២០. សង្ឃានុយោគោ

២០៦. ន វត្តព្ពំ – ‘‘បុគ្គលោ ឧបលព្ភតិ សច្ចិកដ្ឋបរមត្ថេនា’’តិ? អាមន្តា. ននុ ចត្តារោ បុរិសយុគា អដ្ឋ បុរិសបុគ្គលា អត្ថីតិ? អាមន្តា. ហញ្ចិ ចត្តារោ បុរិសយុគា អដ្ឋ បុរិសបុគ្គលា អត្ថិ, តេន វត រេ វត្តព្ពេ – ‘‘បុគ្គលោ ឧបលព្ភតិ សច្ចិកដ្ឋបរមត្ថេនា’’តិ.

២០៧. ចត្តារោ បុរិសយុគា អដ្ឋ បុរិសបុគ្គលា អត្ថីតិ កត្វា តេន ច ការណេន បុគ្គលោ ឧបលព្ភតិ សច្ចិកដ្ឋបរមត្ថេនាតិ? អាមន្តា. ចត្តារោ បុរិសយុគា អដ្ឋ បុរិសបុគ្គលា ពុទ្ធបាតុភាវា បាតុភវន្តីតិ? អាមន្តា. បុគ្គលោ ពុទ្ធបាតុភាវា បាតុភវតីតិ? ន ហេវំ វត្តព្ពេ…បេ….

បុគ្គលោ ពុទ្ធបាតុភាវា បាតុភវតីតិ? អាមន្តា. ពុទ្ធស្ស ភគវតោ បរិនិព្ពុតេ ឧច្ឆិន្នោ បុគ្គលោ, នត្ថិ បុគ្គលោតិ? ន ហេវំ វត្តព្ពេ…បេ….

សង្ឃានុយោគោ.