១៥. ព្យគ្ឃស្ស វត្ថុម្ហិ អយមានុបុព្ពីកថា

ជម្ពុទីបេ ចូលរដ្ឋា សន្នេ ពារាណសីនគរេ ឯកំ បំសុបព្ពតំ វិនិវិជ្ឈិត្វា មហាមគ្គោ ហោតិ, តត្ថ វេមជ្ឈេ ឯកោ ព្យគ្ឃោ អត្តនោ អន្ធបិតរំ បព្ពតគុហាយំ កត្វា បោសេន្តោ វសតិ. តស្សេវ បព្ពតស្ស វនទ្វារេ តុណ្ឌិលោ នាម ឯកោ សុវបោតកោ រុក្ខស្មិំ វសតិ. តេ ឧភោបិ អញ្ញមញ្ញំ បិយសហាយា អហេសុំ, តស្មិំ សមយេ បច្ចន្តគាមវាសី ឯកោ មនុស្សោ អត្តនោ មាតុគាមេន សទ្ធិំ កលហំ កត្វា ពារាណសិំ គច្ឆន្តោ តំ វនទ្វារំ សម្បាបុណិ. អថ សុវបោតកោ បរិហីនត្តភាវំ ទុក្ខិតំ តំ ទិស្វា កម្បមានហទយោ តំ បក្កោសិត្វា ភោ កុហិំ គច្ឆសីតិ អាហ, តេន បរខណ្ឌំ គច្ឆាមីតិ វុត្តេ តុណ្ឌិលោ ភោ ឥមស្មិំ វនខណ្ឌមជ្ឈេ ឯកោ ព្យគ្ឃោ វសតិ. កក្ខលោ ផរុសោ សម្បត្តសម្បត្តេ មារេត្វា ខាទតិ. មា ត្វំ តេន គច្ឆាតិ អាហ. ស្វាយំ ទុព្ភគោ មនុស្សោ ហិតកាមស្ស តស្ស វចនំ អនាទិយិត្វា គច្ឆាមេវាតិ អាហ. តុណ្ឌិលោ តេនហិ សម្ម យទិ អនិវត្តមានោ គច្ឆសិ. ឯសោ ព្យគ្ឃោ មម សហាយោ. មេ វចនំ តវ សន្តិកា សុត្វា ន គណ្ហាតីតិ. តស្ស តំ អនាទិយន្តោ សោ សុវរាជេ បទុដ្ឋចិត្តោ មុគ្គរេន បហរិត្វា មារេត្វា អរណិំ អគ្គិំ កត្វា មំសំ ខាទិ. អសប្បុរិសសំសគ្គោ នាមេ ស ឥធ លោកបរលោកេសុ ទុក្ខាវហោយេវ. តថាហិ.

១. មយា កតំ មយ្ហមិទំ, ឥតិ វេស្សានរំ នរោ;

សមាលិង្គតិ សប្បេមោ, ទហតេវស្ស វិគ្គហំ.

២. មធុខីរាទិទានេន, បេមសា បរិបាលិតោ;

សោរគោ កុបិតោវស្ស, ឌសតេវស្ស វិគ្គហំ.

៣. ឯវំ និហីនជច្ចេន, បាបេន អកតញ្ញុនា;

នរា ធមេន ទីនេន, កតោបិ ខណសង្គមោ.

៤. អសាធុកោ អយំតេវំ, ជានមានេន ជន្តុនា;

មុហុត្តម្បិ ន កាតព្ពោ, សង្គមោ សោ អនត្ថទោតិ.

តតោ សោ អសប្បុរិសោ មំសំ ខាទិត្វា គច្ឆន្តោ វនខណ្ឌមជ្ឈំ សម្បាបុណិ. អថ ព្យគ្ឃោ តំ ទិស្វា មហានាទំ ករោន្តោ គហណត្ថាយ ឧដ្ឋាសិ. សោ ព្យគ្ឃំ ទិស្វា ភយប្បត្តោ តុណ្ឌិលស្ស វចនំ សរិត្វា អហំ ភោ តវ សហាយតុណ្ឌិលស្ស សន្តិកា អាគតោម្ហីតិ អាហ, តំ សុត្វា ព្យគ្ឃោ អត្តមនោ ឯហិ សម្មាតិ តំ បក្កោសិត្វា អត្តនោ វសនដ្ឋានំ នេត្វា ខាទិតព្ពាហារេន តំ សន្តប្បេត្វា បិតុសន្តិកេ និសីទាបេត្វា បុន វនខណ្ឌ មគមាសិ. អថស្ស បិតា បុត្តស្ស គតកាលេ តេន សទ្ធិំ សល្លបន្តោ តស្ស វចនានុសារេន តុណ្ឌិលំ មារេត្វា ខាទិតភាវំ អញ្ញាសិ. តតោ សោ បុត្តស្ស អាគតកាលេ តវ សហាយោ តេន មារិតោតិ អាហ. តំ សុត្វា ព្យគ្ឃោ អនត្តមនោ វេគេន តស្ស វសនដ្ឋានំ គន្ត្វា សម្ម តុណ្ឌិលាតិ សទ្ទំ កត្វា អបស្សន្តោ លុញ្ចិតបត្តំចស្ស ទិស្វា និស្សំសយំ តេន មារិតោ មេ សហាយោតិ សោចន្តោ បរិទេវន្តោ អាគញ្ឆិ. អថ សោ អសប្បុរិសោ តស្មិំ តត្ថ គតេ តស្ស បិតរំ បាសាណេន បហរិត្វា មារេត្វា ព្យគ្ឃំច ទានិ មារេស្សាមីតិ ព្យគ្ឃាគមនមគ្គំ ឱលោកេន្តោ និលីនោ អដ្ឋាសិ. តស្មិំ ខណេ ព្យគ្ឃោបិ អាគញ្ឆិ. សោ តស្សា គតកាលេ តស្ស តេជេន ភីតោ គន្ត្វា ជីវិតំ មេ សាមិ ទេហីតិ បាទមូលេ ឧរេន និបជ្ជិ, ព្យគ្ឃោ បន តេន កតកម្មំ ទិស្វា តស្មិំ ចិត្តំ និព្ពាបេត្វា មម សហាយស្ស សាសនមាទាយាគតស្ស ទុព្ភិតុំ ន យុត្តន្តិ ចិន្តេន្តោ តំ សមស្សាសេត្វា គច្ឆ សម្មាតិ សុខំ បេសេសិ. ឯវញ្ហិ សប្បុរិសសមាគមោ នាម ឥធ លោកបរលោកេសុ សុខាវហោយេវ, វុត្តំហិ.

៥. សព្ភិរេវ សមាសេថ, សព្ភិ កុព្ពេថ សន្ថវំ;

សព្ពត្ថ សន្ថវោ តេន, សេយ្យោ ហោតិ ន បាបិយោ.

៦. សុខាវហោ ទុក្ខនុទោ, សទា សព្ភិ សមាគមោ;

តស្មា សប្បុរិសេហេវ, សង្គមោ ហោតុ ជន្តុនំ.

តតោ សោ ព្យគ្ឃោ តេន មេត្តចិត្តានុភាវេន កាលំ កត្វា សគ្គេ និព្ពត្តោតិ.

៧. ឯវំវិធោបិ ផរុសោ បរមំសភោជី;

ព្យគ្ឃោ ទយាយុបគតោ សុគតិំ សុមេធោ;

តស្មា ករោថ ករុណំ សតតំ ជនានំ,

តំ វោ ទទាតិ វិភវញ្ច ភវេសុ ភោគន្តិ.

ព្យគ្ឃស្ស វត្ថុំ បញ្ចមំ.