១៧. ចោរសហាយស្ស វត្ថុម្ហិ អយមានុបុព្ពីកថា

អម្ហាកំ ភគវតិ បរិនិព្ពុតេ ជម្ពុទីបេ ទេវទហនគរេ ឯកោ មនុស្សោ ទុក្ខិតោ តត្ថ តត្ថ វិចរន្តោ បច្ចន្តេ អញ្ញតរំ គាមំ គន្ត្វា តត្ថ ឯកស្មិំ កុលគេហេ និវាសំ កប្បេសិ. តត្ថ មនុស្សា តស្ស យាគុភត្តំ ទត្វា បោសេសុំ, តតោ សោ តត្ថ មនុស្សេហិ មិត្តសន្ថវំ កត្វា កតិបាហំ តត្ថ វសិត្វា អញ្ញដ្ឋានំ គន្ត្វា អបរភាគេ ចោរកម្មំ ករោន្តោ ជីវិកំ កប្បេតិ. អថេកទិវសំ ចោរេន្តំ តំ រាជបុរិសា គហេត្វា រញ្ញោ ទស្សេសុំ. រាជា តំ ពន្ធនាគារេ ករោថាតិ អាណាបេសិ, តេ តំ ពន្ធនាគារំ នេត្វា សង្ខលិកាហិ ពន្ធិត្វា អារក្ខកានំ បដិបាទេត្វា អគមំសុ, ពន្ធនាគារេ វសន្តស្ស តស្ស ទ្វាទសសំវច្ឆរានិ អតិក្កន្តានិ. តតោ អបរភាគេ តស្ស បុព្ពសហាយោ បច្ចន្តគាមវាសី មនុស្សោ កេនចិ កម្មេន ទេវទហ មាគតោ តត្ថ តត្ថ អាហិណ្ឌន្តោ ពន្ធនាគារេ ពទ្ធំ តំ អទ្ទស. ទិស្វា តស្ស ហទយំ កម្បិ, សោ រោទិត្វា បរិទេវិត្វា កិំ តេ មយា កត្តព្ពំ សម្មាតិ បុច្ឆិ. តតោ តេន សម្ម ពន្ធនាគារេ វសន្តស្ស មេ ឥទានិ ទ្វាទសសំវច្ឆរានិ អតិក្កន្តានិ, ឯត្តកំ កាលំ ទុព្ភោជនាទិនា មហាទុក្ខំ អនុភោមិ. យាវាហំ អាហារំ បរិយេសិត្វា ភុញ្ជិត្វា អាគមិស្សាមិ. តាវ មំ ឥតោ មុញ្ចនុបាយំ ជានាហីតិ វុត្តេ សោ សប្បុរិសោ.

១. រូបេន កិន្តុ គុណសីលវិវជ្ជិតេន,

មិច្ឆាលយស្ស កិតវស្ស ធិយា កិមត្ថំ;

ទានា ទិចាគវិគតេន ធនេន កិំ វា;

មិត្តេន កិំ ព្យសនកាលបរម្មុខេនាតិ.

ឯវញ្ច បន វត្វា សាធុ សម្ម ករោមិ តេ វចនន្តិ អារក្ខកានំ សន្តិកំ គន្ត្វា ភោន្តោ យាវេសោ ភត្តំ ភុញ្ជិត្វា អាគច្ឆតិ. តាវាហំ តស្ស បាដិភោគោ ភវិស្សាមិ. វិស្សជ្ជេថ នន្តិ អាហ, តេហិ ន សក្កា ភោ ឯតំ វិស្សជ្ជេតុំ, អបិ ច ខោ យាវាយំ អាគច្ឆតិ. តាវ ត្វំ អយសង្ខលិកាយ ពទ្ធោ និសីទិស្សសិ, ឯវំ តំ វិស្សជ្ជេស្សាម, នោ ចេ ន សក្កាតិ អាហំសុ, សោ ឯវម្បិ ហោតុ សម្មាតិ វត្វា តស្ស បាទតោ សង្ខលិកំ មុញ្ចិត្វា អត្តនោ បាទេ កត្វា ពន្ធនាគារំ បវិសិត្វា ឥតរំ មុញ្ចាបេសិ. សោបិ អសប្បុរិសោ ពន្ធនា មុត្តោ ន បុន តំ ឋាន មគមាសិ, អហោ អកតញ្ញុនោ បកតិំ ញាតុំ ភារិយំ. យថាហ.

២. វារិបូរេ យថា សោព្ភេ, នេវន្តោ វិសមំ សមំ;

បញ្ញាយតេវំសាធុស្ស, ភាវំ មនសិ សម្ភវំ.

៣. ភាសន្តិ មុខតោ ឯកំ, ចិន្តេន្តិ មនសា បរំ;

កាយេនេកំ ករោន្តេវំ, បកតាយមសាធុនំ.

៤. តេសំ យោ ភាវមញ្ញាសិ, សោវ បណ្ឌិតជាតិកោ;

ពហុស្សុតោបិ សោយេវ, បរចិត្តវិទូបិ សោ.

អថស្ស ពន្ធនាគារេ វសន្តស្ស ទ្វាទសសំវច្ឆរានិ អតិក្កន្តានិ. ឯត្តកំ កាលំ ជិឃច្ឆាបីឡិតេន តេន អាហារត្តាយ បរោ ន យាចិតបុព្ពោ, អនុច្ឆិដ្ឋាហារំ លភនទិវសតោ អលភនទិវសាយេវ ពហុតរា ហោន្តិ, អថ ទ្វាទសសំវច្ឆរាតិក្កមេ រញ្ញោ បុត្តោ និព្ពត្តិ. តទា រាជា អត្តនោ វិជិតេ សព្ពពន្ធនាគារានិ វិវរាបេសិ. អន្តមសោ មិគបក្ខិនោបិ ពន្ធនា មុញ្ចាបេសិ. ទ្វារេ វិវដមត្តេយេវ ពន្ធនាគារេ មនុស្សា ឥច្ឆិតិច្ឆិតដ្ឋានំ អគមំសុ. សោ បនេកោវ តេហិ សទ្ធិំ អគន្ត្វា ឱហីយិ. អារក្ខកេហិ ត្វំ ភោ កស្មា ន គច្ឆសីតិ វុត្តេ អហំ ភោ បញ្ញាតភាវេន ឥទានិ ន គមិស្សាមិ. អតីវ បរិហីនគត្តោស្មិ. អន្ធការេ គមិស្សាមីតិ វត្វា អន្ធការេ អាគតេ និក្ខម្ម អន្តោនគរេ វិស្សាសិកានំ អភាវេន កុតោ អាហារំ លភិស្សាមីតិ ចិន្តេន្តោ និក្ខម្ម រត្តន្ធការេ អាមកសុសាន មគមាសិ. ឯត្ថាហារំ លភិស្សាមីតិ. តត្ថ សោ អធុនា និក្ខិត្តមតមនុស្សំ ទិស្វា មនុស្សដ្ឋិនា មំសំ ឆិន្ទិត្វា សីសកបាលេ បក្ខិបិត្វា តីហិ មនុស្សសីសេហិ កតឧទ្ធនេ ឋបេត្វា ចិតកតោ ឱមុក្កអលាតេហិ អគ្គិំ កត្វា សុសានំ និព្ពាបនត្ថាយា ភតឧទកេន មនុស្សដ្ឋិនា អាលោលេន្តោ មំសំ បចិត្វា ឱតារេត្វា សាខាភង្គេន ហិរិកោបីណំ បដិច្ឆាទេត្វា និវត្ថបិលោកិកំ វាតាវរណំ កត្វានិសីទិ. តស្មិំ ខណេ តត្ថ បិប្បលីរុក្ខេ អធិវត្ថា ទេវតា តស្ស តំ កិរិយំ ទិស្វា បុច្ឆិស្សាមិ តាវ នន្តិ តំ ឧបសង្កមិត្វា ឯវមាហ. ភោ ត្វំ ឃនតរតិមិរាកុលេ មហារត្តិយំ តត្ថ តត្ថ វិកិណ្ណនរដ្ឋិសមាកិណ្ណេ សោណសិគាលាទិកុណបាទកាកុលេ មនុស្សមំសភក្ខយក្ខរក្ខសាកុលេ តត្ថ តត្ថ បជ្ជលន្តានេកចិតកភយានកេ សុសានេ មនុស្សមំសំ បចិត្វា កិំករោសីតិ បុច្ឆន្តី អាហ.

៥. រត្តន្ធការេ កុណបាទកេហិ,

សមាកុលេ សីវថិកាយ មជ្ឈេ;

មនុស្សមំសំ បចសី ធ សីសេ,

វទេហិ កិំ តេន បយោជនំ តេតិ.

អថ សោ អាហ.

៦. ន យាគហេតុ ន ច ទានហេតុ,

សុសានមជ្ឈម្ហិ បចាមិ មំសំ;

ខុទាសមំ នត្ថិ នរស្ស អញ្ញំ,

ខុទាវិនាសាយ បចាមិមម្ភោតិ.

តតោ ទេវតា តំ តថា ហោតុ, ឥមិនា បិលោតិកេន វាតាវរណំ ករោសិ. កិមត្ថមេតន្តិ បុច្ឆន្តី.

៧. និវត្ថសាខោ ហិរិសំវរាយ,

បិលោតិកំ តត្ថ បសារយន្តោ;

ករោសិ វាតាវរណញ្ច សម្ម,

កិមត្ថមេតំ វទ បុច្ឆិតោ មេតិ.

សោ តស្សា ចិក្ខន្តោ អាហ.

៨. សុភា សុភាមិស្សិតសីតវាតោ,

សយំ អចិត្តោវ អចិត្តភាវា;

ទេហំ ផុសិត្វាន អសាធុកស្ស,

អកតញ្ញុនោ មិត្តបធំសកស្ស.

៩. សមាវហន្តោ យទិ មេ សរីរេ,

ផុសាតិ [ផុសាតិសាសង្គតិមជ្ជទានិ ឥតិកត្តចិ] តំ វាយុ មមា វិសិត្វា;

ទុក្ខំ ទទាតីតិ វិសំវ តំ ភោ,

បរិវជ្ជិតុំ ពទ្ធមិមំ កុចេលន្តិ.

ទេវតា អាហ.

១០. កិ មកាសិ ភោ សោ កតនាសកោ តេ,

ធនញ្ច ធញ្ញំ តវ នាសយី ច;

មាតា បិតា ពន្ធវោ ខេត្ត វត្ថូ,

វិនាសិតា តេន វទេហិ កិំ តេតិ.

តតោ សោ អាហ.

១១. យំ រាជតោ ហោតិ ភយំ មហន្តំ,

សព្ពស្ស ហរណាទិវធាទិកញ្ច;

អកតញ្ញុនា សប្បុរិសេន ហោតិ,

អារាវ សោ ភោ បរិវជ្ជនីយោ.

១២. យមត្ថិ ចោរារិភយញ្ហិ លោកេ,

អថោ ទកេនាបិ ច បាវកេន;

អកតញ្ញុនា តំ សកលម្បិ ហោតិ,

អារាវ សោ ភោ បរិវជ្ជនីយោ.

១៣. បាណាតិបាតម្បិ អទិន្នទានំ,

បរស្ស ទារូបគមំ មុសា ច;

មជ្ជស្ស បានំ កលហញ្ច បេសុនំ,

សម្ផំ គិរំ ធុត្តជនេហិ [អក្ខធុត្តាទិយោគំ ឥតិកត្ថចិ] យោគំ.

១៤. សព្ពំ អនត្ថំ អសិវំ អនិដ្ឋំ,

អបាយិកំ [អបាយិកំ ឥតិកត្ថចិ] ទុក្ខមនន្ត មញ្ញំ;

អកតញ្ញុនា សប្បុរិសេន ហោតិ;

អារាវ សោ ភោ បរិវជ្ជនីយោតិ.

វត្វា អត្តនា អសប្បុរិសសំសគ្គេនានុភូតំ សព្ពំ ទុក្ខំ កថេសិ, តតោ ទេវតា អហម្បិ ភោ សត្ថុនោ មង្គលសុត្តទេសនាទិវសេ ឥមស្មិំយេវ រុក្ខេ និសិន្នោ.

អសេវនា ច ពាលានំ, បណ្ឌិតានញ្ច សេវនា;

បូជា ច បូជនីយ្យានំ, ឯតំ មង្គល មុត្តមន្តិ.

គាថាយ ពាលស្ស ទោសេ អស្សោសិំតិ វត្វា តស្ស បសន្នោ តំ អត្តនោ វិមានំ នេត្វា នហាបេត្វា ទិព្ពវត្ថាលង្ការេហិ អលង្ករិត្វា ទិព្ពន្នបានំ ទត្វា មហន្តំ សក្ការសម្មានំ កត្វា អត្តនោ អានុភាវេន តស្មិំ នគរេ រជ្ជេ អភិសិញ្ចាបេសិ. សោ តត្ថ រជ្ជំ ករោន្តោ ទានាទីនិ បុញ្ញានិ កត្វា អាយុបរិយោសានេ យថាកម្មំ គតោតិ.

១៥. ឯវំ អសាធុជនសង្គមសន្និវាសំ,

សញ្ចជ្ជ សាធុសុចិសជ្ជនសង្គមេន;

ទានាទិ នេកកុសលំ បរិបូរយន្តា,

សគ្គា បវគ្គវិភវំ អភិសម្ភុនាថាតិ.

ចោរសហាយស្ស វត្ថុំ សត្តមំ.