៤. យោនករដ្ឋសាសនវំសកថាមគ្គោ

៤. ឥទានិ បន យោនករដ្ឋេ សាសនស្សុប្បត្តិំ កថេស្សាមិ. ភគវា ហិ វេនេយ្យហិតាវហោ យោនករដ្ឋេ មមសាសនំ ចិរកាលំ បភិដ្ឋហិស្សតីតិ អាបេក្ខិត្វា សទ្ធិំ ភិក្ខុ សង្ឃេន ទេសចារិកំ អាហិណ្ឌន្តោ លភុញ្ជំ នាម នគរំ អគមាសិ. តទា ឯកោ នេសាទោ ហរិផលំ ទត្វា តំ បរិភុញ្ជិត្វា ហរិពីជេ ខិបិតេ បថវិយំ អបតិត្វា អាកាសេយេវ បតិដ្ឋាសិ. តំ ទិស្វា សិតំ បត្វាកាសិ. តមត្ថំ ទិស្វា អានន្ទត្ថេរោ បុច្ឆិ. អនាគតេ ខោ អានន្ទ ឥមស្មិំ ឋានេ មម ធាតុចេតិយំ បតិដ្ឋហិស្សតិ, សាសនំ វិរូឡមាបជ្ជិស្សតីតិ ព្យាកាសិ. ភគវតា បន ហរិផលស្ស ភុញ្ជិតដ្ឋានត្តាហរិភុញ្ជោតិ តស្ស រដ្ឋស្ស នាមំ អហោសិ. ទ្វិន្នំ តាបសានំ ឋបិតំ ជលសុត្តិកំ បដិច្ច យោនកានំ ភាសាយ លភុញ្ជោតិ នាមំ អហោសិ.

តទា តត្ថ មបិន្នាយ នាម ឯកិស្សា មាតិកាយ សមីបេ និសិន្នោ ឯកោ លវកុលិកជេដ្ឋកោ អត្តនោ បុត្តំ សត្តវស្សិកំ ភគវតោ និយ្យាទេត្វា បព្ពាជេសិ. កម្មដ្ឋានានុយោគវសេន អចិរេនេវ អរហត្តំ បាបុណិ. សត្តវស្សិ កស្សច សាមណេរស្ស អរហត្តំ សច្ឆិកតដ្ឋានតំ បដិច្ច យោនកភាសាយ ឯតំ ឋានំ ចង្គមង្ឃ ឥតិ វុច្ចតិ. ចិរកាល វសេន ជង្គមង្ឃ ឥតិ វុច្ចតិ. តតោ បដ្ឋាយយេវ យោនករដ្ឋេ សាសនំ បតិដ្ឋាតីតិ.

ឥទំ យោនករដ្ឋេ បឋមំ សាសនស្ស បតិដ្ឋានំ.

សាសនេ បន បញ្ចតិំសាធិកេ ទ្វិវស្សសតេ សម្បត្តេ មហារក្ខិតត្ថេរោ យោនករដ្ឋំ គន្ត្វា កម្ពោជខេមាវរ ហរិភុញ្ជាយុទ្ធយាទីសុ អនេកេសុ រដ្ឋេសុ សាសនំ បតិដ្ឋាបេតិ. តានិ ហិ សព្ពានិ រដ្ឋានិ សង្គហេត្វា ទស្សេន្តេហិ អដ្ឋកថាចរិយេហិ យោនកលោកន្តិ ឱកាសកាលោកវាចកេន សាមញ្ញសទ្ទេន វុត្តំ. បកតិ ហេសា គន្ថការានំ យេន កេនចាការេន អត្ថន្តរស្ស វិញ្ញាបនាតិ.

មហារក្ខិតត្ថេរោ ច សទ្ធិំ បញ្ចហិ ភិក្ខូហិ បាដលិបុត្តតោ អនិលបថមគ្គេន យោនកលោកំ អាគន្ត្វា កាឡការាមសុត្តេន យោនកេ បសាទេសិ. សត្តតិសហស្សាធិកបាណសតសហស្សំ មគ្គផលាលង្ការំ អទាសិ. សន្តិកេ ចស្ស ទសសហស្សានិ បព្ពជិំសុ. ឯវំ សោ តត្ថសាសនំ បតិដ្ឋាបេសិ. តថា ច វុត្តំ អដ្ឋកថាយំ,–

យោនករដ្ឋំ តទា គន្ត្វា, សោ មហារក្ខិតោ ឥសិ;

កាឡការាមសុត្តេន, តេ បសាទេសិ យោនកេតិ.

តតោ បដ្ឋាយ តេសំ សិស្សបរម្បរា ពហូ ហោន្តិ, គណនបថំ វីតិវត្តា.

ឥទំ យោនករដ្ឋេ មហារក្ខិតត្ថេរាទយោ បដិច្ច

ទុតិយំ សាសនស្ស បតិដ្ឋានំ.

យោនករដ្ឋេ លកុន្ននគរេ ជិនចក្កេ បញ្ចវស្សសតេ មណិមយំ ពុទ្ធប្បដិមំ មាបេត្វា វិសុកម្មទេវបុត្តោ នាគសេនត្ថេរស្ស អទាសិ. នាគេសេនត្ថេរោ ច តស្មិំ បដិមម្ហិ ធាតុ អាគន្ត្វា បតិដ្ឋាតូតិ អធិដ្ឋាសិ. អធិដ្ឋានវសេនេវ សត្តធាតុយោ អាគន្ត្វា តត្ថ បតិដ្ឋហិត្វា បាដិហារិយំ ទស្សេសុន្តិ រាជវំសេ វុត្តំ.

តញ្ច វចនំ មម បរិនិព្ពានតោ បញ្ចវស្សសតេ អតិក្កន្តេ ឯតេ ឧប្បជ្ជិស្សន្តីតិ មិលិន្ទបញ្ហាយំ វុត្តវចនេន កាលបរិមាណវសេន ច សមេតិ. យោនករដ្ឋេ មិលិន្ទរញ្ញោ កាលេ ជិនចក្កេ បញ្ចវស្សសតេយេវ នាគសេនត្ថេរំ បដិស្ស ជិនចក្កំ វិរូឡំ ហុត្វា បតិដ្ឋាសិ.

ឥទំ យោនករដ្ឋេ នាគសេនត្ថេរំ បដិច្ច តតិយំ

សាសនស្ស បតិដ្ឋានំ.

កលិយុគេ បញ្ចសដ្ឋិវស្សេលភុញ្ជនគរតោ សង្កមិត្វា ក្យុង្គរនគរេ មាបិកស្ស ពញ្ញាចោមង្គរ នាមកស្ស រញ្ញោ កាលេ មជ្ឈិមទេសតោ កស្សបត្ថេរោ បញ្ចហិ ថេរេហិ សទ្ធិំ អាគច្ឆិ.

តទា សោ រាជា វិហារំ កត្វា តេសំ អទាសិ. សីហឡទីបតោ ច ធាតុយោ អានេត្វា ឯកោ ថេរោ អាគច្ឆិ. ធាតុតោ បាដិហារិយំ ទិស្វា បសីទិត្វា លភុញ្ជចេតិយ និធានំ អកាសិ. តេ ច ថេរេ បដិច្ច យោនករដ្ឋេ សាសន វំសោ អាគតោ.

ឥទំ យោនករដ្ឋេ ចតុត្ថំ សាសនស្ស បតិដ្ឋានំ.

កលិយុគេ ទ្វាសដ្ឋាធិកេ សត្តសតេ សម្បត្ថេ ចិនរដ្ឋិន្ទោ រាជា អភិភវិត្វា សកលម្បិ យោនករដ្ឋំ សង្ខុព្ភិតំ ហោតិ. តទា មហាធម្មគម្ភីរត្ថេរោ មហាមេធង្ករត្ថេ រោចាតិ ទ្វេ ថេរោ យោនករដ្ឋតោ សទ្ធិំ ពហូហិ ភិក្ខូហិ សីហឡទីបំ អគមំសុ. តទា ច សីហឡទីបេ ទុព្ភិក្ខភយេន អភិភូតោ ហុត្វា តតោ ស្យាមរដ្ឋេ សោក្កតយនគរំ បុន អគមំសុ.

តតោ បច្ឆា លកុន្ននគរំ គន្ត្វា សាសនំ បគ្គណ្ហន្តានំ លជ្ជិបេសលានំ ភិក្ខូនំ សន្តិកេ បុន សិក្ខំ គណ្ហិំសុ. តេ ច ថេរោ ស្យាមរដ្ឋេ យោនករដ្ឋេ ច សព្ពត្ថ សាសនំ បតិដ្ឋាបេសុន្តិ.

ឥទំ យោនករដ្ឋេ បត្តលង្កេ ទ្វេ ថេរេ បដិច្ច បញ្ចមំ

សាសនស្ស បតិដ្ឋានំ.

កលិយុគេ បញ្ចវីសាធិកេ អដ្ឋវស្សសតេ សម្បត្តេ សិរិសទ្ធម្មលោកបតិចក្កវត្តិរាជា លភុញ្ជចេតិយំ បុន មហន្តំ កត្វា តស្ស ចេតិយស្ស សមីបេ ចត្តារោ វិហារេ ការាបេត្វា មហាមេធង្ករត្ថេរស្ស សារិបុត្តត្ថេរស្ស ច អទាសិ. តទាបិ តេ ទ្វេ ថេរា សាសនំ បរិសុទ្ធំ កត្វា បតិដ្ឋាបេសុន្តិ.

ឥទំ យោនករដ្ឋេ មហាមេធង្ករសារិបុត្តត្ថេរេ

បដិច្ច ឆដ្ឋំ សាសនស្ស បតិដ្ឋានំ.

កលិយុគេ តេចត្តាលីសាធិកេ នវវស្សសតេ សម្បត្តេ ហំសាវតីនគរេ អនេកសេតិភិន្ទោ នាម រាជា យោនករដ្ឋំ អភិភវិត្វា អត្តនោ ហត្ថគតំ កត្វា ពលិ ភុញ្ជនត្ថាយ ជេដ្ឋបុត្តស្ស អនុរុទ្ធស្ស នាម រាជកុមារស្ស ទត្វា ពហូហិ អមច្ចេហិ សទ្ធិំ តត្ថ គន្ត្វា អនុរាជតាវេន រជ្ជំ ការាបេសិ. សាសនញ្ច វិសោធាបេតុំ សទ្ធម្មចក្កសាមិត្ថេរំ តេន សទ្ធិំ បហិណិ.

អនេកសេតិភិន្នោ កិរ រាជា យោនករដ្ឋំ វិជយកាលេ បឋមំ សាសនស្ស បតិដ្ឋានភូតមិទន្តិ កត្វា តំរដ្ឋវាសិនោ ករមរានីតភាវេន ន អគ្គហេសីតិ.

យថាវុត្តត្ថេរវំសេសុ ច ឯកោ លកុន្ននគរេ អរញ្ញវាសី ថេរោ តត្ថ នគរេ អជ្ជ អសុកស្មិំ ឋានេ ឯកោ មតោតិ គិហីនំ កថេត្វា យថាកថិតំ ភូតំ ហុត្វា អយំ អភិញ្ញាលាភីតិ បាកដោ អហោសិ.

តស្មិំយេវ ច នគរេ មហាមង្គលោ នាម ថេរោ អនេកសេតិភិន្ទស្ស រញ្ញោ យុជ្ឈិតុំ អាគតកាលេ អនេកសេតិភិន្ទោ រាជា មំ បក្កោសិស្សតិ, សមានជាតិកំ ទូតំ បេស្សេស្សតីតិ បក្កោសិតកាលតោ បឋមមេវវទិ. យថាវុត្តនិយាមេនេវ បក្កោសនតោ អយំ អភិញ្ញា លាភីតិ កិត្តិ ឃោសោ អហោសិ.

តត្ថ នគរេ ញាណវិលាសត្ថេរោ សង្ខ្យាបកាសកំ នាម បករណំ អកាសិ. តំឡីកំ បន បត្តលង្កត្ថេរស្ស វិហារេ វសន្តោ សិរិមង្គលោនាម ថេរោ អកាសិ.

វិសុទ្ធិមគ្គទីបនិំ បន សំញ្ញ្វត្តអរញ្ញវាសី ឧត្តរារាមោ នាម ឯកោ ថេរោ. មង្គលទីបនិំ សិរិមង្គលត្ថេរោ. ឧប្បាតសន្តិំ អញ្ញតរោ ថេរោ. តំ កិរ ឧប្បាតសន្តិំ សជ្ឈាយិត្វា ចីនរញ្ញោ សេនំ អជិនីតិ. ឥច្ចេវំ យោនករដ្ឋេ អភិញ្ញាលាភីនំ គន្ថការានញ្ច ថេរានំ អានុភាវេន ជិនសាសនំ បរិសុទ្ធំ ហុត្វា បតិដ្ឋាតិ. ឯវំ ហេតុផលសម្ពន្ធវសេន អាទិ អន្ត សម្ពន្ធវសេន ច យថាវុត្តេហិ តីហិ នយេហិ ថេរបរម្បរា ឃដ្ដេត្វា គហេតព្ពា.

ឥតិ សាសនវំសេ យោនករដ្ឋសាសនវំសកថា

មគ្គោ នាម ចតុត្ថោ បរិច្ឆេទោ.