១១. នន្ទិយរាជស្ស វត្ថុម្ហិ អយមានុបុព្ពីកថា

ឥតោ កិរ កប្បសតសហស្សមត្ថកេ បទុមុត្តរោ នាម សត្ថា លោកេ ឧទបាទិ សទេវកំ លោកំ សំសារកន្តារា ឧត្តារេន្តោ. តស្មិំ កិរ សមយេ ឯកោ កុដុម្ពិកោ សត្ថុ ធម្មទេសនំ សុត្វា បសន្នមានសោ ពុទ្ធបមុខំ ភិក្ខុសង្ឃំ និមន្តេត្វា មហាទានំ សជ្ជេត្វា អត្តនោ ភវនំ ទេវភវនមិវ អលង្ករិត្វា ពុទ្ធារហំ មហាសនំ បញ្ញាបេត្វា គន្ត្វា ភគវន្តំ យាចិ កាលោយំ ភន្តេ ភគវតោ ភត្តគ្គស្ស ឧបសង្កមនាយាតិ. អថ ភគវា ភិក្ខុសង្ឃបរិវុតោ មហតា ពុទ្ធានុភាវេន គន្ត្វា និសីទិ បញ្ញត្តវរពុទ្ធាសនេ, តតោ កុដុម្ពិកោ ហដ្ឋោ ឧទគ្គោ សបរិសោ ភគវន្តំ បរិវិសតិ អនេកេហិ មធុរន្នបានាទីហិ. តទា តស្ស ភគវតោ សាសនេ ធុតង្គធរានំ អគ្គោ វសភត្ថេរោនាម មហាសាវកោ សបទានវត្តេន បិណ្ឌាយ ចរមានោ តស្ស កុដុម្ពិកស្ស គេហទ្វារេ អដ្ឋាសិ, អថ សោ ថេរំ ទិស្វា ភន្តេ សត្ថា អន្តោគេហេ និសិន្នោ, តុម្ហេបិ បវិសថាតិ យាចិ, ថេរោ អបវិសិត្វាវ អគមាសិ, កុដុម្ពិកោ ភគវន្តំ ឧបសង្កមិត្វា តមត្តំ វត្វា កិំ ភន្តេ សទេវកេ លោកេ ភគវតាបិ ឧត្តរិតរោ គុណេន សំវិជ្ជតីតិ អាហ. អថស្ស សត្ថា បុត្តោបមំ ទស្សេត្វា ថេរស្ស គុណេ វណ្ណេន្តោ ឯវមាហ.

១. បាលេន្តិ និម្មលំ កត្វា, បាតិមោក្ខាទិសំវរំ;

សមាទិន្នធុតង្គាច, អប្បិច្ឆា មុនិសូនវោ.

២. និច្ច មន្តកយុទ្ធម្ហិ, នទ្ធា យោធាវ ទប្បិតា;

បុញ្ញានំ វត្ថុភូតា តេ, ទេវមានុសកា ទិនំ.

៣. ធារេមហំ វណ្ណវន្តំ, សីវេយ្យម្បិច ចីវរំ;

ពុទ្ធបុត្តា មហានាគា ន ធារេន្តិ តថាវិធំ.

៤. ធារេន្តិ តេ បំសុកូលំ, សង្ឃាដេត្វា បិលោតិកេ;

វណច្ឆាទនចោលំវ, ឥច្ឆាលោភ វិវជ្ជិតា.

៥. សាទិយាមិ សទា ហម្ភោ, ឧបាសកនិមន្តនំ;

នេវ សាទេន្តិ សម្ពុទ្ធ, បុត្តោ បាសកយាចនំ.

៦. សបទានេន យំ លទ្ធំ, លូខំវាបិ បណីតកំ;

តេន តុស្សន្តិ មេ បុត្តា, រសគេធវិវជ្ជិតា.

៧. និបជ្ជាមិ អហំ សាធុ, សន្ថតេ សយនេ សុភេ;

ន តេ សេយ្យំ បកប្បេន្តិ, សំសារភយភីរុកា.

៨. ឋានា សនគមនេន, កប្បេន្តិ ឥរិយាបថំ;

នេកភូមិសមាកិណ្ណ, បាសាទេសុ វសាមហំ.

៩. ពុទ្ធបុត្តា តថាច្ឆន្នំ, ន កទា បវិសន្តិ តេ;

រុក្ខមូលេ សុសានស្មិំ, អព្ភោកាសេ រមន្តិ តេ.

១០. ភាវេត្វា ភវនាសាយ, ហេតុំ ភាវនមុត្តមំ;

អហំ គាមេ វសិស្សាមិ, បាបេន្តោ ជនតំ សិវំ.

១១. រមន្តិ មម បុត្តា តេ, បន្តសេនាសនេ កកា;

តេសំ មហត្តរោ សន្តោ, ថេរោយំ វសភោ មហា;

ធុតបាបោ ធុតង្គគ្គោ, ញាតោយំ មម សាសនេតិ.

ឯវំ ភគវា ហត្ថំ ឧក្ខិបិត្វា ចន្ទមណ្ឌលេ បហរន្តោ វិយ ថេរស្ស គុណេ បកាសេសិ, តតោ សោ តស្ស គុណកថំ សុត្វា សយម្បិតំ ឋានន្តរំ កាមយមានោ យន្នូនាហំ អនាគតេ អញ្ញតរស្ស សម្មាសម្ពុទ្ធស្ស សាសនេ ធុតង្គធរានំ អគ្គោ ភវិស្សាមីតិ តំ ឋានន្តរំ បត្ថេន្តោ ភគវតោ បាទមូលេ និបជ្ជិ, សត្ថា តំ ការណំ ឧបបរិក្ខិត្វា ឥតោ កប្បសតសហស្សមត្ថកេ គោតមោ នាម សត្ថា ឧប្បជ្ជិស្សតិ. ត្វំ តទា ធុតង្គធរានំ អគ្គោ ហុត្វា កស្ស បោតិ បញ្ញាយិស្សតីតិ ព្យាករណ មទាសិ. តតោ បដ្ឋាយ សោ សោមនស្សោ បុញ្ញកម្មំ កត្វា តតោ ចុតោ ទេវមនុស្សេសុ ទេវិស្សរិយំ អនុភវន្តោ វិបស្សីសម្មាសម្ពុទ្ធកាលេ ឯកសាដកោ នាម ព្រាហ្មណោ ហុត្វា មហាទានំ អទាសិ. តតោ ចុតោ កស្សបសម្មាសម្ពុទ្ធេ បរិនិព្ពុតេ ពារាណសីនគរេ ពារាណសីសេដ្ឋិ ហុត្វា និព្ពត្តោ ទានាទីនិ បុញ្ញានិ កត្វា តតោ ចវិត្វា សំសារេ សំសរន្តោ ទសវស្សសហស្សា យុកេសុ មនុស្សេសុ ពារាណសិយំ ឯកោ កុដុម្ពិកោ ហុត្វា និព្ពត្តិ. សោ បនាយំ កុដុម្ពិកោ អរញ្ញេ ជង្ឃាវិហារំ អនុវិចរន្តោ បច្ចន្តិមេ ជនបទេ អរញ្ញាយតនេ អញ្ញតរំ បច្ចេកពុទ្ធំ អទ្ទស. សោ ច បច្ចេកពុទ្ធោ តត្ថ ចីវរកម្មំ ករោន្តោ អនុវាតេ អប្បហោន្តេ សំហរិត្វា ឋបេតុំ អារទ្ធោ. កុដុម្ពិកោ តំ ទិស្វា ភន្តេ កិំ ករោថាតិ បុច្ឆិ. សោ បច្ចេកពុទ្ធោ អប្បិច្ឆតាយ តេន បុដ្ឋោ ន កិញ្ចិ វុត្តោ ហោតិ. សោ ចីវរទុស្សំ នប្បហោតីតិ ញត្វា អត្តនោ ឧត្តរសាដកំ បច្ចេកពុទ្ធស្ស បាទមូលេ ឋបេត្វា អគមាសិ. បច្ចេកពុទ្ធោ តំ គហេត្វា អនុវាតកំ អារោបេន្តោ ចីវរំ កត្វា បារុបិ. កុដុម្ពិកោ ជីវិតបរិយោសានេ កាលំ កត្វា តាវតិំសភវនេ និព្ពត្តិត្វា តត្ថ យាវតាយុកំ ទិព្ពសម្បត្តិំ អនុភវិត្វា តតោ ចវិត្វា ពារាណសិតោ តិយោជនមត្តកេ ឋានេ អញ្ញតរស្មិំ នគរេ និព្ពត្តិ, តស្ស មាតាបិតរោ នន្ទិយោតិ [នន្ទីតិនាមំ ឥតិសព្ពត្ថ] នាមំ អកំសុ, តស្ស សត្ត ភាតរោ អហេសុំ, សេសា ឆ ភាតរោ នានាកម្មន្តេសុ ព្យាវដា មាតាបិតុន្នំ បោសេន្តិ. នន្ទិយោ បន អកម្មសីលោ គេហេយេវ វសតិ. តស្មា តស្ស សេសា កុជ្ឈន្តិ. មាតាបិតរោបិ នន្ទិយំ អាមន្តេត្វា ឱវទន្តិ. សោ តុណ្ហី ហោតេវ. អថាបរស្មិំ សមយេ គាមេ នក្ខត្តំ សង្ឃុដ្ឋំ, តទា សោ មាតរំ អាហ. អម្ម សាដកំ ទេហិ, នក្ខត្តំ កីឡិស្សាមីតិ, សា ធោត- វត្ថំ នីហរិត្វា អទាសិ, អម្ម ថូលំ ឥទន្តិ, សា អញ្ញំ នីហរិត្វា អទាសិ, តម្បិ បដិក្ខិបិ. អថ នំ មាតា អាហ. តាត យាទិសេ មយំ គេហេ ជាតា, នត្ថិ ឥតោ សុខុមតរស្ស បដិលាភាយ បុញ្ញន្តិ, លភនដ្ឋានំ គមិស្សាមិ អម្មាតិ. បុត្ត អហំ អជ្ជេវ តវ ពារាណសីនគរេ រជ្ជបដិលាភំ ឥច្ឆាមីតិ អាហ. សោ សាធុ អម្មាតិ មាតរំ វន្ទិត្វា បទក្ខិណំ កត្វា បក្កាមិ. មាតុយា បនស្ស ឯវំ អហោសិ. កហំ សោ គមិស្សតិ, បុព្ពេវិយ ឥធវា ឯត្ថវា គេហេ និសីទិត្វា អាគច្ឆតីតិ, សោ បន បុញ្ញនិយាមេន ចោទិយមានោ គាមតោ និក្ខមិត្វា ពារាណសិំ គន្ត្វា សេនគុត្តស្ស គេហេ បដិវសតិ, អថេកទិវសំ សោ តស្ស កម្មការេហិ សទ្ធិំ សល្លបន្តោ និសីទិត្វា បចលាយន្តោ សុបិនំ អទ្ទស. មុខេន អន្តំ និក្ខមិត្វា សកលជម្ពុទីបេ បត្ថរិត្វា អន្តោកុច្ឆិមេវ បាវិសិ. បពុទ្ធោ សោ ភីតោ មហាសទ្ទមកាសិ. អថ នំ មហាសេនគុត្តោ បុច្ឆិ. នន្ទិយោ សុបិនំ អទ្ទសន្តិ អាហ. អថ តេន កីទិសន្តិ បុដ្ឋោ កថេសិ, តតោ សេនគុត្តោ តំ អត្តនោ កុលូបគំ បរិព្ពាជិកំ បុច្ឆិ កោ តស្ស វិបាកោតិ. បរិព្ពាជិកា យទិ ភោ ឥត្ថី បស្សតិ. សត្តទិវសព្ភន្តរេយេវ អភិសេកំ លភតិ, យទិ បុរិសោ បស្សតិ, តថេវ រាជា ហោតីតិ កថេសិ. សេនគុត្តោ តស្សា តំ កថំ សុត្វា ឥមំ មម ញាតិំ ករោមីតិ អត្តនោ សត្ត ធីតរេ បក្កោសិត្វា បដិបាដិយា បុច្ឆិ. នន្ទិយស្ស សន្តិកេ វសថាតិ, សេសា សព្ពា ន ឥច្ឆិំសុ, ន មយំ ជានាម ឯតំ អធុនាគតំ កុលវន្តំ វា ទុក្កុលវន្តំវាតិ. អថ កណិដ្ឋិកំ បុច្ឆិ. សា យស្ស មំ មាតាបិតរោ ទស្សន្តិ. តេសំ វចនំ ន ភិន្ទិស្សាមីតិ សម្បដិច្ឆិ, អថ សេនគុត្តោ នន្ទិយំ បក្កោសិត្វា អត្តនោ ធីតរំ ទត្វា តស្ស មហាសម្បត្តិ មទាសិ. តតោ សត្តមេ ទិវសេ នន្ទិយោ តត្ថ តត្ថ អាហិណ្ឌន្តោ រញ្ញោ មង្គលុយ្យានំ បស្សិស្សាមីតិ គន្ត្វា ធង្គលសិលាបដ្ដេសសីសំ បារុបិត្វា និបជ្ជិ, សោ ច ពារាណសីរញ្ញោ កាលង្កតស្ស សត្តមោ ទិវសោ ហោតិ. អមច្ចាច បុរោហិតោច រញ្ញោ សរីរកិច្ចំ ការេត្វា រាជង្គណេ និសីទិត្វា មន្តយិំសុ. រញ្ញោ ឯកាវ ធីតា អត្ថិ, បុត្តោ បនស្ស នត្ថិ. អរាជិកំ រជ្ជំ ន តិដ្ឋតិ. ផុស្សរថំ វិស្សជ្ជេស្សាមាតិ. តេ កុមុទបត្តវណ្ណេ ចត្តារោ សិន្ធវេ យោជេត្វា សេតច្ឆត្តបមុខំបញ្ចវិធរាជកកុធភណ្ឌំ រថស្មិំយេវ ឋបេត្វា រថំ វិស្សជ្ជេត្វា បច្ឆតោ តុរិយានិ បគ្គណ្ហាបេសុំ. រថោ បាចីទ្វារេន និក្ខមិត្វា ឧយ្យានាភិមុខោ អហោសិ. បរិចយេន ឧយ្យានាភិមុខោ គច្ឆតិ. និវត្តេមាតិ កេចិ អាហំសុ. បុរោហិតោ មា និវារយិត្ថាតិ អាហ. រថោ កុមារកំ បទក្ខិណំ កត្វា អារោហណសជ្ជោ ហុត្វា អដ្ឋាសិ. បុរោហិតោ បារុបណកណ្ណំ អបនេត្វា បាទតលានិ ឱលោកេន្តោ តិដ្ឋតុ អយំ ទីបោ. ទ្វិសហស្សទីប បរិវារេសុ ចតូសុ មហាទីបេសុ ឯករជ្ជំ កាតុំ សមត្ថោតិវត្វា តស្ស ធិតិំ ឧបធារេតុំ តិក្ខត្តុំ តុរិយានិ បគ្គណ្ហាបេសិ. អថ កុមារោ មុខំ វិវរិត្វា ឱលោកេត្វា កេន ការណេន អាគតត្ថាតិ អាហ, ទេវ តុម្ហាកំ រជ្ជំ បាបុណាតីតិ, រាជា កហន្តិ, ទេវត្តំ គតោ សាមីតិ, កតិ ទិវសា អតិក្កន្តាតិ, អជ្ជ សត្តមោ ទិវសោតិ. បុត្តោ វា ធីតា វា នត្ថីតិ, ធីតា អត្ថិ ទេវ. បុត្តោ ន វិជ្ជតីតិ, តេនហិ ករិស្សាមិ រជ្ជន្តិ, តេ តាវទេវ អភិសេកមណ្ឌបំ ការេត្វា រាជធីតរំ សព្ពាលង្ការេហិ អលង្ការិត្វា ឧយ្យានំ នេត្វា កុមារស្ស អភិសេកំ អកំសុ, អថស្ស កតាភិសេកស្ស សតសហស្សគ្ឃនកំ វត្ថំ អានេសុំ, សោ កិមិទំ តាតាតិ អាហ, និវាសនវត្ថំ ទេវាតិ, ននុ តាតា ថូលំតិ, មនុស្សានំ បរិភោគវត្ថេសុ ឥតោ សុខុមតរំ នត្ថិ ទេវាតិ, តុម្ហាកំ រាជា ឯវរូបំ និវាសេសីតិ, អាម ទេវាតិ. ន មញ្ញេ បុញ្ញវា តុម្ហាកំ រាជាតិ វត្វា ហន្ទ សុវណ្ណភិង្ការំ អាហរថ, លភិស្សាម វត្ថន្តិ, តេ សុវណ្ណភិង្ការំ អាហរិំសុ, សោ ឧដ្ឋាយ ហត្ថេ ធោវិត្វា មុខំ វិក្ខាលេត្វា ហត្ថេន ឧទកំ អាទាយ បុរត្ថិមទិសាយ អព្ភុក្កិរិ, តាវទេវ ឃនបថវិំ ភិន្ទិត្វា សោឡសកប្បរុក្ខា ឧដ្ឋហិំសុ, បុន ឧទកំ ហត្ថេន គហេត្វា ទក្ខិណំ បច្ឆិមំ ឧត្តរន្តិ ឯវំ ចតស្សោបិ ទិសា អព្ភុក្កិរិ, សព្ពទិសាសុ សោឡស សោឡស ហុត្វា ចតុសដ្ឋិកប្បរុក្ខា ឧដ្ឋហិំសុ, សោ ឯកំ ទិព្ពទុស្សំ និវាសេត្វា ឯកំ បារុបិត្វា នន្ទិយរញ្ញោ វិជិតេ សុត្តកន្តិកា ឥត្ថិយោ មា សុត្តំ កន្តន្តូតិ ភេរិំ ចរាបេថាតិ វត្វា ឆត្តំ ឧស្សាបេត្វា អលង្កតបដិយត្តោ ហត្ថិក្ខន្ធវរគតោ នគរំ បវិសិត្វា បាសាទមភិរុយ្ហ មហាសម្បត្តិំ អនុភវិ. អហោ តទា បច្ចេកពុទ្ធស្ស ទិន្នានុវាតកស្ស វិបាកោ. តេនាហុ បោរាណា.

១២. យថា សាសបមត្តម្ហា, ពីជា និគ្រោធបាទបោ;

ជាយតេ សតសាខឌ្ឍោ, មហានីលម្ពុទោបមោ.

១៣. តថេវ បុញ្ញកម្មម្ហា, អណុម្ហា វិបុលំ ផលំ;

ហោតីតិ អប្បបុញ្ញន្តិ, នាវមញ្ញេយ្យ បណ្ឌិតោតិ.

ឯវំ គច្ឆន្តេ កាលេ ឯកទិវសំ ទេវី រញ្ញោ សម្បត្តិំ ទិស្វា អហោ តបស្សីតិ ការុញ្ញាការំ ទស្សេសិ. កិមិទំ ទេវីតិ ច បុដ្ឋា អតិមហតី តេ ទេវ សម្បត្តិ. អតីតមទ្ធានំ កល្យាណំ កតត្តា. ឥទានិ អនាគតស្សត្ថាយ កុសលំ ករោថាតិ អាហ. កស្ស ទស្សាម. សីលវន្តា នត្ថីតិ. អសុញ្ញោ ទេវ ជម្ពុទីបោ អរហន្តេហិ, តុម្ហេ ទានំ សជ្ជេថ, អហំ អរហន្តេ លច្ឆាមីតិ អាហ. បុនទិវសេ រាជា មហារហំ ទានំ សជ្ជាបេសិ. ទេវី សចេ ឥមិស្សា ទិសាយ អរហន្តោ អត្ថិ, ឥធា គន្ត្វា អម្ហាកំ ភិក្ខំ គណ្ហន្តូតិ ឧត្តរហិមវន្តាភិមុខី បុប្ផានិ ឧទ្ធំ ខិបិត្វា ឧរេន និបជ្ជិ. អថ តានិ បុប្ផានិ អាកាសតោ គន្ត្វា ហិមវន្តបទេសេ វសន្តានំ បទុមវតិយា បុត្តានំ បញ្ចសតានំបច្ចេកពុទ្ធានំ ជេដ្ឋកមហាបទុមបច្ចេកពុទ្ធស្ស បាទមូលេ បតិំសុ. តថាហិ.

១៤. អហោ បស្សថ ភោ ទានិ, វិម្ហយំ បុញ្ញកម្មុនោ;

អចេតនាបិ បុប្ផានិ, ទូតកិច្ចេសុ ព្យាវដា.

១៥. កត្តុកាមេន លោកស្មិំ, សកលំ អត្តនោ វសំ;

សព្ពត្ថាមេន កត្តព្ពំ, បុញ្ញំ បញ្ញវតា សទាតិ.

តតោ មហាបទុមបច្ចេកពុទ្ធោ តំ ញត្វា សេសភាតរេ អាមន្តេសិ. មារិសា នន្ទិយរាជា តុម្ហេ និមន្តេសិ. អធិវាសេថ តស្ស និមន្តនន្តិ. តេ អធិវាសេត្វា តាវទេវ អាកាសេនា គន្ត្វា ឧត្តរទ្វារេ ឱតរិំសុ. មនុស្សា បញ្ចសតា ទេវ បច្ចេកពុទ្ធា អាគតាតិ រញ្ញោ អារោចេសុំ, រាជា សទ្ធិំ ទេវិយា គន្ត្វា វន្ទិត្វា បត្តេ គហេត្វា បច្ចេកពុទ្ធេ បាសាទំ អារោបេត្វា តត្ថ តេសំ ទានំ ទត្វា ភត្តកិច្ចាវសានេ រាជា សង្ឃត្ថេរស្ស ទេវី សង្ឃនវកស្ស ច បាទមូលេ និបជ្ជិត្វា អយ្យា បច្ចយេហិ ន កិលមិស្សន្តុ, មយំ បុញ្ញេន ន ហាយិស្សាម, អម្ហាកំ ឥធ វាសាយ បដិញ្ញំ ទេថាតិ បដិញ្ញំ ការេត្វា ឧយ្យានេ និវាសដ្ឋានាទយោ ការេត្វា យាវជីវំ បច្ចកពុទ្ធេ ឧបដ្ឋហិត្វា តេសុ បរិនិព្ពុតេសុ សាធុកីឡនំ ការេត្វា ចន្ទនា គរុអាទីហិ សរីរកិច្ចំ ការេត្វា ធាតុយោ គហេត្វា ចេតិយំ បតិដ្ឋាបេត្វា ឯវរូបានម្បិ មហានុភាវានំ មហេសីនំ មរណំ ភវិស្សតិ, កិមង្គំ បន មាទិសានន្តិ សំវេគជាតោ ជេដ្ឋបុត្តំ រជ្ជេ បតិដ្ឋាបេត្វា សយំ បព្ពជំ បព្ពជិ, ទេវីបិ រញ្ញេ បព្ពជិតេ អហំ កិំករិស្សាមីតិ បព្ពជិត្វា ទ្វេបិ ឧយ្យានេ វសន្តា ឈានាភិញ្ញំ និព្ពត្តេត្វា ឈានសុខេន វីតិនាមេន្តា អាយុបរិយោសានេ ព្រហ្មលោកេ និព្ពត្តិំសុ. តេ អម្ហាកំ ភគវតោ កាលេ ព្រាហ្មណកុលេ និព្ពត្តិត្វា ពុទ្ធសាសនេ បព្ពជិំសុ, តទា នន្ទិយរាជា ធុតង្គធរានំ អគ្គោ មហាកស្សបត្ថេរោនាម ហុត្វា ចន្ទោ វិយ សុរិយោ វិយច លោកេ បាកដោ ហុត្វា ភគវតិ បរិ- និព្ពុតេ ពុទ្ធសាសនំ អតិវិយ សោភេតិ. ភរិយាបិស្ស ភទ្ទកាបិឡានី នាម អហោសីតិ.

១៦. ទត្វា បុរេកោ វិបិនេ ចរន្តោ,

បច្ចេកពុទ្ធស្សនុវាតមត្តំ;

កត្វា សរដ្ឋំ កុរុទីបសោភំ,

មហានុភាវោ វសុធា ធិបោសិ.

១៧. តុម្ហេច ភោន្តោ ខលុ សីលវន្តេ,

ទទាថ ទានានិ អនប្បកានិ;

តំ វោ បតិដ្ឋាច ភវន្តរស្មិំ,

ចិន្តាមណិំ កប្បតរុំវ សារន្តិ.

នន្ទិយរាជស្ស វត្ថុំ បថមំ.