៨. សហធម្មិកវគ្គ, ១. សហធម្មិក សិក្ខាបុច្ឆា

បុច្ឆា – ភិក្ខូហិ អាវុសោ សហធម្មិកំ វុច្ចមានេន ន តាវាហំ អាវុសោ ឯតស្មិំ សិក្ខាបទេ សិក្ខិស្សាមិ, យាវ ន អញ្ញំ ភិក្ខុំ ព្យត្តំ វិនយធរំ បរិបុច្ឆិស្សាមីតិ ភណន្តស្ស បាចិត្តិយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – កោសម្ពិយំ ភន្តេ អាយស្មន្តំ ឆន្នំ អារព្ភ បញ្ញត្តំ, អាយស្មា ភន្តេ ឆន្នោ ភិក្ខូហិ សហធម្មិកំ វុច្ចមានោ ន តាវាហំ អាវុសោ ឯតស្មិំ សិក្ខាបទេ សិក្ខិស្សាមិ, យាវ ន អញ្ញំ ភិក្ខុំ ព្យត្តំ វិនយធរំ បរិបុច្ឆិស្សាមីតិ ភណិ, តស្មិំ ភន្តេ វត្ថុស្មិំ បញ្ញត្តំ.