រូបវិភត្តិ

ឯកកនិទ្ទេសោ

៥៩៤. សព្ពំ រូបំ ន ហេតុមេវ, អហេតុកមេវ, ហេតុវិប្បយុត្តមេវ, សប្បច្ចយមេវ, សង្ខតមេវ, រូបមេវ, លោកិយមេវ, សាសវមេវ, សំយោជនិយមេវ, គន្ថនិយមេវ, ឱឃនិយមេវ, យោគនិយមេវ, នីវរណិយមេវ, បរាមដ្ឋមេវ, ឧបាទានិយមេវ, សំកិលេសិកមេវ, អព្យាកតមេវ, អនារម្មណមេវ, អចេតសិកមេវ, ចិត្តវិប្បយុត្តមេវ, នេវវិបាកនវិបាកធម្មធម្មមេវ, អសំកិលិដ្ឋសំកិលេសិកមេវ, ន សវិតក្កសវិចារមេវ, ន អវិតក្កវិចារមត្តមេវ, អវិតក្កអវិចារមេវ, ន បីតិសហគតមេវ, ន សុខសហគតមេវ, ន ឧបេក្ខាសហគតមេវ, នេវ ទស្សនេន ន ភាវនាយ បហាតព្ពមេវ, នេវ ទស្សនេន ន ភាវនាយ បហាតព្ពហេតុកមេវ, នេវ អាចយគាមិ ន អបចយគាមិមេវ, នេវសេក្ខនាសេក្ខមេវ, បរិត្តមេវ, កាមាវចរមេវ, ន រូបាវចរមេវ, ន អរូបាវចរមេវ, បរិយាបន្នមេវ, នោ អបរិយាបន្នមេវ, អនិយតមេវ, អនិយ្យានិកមេវ, ឧប្បន្នំ ឆហិ វិញ្ញាណេហិ វិញ្ញេយ្យមេវ, អនិច្ចមេវ, ជរាភិភូតមេវ.

ឯវំ ឯកវិធេន រូបសង្គហោ.

ឯកកនិទ្ទេសោ.

ទុកនិទ្ទេសោ

ឧបាទាភាជនីយំ

៥៩៥. កតមំ តំ រូបំ ឧបាទា? ចក្ខាយតនំ, សោតាយតនំ, ឃានាយតនំ, ជិវ្ហាយតនំ, កាយាយតនំ, រូបាយតនំ, សទ្ទាយតនំ, គន្ធាយតនំ, រសាយតនំ, ឥត្ថិន្ទ្រិយំ, បុរិសិន្ទ្រិយំ, ជីវិតិន្ទ្រិយំ, កាយវិញ្ញត្តិ, វចីវិញ្ញត្តិ, អាកាសធាតុ, រូបស្ស លហុតា, រូបស្ស មុទុតា, រូបស្ស កម្មញ្ញតា, រូបស្ស ឧបចយោ, រូបស្ស សន្តតិ, រូបស្ស ជរតា, រូបស្ស អនិច្ចតា, កពឡីការោ អាហារោ.

៥៩៦. កតមំ តំ រូបំ ចក្ខាយតនំ? យំ ចក្ខុ [ចក្ខុំ (សី. ស្យា.)] ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន ចក្ខុនា អនិទស្សនេន សប្បដិឃេន រូបំ សនិទស្សនំ សប្បដិឃំ បស្សិ វា បស្សតិ វា បស្សិស្សតិ វា បស្សេ វា, ចក្ខុំ បេតំ ចក្ខាយតនំ បេតំ ចក្ខុធាតុ បេសា ចក្ខុន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ នេត្តំ បេតំ នយនំ បេតំ ឱរិមំ តីរំ បេតំ សុញ្ញោ គាមោបេសោ – ឥទំ តំ រូបំ ចក្ខាយតនំ.

៥៩៧. កតមំ តំ រូបំ ចក្ខាយតនំ? យំ ចក្ខុ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យម្ហិ ចក្ខុម្ហិ អនិទស្សនម្ហិ សប្បដិឃម្ហិ រូបំ សនិទស្សនំ សប្បដិឃំ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ចក្ខុំ បេតំ ចក្ខាយតនំ បេតំ ចក្ខុធាតុ បេសា ចក្ខុន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ នេត្តំ បេតំ នយនំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ចក្ខាយតនំ.

៥៩៨. កតមំ តំ រូបំ ចក្ខាយតនំ? យំ ចក្ខុ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ ចក្ខុ អនិទស្សនំ សប្បដិឃំ រូបម្ហិ សនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ចក្ខុំ បេតំ ចក្ខាយតនំ បេតំ ចក្ខុធាតុ បេសា ចក្ខុន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ នេត្តំ បេតំ នយនំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ចក្ខាយតនំ.

៥៩៩. កតមំ តំ រូបំ ចក្ខាយតនំ? យំ ចក្ខុ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ ចក្ខុំ និស្សាយ រូបំ អារព្ភ ចក្ខុសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ចក្ខុំ និស្សាយ រូបំ អារព្ភ ចក្ខុសម្ផស្សជា វេទនា…បេ… សញ្ញា…បេ… ចេតនា…បេ… ចក្ខុវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ចក្ខុំ និស្សាយ រូបារម្មណោ ចក្ខុសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ចក្ខុំ និស្សាយ រូបារម្មណា ចក្ខុសម្ផស្សជា វេទនា…បេ… សញ្ញា…បេ… ចេតនា…បេ… ចក្ខុវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, ចក្ខុំ បេតំ ចក្ខាយតនំ បេតំ ចក្ខុធាតុ បេសា ចក្ខុន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ នេត្តំ បេតំ នយនំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ចក្ខាយតនំ.

៦០០. កតមំ តំ រូបំ សោតាយតនំ? យំ សោតំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន សោតេន អនិទស្សនេន សប្បដិឃេន សទ្ទំ អនិទស្សនំ សប្បដិឃំ សុណិ វា សុណាតិ វា សុណិស្សតិ វា សុណេ វា, សោតំ បេតំ សោតាយតនំ បេតំ សោតធាតុ បេសា សោតិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ សោតាយតនំ.

៦០១. កតមំ តំ រូបំ សោតាយតនំ? យំ សោតំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យម្ហិ សោតម្ហិ អនិទស្សនម្ហិ សប្បដិឃម្ហិ សទ្ទោ អនិទស្សនោ សប្បដិឃោ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, សោតំ បេតំ សោតាយតនំ បេតំ សោតធាតុ បេសា សោតិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ សោតាយតនំ.

៦០២. កតមំ តំ រូបំ សោតាយតនំ? យំ សោតំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ សោតំ អនិទស្សនំ សប្បដិឃំ សទ្ទម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, សោតំ បេតំ សោតាយតនំ បេតំ សោតធាតុ បេសា សោតិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ សោតាយតនំ.

៦០៣. កតមំ តំ រូបំ សោតាយតនំ? យំ សោតំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ សោតំ និស្សាយ សទ្ទំ អារព្ភ សោតសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ សោតំ និស្សាយ សទ្ទំ អារព្ភ សោតសម្ផស្សជា វេទនា…បេ… សញ្ញា…បេ… ចេតនា…បេ… សោតវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ សោតំ និស្សាយ សទ្ទារម្មណោ សោតសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ សោតំ និស្សាយ សទ្ទារម្មណា សោតសម្ផស្សជា វេទនា…បេ… សញ្ញា…បេ… ចេតនា…បេ… សោតវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, សោតំ បេតំ សោតាយតនំ បេតំ សោតធាតុ បេសា សោតិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ សោតាយតនំ.

៦០៤. កតមំ តំ រូបំ ឃានាយតនំ? យំ ឃានំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន ឃានេន អនិទស្សនេន សប្បដិឃេន គន្ធំ អនិទស្សនំ សប្បដិឃំ ឃាយិ វា ឃាយតិ វា ឃាយិស្សតិ វា ឃាយេ វា, ឃានំ បេតំ ឃានាយតនំ បេតំ ឃានធាតុ បេសា ឃានិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ឃានាយតនំ.

៦០៥. កតមំ តំ រូបំ ឃានាយតនំ? យំ ឃានំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យម្ហិ ឃានម្ហិ អនិទស្សនម្ហិ សប្បដិឃម្ហិ គន្ធោ អនិទស្សនោ សប្បដិឃោ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ឃានំ បេតំ ឃានាយតនំ បេតំ ឃានធាតុ បេសា ឃានិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ឃានាយតនំ.

៦០៦. កតមំ តំ រូបំ ឃានាយតនំ? យំ ឃានំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ ឃានំ អនិទស្សនំ សប្បដិឃំ គន្ធម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ឃានំ បេតំ ឃានាយតនំ បេតំ ឃានធាតុ បេសា ឃានិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោបេសោ – ឥទំ តំ រូបំ ឃានាយតនំ.

៦០៧. កតមំ តំ រូបំ ឃានាយតនំ? យំ ឃានំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ ឃានំ និស្សាយ គន្ធំ អារព្ភ ឃានសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ឃានំ និស្សាយ គន្ធំ អារព្ភ ឃានសម្ផស្សជា វេទនា…បេ… សញ្ញា…បេ… ចេតនា…បេ… ឃានវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ឃានំ និស្សាយ គន្ធារម្មណោ ឃានសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ឃានំ និស្សាយ គន្ធារម្មណា ឃានសម្ផស្សជា វេទនា…បេ… សញ្ញា…បេ… ចេតនា…បេ… ឃានវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, ឃានំ បេតំ ឃានាយតនំ បេតំ ឃានធាតុ បេសា ឃានិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ឃានាយតនំ.

៦០៨. កតមំ តំ រូបំ ជិវ្ហាយតនំ? យា ជិវ្ហា ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យាយ ជិវ្ហាយ អនិទស្សនាយ សប្បដិឃាយ រសំ អនិទស្សនំ សប្បដិឃំ សាយិ វា សាយតិ វា សាយិស្សតិ វា សាយេ វា, ជិវ្ហា បេសា ជិវ្ហាយតនំ បេតំ ជិវ្ហាធាតុ បេសា ជិវ្ហិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ជិវ្ហាយតនំ.

៦០៩. កតមំ តំ រូបំ ជិវ្ហាយតនំ? យា ជិវ្ហា ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យាយ ជិវ្ហាយ អនិទស្សនាយ សប្បដិឃាយ រសោ អនិទស្សនោ សប្បដិឃោ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ជិវ្ហា បេសា ជិវ្ហាយតនំ បេតំ ជិវ្ហាធាតុ បេសា ជិវ្ហិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ជិវ្ហាយតនំ.

៦១០. កតមំ តំ រូបំ ជិវ្ហាយតនំ? យា ជិវ្ហា ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យា ជិវ្ហា អនិទស្សនា សប្បដិឃា រសម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ជិវ្ហា បេសា ជិវ្ហាយតនំ បេតំ ជិវ្ហាធាតុ បេសា ជិវ្ហិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ជិវ្ហាយតនំ.

៦១១. កតមំ តំ រូបំ ជិវ្ហាយតនំ? យា ជិវ្ហា ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ ជិវ្ហំ និស្សាយ រសំ អារព្ភ ជិវ្ហាសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ជិវ្ហំ និស្សាយ រសំ អារព្ភ ជិវ្ហាសម្ផស្សជា វេទនា…បេ… សញ្ញា…បេ… ចេតនា…បេ… ជិវ្ហាវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ជិវ្ហំ និស្សាយ រសារម្មណោ ជិវ្ហាសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ជិវ្ហំ និស្សាយ រសារម្មណា ជិវ្ហាសម្ផស្សជា វេទនា…បេ… សញ្ញា…បេ… ចេតនា…បេ… ជិវ្ហាវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, ជិវ្ហា បេសា ជិវ្ហាយតនំ បេតំ ជិវ្ហាធាតុ បេសា ជិវ្ហិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ ជិវ្ហាយតនំ.

៦១២. កតមំ តំ រូបំ កាយាយតនំ? យោ កាយោ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន កាយេន អនិទស្សនេន សប្បដិឃេន ផោដ្ឋព្ពំ អនិទស្សនសប្បដិឃំ ផុសិ វា ផុសតិ វា ផុសិស្សតិ វា ផុសេ វា, កាយោ បេសោ កាយាយតនំ បេតំ កាយធាតុ បេសា កាយិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ កាយាយតនំ.

៦១៣. កតមំ តំ រូបំ កាយាយតនំ? យោ កាយោ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យម្ហិ កាយម្ហិ អនិទស្សនម្ហិ សប្បដិឃម្ហិ ផោដ្ឋព្ពោ អនិទស្សនោ សប្បដិឃោ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, កាយោ បេសោ កាយាយតនំ បេតំ កាយធាតុ បេសា កាយិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ កាយាយតនំ.

៦១៤. កតមំ តំ រូបំ កាយាយតនំ? យោ កាយោ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យោ កាយោ អនិទស្សនោ សប្បដិឃោ ផោដ្ឋព្ពម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, កាយោ បេសោ កាយាយតនំ បេតំ កាយធាតុ បេសា កាយិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ កាយាយតនំ.

៦១៥. កតមំ តំ រូបំ កាយាយតនំ? យោ កាយោ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យំ កាយំ និស្សាយ ផោដ្ឋព្ពំ អារព្ភ កាយសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ កាយំ និស្សាយ ផោដ្ឋព្ពំ អារព្ភ កាយសម្ផស្សជា វេទនា…បេ… សញ្ញា…បេ… ចេតនា…បេ… កាយវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ កាយំ និស្សាយ ផោដ្ឋព្ពារម្មណោ កាយសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ កាយំ និស្សាយ ផោដ្ឋព្ពារម្មណា កាយសម្ផស្សជា វេទនា…បេ… សញ្ញា…បេ… ចេតនា…បេ… កាយវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, កាយោ បេសោ កាយាយតនំ បេតំ កាយធាតុ បេសា កាយិន្ទ្រិយំ បេតំ លោកោ បេសោ ទ្វារា បេសា សមុទ្ទោ បេសោ បណ្ឌរំ បេតំ ខេត្តំ បេតំ វត្ថុំ បេតំ ឱរិមំ តីរំ បេតំ សុញ្ញោ គាមោ បេសោ – ឥទំ តំ រូបំ កាយាយតនំ.

៦១៦. កតមំ តំ រូបំ រូបាយតនំ? យំ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ នីលំ បីតកំ លោហិតកំ ឱទាតំ កាឡកំ មញ្ជិដ្ឋកំ [មញ្ជេដ្ឋកំ (សី. ស្យា.)] ហរិ ហរិវណ្ណំ អម្ពង្កុរវណ្ណំ ទីឃំ រស្សំ អណុំ ថូលំ វដ្ដំ បរិមណ្ឌលំ ចតុរំសំ [ចតុរស្សំ (សី. ក.)] ឆឡំសំ អដ្ឋំសំ សោឡសំសំ និន្នំ ថលំ ឆាយា អាតបោ អាលោកោ អន្ធការោ អព្ភា មហិកា ធូមោ រជោ ចន្ទមណ្ឌលស្ស វណ្ណនិភា សូរិយមណ្ឌលស្ស [សុរិយមណ្ឌលស្ស (សី. ស្យា.)] វណ្ណនិភា តារករូបានំ វណ្ណនិភា អាទាសមណ្ឌលស្ស វណ្ណនិភា មណិសង្ខមុត្តាវេឡុរិយស្ស វណ្ណនិភា ជាតរូបរជតស្ស វណ្ណនិភា, យំ វា បនញ្ញម្បិ អត្ថិ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ, យំ រូបំ សនិទស្សនំ សប្បដិឃំ ចក្ខុនា អនិទស្សនេន សប្បដិឃេន បស្សិ វា បស្សតិ វា បស្សិស្សតិ វា បស្សេ វា, រូបំ បេតំ រូបាយតនំ បេតំ រូបធាតុ បេសា – ឥទំ តំ រូបំ រូបាយតនំ.

៦១៧. កតមំ តំ រូបំ រូបាយតនំ? យំ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ នីលំ បីតកំ លោហិតកំ ឱទាតំ កាឡកំ មញ្ជិដ្ឋកំ ហរិ ហរិវណ្ណំ អម្ពង្កុរវណ្ណំ ទីឃំ រស្សំ អណុំ ថូលំ វដ្ដំ បរិមណ្ឌលំ ចតុរំសំ ឆឡំសំ អដ្ឋំសំ សោឡសំសំ និន្នំ ថលំ ឆាយា អាតបោ អាលោកោ អន្ធការោ អព្ភា មហិកា ធូមោ រជោ ចន្ទមណ្ឌលស្ស វណ្ណនិភា សូរិយមណ្ឌលស្ស វណ្ណនិភា តារករូបានំ វណ្ណនិភា អាទាសមណ្ឌលស្ស វណ្ណនិភា មណិសង្ខមុត្តាវេឡុរិយស្ស វណ្ណនិភា ជាតរូបរជតស្ស វណ្ណនិភា, យំ វា បនញ្ញម្បិ អត្ថិ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ, យម្ហិ រូបម្ហិ សនិទស្សនម្ហិ សប្បដិឃម្ហិ ចក្ខុំ អនិទស្សនំ សប្បដិឃំ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, រូបំ បេតំ រូបាយតនំ បេតំ រូបធាតុ បេសា – ឥទំ តំ រូបំ រូបាយតនំ.

៦១៨. កតមំ តំ រូបំ រូបាយតនំ? យំ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ នីលំ បីតកំ លោហិតកំ ឱទាតំ កាឡកំ មញ្ជិដ្ឋកំ ហរិ ហរិវណ្ណំ អម្ពង្កុរវណ្ណំ ទីឃំ រស្សំ អណុំ ថូលំ វដ្ដំ បរិមណ្ឌលំ ចតុរំសំ ឆឡំសំ អដ្ឋំសំ សោឡសំសំ និន្នំ ថលំ ឆាយា អាតបោ អាលោកោ អន្ធការោ អព្ភា មហិកា ធូមោ រជោ ចន្ទមណ្ឌលស្ស វណ្ណនិភា សូរិយមណ្ឌលស្ស វណ្ណនិភា តារករូបានំ វណ្ណនិភា អាទាសមណ្ឌលស្ស វណ្ណនិភា មណិសង្ខមុត្តាវេឡុរិយស្ស វណ្ណនិភា ជាតរូបរជតស្ស វណ្ណនិភា, យំ វា បនញ្ញម្បិ អត្ថិ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ, យំ រូបំ សនិទស្សនំ សប្បដិឃំ ចក្ខុម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, រូបំ បេតំ រូបាយតនំ បេតំ រូបធាតុ បេសា – ឥទំ តំ រូបំ រូបាយតនំ.

៦១៩. កតមំ តំ រូបំ រូបាយតនំ? យំ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ នីលំ បីតកំ លោហិតកំ ឱទាតំ កាឡកំ មញ្ជិដ្ឋកំ ហរិ ហរិវណ្ណំ អម្ពង្កុរវណ្ណំ ទីឃំ រស្សំ អណុំ ថូលំ វដ្ដំ បរិមណ្ឌលំ ចតុរំសំ ឆឡំសំ អដ្ឋំសំ សោឡសំសំ និន្នំ ថលំ ឆាយា អាតបោ អាលោកោ អន្ធការោ អព្ភា មហិកា ធូមោ រជោ ចន្ទមណ្ឌលស្ស វណ្ណនិភា សូរិយមណ្ឌលស្ស វណ្ណនិភា តារករូបានំ វណ្ណនិភា អាទាសមណ្ឌលស្ស វណ្ណនិភា មណិសង្ខមុត្តាវេឡុរិយស្ស វណ្ណនិភា ជាតរូបរជតស្ស វណ្ណនិភា, យំ វា បនញ្ញម្បិ អត្ថិ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ, យំ រូបំ អារព្ភ ចក្ខុំ និស្សាយ ចក្ខុសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ រូបំ អារព្ភ ចក្ខុំ និស្សាយ ចក្ខុសម្ផស្សជា វេទនា…បេ… សញ្ញា…បេ… ចេតនា…បេ… ចក្ខុវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ រូបារម្មណោ ចក្ខុំ និស្សាយ ចក្ខុសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ រូបារម្មណា ចក្ខុំ និស្សាយ ចក្ខុសម្ផស្សជា វេទនា…បេ… សញ្ញា…បេ… ចេតនា…បេ… ចក្ខុវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, រូបំ បេតំ រូបាយតនំ បេតំ រូបធាតុ បេសា – ឥទំ តំ រូបំ រូបាយតនំ.

៦២០. កតមំ តំ រូបំ សទ្ទាយតនំ? យោ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ ភេរិសទ្ទោ មុទិង្គសទ្ទោ សង្ខសទ្ទោ បណវសទ្ទោ គីតសទ្ទោ វាទិតសទ្ទោ សម្មសទ្ទោ បាណិសទ្ទោ សត្តានំ និគ្ឃោសសទ្ទោ ធាតូនំ សន្និឃាតសទ្ទោ វាតសទ្ទោ ឧទកសទ្ទោ មនុស្សសទ្ទោ អមនុស្សសទ្ទោ, យោ វា បនញ្ញោបិ អត្ថិ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ សទ្ទំ អនិទស្សនំ សប្បដិឃំ សោតេន អនិទស្សនេន សប្បដិឃេន សុណិ វា សុណាតិ វា សុណិស្សតិ វា សុណេ វា, សទ្ទោ បេសោ សទ្ទាយតនំ បេតំ សទ្ទធាតុ បេសា – ឥទំ តំ រូបំ សទ្ទាយតនំ.

៦២១. កតមំ តំ រូបំ សទ្ទាយតនំ? យោ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ ភេរិសទ្ទោ មុទិង្គសទ្ទោ សង្ខសទ្ទោ បណវសទ្ទោ គីតសទ្ទោ វាទិតសទ្ទោ សម្មសទ្ទោ បាណិសទ្ទោ សត្តានំ និគ្ឃោសសទ្ទោ ធាតូនំ សន្និឃាតសទ្ទោ វាតសទ្ទោ ឧទកសទ្ទោ មនុស្សសទ្ទោ អមនុស្សសទ្ទោ, យោ វា បនញ្ញោបិ អត្ថិ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យម្ហិ សទ្ទម្ហិ អនិទស្សនម្ហិ សប្បដិឃម្ហិ សោតំ អនិទស្សនំ សប្បដិឃំ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, សទ្ទោ បេសោ សទ្ទាយតនំ បេតំ សទ្ទធាតុ បេសា – ឥទំ តំ រូបំ សទ្ទាយតនំ.

៦២២. កតមំ តំ រូបំ សទ្ទាយតនំ? យោ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ ភេរិសទ្ទោ មុទិង្គសទ្ទោ សង្ខសទ្ទោ បណវសទ្ទោ គីតសទ្ទោ វាទិតសទ្ទោ សម្មសទ្ទោ បាណិសទ្ទោ សត្តានំ និគ្ឃោសសទ្ទោ ធាតូនំ សន្និឃាតសទ្ទោ វាតសទ្ទោ ឧទកសទ្ទោ មនុស្សសទ្ទោ អមនុស្សសទ្ទោ, យោ វា បនញ្ញោបិ អត្ថិ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យោ សទ្ទោ អនិទស្សនោ សប្បដិឃោ សោតម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, សទ្ទោ បេសោ សទ្ទាយតនំ បេតំ សទ្ទធាតុ បេសា – ឥទំ តំ រូបំ សទ្ទាយតនំ.

៦២៣. កតមំ តំ រូបំ សទ្ទាយតនំ? យោ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ ភេរិសទ្ទោ មុទិង្គសទ្ទោ សង្ខសទ្ទោ បណវសទ្ទោ គីតសទ្ទោ វាទិតសទ្ទោ សម្មសទ្ទោ បាណិសទ្ទោ សត្តានំ និគ្ឃោសសទ្ទោ ធាតូនំ សន្និឃាតសទ្ទោ វាតសទ្ទោ ឧទកសទ្ទោ មនុស្សសទ្ទោ អមនុស្សសទ្ទោ, យោ វា បនញ្ញោបិ អត្ថិ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ សទ្ទំ អារព្ភ សោតំ និស្សាយ សោតសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ សទ្ទំ អារព្ភ សោតំ និស្សាយ សោតសម្ផស្សជា វេទនា…បេ… សញ្ញា…បេ… ចេតនា…បេ… សោតវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ សទ្ទារម្មណោ សោតំ និស្សាយ សោតសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ សទ្ទារម្មណា សោតំ និស្សាយ សោតសម្ផស្សជា វេទនា…បេ… សញ្ញា…បេ… ចេតនា…បេ… សោតវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, សទ្ទោ បេសោ សទ្ទាយតនំ បេតំ សទ្ទធាតុ បេសា – ឥទំ តំ រូបំ សទ្ទាយតនំ.

៦២៤. កតមំ តំ រូបំ គន្ធាយតនំ? យោ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលគន្ធោ សារគន្ធោ តចគន្ធោ បត្តគន្ធោ បុប្ផគន្ធោ ផលគន្ធោ អាមកគន្ធោ វិស្សគន្ធោ សុគន្ធោ ទុគ្គន្ធោ, យោ វា បនញ្ញោបិ អត្ថិ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ គន្ធំ អនិទស្សនំ សប្បដិឃំ ឃានេន អនិទស្សនេន សប្បដិឃេន ឃាយិ វា ឃាយតិ វា ឃាយិស្សតិ វា ឃាយេ វា, គន្ធោ បេសោ គន្ធាយតនំ បេតំ គន្ធធាតុ បេសា – ឥទំ តំ រូបំ គន្ធាយតនំ.

៦២៥. កតមំ តំ រូបំ គន្ធាយតនំ? យោ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលគន្ធោ សារគន្ធោ តចគន្ធោ បត្តគន្ធោ បុប្ផគន្ធោ ផលគន្ធោ អាមកគន្ធោ វិស្សគន្ធោ សុគន្ធោ ទុគ្គន្ធោ, យោ វា បនញ្ញោបិ អត្ថិ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យម្ហិ គន្ធម្ហិ អនិទស្សនម្ហិ សប្បដិឃម្ហិ ឃានំ អនិទស្សនំ សប្បដិឃំ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, គន្ធោ បេសោ គន្ធាយតនំ បេតំ គន្ធធាតុ បេសា – ឥទំ តំ រូបំ គន្ធាយតនំ.

៦២៦. កតមំ តំ រូបំ គន្ធាយតនំ? យោ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលគន្ធោ សារគន្ធោ តចគន្ធោ បត្តគន្ធោ បុប្ផគន្ធោ ផលគន្ធោ អាមកគន្ធោ វិស្សគន្ធោ សុគន្ធោ ទុគ្គន្ធោ, យោ វា បនញ្ញោបិ អត្ថិ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យោ គន្ធោ អនិទស្សនោ សប្បដិឃោ ឃានម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, គន្ធោ បេសោ គន្ធាយតនំ បេតំ គន្ធធាតុ បេសា – ឥទំ តំ រូបំ គន្ធាយតនំ.

៦២៧. កតមំ តំ រូបំ គន្ធាយតនំ? យោ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលគន្ធោ សារគន្ធោ តចគន្ធោ បត្តគន្ធោ បុប្ផគន្ធោ ផលគន្ធោ អាមកគន្ធោ វិស្សគន្ធោ សុគន្ធោ ទុគ្គន្ធោ, យោ វា បនញ្ញោបិ អត្ថិ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ គន្ធំ អារព្ភ ឃានំ និស្សាយ ឃានសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ គន្ធំ អារព្ភ ឃានំ និស្សាយ ឃានសម្ផស្សជា វេទនា…បេ… សញ្ញា…បេ… ចេតនា…បេ… ឃានវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ គន្ធារម្មណោ ឃានំ និស្សាយ ឃានសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ គន្ធារម្មណា ឃានំ និស្សាយ ឃានសម្ផស្សជា វេទនា…បេ… សញ្ញា…បេ… ចេតនា…បេ… ឃានវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, គន្ធោ បេសោ គន្ធាយតនំ បេតំ គន្ធធាតុ បេសា – ឥទំ តំ រូបំ គន្ធាយតនំ.

៦២៨. កតមំ តំ រូបំ រសាយតនំ? យោ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលរសោ ខន្ធរសោ តចរសោ បត្តរសោ បុប្ផរសោ ផលរសោ អម្ពិលំ មធុរំ តិត្តកំ កដុកំ លោណិកំ ខារិកំ លម្ពិលំ [លបិលកំ (សី.)] កសាវោ សាទុ អសាទុ, យោ វា បនញ្ញោបិ អត្ថិ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ រសំ អនិទស្សនំ សប្បដិឃំ ជិវ្ហាយ អនិទស្សនាយ សប្បដិឃាយ សាយិ វា សាយតិ វា សាយិស្សតិ វា សាយេ វា, រសោ បេសោ រសាយតនំ បេតំ រសធាតុ បេសា – ឥទំ តំ រូបំ រសាយតនំ.

៦២៩. កតមំ តំ រូបំ រសាយតនំ? យោ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលរសោ ខន្ធរសោ តចរសោ បត្តរសោ បុប្ផរសោ ផលរសោ អម្ពិលំ មធុរំ តិត្តកំ កដុកំ លោណិកំ ខារិកំ លម្ពិលំ កសាវោ សាទុ អសាទុ, យោ វា បនញ្ញោបិ អត្ថិ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យម្ហិ រសម្ហិ អនិទស្សនម្ហិ សប្បដិឃម្ហិ ជិវ្ហា អនិទស្សនា សប្បដិឃា បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, រសោ បេសោ រសាយតនំ បេតំ រសធាតុ បេសា – ឥទំ តំ រូបំ រសាយតនំ.

៦៣០. កតមំ តំ រូបំ រសាយតនំ? យោ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលរសោ ខន្ធរសោ តចរសោ បត្តរសោ បុប្ផរសោ ផលរសោ អម្ពិលំ មធុរំ តិត្តកំ កដុកំ លោណិកំ ខារិកំ លម្ពិលំ កសាវោ សាទុ អសាទុ, យោ វា បនញ្ញោបិ អត្ថិ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យោ រសោ អនិទស្សនោ សប្បដិឃោ ជិវ្ហាយ អនិទស្សនាយ សប្បដិឃាយ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, រសោ បេសោ រសាយតនំ បេតំ រសធាតុ បេសា – ឥទំ តំ រូបំ រសាយតនំ.

៦៣១. កតមំ តំ រូបំ រសាយតនំ? យោ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលរសោ ខន្ធរសោ តចរសោ បត្តរសោ បុប្ផរសោ ផលរសោ អម្ពិលំ មធុរំ តិត្តកំ កដុកំ លោណិកំ ខារិកំ លម្ពិលំ កសាវោ សាទុ អសាទុ, យោ វា បនញ្ញោបិ អត្ថិ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ រសំ អារព្ភ ជិវ្ហំ និស្សាយ ជិវ្ហាសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ រសំ អារព្ភ ជិវ្ហំ និស្សាយ ជិវ្ហាសម្ផស្សជា វេទនា…បេ… សញ្ញា…បេ… ចេតនា…បេ… ជិវ្ហាវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ រសារម្មណោ ជិវ្ហំ និស្សាយ ជិវ្ហាសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ រសារម្មណា ជិវ្ហំ និស្សាយ ជិវ្ហាសម្ផស្សជា វេទនា…បេ… សញ្ញា…បេ… ចេតនា…បេ… ជិវ្ហាវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, រសោ បេសោ រសាយតនំ បេតំ រសធាតុ បេសា – ឥទំ តំ រូបំ រសាយតនំ.

៦៣២. កតមំ តំ រូបំ ឥត្ថិន្ទ្រិយំ? យំ ឥត្ថិយា ឥត្ថិលិង្គំ ឥត្ថិនិមិត្តំ ឥត្ថិកុត្តំ ឥត្ថាកប្បោ ឥត្ថត្តំ ឥត្ថិភាវោ [ឥត្ថិត្តំ ឥត្ថីភាវោ (ស្យា.)] – ឥទំ តំ រូបំ ឥត្ថិន្ទ្រិយំ.

៦៣៣. កតមំ តំ រូបំ បុរិសិន្ទ្រិយំ? យំ បុរិសស្ស បុរិសលិង្គំ បុរិសនិមិត្តំ បុរិសកុត្តំ បុរិសាកប្បោ បុរិសត្តំ បុរិសភាវោ – ឥទំ តំ រូបំ បុរិសិន្ទ្រិយំ.

៦៣៤. កតមំ តំ រូបំ ជីវិតិន្ទ្រិយំ? យោ តេសំ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា ជីវិតំ ជីវិតិន្ទ្រិយំ – ឥទំ តំ រូបំ ជីវិតិន្ទ្រិយំ.

៦៣៥. កតមំ តំ រូបំ កាយវិញ្ញត្តិ? យា កុសលចិត្តស្ស វា អកុសលចិត្តស្ស វា អព្យាកតចិត្តស្ស វា អភិក្កមន្តស្ស វា បដិក្កមន្តស្ស វា អាលោកេន្តស្ស វា វិលោកេន្តស្ស វា សមិញ្ជេន្តស្ស វា បសារេន្តស្ស វា កាយស្ស ថម្ភនា សន្ថម្ភនា សន្ថម្ភិតត្តំ វិញ្ញត្តិ វិញ្ញាបនា វិញ្ញាបិតត្តំ – ឥទំ តំ រូបំ កាយវិញ្ញត្តិ.

៦៣៦. កតមំ តំ រូបំ វចីវិញ្ញត្តិ? យា កុសលចិត្តស្ស វា អកុសលចិត្តស្ស វា អព្យាកតចិត្តស្ស វា វាចា គិរា ព្យប្បថោ ឧទីរណំ ឃោសោ ឃោសកម្មំ វាចា វចីភេទោ – អយំ វុច្ចតិ វាចា. យា តាយ វាចាយ វិញ្ញត្តិ វិញ្ញាបនា វិញ្ញាបិតត្តំ – ឥទំ តំ រូបំ វចីវិញ្ញត្តិ.

៦៣៧. កតមំ តំ រូបំ អាកាសធាតុ? យោ អាកាសោ អាកាសគតំ អឃំ អឃគតំ វិវរោ វិវរគតំ អសម្ផុដ្ឋំ ចតូហិ មហាភូតេហិ – ឥទំ តំ រូបំ អាកាសធាតុ.

៦៣៨. កតមំ តំ រូបំ រូបស្ស លហុតា? យា រូបស្ស លហុតា លហុបរិណាមតា អទន្ធនតា អវិត្ថនតា – ឥទំ តំ រូបំ រូបស្ស លហុតា.

៦៣៩. កតមំ តំ រូបំ រូបស្ស មុទុតា? យា រូបស្ស មុទុតា មទ្ទវតា អកក្ខឡតា អកថិនតា – ឥទំ តំ រូបំ រូបស្ស មុទុតា.

៦៤០. កតមំ តំ រូបំ រូបស្ស កម្មញ្ញតា? យា រូបស្ស កម្មញ្ញតា កម្មញ្ញត្តំ កម្មញ្ញភាវោ – ឥទំ តំ រូបំ រូបស្ស កម្មញ្ញតា.

៦៤១. កតមំ តំ រូបំ រូបស្ស ឧបចយោ? យោ អាយតនានំ អាចយោ, សោ រូបស្ស ឧបចយោ – ឥទំ តំ រូបំ រូបស្ស ឧបចយោ.

៦៤២. កតមំ តំ រូបំ រូបស្ស សន្តតិ? យោ រូបស្ស ឧបចយោ, សា រូបស្ស សន្តតិ – ឥទំ តំ រូបំ រូបស្ស សន្តតិ.

៦៤៣. កតមំ តំ រូបំ រូបស្ស ជរតា? យា រូបស្ស ជរា ជីរណតា ខណ្ឌិច្ចំ បាលិច្ចំ វលិត្តចតា អាយុនោ សំហានិ ឥន្ទ្រិយានំ បរិបាកោ – ឥទំ តំ រូបំ រូបស្ស ជរតា.

៦៤៤. កតមំ តំ រូបំ រូបស្ស អនិច្ចតា? យោ រូបស្ស ខយោ វយោ ភេទោ បរិភេទោ អនិច្ចតា អន្តរធានំ – ឥទំ តំ រូបំ រូបស្ស អនិច្ចតា.

៦៤៥. កតមំ តំ រូបំ កពឡីការោ អាហារោ? ឱទនោ កុម្មាសោ សត្តុ មច្ឆោ មំសំ ខីរំ ទធិ សប្បិ នវនីតំ តេលំ មធុ ផាណិតំ, យំ វា បនញ្ញម្បិ អត្ថិ រូបំ យម្ហិ យម្ហិ ជនបទេ តេសំ តេសំ សត្តានំ មុខាសិយំ ទន្តវិខាទនំ គលជ្ឈោហរណីយំ កុច្ឆិវិត្ថម្ភនំ, យាយ ឱជាយ សត្តា យាបេន្តិ – ឥទំ តំ រូបំ កពឡីការោ អាហារោ.

ឥទំ តំ រូបំ ឧបាទា.

ឧបាទាភាជនីយំ.

រូបកណ្ឌេ បឋមភាណវារោ.

៦៤៦. កតមំ តំ រូបំ នោ ឧបាទា? ផោដ្ឋព្ពាយតនំ, អាបោធាតុ.

៦៤៧. កតមំ តំ រូបំ ផោដ្ឋព្ពាយតនំ? បថវីធាតុ តេជោធាតុ វាយោធាតុ កក្ខឡំ មុទុកំ សណ្ហំ ផរុសំ សុខសម្ផស្សំ ទុក្ខសម្ផស្សំ គរុកំ លហុកំ, យំ ផោដ្ឋព្ពំ អនិទស្សនំ សប្បដិឃំ កាយេន អនិទស្សនេន សប្បដិឃេន ផុសិ វា ផុសតិ វា ផុសិស្សតិ វា ផុសេ វា ផោដ្ឋព្ពោ បេសោ ផោដ្ឋព្ពាយតនំ បេតំ ផោដ្ឋព្ពធាតុ បេសា – ឥទំ តំ រូបំ ផោដ្ឋព្ពាយតនំ.

៦៤៨. កតមំ តំ រូបំ ផោដ្ឋព្ពាយតនំ? បថវីធាតុ តេជោធាតុ វាយោធាតុ កក្ខឡំ មុទុកំ សណ្ហំ ផរុសំ សុខសម្ផស្សំ ទុក្ខសម្ផស្សំ គរុកំ លហុកំ, យម្ហិ ផោដ្ឋព្ពម្ហិ អនិទស្សនម្ហិ សប្បដិឃម្ហិ កាយោ អនិទស្សនោ សប្បដិឃោ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ផោដ្ឋព្ពោ បេសោ ផោដ្ឋព្ពាយតនំ បេតំ ផោដ្ឋព្ពធាតុ បេសា – ឥទំ តំ រូបំ ផោដ្ឋព្ពាយតនំ.

៦៤៩. កតមំ តំ រូបំ ផោដ្ឋព្ពាយតនំ? បថវីធាតុ តេជោធាតុ វាយោធាតុ កក្ខឡំ មុទុកំ សណ្ហំ ផរុសំ សុខសម្ផស្សំ ទុក្ខសម្ផស្សំ គរុកំ លហុកំ, យោ ផោដ្ឋព្ពោ អនិទស្សនោ សប្បដិឃោ កាយម្ហិ អនិទស្សនម្ហិ សប្បដិឃម្ហិ បដិហញ្ញិ វា បដិហញ្ញតិ វា បដិហញ្ញិស្សតិ វា បដិហញ្ញេ វា, ផោដ្ឋព្ពោ បេសោ ផោដ្ឋព្ពាយតនំ បេតំ ផោដ្ឋព្ពធាតុ បេសា – ឥទំ តំ រូបំ ផោដ្ឋព្ពាយតនំ.

៦៥០. កតមំ តំ រូបំ ផោដ្ឋព្ពាយតនំ? បថវីធាតុ តេជោធាតុ វាយោធាតុ កក្ខឡំ មុទុកំ សណ្ហំ ផរុសំ សុខសម្ផស្សំ ទុក្ខសម្ផស្សំ គរុកំ លហុកំ, យំ ផោដ្ឋព្ពំ អារព្ភ កាយំ និស្សាយ កាយសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ផោដ្ឋព្ពំ អារព្ភ កាយំ និស្សាយ កាយសម្ផស្សជា វេទនា…បេ… សញ្ញា…បេ… ចេតនា…បេ… កាយវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ផោដ្ឋព្ពារម្មណោ កាយំ និស្សាយ កាយសម្ផស្សោ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា…បេ… យំ ផោដ្ឋព្ពារម្មណា កាយំ និស្សាយ កាយសម្ផស្សជា វេទនា…បេ… សញ្ញា…បេ… ចេតនា…បេ… កាយវិញ្ញាណំ ឧប្បជ្ជិ វា ឧប្បជ្ជតិ វា ឧប្បជ្ជិស្សតិ វា ឧប្បជ្ជេ វា, ផោដ្ឋព្ពោ បេសោ ផោដ្ឋព្ពាយតនំ បេតំ ផោដ្ឋព្ពធាតុ បេសា – ឥទំ តំ រូបំ ផោដ្ឋព្ពាយតនំ.

៦៥១. កតមំ តំ រូបំ អាបោធាតុ? យំ អាបោ អាបោគតំ សិនេហោ សិនេហគតំ ពន្ធនត្តំ រូបស្ស – ឥទំ តំ រូបំ អាបោធាតុ.

ឥទំ តំ រូបំ នោ ឧបាទា.

៦៥២. កតមំ តំ រូបំ ឧបាទិណ្ណំ? ចក្ខាយតនំ សោតាយតនំ ឃានាយតនំ ជិវ្ហាយតនំ កាយាយតនំ ឥត្ថិន្ទ្រិយំ បុរិសិន្ទ្រិយំ ជីវិតិន្ទ្រិយំ, យំ វា បនញ្ញម្បិ អត្ថិ រូបំ កម្មស្ស កតត្តា រូបាយតនំ គន្ធាយតនំ រសាយតនំ ផោដ្ឋព្ពាយតនំ អាកាសធាតុ អាបោធាតុ រូបស្ស ឧបចយោ រូបស្ស សន្តតិ កពឡីការោ អាហារោ – ឥទំ តំ រូបំ ឧបាទិណ្ណំ.

៦៥៣. កតមំ តំ រូបំ អនុបាទិណ្ណំ? សទ្ទាយតនំ កាយវិញ្ញត្តិ វចីវិញ្ញត្តិ រូបស្ស លហុតា រូបស្ស មុទុតា រូបស្ស កម្មញ្ញតា រូបស្ស ជរតា រូបស្ស អនិច្ចតា, យំ វា បនញ្ញម្បិ អត្ថិ រូបំ ន កម្មស្ស កតត្តា រូបាយតនំ គន្ធាយតនំ រសាយតនំ ផោដ្ឋព្ពាយតនំ អាកាសធាតុ អាបោធាតុ រូបស្ស ឧបចយោ រូបស្ស សន្តតិ កពឡីការោ អាហារោ – ឥទំ តំ រូបំ អនុបាទិណ្ណំ.

៦៥៤. កតមំ តំ រូបំ ឧបាទិណ្ណុបាទានិយំ? ចក្ខាយតនំ…បេ… កាយាយតនំ ឥត្ថិន្ទ្រិយំ បុរិសិន្ទ្រិយំ ជីវិតិន្ទ្រិយំ, យំ វា បនញ្ញម្បិ អត្ថិ រូបំ កម្មស្ស កតត្តា រូបាយតនំ គន្ធាយតនំ រសាយតនំ ផោដ្ឋព្ពាយតនំ អាកាសធាតុ អាបោធាតុ រូបស្ស ឧបចយោ រូបស្ស សន្តតិ កពឡីការោ អាហារោ – ឥទំ តំ រូបំ ឧបាទិណ្ណុបាទានិយំ.

៦៥៥. កតមំ តំ រូបំ អនុបាទិណ្ណុបាទានិយំ? សទ្ទាយតនំ កាយវិញ្ញត្តិ វចីវិញ្ញត្តិ រូបស្ស លហុតា រូបស្ស មុទុតា រូបស្ស កម្មញ្ញតា រូបស្ស ជរតា រូបស្ស អនិច្ចតា, យំ វា បនញ្ញម្បិ អត្ថិ រូបំ ន កម្មស្ស កតត្តា, រូបាយតនំ គន្ធាយតនំ រសាយតនំ ផោដ្ឋព្ពាយតនំ អាកាសធាតុ អាបោធាតុ រូបស្ស ឧបចយោ រូបស្ស សន្តតិ កពឡីការោ អាហារោ – ឥទំ តំ រូបំ អនុបាទិណ្ណុបាទានិយំ.

៦៥៦. កតមំ តំ រូបំ សនិទស្សនំ? រូបាយតនំ – ឥទំ តំ រូបំ សនិទស្សនំ.

៦៥៧. កតមំ តំ រូបំ អនិទស្សនំ? ចក្ខាយតនំ…បេ… កពឡីការោ អាហារោ – ឥទំ តំ រូបំ អនិទស្សនំ.

៦៥៨. កតមំ តំ រូបំ សប្បដិឃំ? ចក្ខាយតនំ សោតាយតនំ ឃានាយតនំ ជិវ្ហាយតនំ កាយាយតនំ រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ – ឥទំ តំ រូបំ សប្បដិឃំ.

៦៥៩. កតមំ តំ រូបំ អប្បដិឃំ? ឥត្ថិន្ទ្រិយំ…បេ… កពឡីការោ អាហារោ – ឥទំ តំ រូបំ អប្បដិឃំ.

៦៦០. កតមំ តំ រូបំ ឥន្ទ្រិយំ? ចក្ខុន្ទ្រិយំ សោតិន្ទ្រិយំ ឃានិន្ទ្រិយំ ជិវ្ហិន្ទ្រិយំ កាយិន្ទ្រិយំ ឥត្ថិន្ទ្រិយំ បុរិសិន្ទ្រិយំ ជីវិតិន្ទ្រិយំ – ឥទំ តំ រូបំ ឥន្ទ្រិយំ.

៦៦១. កតមំ តំ រូបំ ន ឥន្ទ្រិយំ? រូបាយតនំ…បេ… កពឡីការោ អាហារោ – ឥទំ តំ រូបំ ន ឥន្ទ្រិយំ.

៦៦២. កតមំ តំ រូបំ មហាភូតំ? ផោដ្ឋព្ពាយតនំ អាបោធាតុ – ឥទំ តំ រូបំ មហាភូតំ.

៦៦៣. កតមំ តំ រូបំ ន មហាភូតំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន មហាភូតំ.

៦៦៤. កតមំ តំ រូបំ វិញ្ញត្តិ? កាយវិញ្ញត្តិ វចីវិញ្ញត្តិ – ឥទំ តំ រូបំ វិញ្ញត្តិ.

៦៦៥. កតមំ តំ រូបំ ន វិញ្ញត្តិ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន វិញ្ញត្តិ.

៦៦៦. កតមំ តំ រូបំ ចិត្តសមុដ្ឋានំ? កាយវិញ្ញត្តិ វចីវិញ្ញត្តិ យំ វា បនញ្ញម្បិ អត្ថិ រូបំ ចិត្តជំ ចិត្តហេតុកំ ចិត្តសមុដ្ឋានំ រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ អាកាសធាតុ អាបោធាតុ រូបស្ស លហុតា រូបស្ស មុទុតា រូបស្ស កម្មញ្ញតា រូបស្ស ឧបចយោ រូបស្ស សន្តតិ កពឡីការោ អាហារោ – ឥទំ តំ រូបំ ចិត្តសមុដ្ឋានំ.

៦៦៧. កតមំ តំ រូបំ ន ចិត្តសមុដ្ឋានំ? ចក្ខាយតនំ…បេ… កាយាយតនំ ឥត្ថិន្ទ្រិយំ បុរិសិន្ទ្រិយំ ជីវិតិន្ទ្រិយំ រូបស្ស ជរតា រូបស្ស អនិច្ចតា, យំ វា បនញ្ញម្បិ អត្ថិ រូបំ ន ចិត្តជំ ន ចិត្តហេតុកំ ន ចិត្តសមុដ្ឋានំ រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ អាកាសធាតុ អាបោធាតុ រូបស្ស លហុតា រូបស្ស មុទុតា រូបស្ស កម្មញ្ញតា រូបស្ស ឧបចយោ រូបស្ស សន្តតិ កពឡីការោ អាហារោ – ឥទំ តំ រូបំ ន ចិត្តសមុដ្ឋានំ.

៦៦៨. កតមំ តំ រូបំ ចិត្តសហភុ? កាយវិញ្ញត្តិ វចីវិញ្ញត្តិ – ឥទំ តំ រូបំ ចិត្តសហភុ.

៦៦៩. កតមំ តំ រូបំ ន ចិត្តសហភុ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន ចិត្តសហភុ.

៦៧០. កតមំ តំ រូបំ ចិត្តានុបរិវត្តិ? កាយវិញ្ញត្តិ វចីវិញ្ញត្តិ – ឥទំ តំ រូបំ ចិត្តានុបរិវត្តិ.

៦៧១. កតមំ តំ រូបំ ន ចិត្តានុបរិវត្តិ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន ចិត្តានុបរិវត្តិ.

៦៧២. កតមំ តំ រូបំ អជ្ឈត្តិកំ? ចក្ខាយតនំ…បេ… កាយាយតនំ – ឥទំ តំ រូបំ អជ្ឈត្តិកំ.

៦៧៣. កតមំ តំ រូបំ ពាហិរំ? រូបាយតនំ…បេ… កពឡីការោ អាហារោ – ឥទំ តំ រូបំ ពាហិរំ.

៦៧៤. កតមំ តំ រូបំ ឱឡារិកំ? ចក្ខាយតនំ…បេ… ផោដ្ឋព្ពាយតនំ – ឥទំ តំ រូបំ ឱឡារិកំ.

៦៧៥. កតមំ តំ រូបំ សុខុមំ? ឥត្ថិន្ទ្រិយំ…បេ… កពឡីការោ អាហារោ – ឥទំ តំ រូបំ សុខុមំ.

៦៧៦. កតមំ តំ រូបំ ទូរេ? ឥត្ថិន្ទ្រិយំ…បេ… កពឡីការោ អាហារោ – ឥទំ តំ រូបំ ទូរេ.

៦៧៧. កតមំ តំ រូបំ សន្តិកេ? ចក្ខាយតនំ…បេ… ផោដ្ឋព្ពាយតនំ – ឥទំ តំ រូបំ សន្តិកេ.

៦៧៨. កតមំ តំ រូបំ ចក្ខុសម្ផស្សស្ស វត្ថុ? ចក្ខាយតនំ – ឥទំ តំ រូបំ ចក្ខុសម្ផស្សស្ស វត្ថុ.

៦៧៩. កតមំ តំ រូបំ ចក្ខុសម្ផស្សស្ស ន វត្ថុ? សោតាយតនំ…បេ… កពឡីការោ អាហារោ – ឥទំ តំ រូបំ ចក្ខុសម្ផស្សស្ស ន វត្ថុ.

៦៨០. កតមំ តំ រូបំ ចក្ខុសម្ផស្សជាយ វេទនាយ…បេ… សញ្ញាយ…បេ… ចេតនាយ …បេ… ចក្ខុវិញ្ញាណស្ស វត្ថុ? ចក្ខាយតនំ – ឥទំ តំ រូបំ ចក្ខុវិញ្ញាណស្ស វត្ថុ.

៦៨១. កតមំ តំ រូបំ ចក្ខុវិញ្ញាណស្ស ន វត្ថុ? សោតាយតនំ…បេ… កពឡីការោ អាហារោ – ឥទំ តំ រូបំ ចក្ខុវិញ្ញាណស្ស ន វត្ថុ.

៦៨២. កតមំ តំ រូបំ សោតសម្ផស្សស្ស…បេ… ឃានសម្ផស្សស្ស…បេ… ជិវ្ហាសម្ផស្សស្ស…បេ… កាយសម្ផស្សស្ស វត្ថុ? កាយាយតនំ – ឥទំ តំ រូបំ កាយសម្ផស្សស្ស វត្ថុ.

៦៨៣. កតមំ តំ រូបំ កាយសម្ផស្សស្ស ន វត្ថុ? ចក្ខាយតនំ…បេ… កពឡីការោ អាហារោ – ឥទំ តំ រូបំ កាយសម្ផស្សស្ស ន វត្ថុ.

៦៨៤. កតមំ តំ រូបំ កាយសម្ផស្សជាយ វេទនាយ…បេ… សញ្ញាយ…បេ… ចេតនាយ…បេ… កាយវិញ្ញាណស្ស វត្ថុ? កាយាយតនំ – ឥទំ តំ រូបំ កាយវិញ្ញាណស្ស វត្ថុ.

៦៨៥. កតមំ តំ រូបំ កាយវិញ្ញាណស្ស ន វត្ថុ? ចក្ខាយតនំ…បេ… កពឡីការោ អាហារោ – ឥទំ តំ រូបំ កាយវិញ្ញាណស្ស ន វត្ថុ.

៦៨៦. កតមំ តំ រូបំ ចក្ខុសម្ផស្សស្ស អារម្មណំ? រូបាយតនំ – ឥទំ តំ រូបំ ចក្ខុសម្ផស្សស្ស អារម្មណំ.

៦៨៧. កតមំ តំ រូបំ ចក្ខុសម្ផស្សស្ស ន អារម្មណំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ចក្ខុសម្ផស្សស្ស ន អារម្មណំ.

៦៨៨. កតមំ តំ រូបំ ចក្ខុសម្ផស្សជាយ វេទនាយ…បេ… សញ្ញាយ…បេ… ចេតនាយ…បេ… ចក្ខុវិញ្ញាណស្ស អារម្មណំ? រូបាយតនំ – ឥទំ តំ រូបំ ចក្ខុវិញ្ញាណស្ស អារម្មណំ.

៦៨៩. កតមំ តំ រូបំ ចក្ខុវិញ្ញាណស្ស ន អារម្មណំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ចក្ខុវិញ្ញាណស្ស ន អារម្មណំ.

៦៩០. កតមំ តំ រូបំ សោតសម្ផស្សស្ស…បេ… ឃានសម្ផស្សស្ស …បេ… ជិវ្ហាសម្ផស្សស្ស…បេ… កាយសម្ផស្សស្ស អារម្មណំ? ផោដ្ឋព្ពាយតនំ – ឥទំ តំ រូបំ កាយសម្ផស្សស្ស អារម្មណំ.

៦៩១. កតមំ តំ រូបំ កាយសម្ផស្សស្ស ន អារម្មណំ? ចក្ខាយតនំ…បេ… កពឡីការោ អាហារោ – ឥទំ តំ រូបំ កាយសម្ផស្សស្ស ន អារម្មណំ.

៦៩២. កតមំ តំ រូបំ កាយសម្ផស្សជាយ វេទនាយ…បេ… សញ្ញាយ…បេ… ចេតនាយ…បេ… កាយវិញ្ញាណស្ស អារម្មណំ? ផោដ្ឋព្ពាយតនំ – ឥទំ តំ រូបំ កាយវិញ្ញាណស្ស អារម្មណំ.

៦៩៣. កតមំ តំ រូបំ កាយវិញ្ញាណស្ស ន អារម្មណំ? ចក្ខាយតនំ…បេ… កពឡីការោ អាហារោ – ឥទំ តំ រូបំ កាយវិញ្ញាណស្ស ន អារម្មណំ.

៦៩៤. កតមំ តំ រូបំ ចក្ខាយតនំ? យំ ចក្ខុ ចតុន្នំ មហាភូតានំ ឧបាទាយ បសាទោ…បេ… សុញ្ញោ គាមោ បេសោ – ឥទំ តំ រូបំ ចក្ខាយតនំ.

៦៩៥. កតមំ តំ រូបំ ន ចក្ខាយតនំ? សោតាយតនំ…បេ… កពឡីការោ អាហារោ – ឥទំ តំ រូបំ ន ចក្ខាយតនំ.

៦៩៦. កតមំ តំ រូបំ សោតាយតនំ…បេ… ឃានាយតនំ…បេ… ជិវ្ហាយតនំ…បេ… កាយាយតនំ? យោ កាយោ ចតុន្នំ មហាភូតានំ ឧបាទាយ បសាទោ…បេ… សុញ្ញោ គាមោ បេសោ – ឥទំ តំ រូបំ កាយាយតនំ.

៦៩៧. កតមំ តំ រូបំ ន កាយាយតនំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន កាយាយតនំ.

៦៩៨. កតមំ តំ រូបំ រូបាយតនំ? យំ រូបំ ចតុន្នំ មហាភូតានំ ឧបាទាយ វណ្ណនិភា…បេ… រូបធាតុ បេសា – ឥទំ តំ រូបំ រូបាយតនំ.

៦៩៩. កតមំ តំ រូបំ ន រូបាយតនំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន រូបាយតនំ.

៧០០. កតមំ តំ រូបំ សទ្ទាយតនំ…បេ… គន្ធាយតនំ …បេ… រសាយតនំ…បេ… ផោដ្ឋព្ពាយតនំ? បថវីធាតុ…បេ… ផោដ្ឋព្ពធាតុ បេសា – ឥទំ តំ រូបំ ផោដ្ឋព្ពាយតនំ.

៧០១. កតមំ តំ រូបំ ន ផោដ្ឋព្ពាយតនំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន ផោដ្ឋព្ពាយតនំ.

៧០២. កតមំ តំ រូបំ ចក្ខុធាតុ? ចក្ខាយតនំ – ឥទំ តំ រូបំ ចក្ខុធាតុ.

៧០៣. កតមំ តំ រូបំ ន ចក្ខុធាតុ? សោតាយតនំ…បេ… កពឡីការោ អាហារោ – ឥទំ តំ រូបំ ន ចក្ខុធាតុ.

៧០៤. កតមំ តំ រូបំ សោតធាតុ…បេ… ឃានធាតុ…បេ… ជិវ្ហាធាតុ…បេ… កាយធាតុ? កាយាយតនំ – ឥទំ តំ រូបំ កាយធាតុ.

៧០៥. កតមំ តំ រូបំ ន កាយធាតុ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន កាយធាតុ.

៧០៦. កតមំ តំ រូបំ រូបធាតុ? រូបាយតនំ – ឥទំ តំ រូបំ រូបធាតុ.

៧០៧. កតមំ តំ រូបំ ន រូបធាតុ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន រូបធាតុ.

៧០៨. កតមំ តំ រូបំ សទ្ទធាតុ…បេ… គន្ធធាតុ…បេ… រសធាតុ…បេ… ផោដ្ឋព្ពធាតុ? ផោដ្ឋព្ពាយតនំ – ឥទំ តំ រូបំ ផោដ្ឋព្ពធាតុ.

៧០៩. កតមំ តំ រូបំ ន ផោដ្ឋព្ពធាតុ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន ផោដ្ឋព្ពធាតុ.

៧១០. កតមំ តំ រូបំ ចក្ខុន្ទ្រិយំ? យំ ចក្ខុ ចតុន្នំ មហាភូតានំ ឧបាទាយ បសាទោ…បេ… សុញ្ញោ គាមោ បេសោ – ឥទំ តំ រូបំ ចក្ខុន្ទ្រិយំ.

៧១១. កតមំ តំ រូបំ ន ចក្ខុន្ទ្រិយំ? សោតាយតនំ…បេ… កពឡីការោ អាហារោ – ឥទំ តំ រូបំ ន ចក្ខុន្ទ្រិយំ.

៧១២. កតមំ តំ រូបំ សោតិន្ទ្រិយំ…បេ… ឃានិន្ទ្រិយំ…បេ… ជិវ្ហិន្ទ្រិយំ…បេ… កាយិន្ទ្រិយំ? យោ កាយោ ចតុន្នំ មហាភូតានំ ឧបាទាយ បសាទោ…បេ… សុញ្ញោ គាមោ បេសោ – ឥទំ តំ រូបំ កាយិន្ទ្រិយំ.

៧១៣. កតមំ តំ រូបំ ន កាយិន្ទ្រិយំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន កាយិន្ទ្រិយំ.

៧១៤. កតមំ តំ រូបំ ឥត្ថិន្ទ្រិយំ? យំ ឥត្ថិយា ឥត្ថិលិង្គំ ឥត្ថិនិមិត្តំ ឥត្ថិកុត្តំ ឥត្ថាកប្បោ ឥត្ថត្តំ ឥត្ថិភាវោ – ឥទំ តំ រូបំ ឥត្ថិន្ទ្រិយំ.

៧១៥. កតមំ តំ រូបំ ន ឥត្ថិន្ទ្រិយំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន ឥត្ថិន្ទ្រិយំ.

៧១៦. កតមំ តំ រូបំ បុរិសិន្ទ្រិយំ? យំ បុរិសស្ស បុរិសលិង្គំ បុរិសនិមិត្តំ បុរិសកុត្តំ បុរិសាកប្បោ បុរិសត្តំ បុរិសភាវោ – ឥទំ តំ រូបំ បុរិសិន្ទ្រិយំ.

៧១៧. កតមំ តំ រូបំ ន បុរិសិន្ទ្រិយំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន បុរិសិន្ទ្រិយំ.

៧១៨. កតមំ តំ រូបំ ជីវិតិន្ទ្រិយំ? យោ តេសំ រូបីនំ ធម្មានំ អាយុ ឋិតិ យបនា យាបនា ឥរិយនា វត្តនា បាលនា ជីវិតំ ជីវិតិន្ទ្រិយំ – ឥទំ តំ រូបំ ជីវិតិន្ទ្រិយំ.

៧១៩. កតមំ តំ រូបំ ន ជីវិតិន្ទ្រិយំ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន ជីវិតិន្ទ្រិយំ.

៧២០. កតមំ តំ រូបំ កាយវិញ្ញត្តិ? យា កុសលចិត្តស្ស វា អកុសលចិត្តស្ស វា អព្យាកតចិត្តស្ស វា អភិក្កមន្តស្ស វា បដិក្កមន្តស្ស វា អាលោកេន្តស្ស វា វិលោកេន្តស្ស វា សមិញ្ជេន្តស្ស វា បសារេន្តស្ស វា កាយស្ស ថម្ភនា សន្ថម្ភនា សន្ថម្ភិតត្តំ វិញ្ញត្តិ វិញ្ញាបនា វិញ្ញាបិតត្តំ – ឥទំ តំ រូបំ កាយវិញ្ញត្តិ.

៧២១. កតមំ តំ រូបំ ន កាយវិញ្ញត្តិ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន កាយវិញ្ញត្តិ.

៧២២. កតមំ តំ រូបំ វចីវិញ្ញត្តិ? យា កុសលចិត្តស្ស វា អកុសលចិត្តស្ស វា អព្យាកតចិត្តស្ស វា វាចា គិរា ព្យប្បថោ ឧទីរណំ ឃោសោ ឃោសកម្មំ វាចា វចីភេទោ, អយំ វុច្ចតិ វាចា. យា តាយ វាចាយ វិញ្ញត្តិ វិញ្ញាបនា វិញ្ញាបិតត្តំ – ឥទំ តំ រូបំ វចីវិញ្ញត្តិ.

៧២៣. កតមំ តំ រូបំ ន វចីវិញ្ញត្តិ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន វចីវិញ្ញត្តិ.

៧២៤. កតមំ តំ រូបំ អាកាសធាតុ? យោ អាកាសោ អាកាសគតំ អឃំ អឃគតំ វិវរោ វិវរគតំ អសម្ផុដ្ឋំ ចតូហិ មហាភូតេហិ – ឥទំ តំ រូបំ អាកាសធាតុ.

៧២៥. កតមំ តំ រូបំ ន អាកាសធាតុ? ចក្ខាយតនំ …បេ… កពឡីការោ អាហារោ – ឥទំ តំ រូបំ ន អាកាសធាតុ.

៧២៦. កតមំ តំ រូបំ អាបោធាតុ? យំ អាបោ អាបោគតំ សិនេហោ សិនេហគតំ ពន្ធនត្តំ រូបស្ស – ឥទំ តំ រូបំ អាបោធាតុ.

៧២៧. កតមំ តំ រូបំ ន អាបោធាតុ? ចក្ខាយតនំ…បេ… កពឡីការោ អាហារោ – ឥទំ តំ រូបំ ន អាបោធាតុ.

៧២៨. កតមំ តំ រូបំ រូបស្ស លហុតា? យា រូបស្ស លហុតា លហុបរិណាមតា អទន្ធនតា អវិត្ថនតា – ឥទំ តំ រូបំ រូបស្ស លហុតា.

៧២៩. កតមំ តំ រូបំ រូបស្ស ន លហុតា? ចក្ខាយតនំ…បេ… កពឡីការោ អាហារោ – ឥទំ តំ រូបំ រូបស្ស ន លហុតា.

៧៣០. កតមំ តំ រូបំ រូបស្ស មុទុតា? យា រូបស្ស មុទុតា មទ្ទវតា អកក្ខឡតា អកថិនតា – ឥទំ តំ រូបំ រូបស្ស មុទុតា.

៧៣១. កតមំ តំ រូបំ រូបស្ស ន មុទុតា? ចក្ខាយតនំ…បេ… កពឡីការោ អាហារោ – ឥទំ តំ រូបំ រូបស្ស ន មុទុតា.

៧៣២. កតមំ តំ រូបំ រូបស្ស កម្មញ្ញតា? យា រូបស្ស កម្មញ្ញតា កម្មញ្ញត្តំ កម្មញ្ញភាវោ – ឥទំ តំ រូបំ រូបស្ស កម្មញ្ញតា.

៧៣៣. កតមំ តំ រូបំ រូបស្ស ន កម្មញ្ញតា? ចក្ខាយតនំ…បេ… កពឡីការោ អាហារោ – ឥទំ តំ រូបំ រូបស្ស ន កម្មញ្ញតា.