៨. អដ្ឋមវគ្គោ

(៨២) ១០. ជីវិតិន្ទ្រិយកថា

៥៤០. នត្ថិ រូបជីវិតិន្ទ្រិយន្តិ? អាមន្តា. នត្ថិ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនាតិ? ន ហេវំ វត្តព្ពេ…បេ… អត្ថិ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនាតិ? អាមន្តា. ហញ្ចិ អត្ថិ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា, នោ ច វត រេ វត្តព្ពេ – ‘‘នត្ថិ រូបជីវិតិន្ទ្រិយ’’ន្តិ.

អត្ថិ អរូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា, អត្ថិ អរូបជីវិតិន្ទ្រិយន្តិ? អាមន្តា. អត្ថិ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា, អត្ថិ រូបជីវិតិន្ទ្រិយន្តិ? ន ហេវំ វត្តព្ពេ…បេ… អត្ថិ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា, នត្ថិ រូបជីវិតិន្ទ្រិយន្តិ? អាមន្តា. អត្ថិ អរូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា, នត្ថិ អរូបជីវិតិន្ទ្រិយន្តិ? ន ហេវំ វត្តព្ពេ…បេ….

អរូបីនំ ធម្មានំ អាយុ អរូបជីវិតិន្ទ្រិយន្តិ? អាមន្តា. រូបីនំ ធម្មានំ អាយុ រូបជីវិតិន្ទ្រិយន្តិ? ន ហេវំ វត្តព្ពេ…បេ… រូបីនំ ធម្មានំ អាយុ ន វត្តព្ពំ – ‘‘រូបជីវិតិន្ទ្រិយ’’ន្តិ? អាមន្តា. អរូបីនំ ធម្មានំ អាយុ ន វត្តព្ពំ – ‘‘អរូបជីវិតិន្ទ្រិយ’’ន្តិ? ន ហេវំ វត្តព្ពេ…បេ….

៥៤១. រូបីនំ ធម្មានំ អាយុ អរូបជីវិតិន្ទ្រិយន្តិ? អាមន្តា. អរូបីនំ ធម្មានំ អាយុ រូបជីវិតិន្ទ្រិយន្តិ? ន ហេវំ វត្តព្ពេ…បេ….

អរូបីនំ ធម្មានំ អាយុ ន វត្តព្ពំ – ‘‘រូបជីវិតិន្ទ្រិយ’’ន្តិ? អាមន្តា. រូបីនំ ធម្មានំ អាយុ ន វត្តព្ពំ – ‘‘អរូបជីវិតិន្ទ្រិយ’’ន្តិ? ន ហេវំ វត្តព្ពេ…បេ….

រូបីនញ្ច អរូបីនញ្ច ធម្មានំ អាយុ អរូបជីវិតិន្ទ្រិយន្តិ? អាមន្តា. រូបីនញ្ច អរូបីនញ្ច ធម្មានំ អាយុ រូបជីវិតិន្ទ្រិយន្តិ? ន ហេវំ វត្តព្ពេ…បេ….

រូបីនញ្ច អរូបីនញ្ច ធម្មានំ អាយុ ន វត្តព្ពំ – ‘‘រូបជីវិតិន្ទ្រិយ’’ន្តិ? អាមន្តា. រូបីនញ្ច អរូបីនញ្ច ធម្មានំ អាយុ ន វត្តព្ពំ – ‘‘អរូបជីវិតិន្ទ្រិយ’’ន្តិ? ន ហេវំ វត្តព្ពេ…បេ… នត្ថិ រូបជីវិតិន្ទ្រិយន្តិ? អាមន្តា. និរោធំ សមាបន្នស្ស នត្ថិ ជីវិតិន្ទ្រិយន្តិ? ន ហេវំ វត្តព្ពេ…បេ….

៥៤២. និរោធំ សមាបន្នស្ស អត្ថិ ជីវិតិន្ទ្រិយន្តិ? អាមន្តា. ហញ្ចិ និរោធំ សមាបន្នស្ស អត្ថិ ជីវិតិន្ទ្រិយំ, នោ ច វត រេ វត្តព្ពេ – ‘‘នត្ថិ រូបជីវិតិន្ទ្រិយ’’ន្តិ.

និរោធំ សមាបន្នស្ស អត្ថិ ជីវិតិន្ទ្រិយន្តិ? អាមន្តា. កតមក្ខន្ធបរិយាបន្នន្តិ? សង្ខារក្ខន្ធបរិយាបន្នន្តិ. និរោធំ សមាបន្នស្ស អត្ថិ សង្ខារក្ខន្ធោតិ? ន ហេវំ វត្តព្ពេ…បេ….

និរោធំ សមាបន្នស្ស អត្ថិ សង្ខារក្ខន្ធោតិ? អាមន្តា. និរោធំ សមាបន្នស្ស អត្ថិ វេទនាក្ខន្ធោ…បេ… សញ្ញាក្ខន្ធោ…បេ… វិញ្ញាណក្ខន្ធោតិ? ន ហេវំ វត្តព្ពេ…បេ….

និរោធំ សមាបន្នស្ស អត្ថិ វេទនាក្ខន្ធោ…បេ… សញ្ញាក្ខន្ធោ…បេ… វិញ្ញាណក្ខន្ធោតិ? អាមន្តា. ន និរោធំ សមាបន្នោតិ? ន ហេវំ វត្តព្ពេ…បេ….

៥៤៣. នត្ថិ រូបជីវិតិន្ទ្រិយន្តិ? អាមន្តា. អសញ្ញសត្តានំ នត្ថិ ជីវិតិន្ទ្រិយន្តិ? ន ហេវំ វត្តព្ពេ…បេ….

អសញ្ញសត្តានំ អត្ថិ ជីវិតិន្ទ្រិយន្តិ? អាមន្តា. ហញ្ចិ អសញ្ញសត្តានំ អត្ថិ ជីវិតិន្ទ្រិយំ, នោ ច វត រេ វត្តព្ពេ – ‘‘នត្ថិ រូបជីវិតិន្ទ្រិយ’’ន្តិ. អសញ្ញសត្តានំ អត្ថិ ជីវិតិន្ទ្រិយន្តិ? អាមន្តា. កតមក្ខន្ធបរិយាបន្នន្តិ? សង្ខារក្ខន្ធបរិយាបន្នន្តិ. អសញ្ញសត្តានំ អត្ថិ សង្ខារក្ខន្ធោតិ? ន ហេវំ វត្តព្ពេ…បេ….

អសញ្ញសត្តានំ អត្ថិ សង្ខារក្ខន្ធោតិ? អាមន្តា. អសញ្ញសត្តានំ អត្ថិ វេទនាក្ខន្ធោ…បេ… សញ្ញាក្ខន្ធោ…បេ… វិញ្ញាណក្ខន្ធោតិ? ន ហេវំ វត្តព្ពេ…បេ….

អសញ្ញសត្តានំ អត្ថិ វេទនាក្ខន្ធោ…បេ… សញ្ញាក្ខន្ធោ…បេ… វិញ្ញាណក្ខន្ធោតិ? អាមន្តា. បញ្ចវោការភវោតិ? ន ហេវំ វត្តព្ពេ…បេ….

៥៤៤. ឧបបត្តេសិយេន ចិត្តេន សមុដ្ឋិតំ ជីវិតិន្ទ្រិយំ ឧបបត្តេសិយេ ចិត្តេ ភិជ្ជមានេ ឯកទេសំ ភិជ្ជតីតិ? អាមន្តា. ឧបបត្តេសិយេន ចិត្តេន សមុដ្ឋិតោ ផស្សោ ឧបបត្តេសិយេ ចិត្តេ ភិជ្ជមានេ ឯកទេសោ ភិជ្ជតីតិ? ន ហេវំ វត្តព្ពេ…បេ….

ឧបបត្តេសិយេន ចិត្តេន សមុដ្ឋិតោ ផស្សោ ឧបបត្តេសិយេ ចិត្តេ ភិជ្ជមានេ អនវសេសោ ភិជ្ជតីតិ? អាមន្តា. ឧបបត្តេសិយេន ចិត្តេន សមុដ្ឋិតំ ជីវិតិន្ទ្រិយំ ឧបបត្តេសិយេ ចិត្តេ ភិជ្ជមានេ អនវសេសំ ភិជ្ជតីតិ? ន ហេវំ វត្តព្ពេ…បេ….

៥៤៥. ទ្វេ ជីវិតិន្ទ្រិយានីតិ? អាមន្តា. ទ្វីហិ ជីវិតេហិ ជីវតិ, ទ្វីហិ មរណេហិ មីយតីតិ? អាមន្តា [ន ហេវំ វត្តព្ពេ (ស្យា. កំ. បី.)].

ជីវិតិន្ទ្រិយកថា និដ្ឋិតា.