២២. មិច្ឆទិដ្ឋិកស្ស វត្ថុម្ហិ អយមានុបុព្ពីកថា

ភគវតិ ធរមានេ រាជគហនគរេ កិរ ឯកោ ព្រហ្មភត្តិកោ មិច្ឆាទិដ្ឋិកោ បដិវសតិ, តត្ថេវ សម្មាទិដ្ឋិកោបិ. តេសំ ឧភិន្នម្បិ ទ្វេ បុត្តា អហេសុំ. តេ ឯកតោ កីឡន្តា វឌ្ឍន្តិ. អថាបរភាគេ គុឡកីឡំកីឡន្តានំ សម្មាទិដ្ឋិកស្ស បុត្តោ ‘‘នមោ ពុទ្ធយា’’តិ វត្វា គុឡ្ហំ ខិបន្តោ ទិវសេ ទិវសេ ជិនាតិ. មិច្ឆាទិដ្ឋិកស្ស បុត្តោ ‘‘នមោ ព្រហ្មុនោ’’តិ វត្វា ខិបន្តោ បរាជេតិ, តតោ មិច្ឆាទិដ្ឋិកស្ស បុត្តោ និច្ចំ ជិនន្តំ សម្មាទិដ្ឋិកំ កុមារំ ទិស្វា សម្ម ត្វំ និច្ចមេវ ជិនាសិ, កិំ វត្វា គុឡំ ខិបសីតិ បុច្ឆិ. សោហំ សម្ម ‘‘នមោ ពុទ្ធាយា’’តិ វត្វា ខិបាមីតិ អាហ. សោបិ តតោ បដ្ឋាយ ‘‘នមោ ពុទ្ធាយា’’តិ វត្វា ខិបតិ, អថ តេ យេភុយ្យេន ទូតេ សមសមាវ ហោន្តិ. អបរភាគេ មិច្ឆាទិដ្ឋិកស្ស បុត្តោ បិតរា សទ្ធិំ ទារូនមត្ថាយ វនំ គន្ត្វា សកដេន ទារុំ គហេត្វា អាគច្ឆន្តោ នគរទ្វារសមីបេ សកដំ វិស្សជ្ជេត្វា តិណេ ខាទនត្ថាយ គោណេ វិស្សជ្ជេសិ, គោណា តិណំ ខាទន្តោ អញ្ញេហិ គោរូបេហិ សទ្ធិំ អន្តោនគរំ បវិសិំសុ. អថស្ស បិតា គោណេ បរិយេសន្តោ សកដំ ឱលោកេហីតិ បុត្តំ និវត្តេត្វា នគរំ បវិដ្ឋោ អហោសិ, អថ សាយណ្ហេ ជាតេ មនុស្សា នគរទ្វារំ បិទហិំសុ, តតោ កុមារោ ពហិនគរេ ទារុសកដស្ស ហេដ្ឋា សយន្តោ និទ្ទូបគតោ អហោសិ. អថ តស្សា រត្តិយា សម្មាទិដ្ឋិកោ ច មិច្ឆាទិដ្ឋិកោ ចាតិ ទ្វេ យក្ខា គោចរំ បរិយេសមានា សកដស្ស ហេដ្ឋា និបន្នំ កុមារំ អទ្ទសំសុ, តេសុ មិច្ឆាទិដ្ឋិកោ ឥមំ ខាទាមីតិ អាហ. អថាបរោ មា ឯវ មកាសិ, ‘‘នមោ ពុទ្ធាយា’’តិ វាចកោ ឯសោតិ, ខាទាមេវេតន្តិ វត្វា ឥតរេន យាវតតិយំ វារិយមានោបិ គន្ត្វា តស្ស បាទេ គហេត្វា អាកឌ្ឍិ. តស្មិំ ខណេ ទារកោ បុព្ពបរិចយេន ‘‘នមោ ពុទ្ធាយា’’តិ អាហ តំ សុត្វា យក្ខោ ភយប្បត្តោ លោមហដ្ឋោ ហត្ថំ វិស្សជ្ជេត្វា បដិក្កម្ម អដ្ឋាសិ. អហោ អច្ឆរិយំ ពុទ្ធានុភាវំ អព្ភុតំ, ឯវំ អត្តំ អនីយ្យាតេត្វា បរិចយេន ‘‘នមោ ពុទ្ធាយា’’តិ វុត្តស្សបិ ភយំ ឆម្ភិតត្តំ ឧបទ្ទវំ វា ន ហោតិ. បគេវ អត្តំ នីយ្យាតេត្វា យាវជីវំ ពុទ្ធំ សរណំ គតស្សាតិ. វុត្តញ្ហិ.

១. យថាបិ សិខិនោ នាទំ, ភុជង្គានំ ភយាវហំ;

ឯវំ ពុទ្ធោតិ វចនំ, អមនុស្សានំ ភយាវហំ.

២. យថា មន្តស្ស ជប្បេន, វិលយំ យាតិ កិព្ពិសំ;

ឯវំ ពុទ្ធោតិ វចនេន, អបយន្តិ [បហាយន្តិ ឥតិសព្ពត្ថ] បិសាចកា.

៣. អគ្គិំ ទិស្វា យថា សិត្ថំ, ទូរតោវ វិលីយតិ;

ទិស្វានេវំ សរណគតំ, បេតា បេន្តិវ [បេតាបេន្តាវ ឥតិកត្ថចិ] ទូរតោ.

៤. បវរំ ពុទ្ធឥច្ចេត, មក្ខរទ្វយមព្ភុតំ;

សព្ពោ បទ្ទវនាសាយ, ថិរបាការ មុគ្គតំ.

៥. សត្តរតនបាសាទំ, តមេវ វជិរំ គុហំ;

តមេវ នាវំ ទីបំ តំ, តមេវ កវចំ សុភំ.

៦. តមេវ សិរសិ ភាសន្តំ, កិរីដំ រតនាមយំ;

លលាដេ តិលកំ រម្មំ, កប្បូរំ នយនទ្វយេ.

៧. តាឌង្កំ កណ្ណយុគលេ, សោណ្ណមាលា គលេ សុភា;

ឯកាវឡិ តារហារ, ភារា ជត្តុសុ លង្កតា.

៨. អង្គទំ ពាហុមូលស្ស, ករគ្គេ វលយំ តថា;

អង្គុលិស្វង្គុលិយញ្ច, ខគ្គំ មង្គលសម្មតំ.

៩. សោណ្ណា តបត្ត មុណ្ហីសំ, សពាណំវ សរាសនំ;

តមេវ សព្ពាលង្ការំ, តមេវ ទុរិតាបហំ.

១០. តស្មា ហិ បណ្ឌិតោ បោសោ,

លោកលោចនសត្ថុនោ;

សរណំ តស្ស គន្តេវ,

គុណនាមំ ឯហិបស្សិកំ.

១១. នមោតិ វចនំ បុព្ពំ, ពុទ្ធាយេតិ គិរំ តទា;

សុបន្តេន កុមារេន, មិច្ឆាទិដ្ឋិកសូនុនា.

១២. សុត្វា វុត្តំ បិសា ចាបិ, មនុស្សកុណបេ រតា;

ន ហិំសន្តិ អហោ ពុទ្ធ, គុណសារមហន្តតាតិ.

អថ សម្មាទិដ្ឋិកយក្ខោ មិច្ឆាទិដ្ឋិកស្ស យក្ខស្ស ឯវមាហ, អយុត្តំ ភោ តយា កតំ. ពុទ្ធគុណេ បហារោ ទិន្នោ, ទណ្ឌកម្មំ តយា កាតព្ពំតិ, តេន កិំមយា សម្ម កាតព្ពន្តិ វុត្តេ ពុភុក្ខិតស្ស អាហារំ ទេហីតិ អាហ. តតោ សោ សាធូតិ វត្វា យាវាហំ អាគច្ឆាមិ, ត្វំ តាវេត្ថ វច្ឆាហីតិ វត្វា ពិម្ពិសាររញ្ញោ កញ្ចនតដ្ដកេ វឌ្ឍិតំ រសភោជនំ អាហរិត្វា កុមារស្ស បិតុវណ្ណេន ទារកំ ភោជេត្វា បុន កុមារេន វុត្តពុទ្ធវចនញ្ច អត្តនា កតវាយាមំ ចាតិ សព្ពំ តដ្ដកេ លិខិត្វា ឥទំ រញ្ញោយេវ បញ្ញាយតូតិ អធិដ្ឋាយ អគមំសុ, អថ បភាតាយ រត្តិយា រញ្ញោ ភោជនកាលេ រាជបុរិសា តត្ថ តដ្ដកំ អទិស្វា នគរំ ឧបបរិក្ខន្តា សកដេ ទារកញ្ច តដ្ដកញ្ច ទិស្វា តដ្ដកេន សទ្ធិំ តំ គហេត្វា រញ្ញោ ទស្សេសុំ. រាជា តដ្ដកេ អក្ខរាទីនិ ទិស្វា វាចេត្វា តស្ស គុណេ បសន្នោ មហន្តេន យសេន សទ្ធិំ សេដ្ឋិដ្ឋានមទាសិ.

១៣. ជិនស្ស នាមំ សុបិនេន បេវំ,

ន ហោតិ ភីតិំ លបនេន យស្មា;

តស្មា មុនិន្ទំ សតតំ សរាថ,

គុណេ សរន្តា សរណញ្ច យាថាតិ.

មិច្ឆាទិដ្ឋិកស្ស វត្ថុំ ទុតិយំ.