១០. រូបទេវិយា វត្ថុម្ហិ អយមានុបុព្ពីកថា

អតីតេ កិរ វិបស្សិស្ស ភគវតោ កាលេ តស្មិំ នគរេ ឯកា គាមទារិកា វិហារេ អាហិណ្ឌន្តី ឯកំ គិលានភិក្ខុំ ទិស្វា កម្បមានហទយា ឧបសង្កមិត្វា វន្ទិត្វា ភន្តេ កោតេ អាពាធោ សរីរំ បីឡេតីតិ បុច្ឆិ. តេនាបិ ភគិនិ ខរាពាធោ មេ បីឡេតីតិ វុត្តេ សា តេនហិ ភន្តេ អហំ តំ រោគំ វូបសមេស្សាមីតិ និមន្តេត្វា គេហំ គន្ត្វា តំ បវត្តិំ មាតាបិតុន្នំ កថេត្វា តេហិ អនុញ្ញាតា បុន ទិវសេ នានគ្គរសេន ភេសជ្ជាហារំ សម្បាទេសិ, តតោ សោ ភិក្ខុ បុនទិវសេ ចីវរំ បារុបិត្វា ភិក្ខាយ ចរន្តោ តស្សា គេហំ គន្ត្វា អដ្ឋាសិ. សា ថេរំ អាគតំ ទិស្វា សោមនស្សជាតា បត្តំ គហេត្វា អាសនំ បញ្ញាបេត្វា អទាសិ. តត្ថ និសិន្នំ តំ អាហារេន សាធុកំ បរិវិសិត្វា សក្ការ មកាសិ. អថស្សា សទ្ធាពលេន ភុត្តមត្តេយេវ សោ អាពាធោ វូបសមិ. តតោ សោ វូបសន្តរោគោ ទុតិយទិវសេ តស្សា គេហំ នា គមាសិ. អថ សា វិហារំ គន្ត្វា តំ វន្ទិត្វា កស្មានាគតត្ថាតិ បុច្ឆិត្វា តេន មេ ភគិនិ ព្យាធិ វូបសមិ, តស្មា នាគតោស្មីតិ វុត្តេ សា សាធុ ភន្តេតិ សោមនស្សជាតា គេហមេវ អគមាសិ. សា តេន បុញ្ញកម្មេន កាលំ កត្វា ទេវលោកេ និព្ពត្តិ. តស្សា តត្ថ ទ្វាទសយោជនិកំ កនកវិមានំ និព្ពត្តិ. សា តត្ថ ទេវិស្សរិយំ អនុភវន្តី ឆពុទ្ធន្តរំ ខេបេត្វា អម្ហាកំ ភគវតោ កាលេ ជម្ពុទីបេ ទេវបុត្តនគរេ ឧទិច្ចព្រហ្មណកុលេ ជេដ្ឋព្រាហ្មណស្ស ភរិយាយ កុច្ឆិម្ហិ បដិសន្ធិំ គណ្ហិ, សា បរិបាក មន្វាយ មាតុកុច្ឆិតោ និក្ខមិ. តស្សា មាតុកុច្ឆិតោ និក្ខន្តកាលតោ បដ្ឋាយ ទិវសេ ទិវសេ អដ្ឋដ្ឋនាលិមត្តំ តណ្ឌុលំ និព្ពត្តតិ. តស្សា រូបសម្បត្តិំ ទិស្វា បសន្នា មាតាបិតរោ រូបទេវីតិ នាម មកំសុ. បច្ឆា តំ បតិរូបេន ទារកេន និយោជេសុំ. អថស្សា តណ្ឌុល- នាលិមត្តំ គហេត្វា បចិតុំ អារទ្ធេ ឥច្ឆិតិច្ឆិតមំសាទិព្យញ្ជនញ្ជ សប្បិនវនីតទធិខីរាទិគោរសញ្ច ជីរមរិចាទិកដុកភណ្ឌញ្ច កទលិបនសមធុគុឡាទិឧបករណញ្ច ភាជនានិ បូរេត្វា និព្ពត្តតិ, តាយ ហត្ថេន គហិតំ កិញ្ចិ ខាទនីយំ ភោជនីយំវា បូតិភាវំ ន គច្ឆតិ, ភត្តុក្ខលិំ គហេត្វា សកលនគរវាសិនោ ភោជេន្តិយាបិ ឯកកដច្ឆុមត្តំ ភត្តំ គហិតដ្ឋានំ ន បញ្ញាយតិ. ឯវំ អបរិក្ខយបុញ្ញា អហោសិ, សកលទេវបុត្តនគរេ ចន្ទសុរិយាវ បាកដា អហោសិ, អថ សា បញ្ចសតភិក្ខូ និមន្តេត្វា និច្ចំ សកនិវេសនេយេវ ភោជេតិ, តទា តេសំ អន្តរេ បដិសម្ភិទាបត្តោ មហាសង្ឃរក្ខិតត្ថេរោនាម ឥមិស្សា បុញ្ញានុភាវំ ទិព្ពចក្ខុនា ទិស្វា ន ជានាតិ ឯសា អត្ថនា បុព្ពេ កតកម្មំ. យន្នូនាហំ អស្សា បកាសេយ្យន្តិ ឯកទិវសំ តស្សា និវេសនេ ភុញ្ជិត្វា អនុមោទនំ ករោន្តោ ជានាសិ ភគិនិ តយា បុព្ពេ កតកម្មន្តិ បុច្ឆិ, ន ជានាមិ ភន្តេ. សោតុមិច្ឆាមីតិ, អថស្សា សោ បុព្ពកម្មំ បកាសេន្តោ.

១. ឯកនវុតេ ឥតោ កប្បេ,

វិបស្សីនាម នាយកោ;

អហោសិ លោកេ លោកេក,

នាយកោ ឆិន្នពន្ធនោ.

២. តទា តស្មិំ បុរេ រម្មេ, អាសិ ត្វំ គាមទារិកា;

អាហិណ្ឌន្តី វិហារស្មិំ, អទ្ទក្ខិ ជិនសាវកំ.

៣. រោគាតុរំ កិសំ បណ្ឌុំ, អស្សសន្តំ មុហុំ មុហុំ;

ទិស្វាន កម្បិតា ចិត្តា, និមន្តេត្វាន តំ មុនិំ.

៤. ភេសជ្ជញ្ចេវ ភត្តញ្ច, អទា ត្វំ តេន សោ យតិ;

អព្យាពាធោ អនីឃោច, អហោសិ អនុបទ្ទវោ.

៥. តតោ ត្វំ តេន កម្មេន, សុកតេន តតោ ចុតា;

ជាតាសិ ទេវលោកស្មិំ, សព្ពកាមសមិទ្ធិនី.

៦. តត្ថ តេ បុញ្ញតេជេន, បាសាទោ រតនាមយោ;

មណិថូបិសតាកិណ្ណោ, កូដាគារេហិ លង្កតោ.

៧. នេកគព្ភសតាកិណ្ណោ, សយនាសនមណ្ឌិតោ;

អច្ឆរាសតសំកិណ្ណោ, នច្ចគីតាទិសំកុលោ.

៨. រម្ភាម្ពជម្ពុសន្នីរ, បូគបុន្នាគបាដលី;

នាគាទិតរុសណ្ឌេហិ, មណ្ឌិតុយ្យានបន្តិហិ.

៩. បទុមុប្បលកឡារ, កុន្ទកាននមណ្ឌិតេ;

មធុមត្តាលិបាលីហិ, សារសីសរសំកុលេ.

១០. ទេវបុត្តេហិ នេកេហិ, តថា ទេវច្ឆរាហិច;

និច្ចុស្សវេ មហាភោគេ, វិមានេ មននន្ទនេ.

១១. ត្វមេវំ ទេវលោកម្ហិ, វិន្ទមានា មហាយសំ;

អទ្ធានំ វីតិនាមេត្វា, និព្ពុតេ គោតមេ ជិនេ.

១២. ជម្ពុទីបេ ឥទានិ ត្វំ, និព្ពត្តា ឧទិតេ កុលេ;

បុញ្ញបញ្ញាគុណាវាសា, រូបេនគ្គា បិយំវទា.

១៣. ឯតំ តេ ទេវលោកស្មិំ, ទេវិស្សរិយមព្ភុតំ,

ឥមំ តេ ឥធ លោកស្មិំ, សព្ពំ មានុសិកំ សុខំ.

១៤. វិបស្សិមុនិនោ កាលេ, ត្វំ តស្សេកស្ស ភិក្ខុនោ;

អទា ទានំ គិលានស្ស, តស្ស តំ ផលមីទិសំ.

១៥. កាតព្ពញ្ហិ សទា បុញ្ញំ, ឥច្ឆន្តេន សុខប្បទំ;

តស្មា ត្វំ សព្ពទា ភទ្ទេ, ឧស្សុក្កា កុសលេ ភវាតិ.

ឯវំ សោ តស្ស បុរិមត្តភាវេ កតកម្មំ បកាសេត្វា ឥទានិ បុញ្ញកម្មេ អប្បមាទា ភវាតិ អនុសាសិ. សា ថេរស្ស ធម្មទេសនំ សុត្វា បរមសោមនស្សា តតោ បដ្ឋាយ ទានាទីសុ និរតា បុញ្ញានិ ករោន្តី តេនេវ សោមនស្សេន សោតាបន្នា អរិយសាវិកា អហោសីតិ.

១៦. ឥតិ តរុណកុមារី បុញ្ញកម្មេសុ សារំ,

អវិទិតគុណមត្តា ទត្វ ភិក្ខុស្ស ទានំ;

ទិវិមនុជសុខំ សាលត្ថ តុម្ហេ ភវន្តា,

វិទិតកុសលបាកា កិំ ន លព្ភេថ សន្តិំ.

រូបទេវិយា វត្ថុំ ទសមំ.

ធម្មសោណ្ឌកវគ្គោ បថមោ.