៨. អដ្ឋមវគ្គោ

(៨៣) ១១. កម្មហេតុកថា

៥៤៦. កម្មហេតុ អរហា អរហត្តា បរិហាយតីតិ? អាមន្តា. កម្មហេតុ សោតាបន្នោ សោតាបត្តិផលា បរិហាយតីតិ? ន ហេវំ វត្តព្ពេ…បេ… កម្មហេតុ អរហា អរហត្តា បរិហាយតីតិ? អាមន្តា. កម្មហេតុ សកទាគាមី…បេ… អនាគាមី អនាគាមិផលា បរិហាយតីតិ? ន ហេវំ វត្តព្ពេ…បេ….

កម្មហេតុ សោតាបន្នោ សោតាបត្តិផលា ន បរិហាយតីតិ? អាមន្តា. កម្មហេតុ អរហា អរហត្តា ន បរិហាយតីតិ? ន ហេវំ វត្តព្ពេ …បេ… កម្មហេតុ សកទាគាមី…បេ… អនាគាមី អនាគាមិផលា ន បរិហាយតីតិ? អាមន្តា. កម្មហេតុ អរហា អរហត្តា ន បរិហាយតីតិ? ន ហេវំ វត្តព្ពេ…បេ….

កម្មហេតុ អរហា អរហត្តា បរិហាយតីតិ? អាមន្តា. បាណាតិបាតកម្មស្ស ហេតូតិ? ន ហេវំ វត្តព្ពេ…បេ… អទិន្នាទានកម្មស្ស ហេតុ…បេ… កាមេសុមិច្ឆាចារកម្មស្ស ហេតុ… មុសាវាទកម្មស្ស ហេតុ… បិសុណវាចាកម្មស្ស ហេតុ… ផរុសវាចាកម្មស្ស ហេតុ… សម្ផប្បលាបកម្មស្ស ហេតុ… មាតុឃាតកម្មស្ស [មាតុឃាតកកម្មស្ស (ស្យា.), មាតុឃាតិកម្មស្ស (ក.) តថា បិតុឃាតអរហន្តឃាតកម្មស្សាតិបទេសុ] ហេតុ… បិតុឃាតកម្មស្ស ហេតុ… អរហន្តឃាតកម្មស្ស ហេតុ… រុហិរុប្បាទកម្មស្ស ហេតុ…បេ… សង្ឃភេទកម្មស្ស ហេតូតិ? ន ហេវំ វត្តព្ពេ…បេ….

កតមស្ស កម្មស្ស ហេតូតិ? ហន្ទ ហិ អរហន្តានំ អព្ភាចិក្ខតីតិ. អរហន្តានំ អព្ភាចិក្ខនកម្មស្ស ហេតុ អរហា អរហត្តា បរិហាយតីតិ? អាមន្តា. យេ កេចិ អរហន្តានំ អព្ភាចិក្ខន្តិ, សព្ពេ តេ អរហត្តំ សច្ឆិករោន្តីតិ? ន ហេវំ វត្តព្ពេ…បេ….

កម្មហេតុកថា និដ្ឋិតា.

អដ្ឋមវគ្គោ.

តស្សុទ្ទានំ –

ឆ គតិយោ, អន្តរាភវោ, បញ្ចេវ កាមគុណា កាមធាតុ, បញ្ចេវ អាយតនា កាមា, រូបិនោ ធម្មា រូបធាតុ, អរូបិនោ ធម្មា អរូបធាតុ, សឡាយតនិកោ អត្តភាវោ រូបធាតុយា, អត្ថិ រូបំ អរូបេសុ, រូបំ កម្មំ, រូបំ ជីវិតំ, កម្មហេតុកា បរិហាយតីតិ.