(៦៣) ១. សង្គហិតកថា

៤៧១. នត្ថិ កេចិ ធម្មា កេហិចិ ធម្មេហិ សង្គហិតាតិ [សង្គហីតាតិ (បី.)]? អាមន្តា. ននុ អត្ថិ កេចិ ធម្មា កេហិចិ ធម្មេហិ គណនំ គច្ឆន្តិ ឧទ្ទេសំ គច្ឆន្តិ បរិយាបន្នាតិ? អាមន្តា. ហញ្ចិ អត្ថិ កេចិ ធម្មា កេហិចិ ធម្មេហិ គណនំ គច្ឆន្តិ ឧទ្ទេសំ គច្ឆន្តិ បរិយាបន្នា, នោ ច វត រេ វត្តព្ពេ – ‘‘នត្ថិ កេចិ ធម្មា កេហិចិ ធម្មេហិ សង្គហិតា’’តិ.

ចក្ខាយតនំ កតមក្ខន្ធគណនំ [កតមំ ខន្ធគណនំ (សី. បី. ក.)] គច្ឆតីតិ? រូបក្ខន្ធគណនំ គច្ឆតីតិ. ហញ្ចិ ចក្ខាយតនំ រូបក្ខន្ធគណនំ គច្ឆតិ, តេន វត រេ វត្តព្ពេ – ‘‘ចក្ខាយតនំ រូបក្ខន្ធេន សង្គហិត’’ន្តិ. សោតាយតនំ…បេ… ឃានាយតនំ…បេ… ជិវ្ហាយតនំ…បេ… កាយាយតនំ កតមក្ខន្ធគណនំ គច្ឆតីតិ? រូបក្ខន្ធគណនំ គច្ឆតីតិ. ហញ្ចិ កាយាយតនំ រូបក្ខន្ធគណនំ គច្ឆតិ, តេន វត រេ វត្តព្ពេ – ‘‘កាយាយតនំ រូបក្ខន្ធេន សង្គហិត’’ន្តិ.

រូបាយតនំ…បេ… សទ្ទាយតនំ…បេ… គន្ធាយតនំ…បេ… រសាយតនំ…បេ… ផោដ្ឋព្ពាយតនំ កតមក្ខន្ធគណនំ គច្ឆតីតិ? រូបក្ខន្ធគណនំ គច្ឆតីតិ. ហញ្ចិ ផោដ្ឋព្ពាយតនំ រូបក្ខន្ធគណនំ គច្ឆតិ, តេន វត រេ វត្តព្ពេ – ‘‘ផោដ្ឋព្ពាយតនំ រូបក្ខន្ធេន សង្គហិត’’ន្តិ.

សុខា វេទនា កតមក្ខន្ធគណនំ គច្ឆតីតិ? វេទនាក្ខន្ធគណនំ គច្ឆតីតិ. ហញ្ចិ សុខា វេទនា វេទនាក្ខន្ធគណនំ គច្ឆតិ, តេន វត រេ វត្តព្ពេ – ‘‘សុខា វេទនា វេទនាក្ខន្ធេន សង្គហិតា’’តិ. ទុក្ខា វេទនា…បេ… អទុក្ខមសុខា វេទនា កតមក្ខន្ធគណនំ គច្ឆតីតិ? វេទនាក្ខន្ធគណនំ គច្ឆតីតិ. ហញ្ចិ អទុក្ខមសុខា វេទនា វេទនាក្ខន្ធគណនំ គច្ឆតិ, តេន វត រេ វត្តព្ពេ – ‘‘អទុក្ខមសុខា វេទនា វេទនាក្ខន្ធេន សង្គហិតា’’តិ.

ចក្ខុសម្ផស្សជា សញ្ញា កតមក្ខន្ធគណនំ គច្ឆតីតិ? សញ្ញាក្ខន្ធគណនំ គច្ឆតីតិ. ហញ្ចិ ចក្ខុសម្ផស្សជា សញ្ញា សញ្ញាក្ខន្ធគណនំ គច្ឆតិ, តេន វត រេ វត្តព្ពេ – ‘‘ចក្ខុសម្ផស្សជា សញ្ញា សញ្ញាក្ខន្ធេន សង្គហិតា’’តិ. សោតសម្ផស្សជា សញ្ញា…បេ… មនោសម្ផស្សជា សញ្ញា កតមក្ខន្ធគណនំ គច្ឆតីតិ? សញ្ញាក្ខន្ធគណនំ គច្ឆតីតិ. ហញ្ចិ មនោសម្ផស្សជា សញ្ញា សញ្ញាក្ខន្ធគណនំ គច្ឆតិ, តេន វត រេ វត្តព្ពេ – ‘‘មនោសម្ផស្សជា សញ្ញា សញ្ញាក្ខន្ធេន សង្គហិតា’’តិ.

ចក្ខុសម្ផស្សជា ចេតនា…បេ… មនោសម្ផស្សជា ចេតនា កតមក្ខន្ធគណនំ គច្ឆតីតិ? សង្ខារក្ខន្ធគណនំ គច្ឆតីតិ. ហញ្ចិ មនោសម្ផស្សជា ចេតនា សង្ខារក្ខន្ធគណនំ គច្ឆតិ, តេន វត រេ វត្តព្ពេ – ‘‘មនោសម្ផស្សជា ចេតនា សង្ខារក្ខន្ធេន សង្គហិតា’’តិ.

ចក្ខុវិញ្ញាណំ …បេ… មនោវិញ្ញាណំ កតមក្ខន្ធគណនំ គច្ឆតីតិ? វិញ្ញាណក្ខន្ធគណនំ គច្ឆតីតិ. ហញ្ចិ មនោវិញ្ញាណំ វិញ្ញាណក្ខន្ធគណនំ គច្ឆតិ, តេន វត រេ វត្តព្ពេ – ‘‘មនោវិញ្ញាណំ វិញ្ញាណក្ខន្ធេន សង្គហិត’’ន្តិ.

៤៧២. យថា ទាមេន វា យោត្តេន វា ទ្វេ ពលិពទ្ទា សង្គហិតា, សិក្កាយ បិណ្ឌបាតោ សង្គហិតោ, សា គទ្ទុលេន សង្គហិតោ; ឯវមេវ តេ ធម្មា តេហិ ធម្មេហិ សង្គហិតាតិ [សកវាទិវចនំ (អដ្ឋកថា បស្សិតព្ពា)]? ហញ្ចិ ទាមេន វា យោត្តេន វា ទ្វេ ពលីពទ្ទា សង្គហិតា, សិក្កាយ បិណ្ឌបាតោ សង្គហិតោ, សា គទ្ទុលេន សង្គហិតោ, តេន វត រេ វត្តព្ពេ – ‘‘អត្ថិ កេចិ ធម្មា កេហិចិ ធម្មេហិ សង្គហិតា’’តិ [សកវាទិវចនំ (អដ្ឋកថា បស្សិតព្ពា)].

សង្គហិតកថា និដ្ឋិតា.