៣. តតិយបាដិទេសនី សិក្ខាបុច្ឆា

បុច្ឆា – សេក្ខសម្មតេសុ អាវុសោ កុលេសុ ខាទនីយំ វា ភោជនីយំ វា សហត្ថា បដិគ្គហេត្វា ភុញ្ជន្តស្ស បាដិទេសនីយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ នមត្តំ ជានិត្វា បដិគ្គហេសុំ, តស្មិំ ភន្តេ វត្ថុស្មិំ បញ្ញត្តំ.

សេខិយកណ្ឌ

បុច្ឆា – អនាទរិយំ អាវុសោ បដិច្ច បុរតោ វា បច្ឆតោ វា ឱលម្ពេន្តេន និវាសេន្តស្សច បារុបន្តស្សច ទុក្កដំ កត្ថ បញ្ញត្តំ, កំ អារព្ភ កិស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ បុរតោ ច បច្ឆតោ ច ឱលម្ពន្តា និវាសេសុំចេវ បារុបិំសុច, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច កាយំ វិវរិត្វា អន្តរឃរេ គច្ឆន្តស្ស ច និសីទន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គីយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ កាយំ វិវរិត្វា អន្តរឃរេ គច្ឆិំសុ ចេវ និសីទិំសុច, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច ហត្ថំ វា បាទំ វា កីឡាបេន្តេន អន្តរឃរេ គច្ឆន្តស្ស ច និសីទន្តស្ស ច, តហំ តហំ ឱលោកេន្តេន អន្តរឃរេ គច្ឆន្តស្ស ច និសីទន្តស្ស ច, ឧក្ខិត្តកាយ អន្តរឃរេ គច្ឆន្តស្ស ច និសីទន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ហត្ថម្បិ បាទម្បិ កីឡាបេន្តា តហំ តហំបិ ឱលោកេន្តា អន្តរឃរេ គច្ឆិំសុចេវ និសីទិំសុ ច, តេយេវ ភន្តេ ឆព្ពគ្គិយា ភិក្ខូ ឧក្ខិត្តកាយ អន្តរឃរេ គច្ឆិំសុចេវ និសីទិំសុច, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច ឧជ្ជគ្ឃិកាយ វា ឧច្ចាសទ្ទំ មហាសទ្ទំ ករោន្តេន វា អន្តរឃរេ គច្ឆន្តស្សច និសីទន្តស្សច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ មហាហសិតំ ហសន្តា ច ឧច្ចាសទ្ទំ មហាសទ្ទំ ករោន្តា ច អន្តរឃរេ គច្ឆិំសុចេវ និសីទិំសុច, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច កាយប្បចាលកំ វា ពាហុប្ប ចាលកំ វា សីសប្បចាលកំ វា ខម្ភកតេន វា ឱគុណ្ឋិតេន វា អន្តរឃរេ គច្ឆន្តស្ស ច និសីទន្តស្ស ច ឧក្កុដិកាយ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ កាយប្បចាលកំ ពាហុប្បចាលកំ សីសប្បចាលកំ ករោន្តា ច ខម្ភីកតា ច ឱគុណ្ឋិតា ច អន្តរឃរេ គច្ឆិំសុចេវ និសីទិំសុច, ឧក្កុដិកាយច អន្តរឃរេ គច្ឆិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច បល្លត្ថិកាយ អន្តរឃរេ និសិន្នស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ បល្លត្ថិកាយ អន្តរឃរេ និសីទិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច អសក្កច្ចំ បិណ្ឌបាតំ បដិគ្គណ្ហន្តស្ស ច តហំ តហំ ឱលោកេន្តេន បិណ្ឌបាតំ បដិគ្គណ្ហន្តស្សច សូបញ្ញេវ ពហុំ បដិគ្គណ្ហន្តស្សច ថូបីកតំ បិណ្ឌបាតំ បដិគ្គណ្ហន្តស្សច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អសក្កច្ចំ បិណ្ឌបាតំ បដិគ្គហេសុំ, តហំ តហំ ឱលោកេន្តា បិណ្ឌបាតំ បដិគ្គហេសុំ, សូបញ្ញេវ ពហុំ បដិគ្គហេសុំ, ថូបីកតំ បិណ្ឌបាតំ បដិគ្គហេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច អាសក្កច្ចំ បិណ្ឌបាតំ ភុញ្ជន្តស្សច តហំ តហំ ឱលោកេន្តន បិណ្ឌបាតំ ភុញ្ជន្តស្ស ច តហំ តហំ ឱមសិត្វា បិណ្ឌបាតំ ភុញ្ជន្តស្ស ច សូបញ្ញេវ ពហុំ ភុញ្ជន្តស្ស ច ថូបកតោ ឱមទ្ទិត្វា បិណ្ឌបាតំ ភុញ្ជន្តស្ស ច សូបំ វា ព្យញ្ជនំ វា ឱទនេន បដិច្ឆាទេន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អសក្កច្ចំ បិណ្ឌបាតំ ភុញ្ជិំសុ, តហំ តហំ ឱលោកេន្តា បិណ្ឌបាតំ ភុញ្ជិំសុ, តេយេវ ភន្តេ ឆព្ពគ្គិយា ភិក្ខូ តហំ តហំ ឱមសិត្វា បិណ្ឌបាតំ ភុញ្ជិំសុ, តេយេវ ភន្តេ ឆព្ពគ្គិយា ភិក្ខូ ពហុំ សូបំ ភុញ្ជិំសុ, តេយេវ ភន្តេ ឆព្ពគ្គិយា ភិក្ខូ ថូបកតោ ឱមទ្ទិត្វា បិណ្ឌបាតំ ភុញ្ជិំសុ, តេយេវ ភន្តេ ឆព្ពគ្គិយា ភិក្ខូ សូបម្បិ ព្យញ្ជនម្បិ ឱទនេន បដិច្ឆាទេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច សូបំវា ឱទនំវា អគិលានេន អត្តនោ អត្ថាយ វិញ្ញាបេត្វា ភុញ្ជន្តស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ សូបម្បិ ឱទនម្បិ អត្តនោ អត្ថាយ វិញ្ញាបេត្វា ភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច ឧជ្ឈានសញ្ញិនា បរេសំ បត្តំ ឱលោកេន្តស្ស ច អតិមហន្តំ កពឡំ ករោន្តស្ស ច ទីឃំ អាលោបំ ករោន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ឧជ្ឈានសញ្ញិនោ បរេសំ បត្តំ ឱលោកេសុំ, តេយេវ ភន្តេ ឆព្ពគ្គិយា ភិក្ខូ អតិមហន្តំ កពឡំ ករិំសុ, តេយេវ ភន្តេ ឆព្ពគ្គិយា ភិក្ខូ ទីឃំ អាលោបំ ករិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច អនាហដេ កពឡេ មុខទ្វារំ វិវរន្តស្ស ច ភុញ្ជមានេ សព្ពំ ហត្ថំ មុខេ បក្ខិបន្តស្ស ច សកពឡេន មុខេន ព្យាហរន្តស្ស ច បិណ្ឌុក្ខេបកំ បិណ្ឌបាតំ ភុញ្ជន្តស្ស ច កពឡាវច្ឆេទកំ បិណ្ឌបាតំ ភុញ្ជន្តស្ស ច អវគណ្ឌការកំ បិណ្ឌបាតំ ភុញ្ជន្តស្ស ច ហត្ថនិទ្ធុនកំ សិត្ថាវការកំ ជិវ្ហានិច្ឆារកំ ចបុចបុការកំ បិណ្ឌបាតំ ភុញ្ជន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អនាហដេ កពឡេ មុខទ្វារំ វិវរិំសុ, ភុញ្ជមានា សព្ពំ ហត្ថំ មុខេ បក្ខិបិំសុ, សកពឡេន មុខេន ព្យាហរិំសុ, បិណ្ឌុក្ខេបកំ ភុញ្ជិំសុ, កពឡាវច្ឆេទកំ ភុញ្ជិំសុ, អវគណ្ឌការកំ ភុញ្ជិំសុ, ហត្ថនិទ្ធុនកំ សិត្ថាវការកំ ជិវ្ហានិច្ឆារកំ ចបុចបុការកំ ភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច សុរុសុរុការកំ ភុញ្ជន្តស្សច ហត្ថនិល្លេហកំវា បត្តនិល្លេហកំ វា ឱដ្ឋនិល្លេហកំ វា ភុញ្ជន្តស្ស ច សាមិសេន ហត្ថេន បានីយថាលកំ បដិគ្គណ្ហន្តស្ស ច សសិត្ថកំ បត្តធោវនំ អន្តរឃរេ ចឌ្ឌេន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សុរុ សុរុការកំ ភន្តេ ភុញ្ជន្តស្ស ទុក្កដំ កោសម្ពិយំ បញ្ញត្តំ, សម្ពហុលេ ភន្តេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ សុរុសុរុការកំ ខីរំ បិវិំសុ, តស្មិំ ភន្តេ វត្ថុស្មិំ បញ្ញត្តំ. ហត្ថនិល្លេហកំ ភុញ្ជន្តស្ស ច បត្តនិល្លេហកំ ភុញ្ជន្តស្ស ច ឱដ្ឋនិល្លេហកំ ភុញ្ជន្តស្ស ទុក្កដំ សាវត្ថិយំ បញ្ញត្តំ, ឆព្ពគ្គិយេ ភន្តេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ហត្ថនិល្លេហកំ ភុញ្ជិំសុ, បត្តនិល្លេហកំ ភុញ្ជិំសុ, ឱដ្ឋនិល្លេហកំ ភុញ្ជិំសុ, តស្មិំ ភន្តេ វត្ថុស្មិំ បញ្ញត្តំ.

សាមិសេន ហត្ថេន បានីយថាលកំ បដិគ្គណ្ហន្តស្ស ច សសិត្ថកំ បត្តធោវនំ អន្តរឃរេ ឆឌ្ឌេន្តស្ស ច ទុក្កដំ ភគ្គេសុ បញ្ញត្តំ, សម្ពហុលេ ភិក្ខូ អារព្ភ បញ្ញត្តំ, សម្ពហុលា ភិក្ខូ សាមិសេន ហត្ថេន បានីយថាលកំ បដិគ្គហេសុំ, តេយេវ ភន្តេ សម្ពហុលា ភិក្ខូ សសិត្ថកំ បត្តធោវនំ អន្តរឃរេ ឆឌ្ឌេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច ឆត្តបាណិស្ស ធម្មំ ទេសេន្តស្ស ច ទណ្ឌបាណិស្ស វា សត្ថបាណិស្ស វា អាវុធបាណិស្ស វា ធម្មំ ទេសេន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ឆត្តបាណិស្ស ទណ្ឌបាណិស្ស សត្ថបាណិស្ស អាវុធបាណិស្ស ធម្មំ ទេសេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច បាទុការុឡ្ហស្ស ច ឧបហនារុឡ្ហស្ស ច យានគតស្ស ច សយនគតស្ស ច ធម្មំ ទេសេន្តស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ បាទុការុឡ្ហស្ស ឧបហនារុឡ្ហស្ស យានគតស្ស សយនគតស្ស ធម្មំ ទេសេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច បល្លត្ថិកាយ និសិន្នស្ស ច វេឋិតសីសស្ស ច ឱគុណ្ឋិតសីសស្ស ច ឆមាយំ និសីទិត្វា អាសនេ និសិន្នស្ស ច នីចេ អាសនេ និសីទិត្វា ឧច្ចេ អាសនេ និសិន្នស្ស ច ឋិតេន និសិន្នស្ស ច បច្ឆតោ គច្ឆន្តេន បុរតោ គច្ឆន្តស្ស ច ឧប្បថេន គច្ឆន្តេន បថេន គច្ឆន្តស្ស ច ធម្មំ ទេសេន្តស្ស ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ បល្លត្ថិកាយ និសិន្នស្ស ច វេឋិតសីសស្ស ច ឱគុណ្ឋិតសីសស្ស ច ឆមាយំ និសីទិត្វា អាសនេ និសិន្នស្ស ច នីចេ អាសនេ និសីទិត្វា ឧច្ចេ អាសនេ និសិន្នស្ស ច ឋិតានិសិន្នស្ស ច បច្ឆតោ គច្ឆន្តា បុរតោ គច្ឆន្តស្ស ច ឧប្បថេន គច្ឆន្តា បថេន គច្ឆន្តស្ស ច ធម្មំ ទេសេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – អនាទរិយំ អាវុសោ បដិច្ច ឋិតេន ឧច្ចារំ វា បស្សាវំ វា ករោន្តស្ស ច ហរិតេ វា ឧទកេ វា ឧច្ចារំ វា បស្សាវំ វា ខេឡំ វា ករោន្តស្ស ច ទុក្កដំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ ឆព្ពគ្គិយេវ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ឋិតា ឧច្ចារម្បិ បស្សាវម្បិ អកំសុ, តេយេវ ភន្តេ ឆព្ពគ្គិយា ភិក្ខូ ហរិតេបិ ឧទកេបិ ឧច្ចារម្បិ បស្សាវម្បិ ខេឡម្បិ អកំសុ, តស្មិំ ភន្តេ វត្ថុស្មិំ បញ្ញត្តំ.