១៩. បានីយទិន្នស្ស វត្ថុម្ហិ អយមានុបុព្ពីកថា

ជម្ពុទីបេ អញ្ញតរស្មិំ ជនបទេ កិរេ កោ មនុស្សោ រដ្ឋតោ រដ្ឋំ ជនបទតោ ជនបទំ វិចរន្តោ អនុក្កមេន ចន្ទភាគានទីតីរំ បត្វា នាវំ អភិរុហិត្វា បរតីរំ គច្ឆតិ. អថាបរា គព្ភិនិត្ថី តាយ ឯវ នាវាយ គច្ឆតិ, អថ នាវា គង្គាមជ្ឈប្បត្តកាលេ តស្សា កម្មជវាតា ចលិំសុ. តតោ សា វិជាយិតុមសក្កោន្តី កិលន្តា បានីយំ មេ ទេថ, បិបាសិតាម្ហិតិ មនុស្សេ យាចិ. តេ តស្សា វចនំ អសុណន្តា វិយ បានីយំ នាទំសុ, អថ សោ ជានបទិកោ តស្សា ករុណាយន្តោ [ករុណាយបានីយំ, ករុណាយន្តោបានីយំ, ករុណាយតោយំ ឥតិចកត្ថចិ] តោយំ គហេត្វា មុខេ អាសិញ្ចិ, តស្មិំ ខណេ សា លទ្ធស្សាសា សុខេន ទារកំ វិជាយិ, អថ តេ តីរំ បត្វា កតិបយទិវសេន អត្តនោ អត្តនោ ឋានំ បាបុណិំសុ. អថាបរភាគេ សោ ជានបទិកោ អញ្ញតរកិច្ចំ បដិច្ច តស្សា ឥត្ថិយា វសននគរំ បត្វា តត្ថ តត្ថ អាហិណ្ឌន្តោ និវាសនដ្ឋានំ អលភិត្វា នគរទ្វារេ សាលំ គន្ត្វា តត្ថ និបជ្ជិ. តស្មិំយេវ ទិវសេ ចោរា នគរំ បវិសិត្វា រាជគេហេ សន្ធិំ ឆិន្ទិត្វា ធនសារំ គហេត្វា គច្ឆន្តា រាជបុរិសេហិ អនុពន្ធា គន្ត្វា តាយេវ សាលាយ ឆឌ្ឌេត្វា បលាយិំសុ. អថ រាជបុរិសា អាគន្ត្វា ចោរេ អបស្សន្តា តំ ជានបទិកំ ទិស្វា អយំ ចោរោតិ គហេត្វា បច្ឆាពាហំ គាឡ្ហំ ពន្ធិត្វា បុន ទិវសេ រញ្ញោ ទស្សេសុំ. រញ្ញា កស្មា ភណេ ចោរកម្ម មកាសីតិ បុច្ឆិតោ នាហំ ទេវ ចោរោ, អាគន្តុកោម្ហីតិ វុត្តេ រាជា ចោរេ បរិយេសិត្វា អលភន្តោ អយមេវ ចោរោ, ឥមំ មារេថាតិ អាណាបេសិ. រាជបុរិសេហិ តំ គាឡ្ហំ ពន្ធិត្វា អាឃាតនំ នីតេ សា ឥត្ថី តំ តថា នីយមានំ ទិស្វា សញ្ជានិត្វា កម្បមានហទយា មុហុត្តេន រញ្ញោ សន្តិកំ គន្ត្វា វន្ទិត្វា ទេវ ឯសោ ន ចោរោ អាគន្តុកោ មុញ្ចថេតំ ទេវាតិ អាហ. រាជា តស្សា កថំ អសទ្ទហន្តោ យជ្ជេតំ មោចេតុ មិច្ឆសិ. តស្សគ្ឃនកំ ធនំ ទត្វា មុញ្ចាបេហីតិ, សា សាមិ មម គេហេ ធនំ នត្ថិ. អបិច មម សត្តបុត្តេហិ សទ្ធិំ មំ ទាសិំ ករោហិ, ឯតំ មុញ្ច ទេវាតិ អាហ, អថ រាជា ត្វំ ឯតំ អធុនាគតោតិ វទសិ. ឯតំ និស្សាយ បុត្តេហិ សទ្ធិំ អត្តានំ ទាសត្តំ សាវេសិ. កិមេសោ តេ ញាតិ វា, ឧទាហុ ឧបការកោតិ បុច្ឆន្តោ អាហ.

១. កិំតេ ភោតិ អយំ បោសោ, តុវំ បុច្ឆាមិ សំសយំ;

ភាតា វា តេ បិតា ហោតិ, បតិ វា ទេវរោ តវ.

២. ញាតិ សាលោហិតោ កិន្នុ, ឧទាហុ ឥណទាយកោ;

អថោបការកោ កិន្នុ, កស្មាស្ស ទេសិ ជីវិតំតិ.

តតោ សា អាហ.

៣. ឯសោ មេ បុរិសោ ទេវ, កតបុព្ពោបការកោ;

អតាណមេកិកំ [អត្តានមេកិកំ ឥតិកត្ថចិ] ចេសោ, ទុក្ខិតំ មរណេ ឋិតំ.

៤. វិជាយិតុ មសក្កោន្តិំ, គព្ភិនិំ ទុក្ខវេទិនិំ;

តោយេន មំ ឧបដ្ឋាសិ, តេនាហំ សុខិតា តទា.

៥. ភង្គកល្លោលមាលាយ, ឧត្តរន្តំ មហណ្ណវំ;

បហាយ បាតុំ កូបស្ស, យាតិ លោកោ បិបាសិតោ.

៦. តថេវ វិជ្ជមានេសុ, ជនេសុ មនុជាធិប,

ឯកស្សេវ មនស្មិំហិ, គុណំ តិដ្ឋតិ សាធុកំ.

៧. បហត្វាន មតំ ហត្ថិំ, មំសត្ថី កេចិ ជន្តុនោ;

អនុពន្ធន្តិ មំសត្ថំ, សសំ ធាវន្ត មេកកំ.

៨. តថេវ វិជ្ជមានេសុ, ជនេសុ មនុជាធិប;

គុណវន្ត មនុពន្ធន្តិ, សប្បុរិសំ កតវេទិកំ.

៩. តស្មា សប្បុរិសេ ធម្មេ, បតិដ្ឋាស្មិ នរាធិប;

អនុស្សរន្តិ ឯតេន, កតបុព្ពូ បការកំ.

១០. អហញ្ច មម បុត្តា ច, ឯតេនម្ហ សុខាបិតា;

ជីវិតម្បិ បរិច្ចជ្ជ, មុច្ចនីយោ អយំ មយាតិ.

តតោ រាជា ទោវារិកំ បក្កោសិត្វា តម្បិ បុច្ឆិត្វា អធុនាគតភាវំ ញត្វា តស្សា សប្បុរិសធម្មេ សន្តុដ្ឋោ តេសំ ឧភិន្នម្បិ មហន្តំ យសំ អនុប្បទាសិ. តេ លទ្ធយសា ត តោ បដ្ឋាយ ទានាទីនិ បុញ្ញកម្មានិ កត្វា សគ្គបរាយណា អហេសុន្តិ.

១១. ធម្មេ បតិដ្ឋិតមនា អបិ មាតុគាមា,

ឯវំ លភន្តិ វិភវញ្ច បសំសនញ្ច;

ធម្មញ្ច សាធុចរិតំ មនសីករោន្តោ,

ធម្មេសុ វត្តថ សទា សុចិសជ្ជនាតិ.

បានីយទិន្នស្ស វត្ថុំ នវមំ.