ទាឋាវំសោ |ឱ០.០០០១|

នមោ តស្ស ភគវតោ អរហតោ សម្មាសម្ពុទ្ធស្ស

១. វិសារទំ វាទបថាតិ វត្តិនំ,

តិលោកបជ្ជោតមសយ្ហសាហិនំ;

អសេស ញេយ្យាវរណប្បហាយិនំ,

នមាមិ សត្ថារមនន្តគោចរំ.

២. |ឱ០.០០០២|

តិលោក នាថប្បភវំ ភយាបហំ,

វិសុទ្ធវិជ្ជាចរណេហិ សេវិតំ;

បបញ្ច សំយោជនពន្ធនច្ឆិទំ,

នមាមិ ធម្មំ និបុណំ សុទុទ្ទសំ.

៣. បសាទមត្តេន’បិ យត្ថ បាណិនោ,

ផូសន្តិ ទុក្ខក្ខយមច្ចុតំ បទំ;

តមាហុណេយ្យំ សុសមាហិតិន្ទ្រិយំ,

នមាមិ សង្ឃំ មុនិរាជសាវកំ.

៤. វិភុសយំ កាឡកនាគរន្វ យំ,

បរក្កមោ ការុណិកោ ចមូបតិ;

គវេសមានោ ជិនសាសនស្ស យោ,

វិរូឡ្ហិមត្ថញ្ច ជនស្ស បត្ថយំ.

៥. |ឱ០.០០០៣|

សុធាមយូខាមល បណ្ឌុវំសជំ,

វិរូឡ្ហសទ្ធំ មុនិរាជសាសនេ;

បិយំ វទំ នីតិបថានុវត្តិនិំ,

សទា បជានំ ជនិកំ’វ មាតរំ.

៦. បិយំ បរក្កន្តិភុជស្ស រាជិនោ,

មហេសិ មច្ចុន្នតខុទ្ធិសម្បទំ;

វិធាយ លីលាវតិមិច្ឆិតត្ថទំ,

អសេស លង្កាតលរជ្ជលក្ខិយំ.

៧. កុមារមារាធិតសាធុមន្តិនំ,

មហាទយំ បណ្ឌុនរិន្ទ វំសជំ;

វិធាយ សទ្ធំ មធុរិន្ទនាមកំ,

សុសិក្ខីតំ បាវចនេ កលាសុ ច.

៨. |ឱ០.០០០៤|

នរិន្ទសុញ្ញំ សុចិរំ តិសីហឡំ,

ឥតិប្បតីតំ អយសំ អបានុទិ;

ចិរំ បណីតេន ច ចិវរាទិនា,

សុសញ្ញតេ សំយមិនោ អតប្បយិ.

៩. ចិរដ្ឋិតិំ បាវចនស្ស ឥច្ឆតា,

កតញ្ញុនា វិក្កម ពុទ្ទិសាលិនា;

សតីមតា ចន្ទិម ពន្ធុកិត្តិនា,

សគារវំ តេន’ភីយាចិតោ អហំ.

១០. សទេស ភាសាយ កវីហិ សីហឡេ,

កតម្បិ វំសំ ជិនទន្តធាតុយា;

និរុត្តិយា មាគធិកាយ វុទ្ធិយា,

ករោមិ ទីបន្តរវាសិនំ អបិ.

១១. |ឱ០.០០០៥|

ជីនោ’យមិទ្ធេ អមរវ្ហយេ បុរេ,

កទាចិ ហុត្វាន សុមេធនាមកោ;

សវេទវេទង្គវិភាគកោវិទោ,

មហទ្ធនេ វិប្បកុលម្ហិ មាណវោ.

១២. អហញ្ហិ ជាតិព្យសនេន បីឡិតោ,

ជរាភិភុតោ មរណេន ឱត្ថដោ;

សិវំ បទំ ជាតិជរាទិនិស្សដំ,

គវេសយិស្សំ’តិ រហោ វិចិន្តិយ.

១៣. អនេកសង្ខំ ធនធញ្ញសម្បទំ,

បតិដ្ឋបេត្វា កបណេសិ ទុច្ចជំ;

អនប្បកេ បេមភរានុពន្ធិនោ,

វិហាយ មិត្តេ ច សុតេច ពន្ធវេ.

១៤. |ឱ០.០០០៦|

បហាយ កាមេ និខិលេ មនោរមេ,

ឃរាភិនិក្ខម្ម ហិមាចលន្តិកេ;

មហីធរំ ធម្មិកនាម វិស្សុតំ,

ឧបេច្ច នានាតរុរាជិភុសិតំ.

១៥. មនោនុកូលេ សុររាជនិម្មីតេ,

អសម្មិគានំ អគតិម្ហិ អស្សមេ;

និវត្តចីរោ អជិនក្ខិបំ វហំ,

ជដាធរោ តាបស វេសមគ្គហី.

១៦. សុសញ្ញតត្តោបរិវារិ តិន្ទ្រិយោ,

ផលាផលាទីហិ បវត្តយំ តនុំ;

គតោ អភិញ្គ្ញាសុ ច បារមិំ វសី,

តហិំ សមាបត្តិ សុខំ អវិន្ទិ សោ.

១៧. |ឱ០.០០០៧|

សុសជ្ជិតេ រម្មបុរាធិវាសិនា,

មហាជនេន’ត្តមនេន អញ្ជសេ;

បថប្បទេសេ អភិយន្តមត្តនោ,

អនិដ្ឋិតេយេវ សុមេធ តាបសោ.

១៨. អគាធញេយ្យោទធីបារទស្សិនំ,

ភវន្តគុំ និព្ពនថំ វិនាយកំ;

អនេកខីណាសវលក្ខសេវិតំ,

កទា ចិ ទីបង្ករពុទ្ធមទ្ទស.

១៩. តតោ សសង្ឃស្ស តិលោកភត្តុនោ,

បរិច្ចជិត្វាន តនុម្បិ ជីវិតំ;

បសារយិត្វាន ជដាជិនាទិកំ,

វិធាយ សេតុំ តនុមេវ បល្លលេ.

២០. |ឱ០.០០០៨|

អនក្កមិត្វា កលលំ មហាទយេ,

សភិក្ខុកោ គច្ចតុ បិដ្ឋិយា ឥតិ;

អធិដ្ឋហិត្វាន និបន្នកោ តហិំ,

អនាថ មេតំ តិភវំ សមេក្ខិយ.

២១. ទយាយ សញ្ចោទិតមានសោ ជនេ,

ភវណ្ណវា ឧទ្ធរិតុំ ទុខទ្ទិតេ;

អកាសិ សម្ពោធិបទស្ស បត្តិយា,

មហាភិនីហារមុទគ្គវិក្កមោ.

២២. |ឱ០.០០០៩|

អថោ វិទិត្វា វសិនោ តមាសយំ,

អទាសិ សោ វ្យាករណំ មហាមុនិ;

តតោ បុរំ តម្ហិ តថាគតេ គតេ,

សយំវសី សម្មសិ បារមិគុណេ.

២៣. តតោ ច កប្បានមលីនវិក្កមោ,

អសំខិយេ សោ ចតុរោ សលក្ខកេ;

តហិំ តហិំ ជាតិសុ ពោធិបាចនេ,

វិសុទ្ធសម្ភារគុណេ អបូរយិ;

អថាភិជាតោ តុសិតេ មហាយសោ,

វិសុទ្ធសម្ពោធិបទោបលទ្ធិយា;

ឧទិក្ខមានោ សមយំ ទយាធនោ,

ចិរំ វិភុតិំ អនុភោសិ សព្ពសោ.

២៥. |ឱ០.០០១០|

សហស្សសង្ខា ទសចក្កវាលតោ,

សមាគតានេកសុរាធិបាទិហិ;

ឧទគ្គុទគ្គេហិ ជិនត្តបត្តិយា,

សគារវំ សោ អភិគម្ម យាចិតោ.

២៦. តតោ ចវិត្វា កបិឡវ្ហយេ បុរេ,

សទា សតោ សក្យកុលេកកេតុនោ;

អហោសិ សុទ្ធោទនភុមិភត្តុនោ,

មហាទិមាយាយ មហេសិយា សុតោ.

២៧. |ឱ០.០០១១|

វិជាតមត្តោ’វ វសុន្ធរាយ សោ,

បតិដ្ឋហិត្វាន ទិសា វិលោកយី;

តទា អហេសុំ វិវដង្គនា ទិសា,

អបូជយុំ តត្ថ ច ទេវមានុសា.

២៨. អាធារយុំ អាតបវារណាទិកំ,

អទិស្សមានាវ នភម្ភិ ទេវតា;

បទានិ សោ សត្ត ច ឧត្តរាមុខោ,

ឧបេច្ច និច្ឆារយិ វាចមាសភិំ.

២៩. យថត្ថសិទ្ធត្តកុមារនាមកោ,

មហព្ពលោ យោព្ពនហារិវិគ្គហោ;

ឧតុត្តយានុច្ឆវិកេសុ តីសុ សោ,

នុភោសិ បាសាទវរេសុ សម្បទំ.

៣០. |ឱ០.០០១២|

កទាចិ ឧយ្យានបថេ ជរាហតំ,

តថាតុរំ កាលកតញ្ច សំយមិំ;

កមេន ទិស្វាន វិរត្តមានសោ,

ភវេសុ សោ បព្ពជិតុំ អកាមយិ.

៣១. សបុប្ផទីបាទីករេហិ រត្តិយំ,

បុរក្ខតោ សោ តិទិវាធិវាសិហិ;

សឆន្នកោ កន្តកវាជិយានតោ,

តតោ មហាការុណិកោ’ភិនិក្ខមិ.

៣២. កមេន បត្វាន អនោមមាបគំ,

សុធោតមុត្តាផលហារិសេកតេ;

បតិដ្ឋហិត្វា វរមោឡិពន្ធនំ,

សិតាសិលូនំ គគនេ សមុក្ខិបី.

៣៣. |ឱ០.០០១៣|

បដិគ្គហេត្វា តិទសានមិស្សរោ,

សុវណ្នចង្គោដវរេន តំ តទា;

តិយោជនំ នីលមណីហិ ចេតិយំ,

អកាសិ ចូឡាមណិមត្តនោ បុរេ.

៣៤. តតោ ឃដីការសរោជយោនិនា,

សមាហដំ ធារយី ចីវរាទិកំ;

អថោ សកំ វត្ថយុគំ នភត្ថលេ,

បសត្ថវេសគ្គហណោ សមុក្ខិបី.