៦. សុរាបានវគ្គ, ៧. នហាន សិក្ខាបុច្ឆា

បុច្ឆា – ឱរេនទ្ធមាសំ អាវុសោ នហាយន្តស្ស បាចិត្តិយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – រាជគហេ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ រាជានម្បិ បស្សិត្វា ន មត្តំ ជានិត្វា នហាយិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ ឯត្ថ កោចិបិ វិរុទ្ធទោសោ.

វិស្សជ្ជនា – នត្ថិ ភន្តេ.

សុណាតុ មេ ភន្តេ សង្ឃោ…បេ… សំគាយេយ្យាម.

បុច្ឆា – យំ តេន អាវុសោ…បេ… សម្មាសម្ពុទ្ធេន អនាទិយិត្វា តិណ្ណំ ទុព្ពណ្ណករណានំ អញ្ញតរំ ទុព្ពណ្ណករណំ នវំ ចីវរំ បរិភុញ្ជន្តស្ស បាចិត្តិយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អត្តនោ ចីវរំ ន សញ្ជានិំសុ, តស្មិំ ភន្តេ វត្ថុស្មិំ បញ្ញត្តំ.