២. ទុតិយវគ្គោ

(១៥) ៦. ទុក្ខាហារកថា

៣៣៤. ទុក្ខាហារោ មគ្គង្គំ មគ្គបរិយាបន្នន្តិ? អាមន្តា. យេ កេចិ ទុក្ខន្តិ វាចំ ភាសន្តិ, សព្ពេ តេ មគ្គំ ភាវេន្តីតិ? ន ហេវំ វត្តព្ពេ.

យេ កេចិ ទុក្ខន្តិ វាចំ ភាសន្តិ, សព្ពេ តេ មគ្គំ ភាវេន្តីតិ? អាមន្តា. ពាលបុថុជ្ជនា ទុក្ខន្តិ វាចំ ភាសន្តិ, ពាលបុថុជ្ជនា មគ្គំ ភាវេន្តីតិ? ន ហេវំ វត្តព្ពេ. មាតុឃាតកោ… បិតុឃាតកោ… អរហន្តឃាតកោ… រុហិរុប្បាទកោ [លោហិតុប្បាទកោ (សី. ក.) អញ្ញដ្ឋានេសុ បន រុហិរុប្បាទកោត្វេវ ទិស្សតិ] … សង្ឃភេទកោ ទុក្ខន្តិ វាចំ ភាសតិ, សង្ឃភេទកោ មគ្គំ ភាវេតីតិ? ន ហេវំ វត្តព្ពេ…បេ….

ទុក្ខាហារកថា និដ្ឋិតា.