ថុបវំសោ |ឱ០.០០០១|

នមោ តស្ស ភគវតោ អរហតោ សម្មាសម្ពុទ្ធស្ស

យស្មិំ សយិំសុ ជិនធាតុវរា សមន្តា

ឆព្ពណ្ណ រំសិ វិសរេហិ សមុជ្ជលន្តា,

និម្មាយ លោកហិតហេតុ ជិនស្ស រូបំ

តំ ថុបមព្ភុត តមំ សិរសា នមិត្វា;

ចក្ខាមហំ សកល លោក ហិតាវហស្ស

ថុបស្ស សព្ព ជន នណ្ទន ការណស្ស,

វំសំ សុរាសុរ នរិណ្ទវរេហិ និច្ចំ

សម្បូជិតស្ស រតនុជ្ជល ថូបិកស្ស;

កិញ្ចាបិ សោ យតិជនេន បុរាតនេន

អត្វាយ សីហឡជនស្ស កតោ បុរាបិ,

វាក្កេន សិហឡភវេន’ភិសង្ខមត្តា

អត្ថំ ន សាធហតិ សព្ពជនស្ស សម្មា;

យស្មា ច មាគធ និរុត្តិកតោបិ ថូប-

វំសោ វិរុទ្ធនយ សទ្ទ សមាកុលោ សោ,

វត្តព្ពមេវ ច ពហុម្បិ យតោ ន វុត្តំ

តម្ហា អហំ បុនបិ វំសមិ’មំ វទាមិ;

សុណាថ សាធវោ សព្ពេ បរិបុណ្ណមនាកុលំ

វុច្ចមានំ មយា សាធុ វំសំ ថូបស្ស សត្ថុនោតិ;

តត្ថ ថូបស្ស វំសំ វក្ខាមីតិ ឯត្ថ តថាគតោ អរហំ សម្មា សម្ពុទ្ធោ ថូបារហោ, បច្ចេកពុទ្ធោ ថូបារហោ, តថាគតស្ស សាវកោ ថូបារហោ, រាជា ចក្កវត្តិ ថូបារហោតិ វចនតោ ថូបារហានំ ពុទ្ធាទីនំ ធាតុយោ បតិដ្ឋាបេត្វា កត ចេតិយំ អព្ភុនន តដ្ឋេន |ឱ០.០០០២| ថូបោតិ វុច្ចតិ, ឥធ បន កញ្ចន មាលិក មហាថូបោ អធិប្បេតោ, សោ កស្ស ធាតុយោ បតិដ្ឋាបេត្វា កតោតិ ចេ? យោទីបង្ករាទីនំ ចតុវីសតិយា ពុទ្ធានំ សន្តិកេ លទ្ធវ្យាករណោ សមតិំសបារមិយោ បូរេត្វា បរមាភិសម្ពោធិំ បត្វា ធម្មចក្កប្បវត្តនតោ បដ្ឋាយ យាវ សុហទ្ទ បរិព្ពាជក វិនយាន សព្ព ពុទ្ធកិច្ចានិ និដ្ឋាបេត្វា អនុបាទិយេសាយ និព្ពានធាតុយា បរិនិព្ពុតោ តស្ស ភគវតោ អរហតោ សម្មា សម្ពុទ្ធស្ស ធាតុយោ បតិដ្ឋាបេត្វា កតោ អយមេត្ថ សង្ខេបោ, វិត្ថារោ បន វេទិតព្ពោ?

២. ឥតោ កិរ កប្បសតសហស្សាធិកានំ ចតុន្នំ អសង្ខេយ្យានំ មត្ថកេ អមរវតី នាម នគរំ អហោសិ. តត្ថ សុមេធោ នាម ព្រាហ្មណោ បដិវសតិ. សោ អញ្ញំ កម្មំ អកត្វា ព្រហ្មណសិប្បមេវ ឧគ្គណ្ហិ តស្ស ទហរកាលេយេវ មាតាបិតរោ កាលមកំសុ. អថស្ស រាសិវឌ្ឍនកោ អមច្ចោ អាយ បោត្ថកំ អាហរិត្វា សុវណ្ណ រជត មណិមុត្តាទិ ភរិតេ គព្ភេ វិវរិត្វា ឯត្តកំ តេ កុមារ មាតុ សន្តកំ, ឯត្តកំ បិតុសន្តកំ, ឯត្តកំ អយ្យក បយ្យកានន្តិ យាវ សត្តមា កុលបរិវដ្ដា ធកំ អាចិក្ខិត្វា ឯតម្បដិជគ្គាហីតិ អាហ. សោ សាធូតិ សម្បដិច្ឆិត្វា អគារំ អជ្ឈាវសន្តោ ឯកទិវសំ ចិន្តេសិ.

៣. បុនព្ភវេ បដិសណ្ធិគហណំ តាម ទុក្ខំ, តថា និព្ពត្ត និព្ពត្តដ្ឋានេ សរីរភេទនំ អហញ្ច ជានិធម្មោ ជរាធម្មោ វ្យាធិធម្មោ មរណធម្មោ. ឯវំ ភូតេន មយា អជាតិ អជរំ អវ្យាធិំ អមរណំ សុខំ សីតលំ និព្ពានំ គវេសិតុំ វដ្ដតីតិ នេក្ខម្មការណំ ចិន្តេត្វា បុន ចិន្តេសិ ឥមំ ធនំ សព្ពំ មយ្ហំ បិតុ បិតាមហាទយោ បរលោកំ គច្ឆន្តា ឯក កហាបណម្បិ គហេត្វា នគតា មយា បន គហេត្វា គមនការណំ កាតុំ វដ្ដតីតិ នគរេ ភេរិំ ចរាបេត្វា មហាជនស្ស ទានំ ទត្វា ហិមវន្តស្ស បវិសិត្វា តាបស បព្ពជ្ជំ បព្ពជិត្វា សត្តាហព្ភន្តរេយេវ អភិញ្ញា ច សមាបត្តិយោ ច និព្ពត្តេត្វ សមាបត្តិសុខេន វីតិនាមេសិ.

តទា ទីបង្ករោ នាម សត្ថា បរយាភិសម្ពោធិំ បត្វា សត្ត សត្តាហំ ពោធិសមីបេចេវ វិតិនាមេត្វា សុនណ្ទារាមេ ធម្មចក្កំ បវត្តេត្វា កោដិសត្តានំ ទេវមនុស្សានំ ធម្មមតំ បាយេត្វា ចាតុទ្ទីបិក មហាមេឃោ វិយ ធម្មវស្សំ វស្សេន្តោ ចតូហិ ខីណាសយ សតសហស្សេហិ បរិវុតោ អនុបុព្ពេន ចារកំ ចរមានោ រម្ម នគរំ បត្វា សុទស្សន មហាវិហារេ បដិវសតិ តទា រម្មនគរវាសិនោ សប្បិ ផណិតាទីនិ ភេសជ្ជានិ គហេត្វា បុប្ផ ធូប គណ្ធហត្ថា យេន ពុទ្ធោ តេនបសង្កមិត្វា សត្ថារំ វន្ទិត្វា បុប្ផាទីហិ បូជេត្វា ឯកមន្តំ និសីទិត្វា ធម្មំ សុត្វា ស្វាតនាយ ភគវន្តំ និមន្តេត្វា ឧដ្ឋាយាសនា ទសពលំ បទក្ខីនំ កត្វា បក្កមិំសុ.

តេ |ឱ០.០០០៣| បុន ទិវសេ អសទិស មហាទានំ សជ្ជេត្វា ទសពលស្ស អាគមន មគ្គំ សោធេន្តិ. តស្មិំ កាលេ សុមេធតាបសោ អត្តនោ អស្សម បទតោ ឧគ្គន្ត្វា រម្មនគរវាសីនំ តេសំ មនុស្សានំ ឧបរិភាគេន អាកាសេន គច្ឆន្តា តេ ហដ្ឋបហដ្ឋេ មគ្គំ សោធេន្តេ ទិស្វា កិន្នុ ខោ ការណន្តិ ចិន្តេន្តោ សព្ពេសំ បស្សន្តានំយេវ អាកាសតោ ឱរុ ឯកមន្តេ ឋត្ថាយហ តេ មនុស្សេ បុច្ឆិ.’ហម្ភោ កស្ស បន ឥមំ មគ្គំ សោធេថា’តិ តេ អាហំសុ ភន្តេ សុមេធ តុម្ហេ កិំ នំ ជានាថ, ទីបង្ករោ នាម សត្ថា បរមាភិសម្ពោធិំ បត្វា បវត្តវរ ធម្មចក្កោ ជនបទ ចារិកំ ចរមានោ អនុក្កមេន អម្ហាកំ នគរំ បត្វា សុទស្សន មហាវិហារេ បដិវសតិ. មយំ តំ ភគវន្តំ និមន្តយិម្ហ តស្ស ភគវតោ អាគមនមគ្គំ សោធេមាតិ. តំ សុត្វា សុមេធបណ្ឌិតោ ចិន្តេសិ. ពុទ្ធោតិ ខោ បនេស ឃោសោបិ ទុល្លភោ, បគេវ ពុទ្ធុប្បាទោ តេន ហិ មយាបិ ឥមេហិ មនុស្សេហិ សទ្ធិំ ទសពលស្ស អាគមនមគ្គំ សោធេតុំ វដ្ដតីតិ សោ តេ មនុស្សេ អាហ, សចេ ភោ តុម្ហេ ឥមំ មគ្គ ពុទ្ធស្ស សោធេថ - សយហម្បិ ឯកំ ឱកាសំ សម្បដិច្ឆត្វា អយំ សុមេធបណ្ឌិតោ មហិទ្ធិកោ មហានុភាវោតិ ជានន្តា ទុព្ពិសោធនំ ឧទកសម្ភិន្នំ អតិវិសមំ ឯកំ ឱកាសំ សល្លក្ខេត្វា ឥមំ ហកាសំ តុម្ហេ សោធេថ. អលង្ករោថាតិ អទំសុ.

សុមេធបណ្ឌិតោ ពុទ្ធារម្មណ បីតិំ ឧប្បាទេត្វា ចិន្តេសិ. អហម្បនិមំ ឱកាសំ ឥទ្ធីយា បរមទស្សនីយ កាតុំ បហោមិ ឯវំ កតោ បន មំ ន បរិតោសេតិ អជ្ជ បន មយា កាយវេយ្យាវច្ចំ កាតុំ វដ្ដតិតិ បំសុំ អាហរិត្វា តំ បហេសំ បូរេនិ, តស្ស បន តស្មិំ បទេសេ អសោធិតេ ជយសុមន កុសុម សទិសិ វណ្ណំ ទុបដ្ដចីវរំ តិមណ្ឌលំ បដិច្ឆាទេត្វា និវាសេត្វា តស្សុបរិ យុណ្ណមាបង្គេន កុសុមកលាបំ បរក្ខិបន្តោ វិយ វិជ្ជុល្លតា សស្សីរីកំ កាយពណ្ធនំ ពណ្ធិត្វា កនក គិរិសិខរ មត្ថកេ លាខារសំ បរិសិញ្ចន្តេ វិយ សុវណ្ណចេតិយំ បវាឡជាលេន បរិក្ខិបន្តោ វិយ សុវណ្ណង្ឃកំ រត្តកម្ពលេន បដិមុញ្ចន្តោ វិយ សរទ សមយ រជនិករំ រត្តវលាហកេន បដិច្ឆាទេន្តោ វិយ ច លាខារសេន តិន្ន កិំ សុកក្សុមវណ្ណំ រត្តវរ បសុកូល ចីវរំ បារិបិត្វា គណ្ធកូគិទ្វ រតោ កនកគុហាតោ សីហោ វិយ និក្ខមិត្វា ជឡភិញ្ញានំយេវ ចតូហិ ខីណាសវ សតសហស្សេហិ បរិវុតោ អមរគណ បរិវុតោ ទសសតនយនោ វិយ ព្រហ្មគណបរិវុតោ មហា ព្រហ្មា វិយ ច អបរិមិត សមយ សមុបចិតាយ កុសលពលជនិតាយ អនោបមយា ពុទ្ធលីលាយ តារាគណបរិវុតោ |ឱ០.០០០៤| សរទ សមយ រជនិករោ វិយ គគនតលំ អលង្គត បដិយត្តំ មគ្គំ បដិបជ្ជិ.

៥. សុមេធតាបសោបិ តេន អលង្កត បដិយត្តេន មគ្គេន អាគច្ឆន្តស្ស ទីបង្ករស្ស ភគវតោ ទ្វត្តិំស វរលក្ខណ បតិមណ្ឌិតំ អសតិយា អនុព្យញ្ជនេហិ អនុព្យញ្ជិតំ ព្យាមប្បហាបរិក្ខេប សស្សីរីកំ ឥណ្ទនីលមណិសំកាសោអាកាសេ នានប្បការា វិជ្ជុល្លតា វិយ ឆព្ពណ្ណពុទ្ធរំសិយោ វិស្សជ្ជេន្តំ រូបគ្គប្បត្តំ អត្តភាវំ ឱលោកេត្វា អជ្ជ មយា ទសពលស្ស ជីវិតបរិច្ចាគំ កាតុំ វដ្ដតិ មា ភគវា កលលេ អក្កមិ មណិមយំ លកសេតុំ អក្កមន្តោ វិយ សទ្ធិំ ចតូហិ ខីណាសវ សតសហស្សេហិ មម បិដ្ឋិំ អក្កមន្តោ គច្ឆតុ តំ មេ ភវិស្សតិ ទីឃរត្តំ ហិតាយ សុខាយាតិ កេសេ មោចេត្វា អជិនជដា វាកចីរានិ កលេល បត្ថរិត្វា តត្ថេវ កលលបិដ្ឋេ និបជ្ជិ និបន្នោ ច សចេ អហំ ឥច្ឆេយ្យំ សព្ពកិលេសេ ឈាបេត្វា សង្ឃនវកោ ហុត្វា រម្មនគរំ បវិសេយ្យំ អញ្ញាតកវេសេន បន មេ កិលេសេ ណ្ធបេត្វា និព្ពានបត្តិយា កិច្ចំ នត្ថិ, យំនូនាហំ ទីបង្ករ ទសពលោ វិយ បរមាភិសម្ពោធិំ បត្វា ធម្មនាវំ អារោបេត្វា មហាជនំ សំសារសាគរា ឧត្តារេត្វា បច្ឆា បរិនិព្ពាយេយ្យំ. ឥទំ មេ បតិរុបន្តិ ចិន្តេត្វា អដ្ឋធម្មេ សមោធានេត្វា ពុទ្ធភាវាយ អភិនីហារំ កត្វា និបជ្ជ.

ទីបង្ករោបិ ភគវា អាគត្ត្វា សុមេធបណ្ឌិតស្ស សីសសាគេ ឋត្វា កលលបិដ្ឋេ និបន្នំ តាបសំ ទិស្វា អយំ តាបសោ ពុទ្ធត្ថាយ អភិនីហារំ កត្វា និបន្តោ, ឥជ្ឈិស្សតិ នុ ខោ ឯតស្ស បត្ថនា ឧទាហុ នោតិ ឧបធារេន្តោ - អនាគតេ គោតមោ នាម ពុទ្ធោ ភវិស្សតីតិ ញត្វា ឋិតកោវ បរិស មជ្ឈេ វ្យាកាសិ, បស្សថ នោ តុម្ហេ ភិក្ខវេ ឥមំ ឧគ្គតបំ តាបសំ កលលបិដ្ឋេ និបន្នន្តិ. ឯវំ ភន្តេ, អយំ យិទ្ធត្ថាយ អភិនីហារំ កត្វា និបន្នោ សមិជ្ឈិស្សតិ ឥមស្ស បត្ថតា កប្បសត សហស្សាធិកានំ ចតុន្តំ អសង្ខេយ្យានំ មត្ថកេ គោតមោ នាម ពុទ្ធោ ភវិស្សតីតិ សព្ពំ វ្យាកាសិ.

វុត្តញ្ហេតំ ពុទ្ធវំសេ.

ទីបង្ករោ លោកវិទូ - អាហុតីនំ បដិគ្គហោ,

ឧស្សីសកេ មំ ឋត្វាន - ឥទំ វចនមព្រវិ;

បស្សថ ឥមំ តាបសំ - ជដិល ឧគ្គតាបសំ អបរិមេយ្យេ ឥតោ កប្បេ - អយំ ពុទ្ធោ ភវិស្សតិ. អហុ កបិលវហយា រម្មា - និក្ខមិត្វា តថាគតោ. បធានំ បទហិត្វាន - កត្វា ទុក្ករ ការិកំ

ពុទ្ធេ លោកេ - កេចិ.

អជបាល |ឱ០.០០០៥| រុក្ខមូលស្មិំ - និសីទិត្វា តថាគតោ,

តត្ថ បាយាសមគ្គយ្ហ - នេរញ្ជរមុបេហេតិ;

នេរញ្ជរាយ តីរម្ហិ - បាយាសាទាយ សោ ជិនោ,

បដិយត្តវរមគ្គេន - ពោធិមូលញ្ហិ ឯហីតិ;

តតោ បទក្ខិណំ កត្វា - ពោធិមណ្ឌំ អនុត្តរោ

អស្សត្ថរាក្ខមូលម្ហិ - វុជ្ឈិស្សតិ មហាយសោ;

ឥមស្សជនិកា មាតា - មាយា នាម ភវិស្សតិ, បិតា សុទ្ធោទនោ នាម - អយំ ហេស្សតិ គោតមោ. អនាសវា វីតរាគា - សន្តចិត្តា សមាហិតា,

កោលិតោ ឧបតិស្សោ ច - អគ្គា ហេស្សន្តិ សាវកា;

អានណ្ទោ នាមុបដ្ឋាកោ - ឧបដ្ឋិស្សតី’មំ ជិនំ;

ខេមា ឧប្បលវណ្ណា ច - អគ្គា ហេស្សន្តិ សាវិកា;

អនាសវា វីតរាគា - សន្តចិត្តា សមាហិតា;

ពោធិ តស្ស ភគវតោ អស្សត្ថោតិ បវុច្ចតី’’តិ.

អភិនីហារ កថា

៦. តតោ ទីបង្ករោ ទសពលោ ពោធិសត្តំ បសំសិត្វា អដ្ឋហិ បុប្ផ មុដ្ឋីហិ បូជេត្វា បទក្ខិណំ កត្វា បក្កាមិ. តេបិ ចតូសត សហស្ស ខីណាសវា ពោធិសត្តំ បុប្ផេហិ ច គណ្ធេហិ ច បូជេត្វា បទប្ផណំ កត្វា បក្កមិំសុ. ទេវមនុស្សា ច តថេវ បូជេត្វា វន្ទិត្វា អថ ខោ ពោធិសត្តោ ទសពលស្ស វ្យាករណំ សុត្វា ពុទ្ធភាវំ ករតលគតមិវ មញ្ញមានោ បមុទិត ហទយោ សព្ពេសុ បដិក្កន្តេសុ សយនា វុដ្ឋាយ បុប្ផរាសិ មត្ថកេ បល្លង្កំ អាភុជិត្វា និសិន្នោ ពុទ្ធការកធម្មេ ឧបធារេន្តោ កហននុ ខោ ពុទ្ធការក ធម្មា, កិំ ឧទ្ធំ អធោ ទិសាសុ វីទីយាសូតិ អនុក្កមេន សកលំ ធម្មធាតុំ វិចិនន្តោ បោរាណកពោធិសត្តេហិ អាសេវិត និសេវិត បឋមំ ទានបារមិំ ទិស្វា តត្ថ ទឡភិសមាទាន កត្វា ឯវំ អនុក្កមេន សីល - នេក្ខម្ម - បញ្ញា - វីរិយ - ខន្តិ - សច្ច - អធិដ្ឋាន - មេត្តា - ឧបេក្ខា បារមិយោច ទិស្វា តត្ថទឡ្ហ សមាទានំ កត្វា ទេវតាហិ អភិត្ថុតោ អាកាសមពភុគ្គនត្វ ហិម ហិមវន្តមេវ អគមាសិ.

ទីបង្ករោបិ សត្ថា ចតូហិ ខីណាសវ សតសហស្សេហិ បរិវុតោ រម្មនគរវាសីហិ បូជីយមានោ ទេវតាហិ អភិនណ្ទិយមានោ អលង្កត បដិយត្តេន មគ្គេន រម្មនគរំ បវិសិត្វា បញ្ញត្តវរពុទ្ធាសនេ និសីទិ. ភិក្ខុសង្ឃោបិ អត្តនោ អត្តនោ បត្តាសនេ និសីទិ. រម្មនគរវាសិនោបិ ឧបាសកា ពុទ្ធបមុខស្ស ភិក្ខុសង្ឃស្ស មហាទានំ |ឱ០.០០០៦| ទត្វា ភគវន្តំ ភុត្តាវិំ ឱនីត បត្តបាណិំ មាលាគណ្ធាទីហិ បូជេត្វា ទានានុមោទនំ សោតុកាមា និសីទិំសុ. ភគវាបិ តេសំ អនុមោទនំ ករោន្តោ ទានកថំ សីលកថំ សគ្គិកថំ កាមានំ អាទីនវំ ឱការំ សំកិលេសំ នេក្ខម្មេ អានិសំសញ្ច បកាសេត្វា អមត បរិយោសានំ ធម្មកថំ កថេសិ.

ឯវំ តស្ស មហជនស្ស ធម្មំ ទេសេត្វា ឯកច្ចេ សរណេសុ ឯកច្ចេ បញ្ចសុ សីលេសុ ឯកច្ចេ សោតាបត្តិផលេ ឯកច្ចេ សកទាគាមិ ផលេ ឯកច្ចេ អនាគាមី ផលេ ឯកច្ចេ ចតុសុបិ ផលេសុ ឯកច្ចេ តីសុ វិជ្ជាសុ ឯកច្ចេ ឆឡភិញ្ញាសុ ឯកច្ចេ អដ្ឋសុ សមាបត្តិសុ បតិដ្ឋាបេត្វា ឧដ្ឋាយាសនា រម្មនគរតោ និក្ខមិត្វា សុទស្សន មហាវិហារមេវ បាវិសិ.

វុត្តញ្ហេតំ

‘‘តទា តេ ភោជយិត្វាន - សសង្ឃំ លោកនាយកំ,

ឧផគឆុញ្ញំ សរណំ តស្ស - ទីបង្ករស្ស សត្ថុនោ,

សរណាគមនេ កញ្ចិ - និវសេតិ តថាគតោ

កញ្ចិ បញ្ចសុ សីលេសុ - សីលេ ទសវិធេ បរំ;

កស្សចិ ទេតិ សាមញ្ញំ - ចតុរោ ផលមុត្តមេ,

កស្សចិ អសថេ ធម្មេ - ទេតិ សោ បដិសម្ភិទា;

កស្សចិ វរសមាបត្តិយោ - អដ្ឋ ទេតិ នរាសភោ,

តិស្សោ កស្សចិ វិជ្ជាយោ - ឆឡភិញ្ញ បវេច្ឆតិ;

តេន យោគេន ជនកាយំ - ឱវទេតិ មហាមុនិ,

តេន វិត្ថារិកំ អាសី - លោកនាថស្ស សាសនំ;

មហាហនូសភក្ខណ្ធោ - ទីបង្ករសនាមកោ,

ពហូ ជនេ តារយតិ - បរិមោចេតិ ទុគ្គតិំ;

ពោធនេយ្យំ ជនំ ទិស្វា - សតសហស្សេបិ យោជនេ

ខណេន ឧបគន្ត្វាន - ពោធេតិ តំ មហាមុនី’’តិ;

ឥតិ សោ ទីបង្ករោ សត្ថា វស្សសត សហស្សានិ ឋត្វា សត្តានំ ពណ្ធនមោក្ខំ កុរុមានោ សព្ពពុទ្ធកិច្ចានិ និដ្ឋាបេត្វា នណ្ទារាមេ អនុបាទិសេសាយ និព្ពានធាតុយា បរិនិព្ពាយិនហេវ ធាតុយោ តស្ស - សត្ថុនោ វិកិរិំសុ តា. ឋិតា ឯកឃនា ហុត្វា - សុវណ្ណបដិមា វិយ សកលជម្ពុទីបវាសិនោ មនុស្សា ឃនកោដិដិមសុវណ្ណដ្ឋិកាហិ ឯវំ ឆត្តិំស យោជនិកំ មហាថូបមកំសុ និវេទសិ - កេចិ.

តេន |ឱ០.០០០៧| វុត្តំ

‘‘ទីបង្ករោ ជិនោ សត្ថា - នណ្ទារាមម្ហិ និព្ពុតោ,

តត្ថេវ តស្ស ជិនថូបោ - ឆត្តិំសុព្ពេធ យោជនោ‘‘;

‘‘បត្ត ចីវរ បរិក្ខារ - បរិភោគញ្ជ សត្ថុនោ,

ពោធិមូលេ តទា ថូបោ - តីណិ យោជនមុគ្គតោ’’តិ;

៧. ទីបង្ករស្ស បន ភគវតោ អបរភាគោ ឯកំ អសង្ខេយ្យំ អតិក្កមិត្វា កោណ្ឌញ្ញោ នាម សត្ថា ឧទបាទិ. តទា ពោធិសត្តោ វិជិតាវិ នាម ចក្កវត្តិ ហុត្វា កោដិសតសហស្ស សង្ខស្ស ពុទ្ធ បមុខស្ស ភិក្ខុសង្ឃស្ស មហាទានំ អទាយិ សត្ថា ពោធិសត្តំ ពុទ្ធោ ភវិស្សតីតិ វ្យាករិត្វា ធម្មំ ទេសេសិ សោ សត្ថុ ធម្មំកថំ សុត្វា រជ្ជិ និយ្យាទេត្វា បព្ពជិ សោ តីណិ បិដកានិ ឧគ្គហេត្វា អដ្ឋ សមាបត្តិយោ បញ្ចអភិញ្ញាយោច ឧប្បាទេត្វា អបរិហីនជ្ឈានោ ព្រហ្មលោកេ និព្ពត្តិ. សោបិ ពុទ្ធោ វស្សសតសហស្សានិ ឋត្វា សព្ពពុទ្ធកិច្ចានិ និដ្ឋាបេត្វា ចណ្ទារាមេ បរិនិព្ពាយិ តស្សាបិ ភគវតោ ធាតុយា ន វិកិរិំសុ សកលជម្ពុទីបវាសិនោ មនុស្សា សមាគន្ត្វា សត្តយោជនិកាសត្តរតនមយំ ហរិតាលមនោសិលាយមត្តិកាកិច្ចំ តេល សប្បីហិ ឧទកកិច្ចំ កត្វា ចេតិយំ និដ្ឋាបេសុំ

កោណ្ឌញ្ញេ កិរ សម្ពុទ្ធោ - ចណ្ទារាមេ មនោរមេ,

និព្ពាយិ ចេតិយោ តស្ស - សត្តយោជនិកោ កតោតិ;

តស្ស អបរភាគេ ឯកំ អសំង្ខយ្យំ អតិក្កមិត្វា ឯកស្មិំយេវ កប្បេ ចត្តារោ ពុទ្ធា ឧប្បជ្ជិំសុ - មង្គលោ សុមនោ រេវតោ យោហិតោតិ. មង្គលស្ស បន ភគវតោ កាលេ ពោធិសត្តោ សុរុចិ នាម ព្រាហ្មណោ ហុត្វា សត្ថារំ និមន្តេស្សាមីតិ ឧបសង្កមិត្វា មធុរ ធម្មំកតំ សុត្វា ស្វាតនាយ និមន្តេត្វា កោដិសតសហស្ស សង្ខស្ស ពុទ្ធបមុខស្ស សង្ឃស្ស សត្តាហំ គវបានំ នាម ទានមទាសិ សត្ថា អនុមោទនំ ករោន្តោ មហាបុរិសំ អាមន្តេត្វា ត្វំ កប្បសតសហស្សាធិកានំ ទ្វន្នំ អសង្ខេយ្យានំ មត្ថកេ គោតមោ នាម ពុទ្ធោ ភវិស្សសីតិ វ្យាកាសិ មហាបុរិសោ វ្យាករណំ សុត្វា អហំ កិរ ពុទ្ធោ ភវិស្សាមិ កោ មេ ឃរាវាសេន អត្ថោ បព្ពជិស្សមីតិ ចិន្តត្វា តថារូបំ សម្បត្តិំ កេឡបិណ្ឌំ វីយ បហាយ សត្ថុ សន្តិកេ បព្ពជិត្វា ពុទ្ធវចនំ ឧគ្គណ្ហិត្វា អភិញ្ញា ច សមាបត្តិយោ ច និព្ពត្តេត្វា អាយុបរិយោសានេ ព្រហ្មលោកេ និព្ពត្តិ, តស្មិម្បិ ពុទ្ធេ បរិនិព្ពុតេ ធាតុយោ ន វិកិរិំសុ, ជម្ពុទីបវាសិនោ បុព្ពេ វិយ តិំសយោជនកំ ថូបមកំសុ.

តេន |ឱ០.០០០៨| វុត្តំ ‘‘ឧយ្យានេ វសភោ នាម - ពុទ្ធោ និព្ពាយិ មង្គលោ, តត្ថេវ តស្ស ជិនថូបោ - តិំសយោជនមុគ្គិតោ’’តិ.

តស្ស អបរភាគេ សុមនោ នាម សត្ថា ឧទបាទិ តទា មហាសត្តោ អតុលោ នាម នាគរាជា ហុត្វា និព្ពត្តិ-មហិទ្ធិកោ មហានុភាវោ សោ ពុទ្ធោ ឧប្បន្នោតិ សុត្វា ញាតិសង្ឃបរិវុតោ នាគភវនា និក្ខមិត្វា កោដិសតសហស្ស ភិក្ខុបរិវារស្ស តស្ស ភគវតោ ទិព្ពតុរិយេហិ ឧបហារំ ការេត្វា មហាទានំ បវត្តេត្វា បច្ចេកំ ទុស្សយុគានិ ទត្វា សរណេសុ បតិដ្ឋាសិ សោបិ នំ សត្ថា អនាគតេ ពុទ្ធោ ភវិស្សសីតិ វ្យាកាសិ តស្មិម្បិ ពុទ្ធេ បរិនិព្ពុតេ ធាតុយោ ន វិកិរិំសុ ជម្ពុទីបវាសនោ បុព្ពេ វិយ ចតុយោជនិកំ ថូបមកំសុ.

តេន វុត្តំ

‘‘សុមនោ យសធរោ - ពុទ្ធោ អគ្គារាមម្ហ និព្ពុតោ,

តត្ថេវ តស្ស ជិនថូបោ - ចតុយោជនមុគ្គតោ’’តិ;

តស្ស អបរភាគេ រេវតោ នាម សត្ថា ឧទបាទិ តទា ពោធិសត្តោ អតិទេវោ នាម ព្រាហ្មណោ ហុត្វា សត្ថុ ធម្មទេសន សុត្វា សរណេសុ បតិដ្ឋាយ សិរសិ អញ្ជលិំ បគ្គហេត្វា តស្ស សត្ថុនោ កិលេសប្បហានេ វណ្ណំ វត្វា ឧត្តរាសង្ឃេន បូជមកាសិ. សោបិ នំ សត្ថា ពុទ្ធោ ភវិស្សតិតិ វ្យាកាសិ តស្មិំ បន ពុទ្ធេ បរិនិព្ពុតេ ធាតុយោ វិកិរិំសុ.

តេន វុត្តំ

‘‘រេវតោ បវរោ ពុទ្ធោ - និព្ពុតោ សោ មហាបុរេ,

ធាតុ វិត្ថារិកំ អាសី - តេសុ តេសុ បទេសតោ’’តិ;

តស្ស អបរភាគេ សោភិតោ នាម សត្ថា ឧទបាទិ តទា ពោធិសត្តោ អជិតោ នាម ព្រាហ្មណោ ហុត្វា សត្ថុ ធម្មទេសនំ សុត្វា សរណេសុ បតិដ្ដាយ ពុទ្ធបមុខស្ស សង្ឃស្ស មហាទានំ អទាសិ. សោបិ នំ សត្ថា ពុទ្ធោ ភវិស្សសីតិ វ្យាកាសិ តស្សាបិ ភគវតោ ធាតុយោ វិកិរិំសុ.

តេន វុត្តំ

‘‘សោភិតោ វរសម្ពុទ្ធោ - សីហរាមម្ហិ និព្ពុតោ,

ធាតុវិត្ថារិកំ អាសី - តេសុ តេសុ បទេសតោ’’តិ;

តស្ស អបរភាគេ ឯកមសង្ខេយ្យំ អតិក្កមិត្វា ឯកស្មិំយេវ កប្បេ តយោ ពុទ្ធា និព្ពត្តិំសុ - អនោមទស្សិ បទុមោ នារទោតិ. អនោមទស្សិស្ស ភគវតោ កាលេ ពោធិសត្តោ ឯកោ

១. យសវរោ ធីរោ - កេចិ.

យក្ខ |ឱ០.០០០៩| សេនាបតិ អហោសិ មហិទ្ធិកោ មហានុភាវោ អនេក កោដិសតសហស្សានំ យក្ខានំ អធិបតិ. សោ ពុទ្ធោ ឧប្បន្នោតិ សុត្វា អាគន្ត្វា ពុទ្ធបមុខស្ស សង្ឃស្ស មហាទានមទាសិ សត្ថាបិ តំ អនាគតេ ពុទ្ធោ ភវិស្សសីតិ វ្យាកាសិ. អនោមទស្សិម្ហិ បន ភគវតិ បរិនិព្ពុតេ ធាតុយោ ន វិកិរិំសុ ជម្ពុទីបវាសិនោ បញ្ចវីសយោជនកំ ថូបំ ករិំសុ

តេន វុត្តំ

‘‘អនោមទស្សិ ជិនោ សត្ថា - ធម្មារាមម្ហិ និព្ពុតោ,

តត្ថេវ តស្ស ជិនថូបោ - ឧព្ពេធា បណ្ណុវីសតី’តិ;

តស្ស អបរភាគេ បទុមោ នាម សត្ថា ឧទបាទិ តថាគតេ អគាមការញ្ញេ វិហរេន្តា ពោធិសត្តោ សីហោ ហុត្វា សត្ថារំ និរោធសមាបត្តិយា សមាបន្នំ ទិស្វា បសន្នចិត្តោ វន្ទិត្វា បទក្ខិណំ កត្វា បីតិសោមនស្សជាតោ តិក្ខត្តុំ សីហនាទំ នទិត្វា សត្តាហំ ពុទ្ធារម្មណំ បីតិំ អវិជហិត្វា បីតិសុខេនេវ គោចរាយ អបក្កមិត្វា ជិវិតបរិច្ចាគំ កត្វា បយិរុបាសមានោ អដ្ឋាសិ សត្ថា សត្តាហច្ចយេន និរោធា វុដ្ឋិតោ សីហំ ឱលោកេត្វា ភិក្ខុសង្ឃេបិ ចិត្តំ បសាទេត្វា សង្ឃំ វន្ទិស្សតី‘‘តិ ភិក្ខុសង្ឃោ អាគច្ឆតូតិ ចិន្តេសិ ភិក្ខុ តាវទេវ អាគមិំសុ សីហោ សង្ឃេ ចិត្តំ បសាទេសិ. សត្ថា តស្ស មនំ ឱលោកេត្វា អនាគតេ ពុទ្ធោ ភវិស្សតីតិ វ្យាកាសិ តស្ស បន ភគវតោ ធាតុយោ វិកិរិំសុ.

តេន វុត្តំ

‘‘បទុមោ ជិនវរោ សត្ថា - ធម្មារាមម្ហិ និព្ពុតោ,

ធាតុ វិត្ថារិកំ អាសិ - តេសុ តេសុ បទេសតោ’’តិ;

តស្ស អបរភាគេ នារទោ នាម សត្ថា អហោសិ តទា ពោធិសត្តោ, ឥសិបព្ពជ្ជំ បព្ពជិត្វា បញ្ចសុ អភិញ្ញាសុ អដ្ឋសុច សមាបត្តិសុចិណ្ណវសី ហុត្វា ពុទ្ធបមុខស្ស សង្ឃស្ស មហាទានំ ទត្វា លោហិត ចណ្ទនេន បូជមកាសិ សោបិ នំ អនាគតោ ពុទ្ធោ ភវិស្សតីតិ វ្យាកាសិ នារទ បន ភគវតោ ធាតុយោ ឯកឃនា អហេសុំ. សព្ពេ ទេវ មនុស្សា សន្និបតិត្វា ចតុយោជនិកំ ថូបំ ករិំសុ.

តេន វុត្តំ

‘‘នារទោ ជិនវសភោ - និព្ពុតោ សុទស្សនេ បុរេ,

តត្ថេវ តស្ស ថូបវរោ - ចតុយោជនមុគ្គតោ’’តិ;

តស្ស អបរភាគេ ឯកមសង្ខេយ្យមតិក្កមិត្វា ឥតោ កប្បសតសហស្ស មត្ថកេ ឯកស្មិំ កប្បេ បទុមុត្តរោ នាម សត្ថា ឧទបាទិ. តទា ពោធិសត្តោ ជដិលោ នាម មហារដ្ឋិកោ ហុត្វា ពុទ្ធបមុខស្ស សង្ឃស្ស ចិវរទានមទាសិ. សោបិ តំ អនាគតោ ពុទ្ធោ ភវិស្សតីតិ វ្យាកាសិ. |ឱ០.០០១០| បទុមុត្តរស្សាបិ ភគវតោ ធាតុយោ ឯកឃនា អហេសុំ. សព្ពេ ទេវមនុស្សា សន្និបតិត្វា ទ្វាទស យោជនិកំ មហាថូបមកំសុ.

តេន វុត្តំ

‘‘បទុមុត្តរោ ជិនោ ពុទ្ធោ - នណ្ទារាមម្ហិ និព្ពុតោ,

តត្ថេវ តស្ស ថូបវរោ - ទ្វាទសុព្ពេធយោជនោ’’តិ;

តស្ស អបរភាគេ តិំសកប្ប សហស្សានិ អតិក្កមិត្វា សុមេធោ សុជាតោ ចាតិ ឯកស្មិំ កប្បេ ទ្វេ ពុទ្ធា និព្ពត្តិំសុ សុមេធស្ស បន ភគវតោ កាលេ ពោធិសត្តោ ឧត្តរោ នាម មានវោ ហុត្វា និទហិត្វា ឋបិតំយេវ អសីតិកោដិធនំ វិស្សជ្ជេត្វា ពុទ្ធបមុខស្ស សង្ឃស្ស មហាទានំ ទត្វា ធម្មំ សុត្វា សរណេសុ បតិដ្ឋាយ និក្ខមិត្វា បព្ពជិ សោបិ នំ អនាគតេ ពុទ្ធោ ភវិស្សតីតិ វ្យាកាសិ. សុម្ធេស្ស បន ភគវតោ ធាតុយោ វិកិរិំសុ

តេន វុត្តំ

‘‘សុមេធោ ជិនវរោ ពុទ្ធោ - មេធារាមម្ហិ និព្ពុតោ,

ធាតុវិត្ថារិកំ អាសិ - តេសុ តេសុ បទេសតោ’’តិ;

តស្ស អបរភាគេ សុជាតោ នាម សត្ថា ឧទបាទិ. តទា ពោធិសត្តោចក្កវត្តិរាជា ហុត្វា ពុទ្ធោ ឧប្បន្នោតិ សុត្វា ឧបសំកមិត្វា ធម្មំ សុត្វា ពុទ្ធបមុខស្ស សង្ឃស្ស សទ្ធិំ សត្តហិ រតនេហិ ចតុមហាទីបំ រជ្ជំ ទត្វា សត្ថុ សន្តិកេ បព្ពជិ សកលរដ្ឋវាសិនោ រដ្ឋុប្បាទំ គហេត្វា អារាមិក កិច្ចំ សាធេន្តា ពុទ្ធបមុខស្ស សង្ឃស្ស និច្ចំ មហាទានមទំសុ. សោបិ នំ សត្ថា អនាគតេ ពុទ្ធោភវិស្សតីតិ វ្យាកាសិ សុជាតស្ស បន ភគវតោ ធាតុយោ ឯកឃនា អហេសុំ ជម្ពុទីបវាសិនោ តិគាវុតំ ថូបមកំសុ

តេន វុត្តំ

‘‘សុជាតោ ជិនវរោ ពុទ្ធោ សីលារាមម្ហិ និព្ពុតោ,

តត្ថេវ ចេតិយោ តស្ស - តីណិ គាវុតមុគ្គតោ’’តិ;

តស្ស អបរភាគេ អដ្ឋារស កប្បសតមត្ថកេ ឯកស្មិំ កប្បេ បិយទស្សិ អត្ថទស្សិ ធម្មទស្សិតិ តយោ ពុទ្ធា និព្ពត្តិំសុ បិយទស្សិ ពុទ្ធកាលេ ពោធិសត្តោ កស្សបោ នាម មាណវោ តិណ្ណំ វេទានំ បារគតោ ហុត្វា សត្ថុ ធម្មទេសនំ សុត្វា កោដិសតសហស្ស ធន បរិច្ចាគេន សង្ឃារាមំ ការេត្វា សរណេសុ ច សីលេសុ ច បតិដ្ឋាសិ អថ នំ សត្ថា អដ្ឋារស កប្ប សតច្ចយេន ពុទ្ធោ ភវិស្សតីតិ វ្យាកាសិ បិយទស្សិស្ស ភគវតោបិ ធាតុយោ ឯកឃនាវ អហេសុំ ជម្ពុទីបវាសិនោ សន្និបតិត្វា តិយោជនិកំ មហាថូបមកំសុ.

តេន |ឱ០.០០១១| វុត្តំ

‘‘បិយទស្សិ មុនិវរោ - សលលារាមម្ហិ និព្ពុតោ,

តត្ថេវ តស្ស ជិនថូបោ - តីណិ យោជនមុគ្គតោ’’តិ;

តស្ស អបរភាគេ អត្ថទស្សិ នាម ភគវា ឧទបាទិ តទា ពោធិសត្តោ មហិទ្ធិកោ មហានុភាវោ សុសិមោ នាម តាបសោ ហុត្វា ភគវតោ សន្តិកេ ធម្មំ សុត្វា បសីទិត្វា ទិព្ពានិ មណ្ទារវ បទុមបារិច្ឆត្តកាទីនិ បុប្ផានិ អាហរិត្វា ចាតុទ្វីបិក មហាមេឃោ វិយ បុប្ផវស្សំ វស្សេត្វា សមន្តតោ បុប្ផមណ្ឌប បុប្ផអគឃិយ តោរណាទីនិ កត្វា មណ្ទារវ បុប្ផច្ឆត្តេន ទសពលំ បូជេសិ សោបិ នំ ភគវា អនាគតោ គោតមោ នាម ពុទ្ធោ ភវិស្សតីតិ វាកាសិ. តស្ស បន ភគវតោ ធាតុយោ វិកិរិំសុ.

តេន វុត្តំ

‘‘អត្ថទស្សិ ជិនវរោ - អនោមារាមម្ហិ និព្ពុតោ,

ធាតុវិត្ថារិកំ អាសិ - តេសុ តេសុ ច រដ្ឋតោ’’តិ;

តស្ស អបរភាគេ ធម្មទស្សិ នាម សត្ថា ឧទបាទិ. តទា ពោធិសត្តោ សក្កា ទេវរាជា ទិព្ពគណ្ធបុប្ផេហិ ច ទិព្ពតុរិយេហិ ច បូជំ អកាសិ សោបិ នំ ពុទ្ធោ ភវិស្សតីតិ វ្យាកាសិ. ធម្មទស្សិស្ស បន ភគវតោ ធាតុយោ ឯកឃនា អហេសុំ. ជម្ពុទីបវាសិនោ តិយោជនិកំ ថូបមកំសុ.

តេន វុត្តំ

‘‘ធម្មទស្សិ មហាវីរោ-កេលាសារមម្ហិ និព្ពុតោ,

តត្ថេវ ថូបវរោ តស្ស-តីណិ យោជនមុគ្គតោ’’តិ;

តស្ស អបរភាគេ ចតុនវុតិកប្ប មត្ថកេ ឯកស្មិំ កប្បេ ឯកោវ សិទ្ធត្ថោ នាម សត្ថា ឧទបាទិ. តទា ពោធិសត្តោ ឧគ្គតេជោ អភិញ្ញាពល សម្បន្នោ មង្គលោ នាម តាបសោ ហុត្វា មហាជម្ពុផលំ អាហរិត្វា តថាគស្ស អទាសិ សត្ថា តំ ផលំ បរិភុញ្ជិត្វា ចតុនវុតិ កប្បមត្ថកេ ពុទ្ធោ ភវិស្សតីតិ វ្យាកាសិ តស្សាបិ ភគវតោ ធាតុយោ ន វិកិរិំសុ, ចតុយោជនិកំ រតនមយំ ថូបមកំសុ.

តេន វុត្តំ

‘‘សិទ្ធត្តោ មុនិវរោ ពុទ្ធោ អនោមារមម្ហិ និព្ពុតោ,

តត្ថេវ តស្ស ថូបវរោ-ចតុយោជនមុគ្គតោ’’តិ;

តស្ស អបរភាគេ ឥតោ ទ្វានវុតិ កប្បមត្ថកេ តិស្សោ ផុស្សោតិ ឯកស្មិំ កប្បេ ទេវ ពុទ្ធា និព្ពត្តិំសុ តិស្សស្ស ភគវតោ កាលេ ពោធិសត្តា មហាភោគោ មហាយសោ សុជាតោ នាម ខត្តិយោ ហុត្វា ឥសិបព្ពជ្ជំ បព្ពជិត្វា មហិទ្ធិកភាវំ បត្វា ពុទ្ធោ |ឱ០.០០១២| ឧប្បន្នោតិ សុត្វា ទិព្ពមណ្ទារវ បទុម បារិច្ឆត្ត បុប្ផានិ អាទាយ ចតុបរិសមជ្ឈេ គច្ឆន្តំ តថាគតំ បូជេសិ. អាកាសេ បុប្ផវិតានមិវ អដ្ឋាសិ សោបិ នំ សត្ថា ឥតោ ទ្វានវុតិ កប្បមត្ថកេ ពុទ្ធោ ភវិស្សតីតិ វ្យាកាសិ. តស្សាបិ ភគវតោ ធាតុយោ ន វិកិរិំសុ ធាតុយោ គហេត្វា តិយោជនិកំ ថូបមកំសុ.

តេន វុត្តំ

‘‘តិស្សោ ជិនវរោ ពុទ្ធោ-នណ្ទារាមម្ហិ និព្ពុតោ

តត្ថេវ តស្ស ថូបវរោ-តីណិ យោជនមុស្សិតោ’’តិ;

តស្ស អបរភាគេ ផុស្សោ នាម ពុទ្ធោ ឧទបាទិ តទា ពោធិសត្តោ វិជិតាវិ នាម ខត្តិយោ ហុត្វា មហារជ្ជំ បហាយ សត្ថុ សន្តិកេ បព្ពជិត្វា តីណិ បិដកានិ ឧគ្គហេត្វា មហាជនស្ស ធម្មកថំ កថេត្វា សីលបារមិញ្ច បូរេសិ. សោបិ នំ ពុទ្ធោ តថេវ វ្យាកាសិ តស្ស បន ភគវតោ ធាតុយោ វិកិរិំសុ.

តេន វុត្តំ

‘‘ផុស្សោ ជិនវរោ សត្ថា-សុនន្ទារាមម្ហិ និព្ពុតោ

ធាតុវិត្ថារិកំ អាសិ-តេសុ តេសុ បទេសតោ’’តិ;

តស្ស អបរភាគេ ឥតោ ឯកនវុតិ កប្បមត្ថកេ វិបស្សិ នាម ពុទ្ធោ ឧទបាទិ តទា ពោធិសត្តោ មហិទ្ធិកោ មហានុភាវោ អតុលោ នាម នាគរាជា ហុត្វា សត្តរតន ខចិតំ សោវណ្ណមហាបីឋំ ភគវតោ អទាសិ សោបិ នំ ឥតោ ឯកនវុតិកប្បមត្ថកេ ពុទ្ធោ ភវិស្សតីតិ វ្យាកាសិ តស្ស បន ភគវតោ ធាតុយោ ន វិកិរិំសុ សព្ពេ ទេវមនុស្សា សន្តិបតិត្វា ធាតុយោ គហេត្វា សត្តយោជនិកំ ថូបមកំសុ.

តេន វុត្តំ

‘‘វិបស្សិ ជិនវរោ វីរោ-សុមិត្តារាមម្ហិ និព្ពុតោ,

តត្ថេវ សោ ថូបវរោ-សត្តយោជនិកោ កតោ’’តិ;

តស្ស អបរភាគេ ឥតោ ឯកតិំស កប្បមត្ថកេ សិខី វេស្សភូតិ ទ្វេ ពុទ្ធា និព្ពត្តិំសុ សិខិស្ស ភគវតោ កាលេ ពោធិសត្តោ អរិណ្ទមោ នាម រាជា ហុត្វា ពុទ្ធបមុខស្ស សង្ឃស្ស សចិវរំ មហាទានំ បវត្តេត្វា សត្តរតន បតិមណ្ឌិតំ ហត្ថិរតនំ ទត្វា ហត្ថិប្បមាណំ កត្វា កប្បិយ ភណ្ឌមទាសិ សោបិ នំ ឥតោ ឯកតិំស កប្បេ ពុទ្ធោ ភវិស្សតីតិ វ្យាកាសិ, សិខិស្ស ភគវតោ ធាតុយោ ឯកឃនា ហុត្វា អដ្ឋំសុ, សកល ជម្ពុទីបវាសិនោ បន មនុស្សា ធាតុយោ គហេត្វា តិយោជនុព្ពេធំ សត្តរតនមយំ ហិមគិរិ សទិស សោភំ ថូបមកំសុ.

សិខី |ឱ០.០០១៣| មុនិវរោ ពុទ្ធោ-ទុស្សារាមម្ហិ និព្ពុតោ,

តត្ថេវ តស្ស ថូបវរោ-តីណិ យោជនមុគ្គតោ’’តិ;

តស្ស អបរភាគេ វេស្សភូ នាម សត្ថា ឧទបាទិ. តទា ពោធិសត្តោ សុទស្សនោ នាម រាជា ហុត្វា ពុទ្ធបមុខស្ស សង្ឃស្ស សចីវរមហាទានំ ទត្វា តស្ស សន្តិកេ បព្ពជិត្វា អាចារគុណសម្បន្នោ ពុទ្ធរតនេ ចិតតីការ បីតិ ពហុលោ អហោសិ សេបិ នំ សត្ថា ឥតោ ឯកតិំសកប្បេ ពុទ្ធោ ភវិស្សតីតិ វ្យាកាសិ វេស្សភុស្ស បន ភគវតោ ធាតុយោ វិកិរិំសុ.

តេន វុត្តំ

‘‘វេស្សភូ ជិនវរោ សត្ថា-ខេមារាមម្ហិ និព្ពុតោ;

ធាតុវិត្ថារិកំ អាសិ-តេសុ តេសុ បទេសតោ’’តិ;

តស្ស អបរភាគេ ឥមស្មិំ កប្បេ ចត្តារោ ពុទ្ធា និព្ពត្តិំសុ កកុសណ្ធោ កោនាគមនោ កស្សបោ អម្ហាកំ ភគវាតិ កតុសណ្ធស្ស បន ភគវតោ កាលោ ពោធិសត្តោ ខេមោ នាម រាជា ហុត្វា ពុទ្ធបមុខស្ស សង្ឃស្ស សបត្តចីវរំ ទានញ្ចេវ អញ្ជនាទិ ភេសជ្ជានិ ច ទត្វា សត្ថុ ធម្មទេសនំ សុត្វា បព្ពជិ សោបិ នំ សត្ថា វ្យាកាសិ តស្ស បន ភគវតោ ធាតុយោ ន វិកិរិំសុ សព្ពេ សន្និបតិត្វា ធាតុយោ គហេត្វា គាវុតុព្ពេធំ ថូបមកំសុ.

តេន វុត្តំ