១០. ចិនរដ្ឋសាសនវំសកថាមគ្គោ

១០. តតោ បរំ បវក្ខាមិ ចីនរដ្ឋសាសនវំសកថាមគ្គំ យថាដ្ឋវិតមាតិកាវសេន.

តតិយសង្គីតាវសានេ ហិ មហាមោគ្គលិបុត្តតិស្សត្ថេរោ មជ្ឈិមត្ថេរំ ចិនរដ្ឋំ បេសេសិ,-ត្វំ ឯតំ រដ្ឋំ គន្ត្វា ឯត្ថ សាសនំ បតិដ្ឋាបេហីតិ.

មជ្ឈិមត្ថេរោច កស្សបគោត្តរេន អឡករេវត្ថេរេន ទុន្ទភិយត្ថេរេន មហារេវត្ថេរេនច សទ្ធិំ ហិមវន្តប្បទេសេ បញ្ចចីនរដ្ឋំ គន្ត្វា ធម្មចក្កប្បវត្តនសុត្តន្តកថាយតំ ទេសំ បសាទេត្វា អសីតិបាណកោដិយោ មគ្គផលរតនានិ បដិលាភេសិ. បញ្ចបិច តេ ថេរា បញ្ចរដ្ឋានិ បសាទេសុំ. ឯកមេកស្ស សន្តិកេ សហស្សមត្តា បព្ពជិំសុ. ឯវំ តេ តត្ថ សាសនំ បតិដ្ឋាបេសុំ.

គន្ត្វា មជ្ឈិមត្ថេរោ, ហិមវន្តំ បសាទយិ;

យក្ខសេនំ បកាសេន្តោ, ធម្មចក្កប្បវត្តនន្តិ.

តត្ថ កិរ មនុស្សា យេភុយ្យេន ចន្ទីបរមីស្វារានំ យក្ខានំ បូជំ ករោន្តិ. តេនេវ តេ បញ្ច ថេរា តេសំ យក្ខសេនំ បកាសយិត្វា ធម្មំ ទេសេសុំ. កស្មីរគន្ធាររដ្ឋំ បន កទាចិ កទាចិ ចីនរដ្ឋិន្ទស្ស វិជិតំ ហោតិ, កទាចិ កទាចិ បន វិសុំ ហោតិ. តទា បន វិសុំយេវ អហោសីតិ ទដ្ឋព្ពំ.

ចីរនដ្ឋេ បន ភគវតោ សាសនំ ទុព្ពលំយេវ ហុត្វា អដ្ឋាសិ, ន ថិរំ ហុត្វា. តេនេវ ឥទានិ តត្ថ កត្ថចិយេវ សាសនំ ឆាយាមត្តំវ បញ្ញាយតិ, វាតវេគេន វិកិណ្ណអព្ភំវិយ តិដ្ឋតីតិ.

ឥតិ សាសនវំសេ ចីនរដ្ឋសាសនវំសកថាមគ្គោ នាម

ទសមោ បរិច្ឆេទោ.

ឯវំ សព្ពេន សព្ពំ សាសនវំសកថាមគ្គោ និដ្ឋិតោ.

ឯត្តាវតាច –

លង្កាគតេន សន្តេន, ចិត្រញាណេន ភិក្ខុនា;

សរណង្ករនាមេន, សទ្ធម្មដ្ឋិតិកាមិនា.

ទូរតោយេវ ទីបម្ហា, សុមង្គលេន ជោតិនា;

វិសុទ្ធសីលិនាចេវ, ទីបន្តរដ្ឋភិក្ខុនា.

អញ្ញេហិចាភិយាចិតោ, បញ្ញាសាមីតិ នាមកោ;

អកាសិំ សុដ្ឋុកំ គន្ថំ, សាសនវំសប្បទីបិកំ.

ទ្វិសតេច សហស្សេច, តេវីសាធិកេ គតេ;

បុណ្ណាយំ មិគសីរស្ស, និដ្ឋំ គតាវ សព្ពសោ.

កោចិ ឯត្ថេវ ទោសោ ចេ, បញ្ញាយតិ សុចិត្តកា;

តំ ខមន្តុ ច សុទ្ធិយា, គណ្ហន្តុ យុត្តិកំ ហវេតិ.