២. កោសិយវគ្គ ៤. ឆព្ពស្ស សិក្ខាបុច្ឆា

បុច្ឆា – យំ តេន អាវុសោ ភគវតា…បេ… សម្មាសម្ពុទ្ធេន អនុវស្សំ ការាបេន្តស្ស និស្សគ្គិយំ បាចិត្តិយំ កត្ថ បញ្ញត្តំ.

វិស្សជ្ជនា – សាវត្ថិយំ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សម្ពហុលេ ភន្តេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អនុវស្សំ សន្ថតំ ការាបេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ ឯត្ថ កោចិ វិរទ្ធទោសោ.

វិស្សជ្ជនា – នត្ថិ ភន្តេ.

សំគាយនត្ថាយ សង្ឃស្ស ញាបនំ

សុណាតុ មេ ភន្តេ សង្ឃោ, អហំ អាយស្មន្តំ វិចិត្តសារាភិវំសំ តិបិដកធរ ធម្មភណ្ឌាគារិកំ ឥមេសំ និស្សគ្គិយបាចិត្តិយសិក្ខាបទានំ យាវ ឆព្ពស្សសិក្ខាបទំ និទានាទីនិ បុច្ឆិតព្ពានិ អនេកានិ ឋានានិ បុច្ឆិំ, បុដ្ឋោបុដ្ឋោ ច សោ អាយស្មា វិចិត្តសារាភិវំសោ វិស្សជ្ជេសិ, ឥតិហិទំ ភន្តេ ឥមានិ សិក្ខាបទានិ និម្មលានិ សុបរិសុទ្ធានី តស្សេវ ភគវតោ វចនានិ អរហតោ សម្មាសម្ពុទ្ធស្ស, តស្មា យថាបុរេ មហាកស្សបាទយោ មហាថេរវរា បោរាណសំគីតិការា ព្រហ្មចរិយស្ស ចិរដ្ឋិតិយា ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ ធម្មវិនយំ សំគាយិំសុ ចេវ អនុសំគាយិំសុ ច, ឯវមេវ មយម្បិ ទានិ សព្ពេវ ឆដ្ឋសំគីតិ មហាធម្មសភា បរិយាបន្នា ឆព្ពស្ស និស្សគ្គិយ សិក្ខាបទតោ បដ្ឋាយ ឥមានិ និស្សគ្គិយសិក្ខាបទានិ ឯកតោ គណសជ្ឈាយំ កត្វា សំហាយេយ្យាម.