៥. ទុកំ

៤៩៤. ហេតូហិ ធម្មេហិ យេ ធម្មា… សហេតុកេហិ ធម្មេហិ យេ ធម្មា… ហេតុសម្បយុត្តេហិ ធម្មេហិ យេ ធម្មា… ហេតូហិ ចេវ សហេតុកេហិ ច ធម្មេហិ យេ ធម្មា… សហេតុកេហិ ចេវ ន ច ហេតូហិ ធម្មេហិ យេ ធម្មា… ហេតូហិ ចេវ ហេតុសម្បយុត្តេហិ ច ធម្មេហិ យេ ធម្មា… ហេតុសម្បយុត្តេហិ ចេវ ន ច ហេតូហិ ធម្មេហិ យេ ធម្មា… ន ហេតុសហេតុកេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៤៩៥. អហេតុកេហិ ធម្មេហិ យេ ធម្មា… ហេតុវិប្បយុត្តេហិ ធម្មេហិ យេ ធម្មា… ន ហេតុអហេតុកេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៤៩៦. អប្បច្ចយេហិ ធម្មេហិ យេ ធម្មា… អសង្ខតេហិ ធម្មេហិ យេ ធម្មា… សនិទស្សនេហិ ធម្មេហិ យេ ធម្មា… សប្បដិឃេហិ ធម្មេហិ យេ ធម្មា… រូបីហិ ធម្មេហិ យេ ធម្មា… លោកុត្តរេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៤៩៧. លោកិយេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៤៩៨. អាសវេហិ ធម្មេហិ យេ ធម្មា… អាសវសម្បយុត្តេហិ ធម្មេហិ យេ ធម្មា… អាសវេហិ ចេវ សាសវេហិ ច ធម្មេហិ យេ ធម្មា… អាសវេហិ ចេវ អាសវសម្បយុត្តេហិ ច ធម្មេហិ យេ ធម្មា… អាសវសម្បយុត្តេហិ ចេវ នោ ច អាសវេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៤៩៩. សាសវេហិ ធម្មេហិ យេ ធម្មា… អាសវវិប្បយុត្តេហិ ធម្មេហិ យេ ធម្មា… សាសវេហិ ចេវ នោ ច អាសវេហិ ធម្មេហិ យេ ធម្មា… អាសវវិប្បយុត្តេហិ សាសវេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៥០០. អនាសវេហិ ធម្មេហិ យេ ធម្មា… អាសវវិប្បយុត្តេហិ អនាសវេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៥០១. សំយោជនេហិ ធម្មេហិ យេ ធម្មា… គន្ថេហិ ធម្មេហិ យេ ធម្មា… ឱឃេហិ ធម្មេហិ យេ ធម្មា… យោគេហិ ធម្មេហិ យេ ធម្មា… នីវរណេហិ ធម្មេហិ យេ ធម្មា… បរាមាសេហិ ធម្មេហិ យេ ធម្មា… បរាមាសសម្បយុត្តេហិ ធម្មេហិ យេ ធម្មា… បរាមាសេហិ ចេវ បរាមដ្ឋេហិ ច ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៥០២. បរាមដ្ឋេហិ ធម្មេហិ យេ ធម្មា… បរាមាសវិប្បយុត្តេហិ ធម្មេហិ យេ ធម្មា… បរាមដ្ឋេហិ ចេវ នោ ច បរាមាសេហិ ធម្មេហិ យេ ធម្មា… បរាមាសវិប្បយុត្តេហិ បរាមដ្ឋេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៥០៣. អបរាមដ្ឋេហិ ធម្មេហិ យេ ធម្មា… បរាមាសវិប្បយុត្តេហិ អបរាមដ្ឋេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៥០៤. សារម្មណេហិ ធម្មេហិ យេ ធម្មា… ចិត្តេហិ ធម្មេហិ យេ ធម្មា… ចេតសិកេហិ ធម្មេហិ យេ ធម្មា… ចិត្តសម្បយុត្តេហិ ធម្មេហិ យេ ធម្មា… ចិត្តសំសដ្ឋេហិ ធម្មេហិ យេ ធម្មា… ចិត្តសំសដ្ឋសមុដ្ឋានេហិ ធម្មេហិ យេ ធម្មា… ចិត្តសំសដ្ឋសមុដ្ឋានសហភូហិ ធម្មេហិ យេ ធម្មា… ចិត្តសំសដ្ឋសមុដ្ឋានានុបរិវត្តីហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា ឯកេន ខន្ធេន ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

៥០៥. អនារម្មណេហិ ធម្មេហិ យេ ធម្មា… ចិត្តវិប្បយុត្តេហិ ធម្មេហិ យេ ធម្មា… ចិត្តសំសដ្ឋេហិ ធម្មេហិ យេ ធម្មា… ឧបាទាធម្មេហិ យេ ធម្មា… អនុបាទិន្នេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៥០៦. ឧបាទិន្នេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ តីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ បន្នរសហិ ធាតូហិ អសង្គហិតា.

៥០៧. ឧបាទានេហិ ធម្មេហិ យេ ធម្មា… កិលេសេហិ ធម្មេហិ យេ ធម្មា… សំកិលិដ្ឋេហិ ធម្មេហិ យេ ធម្មា… កិលេសសម្បយុត្តេហិ ធម្មេហិ យេ ធម្មា… កិលេសេហិ ចេវ សំកិលេសិកេហិ ច ធម្មេហិ យេ ធម្មា… កិលេសេហិ ចេវ សំកិលិដ្ឋេហិ ច ធម្មេហិ យេ ធម្មា… សំកិលិដ្ឋេហិ ចេវ នោ ច កិលេសេហិ ធម្មេហិ យេ ធម្មា… កិលេសេហិ ចេវ កិលេសសម្បយុត្តេហិ ច ធម្មេហិ យេ ធម្មា… កិលេសសម្បយុត្តេហិ ចេវ នោ ច កិលេសេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៥០៨. សំកិលេសិកេហិ ធម្មេហិ យេ ធម្មា… អសំកិលិដ្ឋេហិ ធម្មេហិ យេ ធម្មា… កិលេសវិប្បយុត្តេហិ ធម្មេហិ យេ ធម្មា… សំកិលេសិកេហិ ចេវ នោ ច កិលេសេហិ ធម្មេហិ យេ ធម្មា… កិលេសវិប្បយុត្តេហិ សំកិលេសិកេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៥០៩. អសំកិលេសិកេហិ ធម្មេហិ យេ ធម្មា… កិលេសវិប្បយុត្តេហិ អសំកិលេសិកេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៥១០. ទស្សនេន បហាតព្ពេហិ ធម្មេហិ យេ ធម្មា… ភាវនាយ បហាតព្ពេហិ ធម្មេហិ យេ ធម្មា… ទស្សនេន បហាតព្ពហេតុកេហិ ធម្មេហិ យេ ធម្មា… ភាវនាយ បហាតព្ពហេតុកេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៥១១. ន ទស្សនេន បហាតព្ពេហិ ធម្មេហិ យេ ធម្មា… ន ភាវនាយ បហាតព្ពេហិ ធម្មេហិ យេ ធម្មា… ន ទស្សនេន បហាតព្ពហេតុកេហិ ធម្មេហិ យេ ធម្មា… ន ភាវនាយ បហាតព្ពហេតុកេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៥១២. សវិតក្កេហិ ធម្មេហិ យេ ធម្មា… សវិចារេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ សត្តរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ឯកាយ ធាតុយា អសង្គហិតា.

៥១៣. សប្បីតិកេហិ ធម្មេហិ យេ ធម្មា… បីតិសហគតេហិ ធម្មេហិ យេ ធម្មា… សុខសហគតេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៥១៤. ឧបេក្ខាសហគតេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ តេរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ បញ្ចហិ ធាតូហិ អសង្គហិតា.

៥១៥. កាមាវចរេហិ ធម្មេហិ យេ ធម្មា… បរិយាបន្នេហិ ធម្មេហិ យេ ធម្មា… សឧត្តរេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៥១៦. ន កាមាវចរេហិ ធម្មេហិ យេ ធម្មា… អបរិយាបន្នេហិ ធម្មេហិ យេ ធម្មា… អនុត្តរេហិ ធម្មេហិ យេ ធម្មា វិប្បយុត្តា… តេ ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៥១៧. រូបាវចរេហិ ធម្មេហិ យេ ធម្មា… អរូបាវចរេហិ ធម្មេហិ យេ ធម្មា… និយ្យានិកេហិ ធម្មេហិ យេ ធម្មា… និយតេហិ ធម្មេហិ យេ ធម្មា … សរណេហិ ធម្មេហិ យេ ធម្មា វិប្បយុត្តា… តេ ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៥១៨. ន រូបាវចរេហិ ធម្មេហិ យេ ធម្មា… ន អរូបាវចរេហិ ធម្មេហិ យេ ធម្មា… អនិយ្យានិកេហិ ធម្មេហិ យេ ធម្មា… អនិយតេហិ ធម្មេហិ យេ ធម្មា… អរណេហិ ធម្មេហិ យេ ធម្មា វិប្បយុត្តា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? តេ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

ធម្មាយតនំ ធម្មធាតុ, អថ ជីវិតំ នាមរូបំ;

សឡាយតនំ ជាតិជរាមតំ, ទ្វេ ច តិកេ ន លព្ភរេ.

បឋមន្តរេ សត្ត ច, គោច្ឆកេ ទស អបរន្តេ;

ចុទ្ទស ឆ ច មត្ថកេ, ឥច្ចេតេ សត្តចត្តាលីស ធម្មា;

សមុច្ឆេទេ ន លព្ភន្តិ, មោឃបុច្ឆកេន ចាតិ.

វិប្បយុត្តេនសង្គហិតាសង្គហិតបទនិទ្ទេសោ ចុទ្ទសមោ.

ធាតុកថាបករណំ និដ្ឋិតំ.