២៤. ឧត្តរសាមណេរស្ស វត្ថុម្ហិ អយមានុបុព្ពីកថា

សោ កិរ បុរិមពុទ្ធេសុ [បុរិមពុទ្ធេ ឥតិសព្ពត្ថ] កតាធិការោ តត្ថ តត្ថ ភវេ វិវដ្ដូបនិស្សយំ បុញ្ញំ ឧបចិនន្តោ សុមេធស្ស ភគវតោ កាលេ វិជ្ជាធរោ ហុត្វា ហិមវតិ បដិវសតិ. តទា សុមេធោ នាម សម្មាសម្ពុទ្ធោ វិវេក មនុព្រូហន្តោ ហិមវន្តំ គន្ត្វា រមណីយេ បទេសេ បល្លង្កំ អាភុជិត្វា និសីទិ. តទា វិជ្ជាធរោ អាកាសេន គច្ឆន្តោ ឆព្ពណ្ណរំសីហិ វិរាជមានំ ភគវន្តំ ទិស្វា តីហិ កណិការបុប្ផេហិ បូជេសិ, បុប្ផានិ ពុទ្ធានុភាវេន សត្ថុ ឧបរិ ឆត្តាការេន អដ្ឋំសុ, សោ តេន ភីយ្យោសោ មត្តាយ បសន្នចិត្តោ ហុត្វា អបរភាគេ កាលំកត្វា តាវតិំសភវនេ និព្ពត្តិត្វា ឧឡារំ ទិព្ពសម្បត្តិមនុភវន្តោ យាវតាយុកំ តត្ថ ឋត្វា តតោ ចុតោ ទេវមនុស្សេសុ សំសរន្តោ ឥមស្មិំ ពុទ្ធុប្បាទេ រាជគហនគរេ ព្រាហ្មណមហាសាលស្ស បុត្តោ ហុត្វា និព្ពត្តិ. ឧត្តរោតិស្ស នាមំ អហោសិ. សោ ឧត្តមរូបធរោ វិញ្ញុតំ បត្តោ ព្រាហ្មណវិជ្ជាសុ និប្ផត្តិំ បត្វា ជាតិយា រូបេន វិជ្ជាយ សីលាចារេន ច លោកស្ស មហនីយោ ជាតោ, តស្ស តំ បញ្ញាសម្បត្តិំទិស្វា វស្សការោ មគធមហាមត្តោ អត្តនោ ធីតរំ ទាតុកាមោ ហុត្វា អត្តនោ អធិប្បាយំ បវេទេសិ. សោ និស្សរណជ្ឈាសយតាយ តំ បដិក្ខិបិត្វា កាលេនកាលំ ធម្មសេនាបតិំ បយិរុបាសន្តោ តស្ស សន្តិកេ ធម្មំ សុត្វា បដិលទ្ធសទ្ធោ បព្ពជិត្វា វត្តសម្បន្នោ ហុត្វា ថេរំ ឧបដ្ឋហតិ. តេន ច សមយេន ថេរស្ស អញ្ញតរោ អាពាធោ ឧប្បន្នោ ហោតិ, តស្ស ភេសជ្ជត្ថាយ ឧត្តរសាមណេរោ បាតោវ បត្តចីវរ មាទាយ វិហារតោ និក្ខម្ម អន្តរាមគ្គេ តឡាកស្ស តីរេ បត្តំ ឋបេត្វា ឧទកសមីបំ គន្ត្វា មុខំ ធោវតិ, តទា អញ្ញតរោ ឧម្មគ្គចោរោ កតកម្មោ អារក្ខបុរិសេហិ អនុពទ្ធោ អគ្គទ្វារេនេវ នគរតោ និក្ខមិត្វា បលាយន្តោ អត្តនា គហិតំ រតនភណ្ឌិកំ សាមណេរស្ស បត្តេ បក្ខិបិត្វា បលាយិ. សោ សាមណេរោបិ បត្តសមីបំ [សត្តុសមីបំ ឥតិបិ កត្ថចិ] ឧបគតោ ហោតិ, ចោរំ អនុពន្ធន្តា រាជបុរិសា សាមណេរស្ស បត្តេ ភណ្ឌិកំ ទិស្វា អយំ ចោរោ, ឥមិនា ចោរិយំ កតន្តិ សាមណេរំ បច្ឆាពាហំ ពន្ធិត្វា វស្សការស្ស ព្រាហ្មណស្ស ទស្សេសុំ. វស្សការោ ច តទា រញ្ញោ វិនិច្ឆយេ និយុត្តោ ហុត្វា ឆេជ្ជភេជ្ជំ អនុសាសតិ. សោ ឯសោ បុព្ពេ មម វចនំ នាទិយិ. សុទ្ធបាសណ្ឌិយេសុ បព្ពជីតិ ច ពទ្ធាឃាតត្តា តំ កម្មំ អសោធេត្វាវ ជីវន្តមេវេតំ សូលេ ឧត្តាសេថាតិ អាណា បេសិ, រាជបុរិសា តំ និម្ពសូលេ ឧត្តាសេសុំ. សាមណេរោ សូលគ្គេ និសិន្នោ ឧបជ្ឈាយស្ស មេ កោ ភេសជ្ជំ អាហរិស្សតីតិ សារិបុត្តត្ថេរំ សរិ. តតោ ថេរោ តំ បវត្តិំ ញត្វា សម្មាសម្ពុទ្ធស្ស កថេសិ, ភគវាបិ មហាសាវកបរិវុតោ តស្ស ញាណបរិបាកំ ឱលោកេត្វា តំ ឋានមគមាសិ. តតោ ភគវតោ និក្ខន្តភាវា សកលនគរេ កោលាហលំ អហោសិ, មហាជនកាយោ សន្និបតិ. អថ ភគវា វិប្ផុរន្តហត្ថតលេ នខមណិមយូខសម្ភិន្នបីតាភាសតាយ បគ្ឃរន្តជាតិហិង្គុលកសុវណ្ណរសធារាវិយ ជាលាវគុណ្ឋិតមុទុតលុនង្គុលំ ហត្ថំ ឧត្តរស្ស សីសេ ឋបេត្វា ឧត្តរ ឥទំ តេ បុព្ពេ កតបាបកម្មស្ស ផលំ ឧប្បន្នំ, តត្ថ តយា បច្ចវេក្ខណពលេន អធិវាសនា កាតព្ពាតិ អាហ. តេនេវ អាហ.

១. អតីតេ កិរ ឯកស្មិំ, គាមេ ត្វ មសិ ទារកោ;

ទារេកេហិ សមាគម្ម, កីឡន្តោ កេឡិមណ្ឌលេ.

២. គហេត្វា សុខុមំ សូកំ, តទា ត្វំ និម្ពជល្លិយា;

ឧត្តាសេសិ តត្ថ សូលេ, ជីវមានកមក្ខិកំ.

៣. អបរម្បិ តេ បាបកម្មំ, បវក្ខាមិ សុណោហិ មេ;

ឱវទន្តិំ ហិតេន ត្វំ, អតីតេ សកមាតរំ.

៤. ជីវសូលេ និសីទាតិ, កោបេនាភិសបី តុវំ;

ឥមេហិ ទ្វីហិ បាបេហិ, សរំ សំសារសាគរេ.

៥. បញ្ចជាតិសតេ អច្ឆិ, ជីវសូលម្ហិ និម្ពជេ;

អយំ តេ ចរិមា ជាតិ, ឯត្ថាបិច វិបច្ចិ សោតិ.

ឯវមាទិនា នយេន តស្ស អជ្ឈាសយានុរូបេន ធម្មំ ទេសេសិ, ឧត្តរោ អមតាភិសេកសទិសេន សត្ថុនោ ហត្ថសម្ផស្សសញ្ជាតបសាទសោមនស្សតាយ ឧឡារំ បីតិបាមោជ្ជំ បដិលភិត្វា យថាបរិចិតំ វិបស្សនាមគ្គំ សមារូឡ្ហោ ញាណស្ស បរិបាកំ គតត្តា សត្ថុ ទេសនាវិលាសេន មគ្គបដិបាដិយា សព្ពកិលេសេ ខេបេត្វា ឆឡភិញ្ញោ អហោសិ. ធម្មំ សុត្វា តត្ថ សមាគតានំ ទេវមនុស្សានំ ចតុរាសីតិបាណសហស្សានំ ធម្មាភិសមយោ អហោសីតិ វទន្តិ. ឧត្តរោ បន ឆឡភិញ្ញោ ហុត្វា សូលតោ ឧដ្ឋហិត្វា អាកាសេ ឋត្វា បាដិហារិយំ ទស្សេសិ. មហាជនា អច្ឆរិយព្ភុតចិត្តា ជាតា អហេសុំ. តាវទេវស្ស វណោរុន្ធិ, សោ ភិក្ខូហិ អាវុសោ តាទិសំ ទុក្ខំ អនុភវន្តោ កថំ ត្វំ វិបស្សនំ អនុយុញ្ជិតុំ សក្ខីតិ បុដ្ឋោ បគេវ មេ អាវុសោ សំសារេ អាទីនវោ សង្ខារានញ្ច សភាវោ សុទិដ្ឋោ. តស្មាហំ តាទិសំ ទុក្ខំ អនុភវន្តោបិ អសក្ខិំ វិបស្សនំ វឌ្ឍេត្វា វិសេសំ អធិគន្តុំតិ អាហ. អថាបរភាគេ សោ ភិក្ខុសង្ឃមជ្ឈេ អត្តនោ បុព្ពចរិតា បទានំ បកាសេន្តោ ឥមា គាថា អភាសិ.

៦. សុមេធោ នាម សម្ពុទ្ធោ, ទ្វត្តិំសវរលក្ខណោ;

វិវេកកាមោ សម្ពុទ្ធោ, ហិមវន្ត មុបាគមិ.

៧. អជ្ឈោគហេត្វា ហិមវន្តំ, អគ្គោ ការុណិកោ មុនិ;

បល្លង្កំ អាភុជិត្វាន, និសីទិ បុរិសុត្តមោ.

៨. វិជ្ជាធរោ តទា អាសិំ, អន្តលិក្ខចរោ អហំ;

តិសូលំ សុកតំ គយ្ហ, គច្ឆាមិ អម្ពរេ តទា.

៩. បព្ពតគ្គេ យថា អគ្គិ, បុណ្ណមាសេវ ចន្ទិមា;

វនំ ឱភាសតេ ពុទ្ធោ, សាលរាជាវ ផុល្លិតោ.

១០. វនគ្គា និក្ខមិត្វាន, ពុទ្ធរំសី វិធាវរេ;

នលគ្គិវណ្ណសង្កាសា, ទិស្វា ចិត្តំ បសាទយិំ.

១១. វិចិនំ អទ្ទសំ បុប្ផំ, កណិការំ ទេវគន្ធិកំ;

តីណិ បុប្ផានិ អាទាយ, ពុទ្ធសេដ្ឋំ អបូជយិំ.

១២. ពុទ្ធស្ស អានុភាវេន, តីណិ បុប្ផានិ មេ តទា;

ឧទ្ធវណ្ដា អធោបត្តា, ឆាយំ កុព្ពន្តិ សត្ថុនោ.

១៣. តេន កម្មេន សុកតេន, ចេតនាបណិធីហិច;

ជហិត្វា មានុសំ ទេហំ, តាវតិំសមគញ្ឆហំ.

១៤. តត្ថ មេ សុកតំ ព្យម្ហំ, កណិការីតិ ញាយតិ;

សដ្ឋិយោជន មុព្ពេធំ, តិំសយោជនវិត្ថតំ.

១៥. សហស្សខណ្ឌំ សតភេណ្ឌុ, ធជាលុ ហរិតាមយំ;

សតសហស្សានិ ព្យូហានិ, ព្យម្ហេ បាតុរហំសុ មេ.

១៦. សោណ្ណមយា មណិមយា, លោហិតង្កមយា បិច;

ផលិកា បិច បល្លង្កា, យទិច្ឆក យទិច្ឆកា.

១៧. មហារហញ្ច សយនំ, តូលិកំ វិកតីយកំ;

ឧទ្ទលោមិកឯកន្តំ, ពិម្ពោហនសមាយុតំ.

១៨. ភវនា និក្ខមិត្វាន, ចរន្តោ ទេវចារិកំ;

យទា ឥច្ឆាមិ គមនំ, ទេវសំឃបុរក្ខតោ.

១៩. បុប្ផស្ស ហេដ្ឋា តិដ្ឋាមិ, ឧបរិច្ឆទនំ មម;

សមន្តា យោជនសតំ, កណិការេហិ ឆាទិតំ.

២០. សដ្ឋិតុរិយសហស្សានិ, សាយំ បាតំ ឧបដ្ឋហុំ;

បរិវារេន្តិ មំ និច្ចំ, រត្តិន្ទិវមតន្ទិតា.

២១. តត្ថ នច្ចេហិ គីតេហិ, តាលេហិ វាទិតេហិ ច;

រមាមិ ខិឌ្ឌារតិយា, មោទាមិ កាមកាមហំ.

២២. តត្ថ ភុត្វា ច បិត្វា ច, មោទាមិ តិទសេ តទា;

នារីគណេហិ សហិតោ, មោទាមិ ព្យម្ហមុត្តមេ.

២៣. សតានំ បញ្ចក្ខត្តុញ្ច, ទេវរជ្ជ មការយិំ;

សតានំ តីណិក្ខត្តុំច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសំខិយំ.

២៤. ភវាភវេ សំសរន្តោ, មហាភោគំ លភាមហំ;

ភោគេ មេ ឩនតា នត្ថិ, ពុទ្ធបូជាយិ ទំ ផលំ.

២៥. ទ្វេ មេ ភវេ សំសរាមិ, ទេវត្តេ អថ មានុសេ;

អញ្ញំ គតិំ ន ជានាមិ, ពុទ្ធបូជាយិទំ ផលំ.

២៦. ទ្វេ មេ កុលេ បជានាមិ, ខត្តិយេ ចាបិ ព្រាហ្មណេ;

នីចេ កុលេ ន ជានាមិ, ពុទ្ធបូជាយិទំ ផលំ.

២៧. ហត្ថិយានំ អស្សយានំ, សិវិកំ សន្ទមានិកំ;

លភាមិ សព្ពមេវេ តំ, ពុទ្ធបូជាយិទំ ផលំ.

២៨. ទាសីគណំ ទាសគណំ, នារិយោ ច អលង្កតា;

លភាមិ សព្ព មេវេ តំ, ពុទ្ធបូជាយិទំ ផលំ.

២៩. កោសេយ្យកម្ពលិយានិ, ខោមកប្បាសិកានិច;

លភាមិ សព្ពមេវេតំ, ពុទ្ធបូជាយិទំ ផលំ.

៣០. នវវត្ថំ នវផលំ, នវគ្គរសភោជនំ;

លភាមិ សព្ពមេវេតំ, ពុទ្ធបូជាយិទំ ផលំ.

៣១. ឥមំ ខាទ ឥមំ ភុញ្ជ, ឥមម្ហិ សយនេ សយ;

លភាមិ សព្ពមេវេតំ, ពុទ្ធបូជាយិទំ ផលំ.

៣២. សព្ពត្ថ បូជិតោ ហោមិ, យសោ អច្ចុគ្គតោ មម;

មហេសក្ខោ ឃទា ហោមិ, អភេជ្ជបរិសោ សទា;

ញាតីនំ ឧត្តមោ ហោមិ, ពុទ្ធបូជាយិទំ ផលំ.

៣៣. សីតំ ឧណ្ហំ ន ជានាមិ, បរិឡាហោ ន វិជ្ជតិ;

អថោ ចេតសិកំ ទុក្ខំ, ហទយេ មេ ន វិជ្ជតិ.

៣៤. សុវណ្ណវណ្ណោ ហុត្វាន, សំសរាមិ ភវាភវេ;

វេវណ្ណិយំ ន ជានាមិ, ពុទ្ធបូជាយិទំ ផលំ.

៣៥. ទេវលោកា ចវិត្វាន, សុក្កមូលេន ចោទិតោ;

សាវត្ថិយំ បុរេ ជាតោ, មហាសាលេ សុអឌ្ឍកេ.

៣៦. បញ្ចកាមគុណេ ហិត្វា, បព្ពជិំអនគារិយំ;

ជាតិយា សត្តវស្សោហំ, អរហត្តមបាបុណិំ.

៣៧. ឧបសម្បាទយី ពុទ្ធោ, គុណមញ្ញាយ ចក្ខុមា;

តរុណោវ បូជនីយោ ហំ, ពុទ្ធបូជាយិទំ ផលំ.

៣៨. ទិព្ពចក្ខុំ វិសុទ្ធំ មេ, សមាធិកុសលោ អហំ;

អភិញ្ញាបារមិប្បត្តោ, ពុទ្ធបូជាយិទំ ផលំ.

៣៩. បដិសម្ភិទា អនុប្បត្តោ, ឥទ្ធិបាទេសុ កោវិទោ;

សទ្ធម្មេ បារមិប្បត្តោ, ពុទ្ធបូជាយិទំ ផលំ.

៤០. តិំសកប្បសហស្សម្ហិ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤១. កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៤២. ស្វាគតំ វត មេ អាសិ, ពុទ្ធសេដ្ឋស្ស សន្តិកំ;

តិស្សោ វិជ្ជា អនុប្បត្តោ, កតំ ពុទ្ធស្ស សាសនំ.

៤៣. បដិសម្ភិទា ចតស្សោ ច, វិមេក្ខា បិច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំតិ;

តំ សុត្វា ពហូ កុសលកម្មបរាយណា អហេសុំ.

៤៤. សហេតុកា បច្ឆិមិកាបិ សត្តា,

បាបំ ន សក្កោន្តិ ជហាតុមេវំ;

អនិច្ឆមានេហិ ជនេហិ ទុក្ខំ,

អារាវ បាបំ បរិវជ្ជនីយំតិ.

ឧត្តរសាមណេរស្ស វត្ថុំ ចតុត្ថំ.