៥. នវវាសីរដ្ឋសាសនវំសកថាមគ្គោ

៥. ឥទានិ វនវាសីរដ្ឋេ សិរិខេត្តនគរសាសនវំសំ វក្ខាមិ. ជិនចក្កេ ហិ ឯកាធិកេ វស្សសតេ សម្បត្តេ ជដិលោ សក្កោ នាគោ គរុឡោ កុម្ភណ្ឌោ ចន្ទី បរមីស្វរោចាតិ ឥមេ សត្ត សិរិខេត្តំ នាម នគរំ មាបេសុំ. តត្ថ ទ្វត្តបោង្កោ នាម រាជា រជ្ជំ ការេសិ. តស្ស កិរ តីណិ អក្ខីនិ សន្តីតិ. តទា ភគវតោ សាវកា អរហន្តា តិសហស្សមត្តា តត្ថ វសិំសុ. សោ រាជា តេសំ អរហន្តានំ ទេវសិកំ ចតូហិ បច្ចយេហិ ឧបត្ថម្ភិ. ឆ សរីរធាតុយោ ច ឯកេកំ ឯកេកស្មិំ និទហិត្វា ឆ ចេតិឥយានិ ការាបេសិ. ទក្ខិណពាហុំ បន និទហិត្វា ឯកម្បិ ចេតិយំ ការាបេសិ.

ឧណ្ហីសធាតុំ បន កង្គរន្នគរតោ អានេត្វា ឯកម្បិ ចេតិយំ ការាបេសិ. តំ បន តាវ ន និដ្ឋិតំ. បច្ឆា អនុរុទ្ធរាជា គហេត្វា អរិមទ្ទននគរំ អានេត្វា ចញ្ញិង្ខុ នាម ចេតិយេ និធានំ អកាសិ. តស្មា រក្ខិតត្ថេរស្ស អាគមនតោ បុព្ពេបិ សាសនំ បតិដ្ឋាសីតិ ទដ្ឋព្ពំ. តតោ បច្ឆា សាសនំ ទុព្ពលំ ហុត្វា អដ្ឋាសិ.

ឥទំ វនវាសីរដ្ឋេ បឋមំ សាសនស្ស បតិដ្ឋានំ.

មហាមោគ្គលិបុត្តតិស្សត្ថេរេន បន បេសិតោ រក្ខិតត្ថេរោ វនវាសីរដ្ឋំ គន្ត្វា អាកាសេ ឋត្វា អនមតគ្គបរិយាយកថាយ វនវាសិកេ បសាទេសិ. កថាបរិយោសានេ បនស្ស សដ្ឋិសហស្សានំ ធម្មាភិសមយោ អហោសិ. សត្តតិសហស្សមត្តា បព្ពជិំសុ. បញ្ចវិហារសតានិ បតិដ្ឋាបេសុំ. ឯវំ សោ តត្ថ សាសនំ បតិដ្ឋាបេសិ. តេនេវ អដ្ឋ កថាយំ –

គន្ត្វាន រក្ខិតត្ថេរោ,

វនវាសិំ មហិទ្ធិកោ;

អន្តលិក្ខេ ឋិតោ តត្ថ,

ទេសេសិ អនមតគ្គិយន្តិ វុត្តំ.

ឯវំ វនវាសីរដ្ឋេ បុព្ពេយេវ សាសនំ ឱគាហេត្វា បតិដ្ឋហិ. ន បន តាវ សកលំ ព្យាបេត្វា បតិដ្ឋហិ.

ឥទំ តាវ វនវាសីរដ្ឋេ សិរិខេត្តនគរេ ទុតិយំ

សាសនស្ស បតិដ្ឋានំ.

ជិនចក្កេ បន តេត្តិំសាធិកេ ចតុវស្សសតេ កុក្កុដ សីសោ នាម ឯកោ រាជា រជ្ជំ ការេសិ. តស្ស រញ្ញោ កាលេ ភគវតោ សាវកា អរហន្តា បញ្ចសតមត្តា អហេសុំ. តេសម្បិ សោ រាជា ទេវសិកំ ចតូហិ បច្ចយេហិ ឧបត្ថម្ភេសិ. សោតាបន្នសកទាគាមិអនាគាមិនោ បន គណនបថំ វីតិវត្តា អហេសុំ.

ឥទំ វនវាសីរដ្ឋេ សិរិខេត្តនគរេ បរម្បរាភតវសេន

តតិយំ សាសនស្ស បតិដ្ឋានំ.

ឥច្ចេវំ វនវាសីរដ្ឋេ អនេកសតេហិ អរហន្តត្ថេរេហិ សាសនំ បុណ្ណិន្ទុសង្កាសំ ហុត្វា អតិវិយ វិជ្ជោតេសិ. សាសនិក គន្ថការា បន មហាថេរា តត្ថ ន សន្ទិស្សន្តិ. អរហន្តត្ថេរា បន រាជូនំ អាយាចនំ អារព្ភ ធម្មសត្ថំ ឯកំ វិរចយិំសូតិ បោរាណា វទន្តីតិ. ឥច្ចេវំ–

តេច ថេរា មហាបញ្ញា,

បគ្គហេត្វាន សាសនំ;

សូរិយោ វិយ អត្ថង្គោ,

ឧបគា មច្ចុសន្តិកំ.

តស្មា ហិ បណ្ឌិតោ បោសោ,

យាវ មច្ចុ នចាគតោ;

តាវ បុញ្ញំ ករេ និច្ចំ,

មា បមជ្ជេយ្យ សព្ពទាតិ.

ឥតិ សាសនវំសេ វនវាសីរដ្ឋសាសនវំសកថាមគ្គោ

នាម បញ្ចមោ បរិច្ឆេទោ.