តព្ពេ…បេ… អរូបូបគស្ស បុគ្គលស្ស នត្ថិ អន្តរាភវោតិ? អាមន្តា. ន អរូបូបគស្ស បុគ្គលស្ស នត្ថិ អន្តរាភវោតិ? ន ហេវំ វត្តព្ពេ…បេ….

៥០៩. ន វត្តព្ពំ អត្ថិ អន្តរាភវោតិ? អាមន្តា. ននុ អន្តរាបរិនិព្ពាយី បុគ្គលោ អត្ថីតិ? អាមន្តា. ហញ្ចិ អន្តរាបរិនិព្ពាយី បុគ្គលោ អត្ថិ, តេន វត រេ [នោ ច វត រេ (សី. ក.), នោ វត រេ (ស្យា.)] វត្តព្ពេ – ‘‘អត្ថិ អន្តរាភវោ’’តិ.

អន្តរាបរិនិព្ពាយី បុគ្គលោ អត្ថីតិ កត្វា អត្ថិ អន្តរាភវោតិ? អាមន្តា. ឧបហច្ចបរិនិព្ពាយី បុគ្គលោ អត្ថីតិ កត្វា អត្ថិ ឧបហច្ចភវោតិ? ន ហេវំ វត្តព្ពេ…បេ… អន្តរាបរិនិព្ពាយី បុគ្គលោ អត្ថីតិ កត្វា អត្ថិ អន្តរាភវោតិ? អាមន្តា. អសង្ខារបរិនិព្ពាយី បុគ្គលោ…បេ… សសង្ខារបរិនិព្ពាយី បុគ្គលោ អត្ថីតិ កត្វា អត្ថិ សសង្ខារភវោតិ? ន ហេវំ វត្តព្ពេ…បេ….

អន្តរាភវកថា និដ្ឋិតា.