៩. មហារដ្ឋសាសនវំសកថាមគ្គោ

៩. ឥតោ បរំ មហារដ្ឋសាសនវំសកថាមគ្គំ កថយិស្សាមិ យថាវុត្តមាតិកាវសេន.

តតិយសង្គីតាវសានេ ហិ មហាមោគ្គលិបុត្តតិស្សត្ថេរោ មហាធម្មរក្ខិត្ថេរំ មហារដ្ឋំ បេសេសិ,-ត្វំ ឯតំ រដ្ឋំ គន្ត្វា ឯត្ថ សាសនំ បតិដ្ឋាបេសីតិ.

មហាធម្មរក្ខិតត្ថេរោច អត្តបញ្ចមោ ហុត្វា មហារដ្ឋំ គន្ត្វា មហានារទកស្សបជាតកកថាយ មហារដ្ឋកេ បសាទេត្វា ចតុរាសីតិបាណសហស្សានិ មគ្គផលេសុ បតិដ្ឋាបេសិ. តេរសសហស្សានិ បព្ពជិំសុ. ឯវំ សោ តត្ថ សាសនំ បតិដ្ឋាបេសិ.

មហារដ្ឋំ ឥសិ គន្ត្វា, សោ មហា ធម្មរក្ខិតោ;

ជាតកំ កថយិត្វាន, បសាទេសិ មហាជនន្តិ.

តត្ថ កិរ មនុស្សា បុព្ពេ អគ្គិហុតាទិមិច្ឆាកម្មំ យេភុយ្យេន អកំសុ. តេនេវ ថេរោ មហានារទកស្សបជាតកកថំ ទេសេសិ. តតោ បដ្ឋាយ តត្ថ មនុស្សា ជាតក កថំ យេភុយ្យេន សោតុំ អតិវិយ ឥច្ឆន្តិ. ភិក្ខូច យេភុយ្យេន គហដ្ឋានំ ជាតកកថំយេវ ទេសេន្តិ. វិសេសតោ បន វស្សន្តរជាតកកថំ តេ មនុស្សា ពហូហិ ទាតព្ពវត្ថូហិ បូជេត្វា សុណន្តិ.

តញ្ច មហារដ្ឋំ នាម ស្យាមរដ្ឋសមីបេ ឋិតំ, តេនេវ ស្យាមរដ្ឋវាសិនោបិ ភិក្ខូ គហដ្ឋាច យេភុយ្យេន សោតុំ ឥច្ឆន្តីតិ. មហាធម្មរក្ខិតត្ថេរោបិ មហារដ្ឋវាសីហិ សទ្ធិំ សកលស្យាមរដ្ឋវាសីនំ ធម្មំ ទេសេសិ, អមតរសំ បាយេសិ, យថា យោនកធម្មរក្ខិតត្ថេរោ អបរន្តរដ្ឋំ គន្ត្វា សកលមរម្មរដ្ឋវាសីនន្តិ.

យំ បន យោនករដ្ឋសាសនវំសកថាយំ វុត្តំ, តម្បិ សព្ពំ ឯត្ថាបិ ទដ្ឋព្ពំយេវ, តេហិ តស្ស ឯកសទិសត្តេន ឋិតត្តាតិ. តថា ហិ នាគសេនត្ថេរោបិ យោនករដ្ឋេ វសិត្វា ស្យាមរដ្ឋាទីសុបិ សាសនំ បតិដ្ឋាបេសិ. យោនករដ្ឋវាសិនោ មហាធម្មគម្ភីរត្ថេរមហាមេធង្ករត្ថេរាច សទ្ធិំ ពហូហិ ភិក្ខូហិ សីហឡទីបំ គន្ត្វា តតោ បុនាគន្ត្វា ស្យាមរដ្ឋេ សោក្កតយនគរំ បត្វា តត្ថ និសីទិត្វា សាសនំ បគ្គណ្ហិត្វា បច្ឆា លកុន្ននគរេ និសីទិត្វា សាសនំ បគ្គណ្ហិ. ឯវំ យោនករដ្ឋេ សាសនំ ឋិតំ ស្យាមាទីសុបិ ឋិតំយេវាតិ ទដ្ឋព្ពំ.

ពុទ្ធស្ស ភគវតោ បរិនិព្ពានតោ ទ្វិសតាធិកានំ ទ្វិន្នំ វស្សសហស្សានំ ឧបរិ នវុតិមេ វស្ស សីហឡទីបេ រជ្ជំ បត្តស្ស កិត្តិស្សិរិរាជសីហមហារាជស្ស អភិសេកតោ តតិយេ វស្សេ តេនេវ កិត្តិស្សិរិរាជសីហមហារញ្ញា បហិតបណ្ណាការសាសនំ អាគម្ម សរាមាធិបតិធម្មិកមហារាជាធិរាជេនាណត្តេហិ លង្កាទីបំ អាគតេហិ ឧបាលិត្ថេ រាទីហិ បតិដ្ឋាបិតោ វំសោ ឧបាលិវំសោតិ បាកដោ. សោច ទុវិធោ បុព្ពារាមវិហារវាសីអភយគិរិវិហារវាសីវសេនាតិ. ឯវំ មហានគរយោនកល្យាមរដ្ឋេសុ សាសនំ ថិរំ ហុត្វា តិដ្ឋតីតិ វេទិតព្ពន្តិ.

ឥតិ សាសនវំសេ មហារដ្ឋសាសនវំសកថាមគ្គោ នាម

នវមោ បរិច្ឆេទោ.