៤. តុវដ្ដវគ្គ, ៧-៨. សត្តម អដ្ឋម សិក្ខាបុច្ឆា

បុច្ឆា – អន្តោរដ្ឋេ វា អាវុសោ តិរោរដ្ឋេ វា សាសង្កសម្មតេ សប្បដិភយេ អសត្ថិកាយ ចារិកំ ចរន្តិយា បាចិត្តិយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលា ភិក្ខុនិយោ អារព្ភ បញ្ញត្តំ, សម្ពហុលា ភន្តេ ភិក្ខុនិយោ អន្តោរដ្ឋេបិ តិរោរដ្ឋេបិ សាសង្កសម្មតេ សប្បដិភយេ អសត្ថិកាយោ ចារិកំ ចរិំសុ, តស្មិំ ភន្តេ វត្ថុស្មិំ បញ្ញត្តំ.