៧. វេស្សាមិត្តាយ វត្ថុម្ហិ អយមានុបុព្ពីកថា

ជម្ពុទីបេ កិរ កោសម្ពិនគរេ កោសម្ពិរញ្ញោ វេស្សាមិត្តានាម អគ្គមហេសី អហោសិ. តទា ភគវា កោសម្ពិយំ បដិវសតិ មហតា ភិក្ខុសង្ឃេន សទ្ធិំ ចារិកំ ចរមានោ. តស្មិំ សមយេ សា រញ្ញា សទ្ធិំ វិហារំ គន្ត្វា អនោបមាយ ពុទ្ធលីឡាយ មធុរេន សរេន ទេសេន្តស្ស ភគវតោ ធម្មំ សុត្វា បសន្នា សរណេសុ បតិដ្ឋាយ ពុទ្ធមាមិកា ហុត្វា វិហរតិ. អថា បរភាគេ តស្ស រញ្ញោ រជ្ជត្ថាយ បច្ចន្តរាជា យុទ្ធសជ្ជោ រជ្ជំ វា ទេតុ, យុទ្ធំវាតិ បណ្ណំ បហិណិ. តំ សុត្វា រាជា មហតិយា សេនាយ បរិវុតោ យុទ្ធភូមិំ គច្ឆន្តោ មហេសិយា សទ្ធិំ គន្ត្វា ខន្ធាវារំ និវាសេត្វា តស្សា ឯវមាហ. ភទ្ទេ សង្គាមសីសេ ជយបរាជយោ នាម ន សក្កា វិញ្ញាតុំ. សចេ មេ បរាជយោ អភវិស្ស, បុរេតរមេវ រត្តបតាកំ ឧស្សាបេស្សាមិ, តេន អភិញ្ញាណេន ត្វំ កោសម្ពិមេវ គច្ឆាហីតិ អនុសាសិត្វា សង្គាម មណ្ឌលំ គន្ត្វា មហារណំ ករោន្តោ អត្តនោ បរាជយភាវំ ញត្វា មាតុគាមំ សរិត្វា រត្តទ្ធជំ ឧស្សាបេត្វា យុជ្ឈន្តោ រណេ បតិ. អថ សា រត្តបតាកំ ទិស្វា បរាជិតោ នូន មេ សាមិកោតិ ភយេន បលាយិតុមារភិ. អថ តំ ចោររញ្ញោ មនុស្សា ទិស្វា នូនាយំ រញ្ញោ អគ្គមហេសីតិ ញត្វា អត្តនោ រាជានំ ទស្សេសុំ, រាជា តំ ទិស្វា បដិពទ្ធចិត្តោ មមេតំ អភិសេកំ ករោថាតិ អមច្ចេ អាណាបេសិ. អមច្ចា តំ អភិសេកត្ថាយ យាចិំសុ, សា ន មេ ភណេ អភិសេកេនត្ថោតិ ន ឥច្ឆិ. អមច្ចា តមត្ថំ រញ្ញោ អារោចេសុំ. រាជា នំ បក្កោសាបេត្វា កស្មា ន ឥច្ឆសីតិ បុច្ឆិ. សា ឯវមាហ.

១. សុណោហិ សាធុកំ ទេវ, ភាសមានាយ មេ វចោ;

ភត្តា មយ្ហំ មតោ អជ្ជ, សព្ពសម្បត្តិទាយកោ.

២. កត្វាន សោភិសេកំ មំ, អត្តនោ ហទយំ វិយ;

បាលេតិ តំ សរន្តស្សា, សោកគ្គិ ទហតេ មនំ.

៣. មហារាជ សចញ្ញស្ស, អស្ស មគ្គមហេសិកា;

តម្ហា ទុក្ខា ន មុច្ចាមិ, តេនាហំ តំ ន បត្ថយេ.

៤. សោកគ្គិនា បទិត្តាហំ, សោកេ សោកំ កថំ ខិបេ;

ជលន្តគ្គិម្ហី កោ នាម, បលាលំ បក្ខិបេ ពុធោ.

៥. បិយវិប្បយោគទុក្ខំ, តំ ចិន្តយន្តី បុនប្បុនំ;

តម្ហា ទុក្ខា ន មុច្ចាមិ, តស្មាហំ តំ ន បត្ថយេតិ.

តំ សុត្វា រាជា កោធេនាភិភូតោ សចេ នាភិសិញ្ចិស្សសិ, អគ្គិម្ហិ តំ បក្ខិបិស្សាមីតិ វត្វា មហន្តំ ទារុចិតកំ ការាបេត្វា អគ្គិំ ទត្វា ឯកបជ្ជោតេ ជាតេ ឯត្ត បវិសាតិ អាហ. អថ សា យាចន្តី រាជានំ អាហ.

៦. បាបោ និប្បាបិនំ រាជ, បាតនំ ខលុ បាវកេ;

ហោតិ បាបផលំ តស្ស, បច្ចត្តេច បរត្ថច.

៧. បុរាតនេហិ ភូបាល, សមណព្រហ្មណេសុច;

មាតាបិតុសុ ពាលេសុ, រោគេនា តុរឥត្ថិសុ;

នប្បសត្ថោ វធោ ទេវ, តស្មាហំ ន វធារហាតិ.

តំ សុត្វាបិ រាជា អសទ្ទហន្តោ មនុស្សេ អាណាបេសិ. ឯតាយ ហត្ថបាទេ គហេត្វា អគ្គិម្ហិ បក្ខិបថាតិ តេ តថា ករិំសុ, អថ សា អគ្គិម្ហិ បក្ខិបមានា នត្ថេត្ថ មេ កោចិ បដិសរណោតិ សរណមេវ សរណំ ករោមីតិ ចិន្តេត្វា ‘‘ពុទ្ធំ សរណំ គច្ឆាមិ, ធម្មំ សរណំ គច្ឆាមិ, សង្ឃំ សរណំ គច្ឆាមីតិ’’ វទន្តី មនសាច អនុស្សរន្តី អគ្គិម្ហិ បតិ, តថាវិធោបិ អគ្គិ តស្សា សរីរេ លោមកូបមត្តម្បិ ឧណ្ហាការំ កាតុំ នាសក្ខិ. បទុមគព្ភំ បវិដ្ឋា វិយ សីតិភូតសរីរា អហោសិ. រាជា តំ អច្ឆរិយំ ទិស្វា សំវិគ្គោ លោមហដ្ឋជាតោ វេគេន តំ ឧបសង្កមិត្វា ឧភោហិ ហត្ថេហិ បគ្គយ្ហ ឧរេ និបជ្ជាបេត្វា រាជាសនេ និសីទាបេត្វា អញ្ជលិំ គគ្គយ្ហ ឋិតោ កស្មា តេ តំ អគ្គិ សរីរំ មា បរិទហីតិ បុច្ឆិ. សា តំ ការណំ កថេន្តី ឯវ មាហ.

៨. មាតា បិតាច ញាតីច, បរិវារាច សោហទា;

មន្តោ សធាទយោចាបិ, មហេសក្ខាច ទេវតា.

៩. ឯតេច ញ្ញេច ភូបាល, សត្តានំ ភយ មាគតេ;

រក្ខិតុំ នេវ សក្កោន្តិ, ហិត្វាន សរណត្តយំ.

១០. អគាហំ ពុទ្ធំ សរណំ, ពុទ្ធោ មេ សរណំ ឥតិ;

តេន តេជេន មំ រាជ, ជលន្តោ អគ្គិ នោ ទហិ.

១១. អគាហំ ធម្មំ សរណំ, ធម្មោ មេ សរណំ ឥតិ;

តេន តេជេន មំ រាជ, ជលន្តោ អគ្គិ នោ ទហិ.

១២. អគាហំ សង្ឃំ សរណំ, សង្ឃោ មេ សរណំ ឥតិ;

តេន តេជេន មំ រាជ, ជលន្តោ អគ្គិ នោ ទហិ.

១៣. ឯវំ មហានុភាវន្តំ, បច្ចក្ខំ ឯហិបស្សិកំ;

នានោ បទ្ទវ វិទ្ធំសិំ, នានាសម្បត្តិទាយកំ.

១៤. សរណត្តយញ្ហិ យោ សត្តោ, ន សមាទាយ គណ្ហតិ;

ឥធវា បរត្ថវា លោកេ, សោ សុខំ នានុភោស្សតិ.

១៥. សរណត្តយញ្ហិ យោ សត្តោ, សុសមាទាយ គណ្ហតិ;

ឥធវាបរត្ថវា លោកេ, សោ សុខា ន វិហាយតិ.

១៦. តស្មា តុវម្បិ ភូបាល, គណ្ហាហិ សរណត្តយំ;

តំ តេ ភវតិ សព្ពត្ថ, តាណំ លេណំ បរាយណន្តិ.

តំ សុត្វា រាជា អតិវិយ បសន្នមានសោ តំ ខមាបេត្វា មហន្តំ សក្ការសម្មានំ កត្វា អជ្ជប្បដ្ឋាយ ត្វំ មម មាតាតិ តំ មាតុដ្ឋានេ ឋបេត្វា សរណ មគមាសិ. តស្មិំ សន្និបតិត្វា ឋិតមហាជនា តំ បាដិហារិយំ ទិស្វា សរណេសុច សីលេសុច បតិដ្ឋាយ ទានាទីនិ បុញ្ញកម្មានិ កត្វា យថាកម្មំ គតាតិ.

១៧. ឥតិ សរណវរំ សា កេវលំ ឧគ្គហេត្វា,

ជលិតទហនមជ្ឈេ សីតិភាវំ អលត្ថ;

បរមសរណសីលំ បាលយន្តា កថំ វោ,

ន លភថ ភវភោគំ និព្ពុតិញ្ចាបិ អន្តេតិ.

វេស្សាមិត្តាប វត្ថុំ សត្តមំ.