(៧៣) ១. ឆគតិកថា

៥០៣. ឆ គតិយោតិ? អាមន្តា. ននុ បញ្ច គតិយោ វុត្តា ភគវតា – និរយោ, តិរច្ឆានយោនិ, បេត្តិវិសយោ, មនុស្សា, ទេវាតិ [ម. និ. ១.១៥៣]? អាមន្តា. ហញ្ចិ បញ្ច គតិយោ វុត្តា ភគវតា – និរយោ, តិរច្ឆានយោនិ, បេត្តិវិសយោ, មនុស្សា, ទេវា; នោ ច វត រេ វត្តព្ពេ – ‘‘ឆ គតិយោ’’តិ.

ឆ គតិយោតិ? អាមន្តា. ននុ កាលកញ្ចិកា [កាលកញ្ជិកា (សី. ស្យា. កំ.), កាឡកញ្ជកា (បី.)] សុរា បេតានំ សមានវណ្ណា សមានភោគា សមានាហារា សមានាយុកា បេតេហិ សហ អាវាហវិវាហំ គច្ឆន្តីតិ? អាមន្តា. ហញ្ចិ កាលកញ្ចិកា អសុរា បេតានំ សមានវណ្ណា សមានភោគា សមានាហារា សមានាយុកា បេតេហិ សហ អាវាហវិវាហំ គច្ឆន្តិ, នោ ច វត រេ វត្តព្ពេ – ‘‘ឆ គតិយោ’’តិ.

ឆ គតិយោតិ? អាមន្តា. ននុ វេបចិត្តិបរិសា ទេវានំ សមានវណ្ណា សមានភោគា សមានាហារា សមានាយុកា ទេវេហិ សហ អាវាហវិវាហំ គច្ឆន្តីតិ? អាមន្តា. ហញ្ចិ វេបចិត្តិបរិសា ទេវានំ សមានវណ្ណា សមានភោគា សមានាហារា សមានាយុកា ទេវេហិ សហ អាវាហវិវាហំ គច្ឆន្តិ, នោ ច វត រេ វត្តព្ពេ – ‘‘ឆ គតិយោ’’តិ.

ឆ គតិយោតិ? អាមន្តា. ននុ វេបចិត្តិបរិសា បុព្ពទេវាតិ? អាមន្តា. ហញ្ចិ វេបចិត្តិបរិសា បុព្ពទេវា, នោ ច វត រេ វត្តព្ពេ – ‘‘ឆ គតិយោ’’តិ.

៥០៤. ន វត្តព្ពំ – ‘‘ឆ គតិយោ’’តិ? អាមន្តា. ននុ អត្ថិ អសុរកាយោតិ, អាមន្តា. ហញ្ចិ អត្ថិ អសុរកាយោ, តេន វត រេ វត្តព្ពេ – ‘‘ឆ គតិយោ’’តិ.

ឆគតិកថា និដ្ឋិតា.