(៧០) ៨. ជរាមរណំ វិបាកោតិកថា

៤៩៥. ជរាមរណំ វិបាកោតិ? អាមន្តា. សុខវេទនិយំ ទុក្ខវេទនិយំ អទុក្ខមសុខវេទនិយំ, សុខាយ វេទនាយ សម្បយុត្តំ, ទុក្ខាយ វេទនាយ សម្បយុត្តំ, អទុក្ខមសុខាយ វេទនាយ សម្បយុត្តំ, ផស្សេន សម្បយុត្តំ, វេទនាយ សម្បយុត្តំ, សញ្ញាយ សម្បយុត្តំ, ចេតនាយ សម្បយុត្តំ, ចិត្តេន សម្បយុត្តំ, សារម្មណំ; អត្ថិ តស្ស អាវដ្ដនា អាភោគោ សមន្នាហារោ មនសិការោ ចេតនា បត្ថនា បណិធីតិ? ន ហេវំ វត្តព្ពេ…បេ… ននុ ន សុខវេទនិយំ ន ទុក្ខវេទនិយំ…បេ… អនារម្មណំ; នត្ថិ តស្ស អាវដ្ដនា…បេ… បណិធីតិ? អាមន្តា. ហញ្ចិ ន សុខវេទនិយំ ន ទុក្ខវេទនិយំ…បេ… អនារម្មណំ; នត្ថិ តស្ស អាវដ្ដនា …បេ… បណិធិ, នោ ច វត រេ វត្តព្ពេ – ‘‘ជរាមរណំ វិបាកោ’’តិ.

ផស្សោ វិបាកោ, ផស្សោ សុខវេទនិយោ ទុក្ខវេទនិយោ…បេ… សារម្មណោ; អត្ថិ តស្ស អាវដ្ដនា…បេ… បណិធីតិ? អាមន្តា. ជរាមរណំ វិបាកោ, ជរាមរណំ សុខវេទនិយំ ទុក្ខវេទនិយំ…បេ… សារម្មណំ; អត្ថិ តស្ស អាវដ្ដនា…បេ… បណិធីតិ? ន ហេវំ វត្តព្ពេ…បេ….

ជរាមរណំ វិបាកោ, ជរាមរណំ ន សុខវេទនិយំ ន ទុក្ខវេទនិយំ…បេ… អនារម្មណំ; នត្ថិ តស្ស អាវដ្ដនា…បេ… បណិធីតិ? អាមន្តា. ផស្សោ វិបាកោ, ផស្សោ ន សុខវេទនិយោ ន ទុក្ខវេទនិយោ…បេ… អនារម្មណោ; នត្ថិ តស្ស អាវដ្ដនា…បេ… បណិធីតិ? ន ហេវំ វត្តព្ពេ…បេ….

៤៩៦. អកុសលានំ ធម្មានំ ជរាមរណំ, អកុសលានំ ធម្មានំ វិបាកោតិ? អាមន្តា. កុសលានំ ធម្មានំ ជរាមរណំ, កុសលានំ ធម្មានំ វិបាកោតិ? ន ហេវំ វត្តព្ពេ…បេ….

កុសលានំ ធម្មានំ ជរាមរណំ, ន វត្តព្ពំ – ‘‘កុសលានំ ធម្មានំ វិបាកោ’’តិ? អាមន្តា. អកុសលានំ ធម្មានំ ជរាមរណំ, ន វត្តព្ពំ – ‘‘អកុសលានំ ធម្មានំ វិបាកោ’’តិ? ន ហេវំ វត្តព្ពេ…បេ….

កុសលានំ ធម្មានំ ជរាមរណំ, អកុសលានំ ធម្មានំ វិបាកោតិ? អាមន្តា. អកុសលានំ ធម្មានំ ជរាមរណំ, កុសលានំ ធម្មានំ វិបាកោតិ? ន ហេវំ វត្តព្ពេ…បេ….

អកុសលានំ ធម្មានំ ជរាមរណំ, ន វត្តព្ពំ – ‘‘កុសលានំ ធម្មានំ វិបាកោ’’តិ? អាមន្តា. កុសលានំ ធម្មានំ ជរាមរណំ, ន វត្តព្ពំ – ‘‘អកុសលានំ ធម្មានំ វិបាកោ’’តិ? ន ហេវំ វត្តព្ពេ…បេ….

កុសលានញ្ច អកុសលានញ្ច ធម្មានំ ជរាមរណំ, អកុសលានំ ធម្មានំ វិបាកោតិ? អាមន្តា. កុសលានញ្ច អកុសលានញ្ច ធម្មានំ ជរាមរណំ, កុសលានំ ធម្មានំ វិបាកោតិ? ន ហេវំ វត្តព្ពេ…បេ….

កុសលានញ្ច អកុសលានញ្ច ធម្មានំ ជរាមរណំ, ន វត្តព្ពំ – ‘‘កុសលានំ ធម្មានំ វិបាកោ’’តិ? អាមន្តា. កុសលានញ្ច អកុសលានញ្ច ធម្មានំ ជរាមរណំ, ន វត្តព្ពំ – ‘‘អកុសលានំ ធម្មានំ វិបាកោ’’តិ? ន ហេវំ វត្តព្ពេ…បេ….

៤៩៧. ន វត្តព្ពំ – ‘‘ជរាមរណំ វិបាកោ’’តិ? អាមន្តា. ននុ អត្ថិ ទុព្ពណ្ណសំវត្តនិយំ កម្មំ អប្បាយុកសំវត្តនិយំ កម្មន្តិ? អាមន្តា. ហញ្ចិ អត្ថិ ទុព្ពណ្ណសំវត្តនិយំ កម្មំ អប្បាយុកសំវត្តនិយំ កម្មំ, តេន វត រេ វត្តព្ពេ – ‘‘ជរាមរណំ វិបាកោ’’តិ.

ជរាមរណំ វិបាកោតិកថា និដ្ឋិតា.